Watchtower ONLINE NGA LIBRARYA
Watchtower
ONLINE NGA LIBRARYA
Cebuano
  • BIBLIYA
  • PUBLIKASYON
  • MGA TIGOM
  • w88 3/15 p. 15-20
  • Nagaalagad Ingong Masaligong Kaubang mga Mamumuo ni Jehova

Walay video nga available.

Sorry, dunay problema sa pag-load sa video

  • Nagaalagad Ingong Masaligong Kaubang mga Mamumuo ni Jehova
  • Ang Bantayanang Torre Nagapahayag sa Gingharian ni Jehova—1988
  • Sub-ulohan
  • Susamang Materyal
  • “Pagpakitag Hustisya”
  • ‘Higugmaa ang Kalulot’
  • Mga Pagsulay sa Pagkamaunongon
  • “Magmakasaranganon sa Paglakaw Uban sa Imong Diyos”
  • Pagkamakasaranganon nga Angay sa Pagkabatan-on
  • Pagkamakasaranganon—Usa Ka Hiyas nga Magpalambo sa Pakigdait
    Ang Bantayanang Torre Nagapahayag sa Gingharian ni Jehova—2000
  • “Ang Kaalam Anaa sa mga Makasaranganon”
    Ang Bantayanang Torre Nagapahayag sa Gingharian ni Jehova—2000
  • “Ikaw Lang ang Maunongon”
    Pakigsuod Kang Jehova
  • ‘Unsay Gipangayo ni Jehova Kanimo?’
    Ang Bantayanang Torre Nagapahayag sa Gingharian ni Jehova—2012
Uban Pa
Ang Bantayanang Torre Nagapahayag sa Gingharian ni Jehova—1988
w88 3/15 p. 15-20

Nagaalagad Ingong Masaligong Kaubang mga Mamumuo ni Jehova

“Ikaw iyang gisultihan, Oh tawo, kon unsa ang maayo. Ug unsa ang gikinahanglan ni Jehova kanimo kondili ang pagpakitag hustisya ug ang paghigugma sa kalulot ug magmakasaranganon sa paglakaw uban sa imong Diyos?”—MIQUEAS 6:8.

1. Unsang Kasulatanhong basehanan nga mahimong matawag ang tanang mga alagad ni Jehova karon nga iyang “masigkamagbubuhat”?

ANG Kristohanong apostol Juan misulat: “Tan-awa ninyo unsang gugmaha ang gihatag kanato sa Amahan, nga paganganlan kita nga mga anak sa Diyos; ug mao kana kita.” (1 Juan 3:1) Ug si apostol Pablo mihisgot bahin sa iyang kaugalingon ug sa iyang kaubang si Apolos: “Kami mga masigkamagbubuhat sa Diyos.” (1 Corinto 3:9) Kining mga pulonga gihimo ug gitumong alang sa dinihogang mga sumusunod ni Jesu-Kristo. Apan ang prinsipyo niini aplikado sa tanang tinuod nga mga alagad sa Diyos. Busa kini mahimong mausab sa pag-ingon: ‘Tan-awa ninyo unsang gugmaha ang gihatag kanato sa Amahan nga kita mahimong masigkamagbubuhat sa Diyos.’

2. Nganong posible alang sa mga alagad ni Jehova karon nga mahimong iyang masigkamagbubuhat?

2 Sa unsang paagi posible kini alang sa mahuyang, dili-hingpit nga mga tawo nga mahimong masigkamagbubuhat sa dakong Maglalalang, kinsa walay kinutuban ang gahom ug kaalam, hingpit sa hustisya, ug larawan sa gugma? Posible kini tungod kay ang atong unang mga ginikanan gihimo diha sa dagway ug pagkasama sa Maglalalang ug sa iyang masigkamagbubuhat, ang Pulong, o ang Logos. (Genesis 1:26; 27; Juan 1:1) Busa ang atong unang mga ginikanan gihatagan ug igong kaalam, hustisya, gahom, ug gugma. Maoy hinungdan nga mipahayag si Jehova sa iyang mga alagad sa yuta pinaagi sa iyang propeta: “Ikaw iyang gisultihan, Oh tawo, kon unsa ang maayo. Ug unsa ang gikinahanglan ni Jehova kanimo kondili ang pagpakitag hustisya ug ang paghigugma sa kalulot ug magmakasaranganon sa paglakaw uban sa imong Diyos?”—Miqueas 6:8.

