Ang Pag-ampo Takos ba sa Kahago?
BIYERNES kadto, Mayo 31, 1985, natunga ang amihanang bahin sa Ontario, Canada tungod sa sunodsunod nga mga alimpulos. Usa ka klerigo nga nagpuyo sa gamayng baryo sa Grand Valley naghinan-aw na lang samtang gilaksi sa naghagiyos nga hangin ang atop sa iyang apartment. Sumala sa gitaho diha sa prensa, siya “nakakitag mga milagro ug mga katalagman nga nahitabo sa tanang kiliran samtang iyang nasaksihan ang dili mabangbang nga kasuko sa kinaiyahan.”
Siyempre, giisip sa mga minahal ug sa mga higala sa duha ka tawong namatay ang mga alimpulos ingong makalilisang nga katalagman. Maingon man sa libolibo pang nawad-an ug mga balay tungod sa malaglagong mga maglulubag. Sa laing bahin, gihubit kini sa kadaghanan niadtong diriyut nga namatay ug sa nangasamad ug grabe ingong “milagro.” Si Ron ug ang iyang kauban sa trabaho maoy duha niini. Midangop sila sa malig-ong bahin sa edipisyo sa ilang opisina nga upat ka segundo lamang nga pasidaan. Tapos gisaysay ang ilang katingalahang pag-ikyas gikan sa kamatayon, si Ron miingon: “Oo, nagtuo akog Diyos niadto ug ilabinang nagtuo akog Diyos karon.”
Ginaingon nga sa yugto sa kalit, wala dahomang kalamidad, ‘diyutay lamang, kon aduna man, nga walay pagtuo sa Diyos.’ Ug kon may igong panahon niining mga hitaboa, daghang kinasingkasing mga pag-ampo alang sa panalipod ug kaluwasan ang itanyag.
Sa Sabado, Hulyo 21, 1985, kapin sa gatos ka lalaki, mga babaye, ug mga bata ang nagtigom alang sa pagsimba diha sa ilang Kingdom Hall sa Sydney, Australia. Tapos sa awit sa pagdayeg sa Diyos, gitanyag ang pag-ampo alang sa kongregasyon. Sa 15 minutos pa lang ang ministro sa iyang pakigpulong sa Bibliya niadtong Dominggo sa buntag, usa ka butok sa bomba ang kalit nga mibungkag sa kalinaw, nga nakasamad kaniyag grabe, nakapatay sa tawong naglingkod sa atubangan sa tigomanan, ug misangpot sa pagkaospital sa kapin sa 40 ka tawo.
[Kahon/Hulagway sa panid 3]
Mohatag bag Kalainan ang Pag-ampo?
Ang mga hitabo nga mao pay pag-asoy—ang usa gihubit ingong “dili mabangbang nga kasuko sa kinaiyahan” ug ang lain ingong kriminal nga buhat—nakabangon ug mga pangutana bahin sa bili sa pag-ampo. Unsay bili sa pag-ampo? Moobra ba gayod ang pag-ampo? Ang pag-ampo takos ba sa kahago?