Ikaw ba May Pagmahal Kang Jehova?

ANG gugma dunay daghang “mga nawong.” Tingali ang mainitong batan-ong ulitawo nahigugma sa usa ka matahom nga dalaga. Anaa pa kanang gugma sa inahan alang sa iyang anak. Ug anaa kanang gugma nga nagabugkos sa mga Kristohanon diha sa tibuok-globong panag-igsoonay.

Kining tanan maoy “gugma,” apan ang mga Grego dunay lainlaing matang sa gugma. Ang éros mao ang gugma nga nalangkit sa pagkaibog sa sekso. Nagkahulogan ang storgé sa gugma nga gipasukad sa relasyon sa dugo. Ug ang agápe​—ang dili-mahakugong gugma nga gipasukad sa prinsipyo—​mao ang gugma nga bation sa mga Kristohanon alang sa matag usa kanila.​—Juan 13:34, 35.

Malumong Pagmahal

Apan, dihang magpasiugdag gugma sa ilabinang mainiton ug malulutong paagi, ang mga magsusulat sa Kristohanon Gregong Kasulatan migamit sa pulong philía. Kini nagkahulogan ug malig-on, mainiton, personal nga paglangkit, sama nianang bation sa tinuod nga mga higala. Si Jehova aduna niining linain nga pagmahal alang sa iyang bugtong Anak. Busa si Jesus miingon bahin sa iyang kaugalingon: “Ang Anak dili makabuhat sa iyang kaugalingong kabubut-on, gawas lamang sa iyang makita nga ginabuhat sa Amahan. Kay bisan unsay ginabuhat nianang maong Usa, ginabuhat usab kana sa Anak sa samang paagi. Kay ang Amahan may pagmahal sa Anak ug iyang gipakita kaniya ang tanan nga iyang ginabuhat.” Ug, sa susama, mahitungod sa iyang tinuod nga mga sumusunod, si Jesus miingon: “Ang Amahan may pagmahal kaninyo, kay ako inyo man nga gimahal ug nagatuo nga ako gikan sa Amahan ingong iyang hawas.”​—Juan 5:19, 20; 16:27.

Diha sa Kristohanon Gregong Kasulatan, ang “pagmahal” nagkahulogan sa usa ka mainit, personal nga matang sa gugma. Makita kini gikan sa kamatuoran nga sa kasagaran sa paghubad niini kini duyogan sa pulong “malumo.” Pananglitan, gitambagan ni apostol Pablo ang mga Kristohanon: “Diha sa inigsoong gugma pagpakitag malumong pagmahal alang sa usag usa.” (Roma 12:10) Dugang pa, gikutlo sa disipulong Santiago ang pag-antos ni Job ug ang gisangpotan nga gihatag ni Jehova sa pagpamatuod “nga si Jehova malumo sa iyang pagmahal ug maluluy-on.”​—Santiago 5:11.

Posible ba ang Pagmahal Kang Jehova?

Busa si Jehova dunay malulot nga pagmahal alang sa maghuhupot sa integridad​—bisag dili-hingpit—​nga mga tawo. Apan kay ang pagmahal nagkahulogan man ug suod, mainit nga pagbati alang sa usa ka tawo, posible ba sa dili-hingpit nga mga tawo ang pagmahal sa Soberano sa Uniberso, si Jehova?

Oo, posible kini. Ang usa ka tagsaong pananglitan sa usa ka tawo nga may pagmahal kang Jehova mao si David. Makita kini gikan sa iyang daghang mga salmo. Iyang gipabilhag dako ang mahigugmaong pagtagad ni Jehova ingong Magbalantay.​—Salmo 18:1; 23:1-6.

Mahimong masuod kaayo si Jehova, tinuod kaayo, alang kanato nga sa ingon kita makabaton ug personal nga pagmahal, kun pagbati, alang kaniya. Sa pagkatinuod, nga angay magbaton kita niining suod, mainit nga pagmahal alang sa atong Maglalalang matin-aw gikan sa una ug labing dakong sugo. Sumala niini, kita gisugo sa ‘paghigugma kang Jehova sa bug-os kasingkasing, sa bug-os natong kalag, ug sa bug-os natong hunahuna ug sa bug-os natong kusog.’​—Marcos 12:29, 30.

Pag-ugmad ug Mainit nga Pagmahal Kang Jehova

Nan, sa unsang paagi nga atong maugmad kining mainit nga pagmahal kang Jehova? Pinaagi sa pag-ugmad ug dulot nga apresasyon kon unsa siya kamahigugmaon, kamabinationg langitnong Amahan. Atong mahimo kini pinaagi sa paggahin ug panahon sa pagbasa sa iyang Pulong, ang Bibliya, sa regular. Ilabinang makita natong mapuslanon ang pagbasa sa mga bahin niini sama diha sa mga Salmo, sa mga Ebanghelyo ug sa mga sulat sa apostole.