3. Unsay gipasabot sa Miqueas 6:8, ug unsay gikinahanglan diha sa usa ka tawo sa dili pa siya mahimong usa ka masigkamagbubuhat ni Jehova?

3 Dihang atong mabasa ang mga pulong, “Unsa ang gikinahanglan ni Jehova kanimo kondili . . . ?” daw nagpasabot kini nga ang nagsunod tukmang nagasumaryo sa responsibilidad ‘sa tawo’ ngadto sa Diyos ug sa isigkatawo. Kon asa kutob nga buhaton kana makita samtang magapadayon ang atong panaghisgot. Siyempre, dili kay bisan kinsa lang ang makahimo sa paglakaw uban kang Jehova. Kining pribilehiyoa iya lamang niadtong kinsa ‘nakapakigkita kaniya pinaagig panagsabot,’ pagaingon pa. (Amos 3:3) Sa unsang paagi? Pinaagi sa paghimog bug-os nga pagpahinungod kang Jehova ug simbolohan kini pinaagi sa bawtismo sa tubig, sumala sa gipadayag sa nag-unang artikulo. Busa, unsay kahulogan sa Miqueas 6:8 alang niining mga tawhana?

“Pagpakitag Hustisya”

4. Sa lintunganay, unsay kahulogan sa “pagpakitag hustisya”?

4 Una sa tanan, dunay kinahanglanon aron sa “pagpakitag hustisya.” Ingong masigkamagbubuhat ni Jehova nga Diyos, kinahanglan magbaton kitag maayong konsensiya. Aron sa “pagpakitag hustisya” sa lintunganay nagkahulogan sa pagbuhat sa matarong, sa butang nga gikinahanglan sa Diyos kanato. Kini nagkahulogan nga kinahanglan atong tumanon ang atong mga obligasyon, ang panguna niini mao ang paghatag kang Jehova sa ekslusibong debosyon. (Nahum 1:2) Dili siya motugot nga may kaatbang siya. Dili kita mahimong ulipon sa duha ka agalon.—1 Corinto 10:22; Mateo 6:24.

5. Sa unsang paagi gipakita ni Jesu-Kristo nga siya nahigugma sa pagkamatarong ug nagdumot sa pagkadaotan?

5 Dugang pa, aron ‘makapakitag hustisya,’ kinahanglang atong ‘higugmaon ang pagkamatarong ug dumtan ang daotan,’ sama sa gihimo ni Jesu-Kristo. Tungod sa iyang gugma sa pagkamtarong, iyang gihimo ang iyang kaugalingon nga “walay sala, walay lama, linain gikan sa mga makasasala.” (Salmo 45:7; Hebreohanon 7:26) Ug tungod kay gidumtan ni Jesus ang pagkadaotan, kadto maoy matarong nga kasuko dihang iyang gibadlong ang maut ug hakog nga mga pangulo sa relihiyon sa iyang adlaw.—Mateo 23:13-36; Juan 8:44.

6. Nganong kinahanglang magbaton kitag labaw pa kay sa yanong pag-uyon sa hunahuna nga angay gayod natong likayan ang gidiling butang tungod kay kini daotan?

6 Sumala sa makita sa panig-ingan ni Jesus, dili pa igo ang paghigugma sa pagkamatarong. Kinahanglang atong dumtan usab—oo, kaligotgotan, ayran, kasilagan, magbaton ug kusganong pagbatok—sa daotan. Tungod kay daotan man ang atong mga kiling gikan sa atong pagkabatan-on ug kay ang atong mga kasingkasing malimbongon, mabudhion man, kita nagkinahanglan ug labaw pa kay sa yanong pag-uyon sa hunahuna nga ang butang nga ginadili daotan. (Genesis 8:21; Jeremias 17:9) Gawas kon kusganon natong suklan ang makasasalang mga kiling ug mga tintasyon, madaog kita sa ilang mga pagpangdani. Angay magbaton kita ug kusganong pagdumot sa daotan nga gipakita ni Pinehas dihang iyang gigamit ang bangkaw sa pagduslak sa magtiayon nga nag-usa sa imoral nga pagsimba sa Baal sa Peor.—Numeros 25:5-8.

