Espiritismo—Unsay Pag-isip sa Diyos?

“ANG pag-angay ug dili pag-angay sa samang mga butang, kini ang mohimo sa lig-ong panaghigala,” matud sa Romanong historyanong si Sallust. Sa pagkamatuod, ang usa ka higala mao ang tawo nga labing daghan kag gikahiusahan, usa ka tawong imong kapiyalan. Sa samang paagi, ang Diyos nagatan-aw kanato ingong mga higala ug nagatugot nga kita labi pang maduol kaniya kon atong maangayan ug dili maangayan ang mga butang usab nga iyang maangayan ug dili maangayan. Kini nagkahulogang kita madani sa mga hiyas sa Diyos sama sa gugma, pakigdait, kalulot, ug pagkamaayo, ug naningkamot pag-ayo sa pagsundog niining mga hiyasa diha sa atong kinabuhi.​—Galacia 5:22, 23.

Nan, sa pagsusi kon giuyonan ba sa Diyos ang espiritismo, ato unang masusi ang mga bunga niini. (Mateo 7:17, 18) Motabang ba kini nato sa pag-ugmad niining makapadaning diyosnong mga hiyas? Sa pagsusi, atong tan-awon ang duha ka pananglitan sa tinuod nga kinabuhi.

Pagtagna, Paghasi, ug Kamatayon

Si Asamaja Amelia, usa ka edarang babaye sa Suriname, maoy 17 anyos pa sa una niyang pagkalangkit sa pagtagna, usa ka dagway sa espiritismo. Sanglit ang iyang mga panagna nangatuman ug ang mga nagpatagna nakapulos sa iyang tambag, siya tinahod kaayo sa iyang komunidad. (Itandi ang Buhat 16:16.) Apan may butang nakapalibog kaniya.

“Ang mga espiritu nga nagsulti pinaagi kanako maluluton niadtong nangita sa ilang tabang,” matud niya, “apan sa samang panahon sila naghimo sa akong kinabuhi nga masulob-on. Tapos sa matag sesyon, bation kong gibun-og ug halos dili makalihok. Inigtikyop sa kagabhion, ako maglaom nga makapahulay, apan ako samokon sa mga espiritu. Kanunay nila akong disturbohon, nga makigsulti kanako ug ako dili pakatulogon. Ug ngil-ad kaayo ang ilang gipamulong!” Siya nangagho ug miduko, nga nagpanglingolingo sa kawala-makaangay. “Gusto nilang mohisgot bahin sa sekso ug mopugos nga makigsekso kanako. Kadto makalilisang. Ako minyo. Dili ko buot magmaluibon ug gisultihan ko sila niana. Kana wala makatabang. Sa makausa ako gidaog sa dili-makitang puwersa, gihikap ug gipiga ang akong lawas, ug ako gipaak pa. Gibati ko ang kangil-ad.”

‘Mga espiritu nga nagadasig sa seksuwal nga imoralidad? Kana halayo kaayo!’ tingali mopatugbaw ka. Tinuod bang ingon ka daotan ang maong mga espiritu?

“Labi pang daotan!” matud ni Izaak, nga gihisgotang unauna. “Usa ka gabii kami gipatawag sa pagtabang sa usa ka babayeng masakiton nga gisamok sa usa ka espiritu. Ang lider sa grupo​—ang medyum sa mas kusgang espiritu​—misulay sa pagpalayas sa espiritu. Sa tibuok adlaw kami nangaliyupo alang sa tabang sa iyang espiritu. Kami nagsayawsayaw ug nagbasal sa mga bombo, ug inanay naarang-arang ang babaye. Gisugo ang espiritu sa paggula, ug kadto misaler. ‘Kita ang nakadaog,’ mipahiyom ang lider. Unya kami nanglingkod ug namahulay.”

Ang gawarawarang mga bukton ni Izaak mipahulay sa kadiyut samtang mihunong siyang makahuloganon. Dayon siya mipadayon: “Sa kadiyut ang tanan daw maayo, apan unya ang kahilom gibuak sa usa ka singgit. Kami mingdali sa pag-adto sa balay nga gigikanan niana ug among nakita ang asawa sa lider. Siya natarantar sa paghinilak. Sulod sa balay, among nakit-an ang iyang batang babaye​—ang iyang ulo nabalit-ad! May puwersang nagtuok ug naglunggo sa iyang liog, nga nagpatay kaniyang samag manok​—dayag, kadto ang panimalos niadtong gipalagpot nga espiritu. Makalilisang! Kadtong mga espirituha maoy pintas nga mga mamumuno.”

