Mga Estudyante Mingsalmot sa Adlaw sa Nasodnong Kasaysayan

ANG mga panawag sa telepono misugod sa pag-abot sa hedkuwarter sa kalibotan sa mga Saksi ni Jehova sa New York niadtong Abril 1991. Sila naggikan sa mga batan-on nga naghimog mga proyekto sa panukiduki bahin sa mga Saksi.

Kada tuig sa Tinipong Bansa, ingong bahin sa programa sa Adlaw sa Nasodnong Kasaysayan, ang mga estudyante gikan sa grado 6 hangtod 12 mosalmot sa gipasiugda-sa-eskuylahan nga mga bangga mahitungod sa usa ka tinuig nga tema. Ang tema karong tuiga, “Mga Katungod sa Kasaysayan,” nalangkit sa ika-200 anibersaryo sa Pahayag sa mga Katungod sa T.B. Gitagana ang usa ka listahan sa may-kalangkitan nga impormasyon sa pagtabang sa mga estudyante sa pagpilig usa ka ulohan nga han-ayon.

Mga 500,000 ka estudyante mingsalmot sa pito ka kategoriya sa bangga. Makaiikag alang sa mga Saksi ni Jehova mao ang mga salmot sa pila ka otso-grado nga sa kataposan maoy mga mananaog sa ilang mga estado ug sa ulahi mihimo sa ilang mga presentasyon didto sa Washington, D.C.

Duha ka 14-anyos nga mga batang babaye nga taga-Pennsylvania, si Nicole DiSalvo ug si Gwen Naglak, nga dili mga Saksi ni Jehova, mipili sa duha ka kaso sa pagsaludar ug bandera nga naglangkit sa mga Saksi sa katuigang 1940. Sa ilang panukiduki, nakigsulti sila niadtong nalangkit sa mga kasong Minersville School District v. Gobitis ug West Virginia Board of Education v. Barnette, ug sila miduaw sa hedkuwarter sa kalibotan sa mga Saksi ni Jehova aron masayod ug dugang mahitungod sa mga tinuohan sa mga Saksi.a

Usa ka Binaba nga Presentasyon

Gipresentar ni Nicole ang binaba nga pasundayag nga nag-ulohang “Ang Kaisog sa Paglingkod.” Iyang gihulagway si Lillian Gobitas ug gipabuhi ang mga pagbati ug kaisog sa nagtungha pang si Lillian samtang giasoy niya ang personal nga desisyon ni Lillian nga dili mosaludar sa bandera bisan pag giayran sa iyang mga kauban sa tunghaan. Iyang gipahayag ang kalipay ni Lillian sa pagkadaog matag lakang sa legal nga palakaw nga misangpot sa Korte Suprema sa 1940. Nga misul-ob ug itom taas nga biste sa paghulagway sa usa ka huwes sa Korte Suprema, iyang gipahayag ang opinyon sa Korte batok kang Gng. Gobitas. Bisan pag pildi ang kaso, gipasa ni Nicole ang hugot nga pagtuo ni Lillian nga ang iyang desisyon mao ang matarong alang kaniya.

Usa ka Sinulat nga Presentasyon

Ang komposisyon ni Gwen Naglak, “Usa ka Nasod Ubos sa Diyos,” nag-analisar sa kahimtang sa kalibotan sa 1935 ug sa kamatuoran nga ang mga Saksi ni Jehova midumili sa pagsaludar sa bandera. Gibati sa magbabasa ang epekto niini sa dihang nahauna si William, 10 anyos, ug dayon si Lillian, 12 anyos, gipalagpot sa eskuylahan.

Sa mga kaso sa korte nga misunod sa ilang pagkapalagpot sa Pennsylvania, ang tanang huwes mihukom pabor sa pamilyang Gobitas. Bisan pa, gidala sa hunta sa eskuylahan ang kaso ngadto sa Korte Suprema. Didto, sa Hunyo 3, 1940, ang Korte mihukom batok sa mga Gobitas. Usa ka resulta mao nga libolibong pag-abusar ang gipahamtang diha sa mga Saksi ni Jehova. Dayon gisubay ni Gwen ang mga hitabo ngadto sa desisyon sa Korte Suprema niadtong 1943, sa dihang gibalit-ad sa Korte ang desisyon sa 1940.

Sa iyang konklusyon, si Gwen misulat: “Gidayeg ko si Lillian ug si William tungod sa pagbatog kaisog sa pagbuhat kon unsay gibati nila nga matarong ug pagpakig-away dapig sa ilang mga tinuohan. Sa akong mga mata, sila mao ang tinuod nahigugma sa ilang nasod.”

Usa ka Kahimoan Ingong Grupo

“Usa ka Balaang Sugo, Usa ka Katungod Sumala sa Batakang-Balaod,” mao ang titulo sa usa ka kahimoan ingong grupo sa duha pa ka laing tag-otso grado, si Robert Young ug si Stacey Wright, nga taga-Virginia, nga pulos Saksi ni Jehova. Gihulagway ni Robert ang usa ka reporter sa peryodiko nga nag-interbiyo kang Lillian Gobitas, nga gihulagway ni Stacey.

Si Robert ug Stacey, uban sa pagdumala sa ginikanan, mibiyaheg kapin ug 4,000 kilometros nga nangitag impormasyon alang sa ilang proyekto. Apil sa ubang mga kasayoran, gipadayag sa ilang panukiduki nga ang pagsaludar ug bandera sa Tinipong Bansa nagsugod sa ika-19ng siglo. Ug sila natingala sa pagkahibalo nga si George Washington misupak sa mga panumpa sa pag-unong sa nasod sa usa.

Kadtong tanan nga batan-on nakapabili nga mas bug-os pa sa mga pulong ni Propesor C. S. Braden, si kinsa, diha sa iyang librong These Also Believe, miingon mahitungod sa mga Saksi ni Jehova: “Nahimo nila ang usa ka halandumong serbisyo sa demokrasya tungod sa ilang pakigbisog sa pagpreserbar sa ilang mga katungod sibil, tungod kay sa ilang pakigbisog dako ang ilang nahimo sa pagtino sa maong mga katungod alang sa matag minoriyang grupo sa Amerika.”

[Footnote]