7. Unsay pamatuod ang atong nabatonan nga dili mogamit si Jesus sa mga daotan ingong iyang masigkamagbubuhat?

7 Si Jehova dili gusto ug dili mogamit ingong iyang masigkamagbubuhat kang bisan kinsa nga daotan. Gipatin-aw kini diha sa Salmo 50:16-18, diin atong mabasa: “Apan sa tawong daotan ang Diyos nagaingon: ‘Unsay imong katungod sa pagpahayag sa akong kabalaoran, ug nga ikaw nagadawat sa akong tugon sa imong baba? Gani, ikaw—ikaw nagadumot sa pahamatngon, ug nagasalikway sa akong mga pulong sa likod nimo. Sa diha nga nakita mo ang usa ka kawatan, ikaw nahimuot kaniya; ug nagpakig-ambit ka uban sa mga mananapaw.’”

8. Unsang hitabo ang nagpasiugda sa pasipala nga atong mahimo tungod sa pagpadaog sa daotang buhat?

8 Hayan puliki kita sa pag-alagad kang Jehova, nagawali sa maayong balita sa Gingharian sa Diyos. Apan kon dili kita mag-amping sa pagpugong sa kaugalingon, basig makasala kita tungod sa kahuyangon sa unod ug makahatag pasipala sa ngalan ni Jehova. Busa, sa pila ka tuig nga milabay usa ka ansiano nakapanapaw uban sa espirituwal nga igsoong babaye nga dunay dili-magtutuong bana. Sa gabii nga gianunsiyo ang pagpalagpot sa ansiano kanhi, ang nasukong bana misulod sa Kingdom Hall nga may shotgun ug giluthang ang duha ka sad-ang mga indibiduwal. Walay namatay kanila, apan sa pagkasunod adlaw nahimo kining ulohan sa balita sa unang panid diha sa labing dakong mantalaan sa Tinipong Bansa! Sa pagkatinuod, ang daotang mga buhat makahatag pasipala.—Proverbio 6:32.

9. Sumala sa Proverbio 4:23, unsa ang angay natong ampingan, ug ngano?

9 Busa, sa katukma, kita gitambagan: “Labaw sa tanang butang nga pagaampingan, ampingi ang imong kasingkasing, kay gikan niini nagagula ang mga tuboran sa kinabuhi.” (Proverbio 4:23) Oo, atong disiplinahon ang atong kaugalingon bahin sa mga butang nga ginapahambin nato sa atong mahulagwayong mga kasingkasing. Dugang ug dugang, ang telebisyon, mga magasin, ug ubang mga porma sa palumagian nagapasundayag ug mahugawng mga butang, lakip sa pornograpiya. Busa, kinahanglang magmapilion kita kon unsa ang atong tan-awon, pamatian, ug basahon. Ang pagkontrolar sa kaugalingong hunahuna bililhon! Pananglitan, tingali malingaw ka sa pagpukaw diha sa atong mga hunahuna ug seksuwal nga mga handurawan, mga butang nga dili gayod nato buhaton diha sa tinuod nga kinabuhi. (Mateo 5:28) Apan sa kasagaran kining maong paghunahuna mosangpot ug daotang mga aksiyon. Inay isentro ang hunahuna niining mga butanga, nan, ipasundayag nato ang bunga sa balaang espiritu sa pagpugong sa kaugalingon ug palandongon ang mga butang nga gilista diha sa Filipos 4:8.—Galacia 5:22, 23.

‘Higugmaa ang Kalulot’

10, 11. (a) Unsay kalainan sa pagkamatinumanon ug pagkamaunongon? (b) Sa unsang paagi gipasundayag sa Anak sa Diyos ang pagkamatinumanon ug pagkamaunongon?

