Mga Imahen—Unsay Imong Hunahuna Niana?
NIADTONG 1888 may dako kaayong baha sa Canton, Tsina. Ang mga tanom nadaot tungod sa walay-hunong nga ulan. Tungod kay nawad-ag paglaom ang mga magbabaol miampo sa ilang diyos si Lung-wong aron motuang ang ulan, apan pakyas kadto. Sila, kay nasuko sa kadili-matinagdanon sa ilang diyos, nagbilanggo sa iyang imahen sulod sa lima ka adlaw! Pila ka tuig nga miagi, ang samang diyos wala magdungog sa ilang mga pag-ampo aron matapos ang usa ka hulaw. Gigapos nila ang iyang imahen sa gawas sa naglagiting nga kainit.
Niadtong 1893 ang Sicily gihulaw. Ang relihiyosong mga prosisyon, mga kandilang gidagkotan sulod sa mga simbahan, ug ang mga pag-ampo ngadto sa mga imahen tanan napakyas sa pagpatunghag ulan. Kay nawad-ag pailob, gihuboan sa pila ka magbabaol ang pila ka imahen sa ilang mga biste, gipaatubang sa bungbong ang mga nawong sa uban, ug gilabog pa ang uban sa mga lim-aw para sa kabayo! Sa Licata, si “San” Angelo gihuboan, gigapos, gipasipalahan, ug gibaharang bitayon. Sa Palermo, Italya, si “San” Jose gilabog sa usa ka tanaman nga napagba aron magpaabot sa ulan.
Kining mga hitaboa, nga giasoy diha sa librong The Golden Bough, nga gisulat ni Sir James George Frazer, dunay makapatugaw nga mga kahulogan. Sila nagapasabot nga ang nag-angkong mga Kristohanon ug mga dili-Kristohanon daw may parehong mga hunahuna sa mga imahen. Sa duha ka kaso, gigamit sa mga magsisimba ang ilang mga imahen ingong paagi sa pagkontak sa usa ka “santos” o usa ka diyos. Ug makaiikag, ang duha nagsulay sa pagpalihok sa ilang langanang “mga santos” o mga diyos pinaagi sa pagpahamtang kanila sa mga kalisdanan nga nasinati sa ilang mga magsisimba!
Karong adlawa, hinunoa, daghan nga nagagamit sa mga imahen mag-isip nianang mga buhata ingong hinobra, tingali kataw-anan pa. Mangatarongan sila nga alang kanila ang mga imahen mao lamay mga butang nga pagatahoron—dili pagasimbahon. Mangangkon pa tingali sila nga ang mga estatwa, mga krus, ug mga dibuho sa relihiyon maoy angayang mga tabang sa pagsimba sa Diyos. Tingali kana usab ang imong pagbati. Apan ang pangutana mao: Unsay pagbati sa Diyos bahin niini? Ang pagbalaan sa usa ka imahen katumbas ba gayod sa pagsimba niana? Posible kaha nga ang maong mga buhat may tinagong mga kapeligrohan?