Espiritismo ug “ang mga Buhat sa Unod”

Ang kahugawan, seksuwal nga imoralidad, ug pagbuno​—nga nahitabo niining duha ka kasinatian uban sa espiritismo​—maoy mga hiyas nga laktud supak sa personalidad sa Diyos. Ug kana motabang nato sa pag-ila kon kinsa gayod ang maong mga espiritu. Sila tingali magpakaaron-ingnong mga mensahero sa Diyos, apan ang ilang imoral ug mopatayng mga buhat nagapadayag nga sila mga manunundog sa kaaway sa Diyos ug sa unang mamumuno sa kasaysayan, si Satanas nga Yawa. (Juan 8:44) Siya mao ang ilang lider. Sila mao ang iyang mga katabang​—ang daotang mga manulonda, o mga demonyo.​—Lucas 11:15-20.

Apan tingali mangutana ka: ‘Kini bang Satanasnong mga hiyas motungha sa espiritismo sa tagsa rang mga okasyon? Ang espiritismo ba ingong lagda magpakontak kanako sa maayong mga espiritu nga makatabang nakong labi pang maduol sa Diyos?’ Dili, ang Bibliya nagalista sa “buhat sa espiritismo” uban sa ubang “mga buhat sa unod” nga laktud supak sa Kristohanong mga hiyas.​—Galacia 5:19-21.

Sa Pinadayag 21:8 “kadtong nagabuhat sa espiritismo” (“kadtong nagapakigsulti sa mga demonyo,” The Living Bible) gibutang sa samang kategoriya “niadtong walay pagtuo ug niadtong dulumtanan sa ilang kahugawan ug mga mamumuno ug mga makihilawason . . . ug mga tigsimbag diyosdiyos ug tanang bakakon.” Unsay pag-isip ni Jehova sa tinuyong mga bakakon, mga makihilawason, mga mamumuno, ug mga magbubuhat sa espiritismo? Gidumtan niya ang ilang mga binuhatan!​—Proverbio 6:16-19.

Busa, ang pag-usisa sa espiritismo motumbas sa paghigugma sa gidumtan ni Jehova nga Diyos. Kini nahisama sa pagsalikway kang Jehova, pagkaanaa sa kampo ni Satanas, ug pagdapig sa labawng kaaway sa Diyos ug iyang mga katabang. Karon palandonga kini: Buot ba nimong masuod sa usa ka tawong dapig sa imong mga kaaway? Siyempre dili. Hinunoa, ikaw magpahilayo nianang tawhana. Nan, dayag nga kita makalaom sa samang reaksiyon gikan kang Jehova nga Diyos. Ang Proverbio 15:29 nagaingon, “Si Jehova halayo sa mga daotan.”​—Tan-awa usab ang Salmo 5:4.

Espiritismo Mosangko sa Kamatayon

Ang paglingawlingaw sa espiritismo makapameligro usab sa kinabuhi. Giisip kini sa Diyos ingong usa ka hinungdan sa silot nga kamatayon taliwala sa iyang katawhan sa karaang Israel. (Levitico 20:27; Deuteronomio 18:9-12) Busa dili angay katingalahan nga ang mga mamumuhat sa espiritismo “dili magapanunod sa gingharian sa Diyos.” (Galacia 5:20, 21) Hinunoa, “ang ilang bahin maoy sa linaw nga nagadilaab sa kalayo,” nga nagkahulogan sa “ikaduhang kamatayon,” o kalaglagang walay kataposan. (Pinadayag 21:8) Tinuod, karong adlawa ang pila ka simbahan sa Kakristiyanohan tingali motugot sa espiritismo, apan ang hunahuna sa Bibliya wala mausab.

Unsa man kon imo nang nakuha ang unang mga tikang subay sa dalan sa espiritismo? Nan maayong mohunong ka dayon ug moliso. Sunda ang balaan dinasig nga tambag nga gihatag sa propeta sa Diyos si Isaias ngadto sa mga Israelinhon sa kakaraanan. Ang ilang kahimtang susama sa iya sa katawhan karong adlawa nga nagabuhat sa mahugawng mga buhat apan nagahunahunang sila nagasimba sa Diyos sa samang panahon. Busa, adunay bililhong mga leksiyon sa ilang kasinatian. Unsang mga leksiyona?

