Pagpanambal Pinasukad sa Pagtuo—Unsay Pangdani Niini?

Ang simbahan mihugong sa mga tingog sa sista, trompeta, mga bombo, mga tamborin, ug mga piyangpiyang. Ang mga lalaki, mga babaye, ug mga bata nanayaw ug nanganta sa labihang kalipay. Ang kahimtang tukma aron sugdan ang pagpanambal.

Ang mananambal pinasukad sa pagtuo, nga nagsul-ob ug luag, puting biste, misugod pinaagi sa pagpatong sa iyang mga kamot diha sa usa ka lalaking bakol nga nagkamangkamang lamang. Sunod, usa ka lalaking buta, kansang itom nga antipara nagtabon sa iyang mga matang dili makakita. “Usa ka milagro!” mipatugbaw ang mga tumatan-aw samtang ang bakol nakalakaw ug ang buta nakakita . . .

ANG mga talan-awong sama niini kasagaran sa daghang Aprikanhong mga iglesya nga manambal pinasukad sa pagtuo. Sa pagkamatuod, ang mga mananambal pinasukad sa pagtuo daghag mga sakop sa Aprika ug sa ubang nasod tungod sa ilang mga pangangkon nga sila makasulbad sa tanang matang sa suliran pinaagi sa pag-ampo ug pagtuo sa Diyos. Sa ingon ang pipila moduol sa mga mananambal pinasukad sa pagtuo uban ang mga suliran sa kuwarta. Ug sanglit ang pagkawalay-anak kadaghanan kaulawan sa Aprikanhong katilingban, ang pipila moduol sa mga mananambal sa pagtuo nga nagalaom nga matambalan ang pagkadili-makaanak.

Hinuon, ang mga suliran sa panglawas nakakuhag pagtagad sa mga mananambal sa pagtuo labaw sa tanan. Bisan pag ang baligyaan sa kalibotan gilunopan sa mga medisina ug gihimo ang dalayegong mga paningkamot sa medikal nga natad sa pagpatunghag kahupayan sa sakit, ang tawo halayo pa kaayo sa pagkaplag ug kasulbaran sa suliran sa sakit. Gigugol sa pila ka biktima sa sakit ang dagko kaayong kantidad sa salapi sa pagpangitag mga tambal, nga atubangon lamang sa kapakyasan. Nan, dili katingalahan, kay nawad-ag paglaom, daghan ang modangop sa mga mananambal pinasukad sa pagtuo!

Gibati sa pipila nga ang pagtambal pinasukad sa pagtuo misaler alang kanila ug sila walay nakitang panagsumpaki tali niini ug sa Kristiyanidad. Sa pagkamatuod, sanglit ang mga mananambal kadaghanan moangkon nga sila nagatambal sa ngalan ni Jesus, dili talagsaon nga ang mga sumusunod nila maoy mga sakop sa usa ka dakong relihiyon ug sa usa ka iglesyang nagapanambal pinasukad sa pagtuo. Apan ang matuod nga magsisimba sa Diyos angay bang magpatambal sa usa ka mananambal pinasukad sa pagtuo? (Juan 4:23) Ang mga pagkaayo nga nahimo sa maong mananambal tinuod ba gayod nga ikapasidungog sa Diyos?