Pagpalagpot sa Yugo sa Espiritismo
NAHIAGOMAN sa akong pamilya ang katalagman sa dihang ako dalagita pa nga 14 anyos. Niadtong panahona, ang usa ka mapintasong mamumuno nagsugod sa pagpatay sa akong mga paryente. Ang una niyang mga biktima mao ang mga anak sa akong igsoong babaye—siyam silang tanan. Unya iyang giatake ang iyang bana. Wala madugay tapos niadto, iyang gipatay usab ang usa sa akong mga igsoon. Upat pa sa akong mga igsoong lalaki ug babaye ang misunod, hangtod nga ang nahibilin na lamang mao ang akong inahan ug ako. Ay, dako gayod kaayo ang akong kalisang!
Sa sunod nga mga tuig, ako nagkaon, nagtrabaho, ug natulog sa kahadlok sa matag adlaw. Ako naghunahuna: ‘Kanus-a kaha siya moatake? Ug kinsa ba unya ang isunod—si Mama o ako?’
Akong Kagikan
Sa pagtabang kanimo nga hisabtan ang nahitabo human niadto, pasugira ako sa akong kagikan. Niadtong 1917, ako natawo ingong sakop sa tribong Paramaccaner Bush-Negroe sa usa ka pulo sa Subang Maroni sa Suriname. Ang akong mga katigulangan maoy den lowenengre, o nanglayas nga mga ulipon, kinsa mikagiw ngadto sa lasang aron mangabuhi sa pait apan may-kagawasang kinabuhi. Aw, sa pagkamatuod kadto usa ka kinabuhi nga nahigawas sa pagkaulipon sa mga tawo apan wala mahigawas sa mga demonyo.
Sa among balangay ang matag-adlawng kinabuhi gigamhan sa pagsimba sa demonyo ug katigulangan. Gigamit sa pila ka tawo ang wisi, barang, o sila magpatabang sa koenoe (litokong koo noo), usa ka tiaw aron daoton ang uban ug ipahinabo ang sakit ug pagkamatay sa ilang isigkatawo. Ang maong mga tiaw gituohan nga mao ang mga tawong gidaugdaog sa usa ka sakop sa pamilya. Inigkamatay nila, gituohang sila mobalik sa pamilya aron manimalos. Ugaling, kining maong mga tiaw mao gayod ang daotang mga demonyo nga nagapugos sa mga tawo sa pagsimba kanila.
Ingong sakop sa Evangelical Brother Community, usa ka Protestanteng iglesya, ako may nakat-onan usab bahin sa Diyos. Bisan tuod ako walay alamag kon unsaon sa pagsimba kaniya, ang bagang lasang alirong nako naghatag ug dagayang pamatuod nga siya maayong Magtatagana. ‘Gusto kong mosimba sa usa ka maayong Diyos apan dili sa usa ka daotang espiritu nga magpaantos,’ ako nangatarongan. Ako nasayod nga ang mga tiaw nagakalipay sa pagsakit sa ilang dili-andam nga mga biktima hangtod mamatay.
Dako gayod ang akong kalisang sa akong nasayran nga ang mga kaaway sa among pamilya nagpadalag koenoe kanamo. Ako 14 anyos niadto sa iyang gisugdan ang iyang misyon sa pagpatay. Kawhaag-unom ka tuig sa ulahi, si Mama ug ako na lamang ang nahibilin.
Ang Unang Pakigtagbo
Si Mama kugihan kaayo. Usa ka adlaw, samtang nagbaktas paingon sa iyang umahan, siya natumba ug dili na makabangon. Ang koenoe nagpili sa akong inahan. Naluya ang iyang panglawas ug siya naparalisado. Gikinahanglan niya ang tabang—ang akong tabang. Apan ako nabahin tali sa gugma kaniya ug sa kahadlok sa demonyong nag-atake kaniya. Bisan pa niana, panahon sa mga atake sa koenoe si Mama motiyabaw sa hilabihang kasakit nga ako dili makaantos ug ibutang ko ang iyang ulo sa akong sabakan aron mahupayan. Niana siya mokalma, apan bation kong may “mga kamot” nga nagapiga sa akong lawas.