10 Ang ikaduhang kinahanglanon nga gihisgotan sa Miqueas 6:8 mao ang atong “paghigugma sa kalulot.” Ang “paghigugma sa pagkamaunongon” maoy paagi sa paghubad dinhi sa The New English Bible. Ang potnot sa New World Translation Reference Bible nagpakita nga ang Hebreohanong pulong cheʹsedh, nga gihubad “kalulot,” mahubad usab nga “mahigugmaong-kalulot” o “maunongong gugma.” Sumala sa mga tighimog diksiyonaryo, ang “maunongong gugma nagpasabot ug malig-ong pagsukol sa bisan unsang tintasyon sa pagbiya o pagbudhi.” “Ang pagkamaunongon nagadugang ngadto sa pagkamatinumanon sa ideya nga buot mounong ug sa pagpakig-away alang sa tawo kun butang, bisan batok sa tanang kakulian.” Makaikag diha sa Kasulatan atong makita usab ang gamayng kalainan sa paggamit niining mga pulonga. Pananglitan, ang terminong “pagkamaunongon” wala gayod gamita sa walay kinabuhing mga butang. Apan ang pulong “matinumanon” kanunayng gigamit. Busa, ang bulan gitawag “usa ka matinumanong saksi diha sa panganod.” (Salmo 89:37) Dayon, ang mga pulong sa Diyos usab ginaingon nga matinumanon, sa ato pa, kasaligan.a (Pinadayag 21:5, 22:6) Apan, ang pagkamaunongon, iya lamang kang Jehova nga Diyos ug sa iyang gikahimut-ang mga alagad. Busa, mahitungod kang Jehova, atong mabasa: “Uban sa maunongon ikaw nagalihok sa pagkamaunongon.”—2 Samuel 22:26.

11 Ang Anak sa Diyos matinumanon ug maunongon kang Jehova sa langit. Dinhi sa yuta, miagi siya ug mga pagsulay ingong tawong si Jesu-Kristo ug napamatud-an ang iyang pagkamasinundanon sa pagkaagi nga siya matinumanon ug maunongon ingong tawo. Gipakita kini diha sa Hebreohanon 5:7-9, nga niini atong mabasa: “Sa mga adlaw sa tawhanon niyang kinabuhi si Kristo uban ang makusog nga pagsinggit ug paghilak naghimog mga pag-ampo ug pagpangamuyo ngadto sa Usa nga arang makaluwas kaniya gikan sa kamatayon ug siya gidungog tungod sa iyang diyosnong kahadlok. Ug bisan tuod siya Anak, siya nakakat-on sa pagkamatinumanon pinaagi sa mga butang nga iyang giantos; ug sa nahimo na siyang hingpit siya nahimong tuboran sa dayong kaluwasan alang sa tanang magasugot kaniya.”

Mga Pagsulay sa Pagkamaunongon

12. Usahay, unsay makahatag pagsulay sa atong pagkamaunongon, ug unsay reaksiyon sa uban niining mga pagsulaya?

12 Ang pagkamaunongon sa pag-alagad kang Jehova nga Diyos nagkinahanglan nga magmaunongon usab kita sa iyang mga alagad sa yuta, sa atong isigka-Kristohanon. Gipatin-aw kini ni apostol Juan dihang kita iyang gipahinumdoman: “Siya nga nagadumot sa iyang igsoon, nga iyang nakita, dili gayod makahimo sa paghigugma sa Diyos, nga wala niya makita.” (1 Juan 4:20) Ang pagkadili-hingpit sa uban nagahatag pagsulay sa atong pagkamaunongon ning bahina. Pananglitan, dihang sila masilo, ang uban nagpakitag kahuyang sa ilang pagkamaunongon sa organisasyon ni Jehova pinaagi sa pagpalayo gikan sa Kristohanong mga tigom. Laing pagsulay sa atong pagkamaunongon sa atong mga igsoon motungha dihang ang mga tawo nga gigamit ni Jehova sa pagpanguna masayop sa paghatag ug hukom. Matag karon ug unya, kining maong mga kasaypanan gigamit sa uban ingong pasangil sa pag-undang ug dili na makig-uban gikan sa makitang organisasyon ni Jehova. Apan ang ila bang gihimo makataronganon? Dili gayod!

13. Nganong ang pagbulag gikan sa organisasyon ni Jehova dili-makataronganon, ug unsa ang kapilian alang niining mga dili-maunongon?

