Espiritismo—Nganong Midako ang Kaikag Niini?
SI Frans maoy usa ka haligi sa lokal Protestanteng simbahan. Kon may buluhaton sa simbahan, siya ang unang motabang. Si Wilhelmina mahadlokon usab sa Diyos. “Kinahanglan kang mosimba,” matud niya, ug siya nagasimba. Si Ester regular usab nga nagasimba ug dili niya palabyon ang usa ka adlaw nga dili mangadye. Kanang tulo duna pay butang gikahiusahan: Sila mga espiritista usab o mga medyum.
Kining tulo ka molupyo sa Suriname wala mag-inusara. Sa tibuok kalibotan, adunay misulbong nga kaikag sa espiritismo. Palandonga: Sa Tinipong Bansa lamang, mga 30 ka magasin nga may giipong sirkulasyon nga kapin ug 10,000,000 gideboto sa nagkalainlaing natad sa espirituhanong mga katingalahan. Ang gibanabanang 2,000,000 ka tawo sa Inglaterra maikagon sa mao mismong ulohan. Ang usa ka bag-ong surbi sa Netherlands nagpakitang ang mga motuo sa labaw-kinaiyanhong mga panghitabo hikaplagan taliwala sa mga molupyo sa dagkong siyudad, sa edukado kaayong mga tawo, ug sa mga batan-on. Dugang pa, sumala sa kapamatud-an sa mga molupyo sa Aprika, Asia, ug Latin Amerika, sa daghang nasod ang espiritismo nahimong dimalaksing bahin sa adlaw-adlawng kinabuhi. Dili katingalahang ang mga magsusulat si John Weldon ug Clifford Wilson mihinapos diha sa ilang librong Occult Shock and Psychic Forces: “Ang nagkadaiya kaayong mga komentarista daw mibati nga kita anaa sa panahon sa walay-ingong pagkabanhaw sa okulto.”
Oo, ang espiritismo ug ang okulto—diha sa dagway sa astrolohiya, hipnotismo, parasikolohiya, extrasensory perception, mahiko, paghubad sa mga damgo, ug uban pa—nagadani sa mga tawo gikan sa tanang kahimtang sa kinabuhi. Ngano?
Sa usa ka butang, gikonsentir ug giaprobahan pa sa pila ka simbahan sa Kakristiyanohan ang espiritismo. Sila nagsugyot nga ang pagkontak sa mga espiritu maoy lain rang paagi sa labawng pagpaduol sa Diyos.
Ingong pananglitan, palandonga si Izaak Amelo, usa ka 70-anyos nga negosyante sa Suriname. Sa pito ka tuig siya tinahod nga membro sa konsilyo sa simbahan ug iladong medyum sa samang panahon. Siya nahinumdom: “Kada Sabado ang tibuok nga konsilyo sa among simbahan magtigom sa gawas sa balangay aron mokonsulta sa mga espiritu. Ipadayon namo kana sa tibuok gabii. Sa pagkabuntag na, ang deakono ang magbantay sa iyang relo, ug sa mga alas singko, siya mosenyas kanamo sa paghunong. Unya kami maligo, mag-ilis sa sinina, ug mopadulong sa simbahan—nga igong makaabot sa oras sa buntagong pagsimba sa Dominggo. Niadtong tanan nga katuigan ang pastor wala gayod molitok sa usa ka pulong sa pagsupak.”
Tapos sa pagtuon sa koneksiyon tali sa espiritismo ug sa mga simbahan sa Suriname, ang Olandes nga Propesor R. van Lier nagpamatuod nga giisip sa daghan ang espiritismo ingong “suplementaryong relihiyon.” Sa usa ka pagtuon nga gipatik dili pa dugay sa Leiden University, siya miingon usab nga ang espiritismo giilang “usa ka bahin sa haluag nga konstitusyon sa relihiyon diin kini nagabarog tapad sa Kristiyanidad.”
Apan tingali mahibulong ka, ‘Ang pagdawat ba sa mga simbahan sa Kakristiyanohan sa espiritismo usa ka pasalig nga kini giuyonan sa Diyos? Ang pagkontak ba sa mga espiritu labaw pang mopaduol kanimo kaniya? Unsa gayod ang ginaingon sa Bibliya mahitungod sa espiritismo?’
[Hulagway sa panid 3]
Si Izaak Amelo nahinumdom nga ang tibuok konsilyo sa simbahan miapil sa mga sesyon sa espiritismo