Sa dihang buot kong mokalagiw, si Mama motiyabaw na usab. Busa tungod kaniya ako nagpabilin ug nag-antos sa una kong makapakurog nga pakigtagbo sa maong mamumuno. Ako niadto 40 anyos.
Migrabeng mga Atake
Si Mama namatay. Tulo ra ka adlaw sa ulahi, nabatian ko ang mahigalaong tingog nga nag-ingon: “Lintina, Lintina, makadungog ka ba kanako? Ako nagatawag kanimo.” Kadto ang sinugdanan sa kagul-anan nga labihan kaayo nga akong gipangandoy ang madaling kamatayon.
Sa sinugdan ako samokon sa demonyo sa dihang ako dayon nang matulog. Sa hapit na akong makatulog, ako pukawon sa tingog, nga maghisgot sa mga lubnganan ug sa kamatayon. Ako naluya tungod sa kakulang sa tulog, bisan pag akong gipadayon ang pag-atiman sa akong mga anak.
Sa ulahi misamot ang mga atake sa demonyo. Sa daghang panahon akong gibati nga daw iya akong gituok. Bisan tuod ako naningkamot nga makalingkawas, ako dili makalingkawas kay ang akong lawas daw gidat-ogan ug bug-at kaayong butang. Buot kong mosinggit apan ako dili makatingog. Bisan pa niana, ako midumili sa pagsimba sa nag-atake kanako.
Sa dihang maulian gikan sa matag atake, akong ipadayon ang pagbaol, pagtanom sa balanghoy ug tubo ug pagbaligya niana sa tiyanggihan sa usa ka gamayng lungsod sa baybay. Hamugaway na ang pangabuhi, apan diha sa unahan ang kinagrabehan kong mga pag-antos.
Pagpangitag Tambal
Usa ka adlaw akong nabatian ang mabaharong tingog sa demonyo nga miingon, “Padakoon ko ang imong tiyan samag bola.” Sa wala madugay, dihay gahing bugon sa akong tiyan nga nagdako hangtod nga ako mabdos nang tan-awon. Kay nahadlok kaayo, ako nahibulong: ‘Ang Diyos kaha, ang Maglalalang, makatabang nako sa pagpadlas sa koenoe? Makapadala ba siyag maayo ug mas kusgang espiritu sa pagpalayas kaniya?’ Sa pagsusi, ako miadto sa usa ka bonoeman, usa ka tambalan.
Ang unang tambalan o witch doctor naghatag kanakog tapoes, o mga anting-anting, apan nagpabilin ang panghupong. Kay determinadong makakitag tambal, ako miadto sa lainlaing bonoeman—ang tanan kawang. Tali nianang mga pagduaw, ako nagpadayon sa pagbaol aron makasapi aron ipalit sa serbesa, bino, champagne, ug mga bahag nga ibayad sa mga tambalan. Ako gitambagan nila sa masubsob: “Lumuhod ka sa koenoe. Hangyoa siya ingong imong agalon. Simbaha siya, ug siya mobiya kanimo.” Apan unsaon nako pagluhod sa usa ka espiritu nga nagsakit kanako ug buot mopatay kanako? Ako dili makaluhod.
Bisan pa niana, kay nawad-ag paglaom akong gituman ang tanang laing butang gisugo kanako sa mga tambalan. Usa kanila nagtambal kanako sulod sa lima ka bulan. Gidigo niya ako sa mga sagbotsagbot ug gipatuloan ang akong mga mata sa duga sa 11 ka nagkalainlaing tanom—“sa pagputli kanila,” siya miingon samtang ako misiyagit sa kahapdos. Apan pagkatapos sa tambal, ako mopauling walay kuwarta, giabusohan, ug labi pang masakiton.
“Kini na ang Imong Kataposan”
Usa sa akong mga anak lalaki, kinsa nagpuyo sa Netherlands, nagpadala kanakog kuwarta aron ipadayon ang pagpangitag tambal. Busa ako miadto sa usa ka medikal doktor sa kaulohan. Tapos sa usa ka pagsusi, siya miingon: “Ako dili makatabang kanimo. Lakaw ug umadto ka sa usa ka bonoeman.” Busa akong gisulayan ang usa ka medyum nga taga East India—apan sa makausa pa wala makatabang. Ako nagpauli na niadto apan igo lang nakaabot sa kaulohan, diin ako nakaabot sa balay sa usa sa akong mga anak babaye. Didto ako gikuyapan—nga walay kuwarta ug masakiton. Sa kawang, akong nagugol ang 17 anyos ug 15,000 guilders ($8,300, U.S.) sa pagpangitag tambal. Ako 57 anyos na niadto.