13 Nganong dili makataronganon kining mga tawhana sa pagbulag sa organisasyon sa Diyos? Tungod kay ang iyang Pulong nagpasalig kanato: “Ang mga nahigugma sa kasugoan [ni Jehova] adunay pakigdait nga dako, ug kanila wala ang kahigayonan sa pagkapandol.” (Salmo 119:165) Dugang pa, kita gisugo sa “pagbaton ug mainitong gugma alang sa usag usa, sanglit ang gugma nagatabon man sa kapid-an sa mga sala.” (1 Pedro 4:8; Proverbio 10:12) Lain pa, ingnon ta nga mibulag na ang tawo gikan sa katawhan sa Diyos. Asa man siya moadto? Dili ba atubangon man niya ang samang isyu nga giatubang sa mga apostoles ni Jesus dihang iyang gipangutana sila kon buot ba usab silang mobiya kaniya? Si apostol Pedro tukmang mitubag: “Ginoo, kang kinsa man kami moadto? Ikaw mao ang may mga pulong mahitungod sa kinabuhing dayon.” (Juan 6:68) Walay laing kaadtoan kondili sa “Babilonyang Bantogan,” ang kalibotang imperyo sa bakak nga relihiyon, o ngadto sa mga paghawid sa politikanhong “mapintas nga mananap” ni Satanas. (Pinadayag 13:1; 18:1-5) Sa katibuk-an, ang mga dili-maunongon nga mibulag sa makitang organisasyon ni Jehova nakig-uban sa kawsa niadtong nagapasipala sa Diyos nga “Babilonyang Bantogan.”

“Magmakasaranganon sa Paglakaw Uban sa Imong Diyos”

14, 15. (a) Unsay mga kahulogan sa Ingles nga pulong sa “modest”? (b) Unsang kahulogan sa “pagkamakasarangon” ang atong tagdon dinhi, ug alang sa unsang mga katarongan? (c) Nganong ang mga Kristohanon ‘maghatag ug makasaranganong pagtimbang sa ilang mga katakos o bili’?

14 Ang Ingles nga pulong “modest” o pagkamakasaranganon daghag mga kahulogan. Kini mahimong nagapasabot sa pagkadili-mahambugon, “may kinutoban sa gidak-on, sa gidaghanon, o sa gisangkaron.” O nagkahulogan usab kini sa kaligdong, “nagasunod sa maugdang nga pamiste ug paggawi.” (1 Timoteo 2:9) Dayon anaa usab ang kahulogan sa “pagkamakasaranganon” nga sa linain maoy atong tagdon, nga mao, ang pagkasayod sa atong mga limitasyon o sa “paghimog makasaranganong pag-ila sa atong mga katakos o bili.” Dili kita mahimong masigkamagbubuhat ni Jehova kon hataas kaayo ang atong pagtamod sa atong kaugalingon, nagahatag pagtagad sa atong kaugalingon inay sa paghatag sa pangunang pagtagad kang Jehova nga Diyos.

15 ‘Ang paghatag ug kasarangang pag-ila sa atong mga katakos o bili’ matin-aw nga mao ang kahulogan nga atong ilangkit diha sa Hebreohanong pulong nga gihubad “makasaranganon” sa Miqueas 6:8. Makita kini sa paagi sa paggamit sa pulong nga kas-a lamang makita diha sa Hebreohanong Kasulatan. Diha sa Proverbio 11:2 gitandi kini dili sa seksuwal nga kahugawan kondili sa pagkamapahangason, nga maoy sangpotan gikan sa sobrang pagpataas sa kaugalingon. Didto atong mabasa: “Miabot ba ang pagkamapangahason? Nan modangat unya ang kaulaw; apan ang kaalam nagauban sa mga makasaranganon.” Ang pagkamakasaranganon nagauban sa pagbaton ug kahadlok kang Jehova, nga nalangkit usab sa kaalam. (Salmo 111:10) Ang tawong makasaranganon may kahadlok kang Jehova tungod kay siya nasayod sa pagkadako sa kalainan tali kaniya ug sa Diyos, tali sa pagkamatarong ni Jehova ug sa gahom ug sa iyang kaugalingong pagkadili-hingpit ug mga kahuyangon. Busa, ginahimo sa tawong makasaranganon ang iyang buluhaton sa iyang kaluwasan uban ang kahadlok ug pagkurog.—Filipos 2:12.