Pamatii ang Pasidaan ni Isaias

Ang paglantaw sa unang kapitulo sa Isaias nagapakitang ang mga Israelinhon “namiya kang Jehova” ug “nanibog.” (Bersikulo 4) Bisan tuod sila nangasalaag, sila padayong nagtanyag ug mga halad, nagtuman sa relihiyosong mga saulog, ug nagtanyag sa mga pag-ampo. Apan kawang lamang! Sanglit kulang silag tinguha sa kahiladman nga pahimut-an ang ilang Maglalalang, si Jehova miingon: “Akong tagoan ang akong mga mata gikan kaninyo. Bisan pag inyong himoon ang daghang pag-ampo, ako dili mamati.” Kadtong mga Israelinhon mingrebelde batok kaniya pinaagi sa pagbuhat sa mahugawng mga buhat, bisan sa puntong ‘gipuno ang ilang mga kamot sa inula nga dugo.’​—Bersikulo 11-15.

Ubos sa unsang mga kahimtang dawaton sila pag-usab ni Jehova? Matikdi ang mga kinahanglanon nga gipahayag sa Isaias 1:16. Siya miingon: “Panghinlo kamo; hinloi ninyo ang inyong kaugalingon.” Busa kon atong dawatong maugdang kanang tambaga, kita mohunong o molikay sa mahugawng mga buhat, apil ang espiritismo, nga usa sa “mga buhat sa unod.” Sanglit kita nasayod nga ang daotang kaisipan luyo sa espiritismo mao ang iya ni Satanas nga Yawa, atong ugmaron ang pagdumot niana.

Unya atong wagtangon ang tanang butang konektado sa espiritismo. Kana ang gibuhat ni Izaak. Siya miingon: “Usa ka adlaw akong gitapok ang tanan kong galamiton sa espiritismo atubangan sa akong balay, gikuha ang atsa, ug giputolputol kadto. Ang akong silingan misinggit nga pagabasolan ko ang akong gibuhat. Samtang siya nagsinggit, akong gibuboag gasolina ang mga pinutol ug gisunog ang tanan. Walay nahibilin.”

Kadto 28 anyos kanhi. Gibasolan ba ni Izaak ang iyang gibuhat? Sa kasukwahi. Karong adlawa, siya malipayong nagaalagad kang Jehova ingong Kristohanong ministro sa usa sa mga kongregasyon sa mga Saksi ni Jehova.

Ang Isaias 1:17 nagahatag niining dugang tambag: “Pagtuon sa pagbuhat ug maayo.” Kana nagkinahanglan sa pagtuon sa Pulong ni Jehova, ang Bibliya, aron matuki kon unsa “ang maayo ug dalawaton ug hingpit nga kabubut-on sa Diyos.” (Roma 12:2) Ug ang pagpadapat nianang bag-ong-kaplag nga kahibalo mosangpot sa makapahupayng mga panalangin. Kini ang nadiskobrehan ni Asamaja.

Bisan pa sa mapait nga pagsupak sa mga paryente ug mga silingan, maisogong nagtuon si Asamaja sa Bibliya uban sa mga Saksi ni Jehova ug sa wala madugay human niana mibulag sa espiritismo. Unya gipahinungod niya ang iyang kinabuhi kang Jehova nga Diyos ug nabawtismohan panahon sa usa ka asembliya. Karon, mga 12 ka tuig sa ulahi, siya mapasalamatong miingon: “Sukad sa akong bawtismo, ako wala na samoka sa mga espiritu.” Ug siya nahinumdom uban ang pahiyom: “Sa gabii pagkatapos sa akong bawtismo, hinanok kaayo ang akong pagkatulog ug wala matugaw nga ako naulahi alang sa programa sa asembliya pagkaugma.”

Malungtarong mga Kaayohan

Karong adlawa, si Izaak ug Asamaja kinasingkasing makaingon uban sa salmistang si Asap: “Ang pagpaduol sa Diyos maayo alang kanako.” (Salmo 73:28) Sa pagkamatuod, ang pagpaduol kang Jehova naghatag kanilag lawasnon ug emosyonal nga mga kaayohan. Apan labaw sa tanan, kana naghatag kanilag kalinaw sa kahiladman ug suod nga relasyon uban kang Jehova.

Ang maong mga panalangin molabaw kaayo sa kasakit ug pakigbisog nga gikinahanglan sa pagsalikway sa yugo sa espiritismo. Ang pagbulag, hinuon, mahimong mapait nga kasinatian. Si Lintina van Geenen, usa ka babayeng taga-Suriname, nakasinati niana. Sa sunod, atong tan-awon sa unsang paagi siya nakigbisog sa daghang mga tuig ug sa kataposan nagmalamposon.

[Hulagway sa panid 5]

Si Asamaja Amelia misugid: “Ang mga espiritu . . . naghimo sa akong kinabuhi nga masulob-on. . . . Ug ngil-ad kaayo ang ilang gipamulong!”