Talagsaong Gasa sa Kabataan

ANG tim-os nga mga pahayag sa mga bata kadaghanan magkapaugnok ug makapahunahuna sa mga hamtong. Sa usa ka okasyon, sa pagkakitang gihimo ni Jesus ang pipila sa iyang mga milagro, ang mga batang lalaki misugod sa pagsinggit: “Luwasa kami, kami nagapangamuyo, Anak ni David!” Ang relihiyosong mga pangulo misupak niini. Kay nabutaan sa kasina, wala sila makaila nga si Jesus mao ang Mesiyanikong kaliwat ni Haring David. Apan gitubag sila ni Jesus ug miingon: “Wala ba kamo makabasa niini, ‘Gikan sa baba sa mga bata ug sa mga masuso [ang Diyos] nagtagana ug pagdayeg’?” (Mateo 21:15, 16) Karong adlawa, ang Diyos nagagamit gihapon “sa baba sa mga bata” sa pagtabang niadtong kansang mga hunahuna gibutaan sa bakak nga pagtulon-an.​—2 Corinto 4:4.

◻ Si Daleen, edad 12, nakitang kasaligang batang babaye sa tunghaan. Usa ka adlaw giasayn siya nga himoong puliki ang klase samtang nagbuhat ang iyang magtutudlo ug laing trabaho. Unsay iyang buhaton? “Mihukom ako sa pagsaysay ngadto sa akong mga klasmet nga ang mga tawong matarong magapuyo sa walay kataposan sa yuta ug ang tanan dili moadto sa langit,” matud ni Daleen. Uban sa pagtugot sa magtutudlo, gipresentar ni Daleen ang iyang impormasyon ngadto sa klase sa dagway sa usa ka pakigsulti uban sa misugot nga klasmet. Gibasa niya ang ubay-ubay nga kasulatan, apil ang Salmo 37:29: “Ang mga matarong mismo magapanunod sa yuta, ug sila magapuyo niini sa walay kataposan.” Unsa ang sanong? “Ang magtutudlo mihunong sa iyang trabaho ug namatig maayo sama sa mga bata,” matud ni Daleen. “Human niadto ako iyang gipasalamatan, ug ang pila ka bata may mga pangutana.”

◻ Si Lillian, edad 5, ug ang iyang mga ginikanan nagpuyog 12 milya (19 km) gikan sa gamayng lungsod sa South Africa diin sila kanunayng nagtambong sa mga tigom ug nagbuhat sa balay-balay nga pagsangyaw. Usa ka Dominggo, tungod sa usa ka kadaot sa sakyanan, gihukom sa iyang mga ginikanan nga dili molakaw. “Nganong dili man kita mosangyaw?” nangutana si Lillian. Kay wala matagbaw sa katarongan, siya miingon: “Dili ako magpapugong niana.” Sa ulahi ang inahan nakamatikod nga si Lillian ug ang iyang bag alang sa pagsangyaw wala na. Ang gamayng bata napuliki sa pagduaw sa mga balay sa duol, nga nanghatag ug basahon sa Bibliya​—apil ang personal nga Bibliya sa iyang inahan! Usa ka tigulang nga babaye nakadayeg kaayo sa katin-awan ni Lillian mahitungod sa umaabot nga Paraiso nga gidawat niya sa ulahi ang tanyag sa pagtuon sa Bibliya gikan sa inahan ni Lillian. Kining bayhana sa kataposan nahimong dedikadong magsisimba ni Jehova.

Oo, ang Diyos nagagamit gihapon sa “baba sa mga bata” sa pagtaganag pagdayeg. Ang ilang sinseridad makatandog nga lalom sa mga kasingkasing sa hamtong. Nan, tukmang ang mga bata uban sa mga hamtong naapil sa talagsaong pagdapit: “Dayega ninyo si Jehova gikan sa yuta, . . . kamong mga batan-ong lalaki ug kamong mga ulay usab, kamong mga tigulang lalaki uban ang mga batang lalaki. Ipapagdayeg nila ang ngalan ni Jehova, kay ang iyang ngalan lamang maoy hataas uyamot.”​—Salmo 148:7, 12, 13.