16. Unsang mga kasulatan ang nagpakita nganong angay magmakasaranganon ang mga Kristohanon?

16 Dunay daghan kaayong mga katarongan nganong ang masigkamagbubuhat ni Jehova angay nga magmakasarangon! Bisan pa sa kaalam nga atong mabatonan, ang pisikal nga kusog nga gihatag kanato, o bisan unsa pa ka daghana sa atong materyal nga bahandi, kita walay katarongan sa pagpasigarbo. (Jeremias 9:23) Ngano wala? Tungod sa prinsipyo nga gipahayag diha sa 1 Corinto 4:7: “Kay kinsa bay nagahimo kanimo nga lahi sa uban? Ug unsa bay anaa kanimo nga dili mo dinawat, ug kon kini dinawat man, nganong magpasigarbo man ikaw nga morag dili kini hinatag?” Kita usab walay katarongan sa pagpasigarbo tungod sa mga bunga sa atong ministeryo, kay unsay atong mabasa diha sa 1 Corinto 3:6, 7? Didto si Pablo miingon: “Ako ang nagtanom, si Apolos mao ang nagbisbis, apan ang Diyos mao ang nagapatubo; sa ingon niana ang may bili dili ang nagtanom o ang nagbisbis, kondili ang nagapatubo nga mao ang Diyos.” Ang mga pulong ni Jesus diha sa Lucas 17:10 makatabang usab kanato sa pagpabiling makasaranganon, kay siya miingon: “Sa makabuhat na kamo sa tanang gisugo kaninyo, umingon, ‘Kami mga ulipon nga walay hinungdan. Kay kami igo lamang nagbuhat sa kinahanglan namong pagabuhaton.’”

17. Nganong ang pagkamakasaranganon mao gayod ang dalan sa kaalam?

17 Ang pagkamakasaranganon sa tinuod maoy dalan sa kaalam. Ang pagkamakasaranganon makahimo kanato nga magmatagbawon dihang makabaton kitag pribilehiyo sa pag-alagad. Kon kita makasaranganon, dili kita ambisyosong maningkamot sa pagpasidlak kondili magmatagbaw sa paggawi sa atong kaugalingon ingong “usa nga ubos.” (Lucas 9:46) Sa ingon, makabaton kitag tinamdan sama sa salmista, kinsa miingon: “Kay ang usa ka adlaw sa imong sawang labi pang maayo kay sa usa ka libo nga gawas kanila. Palabihon ko ang pagbarog diha sa pultahan sa balay sa akong Diyos kay sa pagpuyo sa mga balongbalong sa mga daotan.” (Salmo 84:10) Dugang pa, kon kita makasaranganon, kita may gugma nga mopalihok kanato sa pagpanguna sa pagpasidungog sa uban.—Roma 12:10.

Pagkamakasaranganon nga Angay sa Pagkabatan-on

18. (a) Nganong ang pagkamakasarangon angay kaayo alang sa mga batan-on? (b) Ang panginahanglan sa pagkamakasaranganon napamatud-an sa unsang rekord nga nalangkit sa modernong adlawng mga batan-on?

18 Angay gayod nga ang Kristohanong mga batan-on mamesti nga makasaranganon. Pagkamaayong panig-ingnan ang gihatag ni Elihu alang kanila! Bisan pa nga siya dunay hustong mga tubag, naghulat siya sa pagkamatinahuron hangtod nga nakasulti na ang mga tigulang. (Job 32:6, 7) Sa kasagaran, ang mga batan-on masaligon sa kaugalingon, nga dili magpakamatikod sa ilang mga limitasyon. Tungod sa ilang pisikal nga kusog ug nabatonang mga kahibalo, tingali tamayon nila ang ilang mga ansiano. Apan ang kahibalo dili samag kahulogan sa kaalam, nga maoy pagpadapat sa kahibalo. Ania ang pananglitan sa makasubong rekord nga ginahimo sa modernong mga batan-on diha sa Tinipong Bansa. Didto, 63 porsiento sa mga pagdakop tungod sa dagkong mga krimen nahimo sa mga batan-on hangtod sa 24 anyos, nga may 30 porsiento sa mga pagdakop niadtong ubos sa edad 18. Gikataho usab nga ang “pagmaneho nga hubog kun ilalom sa impluwensiya sa droga mao ang pangunang hinungdan sa kamatayon taliwala sa mga Amerikano sa edad 15-24.” Nianang yutaa, “dugang ug dugang kaminyoon sa mga tin-edyer natapos sa diborsiyo,” samtang gikataho nga “ang mga kaminyoon malagmit molungtad ug dugay kon ang pangasaw-onon ug pamahonon dunay daghang mga tuig sa kaalam sa likod kanila dihang moadto sila sa altar.”