Sunod, ang demonyo mihulga: “Tapos na ako kanimo. Kini na ang imong kataposan.”
“Apan ikaw dili mao ang Diyos, ikaw dili mao si Jesus,” ako mipatugbaw.
“Bisan ang Diyos dili makapugong kanako,” mitubag ang demonyo. “Inihap na ang imong mga adlaw.”
Ang Kataposang Pakigbisog
Milabay ang pila ka semana. Si Meena, usa ka silingang babaye nga bug-os-panahong ministro sa mga Saksi ni Jehova, nangutana sa akong anak babaye mahitungod sa akong kahimtang ug miingon: “Bibliya lamang ang makatabang sa imong inahan.” Sa pagkadungog sa kabildohay, ako mipaingon kanila. Apan, una pa makaabot kanila ako gilamba sa yuta. Si Meena daling miduol ug miingon: “Kanang demonyoha dili gayod mobiya kanimo. Ang makatabang lamang kanimo mao si Jehova, wala nay lain.” Unya siya miampo uban nako kang Jehova nga Diyos ug misugod sa pagduaw kanako. Apan sa sige niyang pagduaw kanako, labi pang pintas ang mga atake sa demonyo. Sa magabii, mangurog ug kusog kaayo ang akong lawas nga walay mausa sa balay ang makatulog. Ako wala na mokaon ug may mga gutlong ako bug-os nawad-an sa maayong pangisip.
Ang akong kahimtang migrabe kaayo nga ang akong mga anak lalaki nangabot gikan sa interyor aron ako dad-on ngadto sa akong balangay aron didto mamatay. Kay luya kaayo nga mobiyahe, ako wala mosugot. Apan kay mibating nagkaduol na ang kamatayon, akong gitawag ang Saksi aron manamilit. Si Meena mipatin-aw gikan sa Bibliya nga bisan pag ako mamatay, adunay paglaom sa pagkabanhaw.
“Pagkabanhaw? Unsay imong ipasabot?”
“Ang Diyos makabanhaw kanimo ngadto sa kinabuhi sa Paraiso,” siya mitubag. Usa ka silaw sa paglaom!
Apan niadtong gabhiona mismo ang demonyo miatake kanako. Nga napunawan, daw akong nakita ang koenoe nga gisunod sa usa ka panon sa mga tawo. Siya mibiaybiay: “Siya nagahunahunang siya banhawon.” Dayon ang panon nangatawa ug nangatawa. Apan unya ako may gihimo nga wala nako sukad mahimo. Ako mitawag: “Jehova! Jehova!” Kana lamang ang akong nasayran nga akong gisulti. Ug ang demonyo mipahawa!
Ang akong mga anak lalaki nangabot na usab ug mihangyo: “Mama, ayaw pagpakamatay sa siyudad. Itugot nga dad-on ka namo ngadto sa imong balangay.” Ako wala mosugot, kay buot ko nga makakat-on ug dugang bahin kang Jehova. “Buweno, tingali mamatay gihapon ako,” ako silang giingnan, “apan labing menos nianang panahona ako makaalagad na sa Maglalalang.”
Samag Malig-ong Torre
Si Meena ug ang ubang Saksi mipadayon sa pagduaw kanako. Gitudloan nila ako sa pag-ampo kang Jehova. Apil sa ubang mga butang, ako ilang gisuginlan bahin sa isyu tali ni Jehova ug ni Satanas ug sa unsang paagi gipahamtang sa Yawa ang pag-antos diha kang Job aron iyang isalikway ang Diyos. Ang pagkasayod niining mga butanga naglig-on sa akong kombiksiyon nga dili gayod mosimba sa demonyo. Gibasa sa mga Saksi ang usa ka kasulatan nga nahimong mahal kanako: “Ang ngalan ni Jehova maoy usa ka malig-ong torre. Nganha niana ang matarong nagadalagan ug gihatagan sa panalipod.”—Proverbio 18:10.