Laing dakong tabang sa pag-ugmad ug mainit nga pagbati kang Jehova mao ang pagbansay sa espiritu sa pagpabili ug pagpasalamat sa iyang daghang mga panalangin. Palandonga ang tanang maayong mga butang ingong gikan kaniya, kay, sa pagkatinuod, “ang tanang maayong mga gasa ug tanang hingpit nga regalo . . . nagagikan sa Amahan sa kahitas-an.” Sa pagkatinuod, daghan kaayo ang tambag sa Kasulatan sa paghatag pasalamat sa Diyos, ilabina diha sa basahon sa mga Salmo ug sa mga sulat ni Pablo. Ang pananglitan niini mao ang mga pulong sa apostol: “Sa ngalan sa atong Ginoong Jesu-Kristo [paghatag] kanunay ug pasalamat alang sa atong Diyos ug Amahan alang sa tanang butang.”​—Santiago 1:17; Efeso 5:20.

Makatabang usab kanato aron modako ang atong pagmahal kang Jehova nga Diyos mao ang pag-ampo​—kinasingkasing, tim-os ug mapainubsanong mga pangamuyo ug pangaliyopo nga ipatumong ngadto sa atong mahigugmaong langitnong Amahan. Diha sa pag-ampo atong isentro ang maayong mga hiyas ni Jehova, ang iyang kaayo kanato ug ang atong panginahanglan kaniya. Ug diha sa pag-ampo mangayo usab kita sa kapasayloan sa atong mga sala, sama sa gihimo ni David diha sa Salmo 51. Busa, kining tanan makapasuod pa kanato kang Jehova ug makalig-on sa atong pagmahal kaniya.

Kon sa Unsang Paagi ang Pagmahal Kang Jehova Makatabang Kanato

Kon atong ugmaron kining, mainit personl nga pagmahal kang Jehova nga Diyos, tinuod nga higugmaon siya sa bug-os natong kasingkasing, kalag, ug hunahuna ug kusog, nan unsa? Kini makatabang kanato sa paglakaw sa paagi nga kahimut-an sa Diyos ug mapalayo usab kita sa daghang mga kasakit ug mga kaguol. Kadtong mga Kristohanon nga nagkaproblema tungod sa seryosong paglapas sa matarong nga mga balaod sa Diyos tingali napakyas sa pag-ugmad niining mainit nga relasyon uban sa langitnong Amahan.

Pananglitan, dihay batan-ong Kristohanon, nga tin-edyer, kinsa nakapribilehiyo sa pag-alagad sa bug-os panahon. Apan wala siya magbantay bahin sa “mga buhat sa unod” ug gidisiplina. (Galacia 5:19-21) Dihang gipasilsil kaniya ang pagkaseryoso sa iyang sayop nga buhat, tim-os siyang naghinulsol. Apan nasipyat siya sa butang nga angay niyang isilsil sa iyang hunahuna, nga mao, ang pasipala sa iyng daotang dalan diha sa ngalan ni Jehova. Kon kining batan-ona duna pay mainit, personal nga relasyon sa iyang langitnong Amahan malagmit makatabang unta kadto sa pagpugong kaniya.

Gipangutana ni Jesus si Pedro kon dili ba lang kay siya may gugma kondili pagmahal sa Agalon. Dihang mitubag si Pedro nga may pagmahal siya, si Jesus miingon, “Pakan-a ang akong gagmayng mga karnero.” (Juan 21:15-17) Sama usab kini sa atong pagbaton ug pagmahal kang Jehova. Kining maong pagmahal makatabang kanato nga magmahunahunaon sa pagpahimuot sa Diyos pinaagi sa pagsunod sa iyang mga sugo. Makapahunahuna kini kanato sa dili pagpasuko kaniya, nga dili nato pasakitan ang iyang mga pagbati. Sama sa gipahinumdom kanato ni apostol Pablo, kon kita mopalayo gikan sa pagbuhat sa kabubut-on ni Jehova, Siya dili malipay kanato. Siyempre, dili kita buot nga mahitabo kini kanato, dili ba? (Hebreohanon 10:38, 39) Pagkamaayo nga magbaton kitag pagtuo ug tinuod mainit nga pagmahal sa atong mahigugmaong Diyos!

Busa, atong ugmaron ang mainit nga pagmahal kang Jehova nga Diyos. Atong mahimo kini pinaagi sa pagbasa sa iyang Pulong, pinaagi sa pagpalanong sa iyang kaayo diha sa espiritu ug sa pagpasalamat, pinaagi sa pagpadayon sa pag-ampo ug pinaagi sa pagpahimuot kaniya pinaagi sa atong paggawi ug sa atong madasigong ministeryo sa pagwali sa iyang ngalan ug gingharian.