19. Unsang Kasulatanhong tambag ang maayong pamation sa mga batan-on?

19 Nan, pagkamaalamon, ang tambag sa Pulong sa Diyos! Sa tukma, kini nagatudlo sa mga batan-on sa pagtahod sa ilang amahan ug sa ilang inahan, magmasinugtanon kanila sa tanang butang. (Efeso 6:1-3; Colosas 3:20) Angay mamati ang mga batan-on sa maalamong tambag: “Sumalig ka kang Jehova sa bug-os mong kasingkasing ug ayaw pagsalig sa imong kaugalingong salabotan. Sa tanan nimong mga dalan ilha siya, ug siya magatul-id sa imong mga alagianan.”—Proverbio 3:5, 6.

20. Unsang mga ganti ang malaoman sa nagapahinungod ug bawtismadong mga tawo kon ilang sundon ang Miqueas 6:8?

20 Pagkadako sa ganting nagapaabot natong tanan kon, human nakapasundayag sa pagsalig kang Jehova pinaagi sa pagpahinungod ug bawtismo sa tubig, kita ‘magpakitag hustisya, magpasundayag sa maunongong gugma, ug magmakasaranganon sa paglakaw uban sa atong Diyos’? Labing hinungdanon sa tanan, atong mabatonan ang pag-uyon ni Jehova tungod sa pag-abot sa iyang mga kinahanglanon ug busa makalipay sa iyang kasingkasing pinaagi sa pakigbahin sa pagbalaan sa iyang dako ug makahahadlok nga ngalan. (Proverbio 27:11) Dugang pa, atong makat-onan diha sa atong mga kinabuhi ang kamatuoran sa prinsipyo nga ang “diyosnong debosyon mapuslanon alang sa tanang butang, sanglit kini dunay saad nga kinabuhi karon ug nianang sa umaabot.”—1 Timoteo 4:8.

[Mga footnote]

a Diha sa kasadpang basin sa Tinipong Bansa, adunay geyser nga sa daghan nang mga tuig, sa aberids, nagabugwak ug tubig kas-a kada 65 minutos. Busa kini ginganlan, Old Faithful.

Unsay Imong mga Tubag?

◻ Sibo sa Miqueas 6:8, unsay gikinahanglan sa “pagpakitag hustisya”?

◻ Unsay kalabotan sa pagkamaunongon kang Jehova diha sa atong relasyon sa isigka-Kristohanon?

◻ Nganong kita angay ‘magmakasaranganon sa paglakaw uban sa Diyos’?

◻ Nganong ang pagkamakasaranganon ilabinang angay alang sa Kristohanong mga batan-on?

[Hulagway sa panid 17]

Giampingan ba nimo ang imong kasingkasing pinaagi sa pagpili sa imong tan-awon, pamatian, ug basahon?

[Hulagway sa panid 18]

Si Pedro nahibalo nga wala nay lain pang kaadtoan tungod kay si Jesus lamang ang nakabaton sa “mga pulong sa dumalayong kinabuhi.” Ikaw ba desidido sa pagpabiling maunongon sa organisasyon ni Jehova?

    Cebuano Publications (1983-2025)
    Log Out
    Log In
    • Cebuano
    • Ipasa
    • Setting
    • Copyright © 2025 Watch Tower Bible and Tract Society of Pennsylvania
    • Kondisyones sa Paggamit
    • Polisa sa Pribasiya
    • Mga Setting sa Pribasiya
    • JW.ORG
    • Log In
    Ipasa