Sa inanay nahibalik ang akong kusog. Sa nahibalik ang akong anak lalaki, gisultihan ko siya sa paghulat sa gawas. Ako nag-ilis ug gipailadman ko ang akong blusa sa akong palda aron ipakitang hapit nang mawala ang akong panghubag. Unya ako migawas.
“Kini ba si Mama Lintina?” ang akong anak lalaki mipatugbaw.
“Oo, ako kini—salamat kang Jehova, ang akong Diyos!”
Akong Pagbarog
Sukad sa gutlo nga ako makalakaw nag diyutay, ako miadto sa Kingdom Hall sa mga Saksi ni Jehova. Didto ako nakadawat ug dako kaayong pagdasig gikan sa mga higala nga wala na gayod ako mohunong sa pagtambong sa mga tigom. Pila ka bulan sa ulahi, ako mikuyog sa mga Saksi sa buluhaton sa publikong pagsangyaw. Wala madugay tapos niadto, ako nabawtismohan ug nahimong alagad ni Jehova, ang akong mahigugmaong Manluluwas. Ako 58 anyos niadto.
Bisan pa niana, may pagabuhaton pa. Mga tuig nga miagi, didto sa akong payag sa balangay, ako nagbuhat ug halaran aron pagahalaran sa mga halad alang sa akong mga katigulangan. Aron mahimong hinlo sa espirituwal, kinahanglang akong gub-on kana. Nangayo akog tabang kang Jehova, sanglit ang akong aksiyon makapagubot man sa mga tagabalangay. Sa pag-abot nako sa akong payag ug pag-abli sa pultahan, may misinggit: “Pingos!” (Mga bakatin!) Ang usa ka panon mitabok sa pulo ug nanlukso sa suba aron motabok. Dihadiha, gibiyaan sa batag tigulang ang balangay alang sa maong sayon nga dakpon. Sa kalipay, ako miluhod ug nagpasalamat kang Jehova tungod sa maong hitabo. Sa madali, akong giguyod ang halaran sa gawas, gibuboan kanag gasolina ug gisunog. Ang halaran nawala na sa paghibalik sa panon. Siyempre, kadto ilang nasayran, apan wala nay mahimo. Busa, uban ang kalinaw sa hunahuna, ako mibalik sa kaulohan.
Gikan sa Kagul-anan Ngadto sa Kalipay
Dugang panalangin ang miabot kanako. Ang akong anak lalaki sa Netherlands wala motuo sa mga estorya nga iyang nadunggan bahin kanako ug misakayg ayroplano padulong sa Suriname aron iyang makita sa kaugalingon. Siya nalipay kaayo sa pagkakita nga ako himsog nga gipalitan niya akog balay sa kaulohan, diin mao karon ang akong gipuy-an. Dako gayong kausaban ang akong natagamtam—gikan sa walay-kuwartang ulipon sa mga demonyo ngadto sa inatiman-kaayong ulipon ni Jehova!
Napulog-usa ka tuig tapos sa akong bawtismo, ako may dugang pang hinungdan sa pagpasalamat. Kay natandog sa daghang panalangin nga akong nadawat, tulo sa akong mga anak ug usa ka umagad-nga-lalaki nainteresado usab sa kamatuoran sa Bibliya ug sa kataposan nagpahinungod sa ilang kinabuhi kang Jehova nga Diyos. Ug matag karon ug unya, akong iasoy ang akong kasinatian sa demonismo dihang ikuyog ako sa mga igsoong lalaki ug babaye sa pagpakigkita sa ilang mga estudyante sa Bibliya nga kulang ug kaisog sa pagbulag sa mga demonyo. Nianang paagiha bisan kadtong makalilisang nga mga tuig may kapuslanan sa buluhaton sa pagsangyaw sa Gingharian.
Ako nakulangan ug mga pulong aron ipahayag ang akong pasalamat kang Jehova, ang akong Diyos. Segurado, akong nakita ang iyang gamhanang kamot alang kanako. Sa pagkamatuod, si Jehova maayo gayod kanako!—Itandi ang Salmo 18:17-19.
[Hulagway sa panid 7]
Sa pagbulag sa espiritismo, nasayran ni Lintina van Geenen nga “ang ngalan ni Jehova maoy usa ka malig-ong torre”
[Hulagway sa panid 9]
Kailayahan sa Suriname diin daghang tawo naulipon sa espiritismo