“Biyai ang Imong Yuta ug ang Imong mga Kaparyentihan”
NIADTONG Nobyembre 1, 1981 si Tony ug ang iyang asawa, si Margaret, kauban sa duha nila ka anak, nga ang edad 9 ug 11, namiya sa Inglaterra ug nangadto sa kasadpan sa Irlandiya. Ngano man? Aron motabang sa katilingbanong buluhaton sa mga Saksi ni Jehova sa pagpanudlo. Pila ka semana lamang sa ulahi, nakaatubang silag mga kalisdanan. Panahon kadto sa grabeng tingtugnaw. Wala matuman ang gilaomang trabaho, mao nga gisugdan ni Tony ang negosyo sa pagpanglimpiyog panghaw. Kay dili pa man kaayo hanas, siya mouli sa balay nga nalukop sa anuos tapos sa hagong tibuok-adlaw nga trabaho. Tiaw na ang iyang kaluya sa diha nga nadiskobrehan niyang nanggahi sa kabugnaw ang tubig sa mga tubo ug siya may gamay rang takori sa tubig nga ipanghilam-os! “Sa kadiyut nakahunahuna ako nganong kami namiya man sa among balay ug sa among mga paryente,” siya miangkon.
Ang pagbiya sa pamilya ug sa mga higala aron moalagad sa Diyos sa bug-os pa, ug dayon sa pagpadayon bisan sa mga kalisdanan, nagkinahanglag dakong pagtuo. Ang usa nga nagpakita sa maong pagtuo halos 4,000 ka tuig kanhi mao ang patriarkang si Abraham. Ang disipulong si Esteban miingon bahin kaniya: “Ang Diyos sa kahimayaan nagpakita sa atong amahan si Abraham samtang siya didto sa Mesopotamia, una siya mopuyo sa Haran, ug [ang Diyos] miingon kaniya, ‘Biyai ang imong yuta ug ang imong mga kaparyentihan ug umadto ka sa yuta nga ipakita ko unya kanimo.’”—Buhat 7:2, 3.
Hinuon, walay mausa karong adlawa ang dunay espisipikong sugo gikan sa Diyos nga mobiya sa iyang yutang-natawhan. Bisan pa niana, libolibong Kristohanon niining ika-20ng siglo naghikay sa ilang pagkabutang aron buhaton ang gibuhat ni Abraham—ang pagbalhin ngadto sa bag-ong mga dapit sa pagpauswag sa intereses sa Diyos. (Mateo 24:14; 28:19, 20; Roma 10:13-15) Nakaila sila nga “ang uma mao ang kalibotan” ug ang daghang dapit may dakong panginahanglan sa dugang tabang. (Mateo 13:38) Sama kang Isaias, misanong silang makusganon sa mga pulong ni Jehova, “Kinsay akong ipadala, ug kinsay moadto alang kanamo?” Kay nakasabot sa panginahanglan, sila mitubag usab, “Ania ako! Ipadala ako.”—Isaias 6:8.
Nganong Ginahimo Nila Kini?
Unsang matanga sa mga tawo ang mohimo sa maong lakang? Sila dili gikan sa usa ka linaing grupo sa panuigon o kagikan, ni nangangkon silag talagsaong mga katakos. Sila maoy mga tawo lamang si kinsa, sa usa ka butang, andam magpailalom sa personal nga mga tinguha ug mga kaharuhay alang sa intereses sa Gingharian sa Diyos. Kini nahisama sa dihang si Abraham mibiya sa bahandianon-sa-materyal ug haruhay nga siyudad sa Ur aron mopuyo sa mga tolda diha sa usa ka langyawng yuta.—Hebreohanon 11:8-10.
“Kanunay kaming nakasabot sa panginahanglan nga buhaton ang labing dako kutob sa mahimo sa pag-alagad kang Jehova,” matud sa usa ka magtiayon nga mibalhin kauban sa duha nila ka tin-edyer nga anak lalaki niadtong 1983. “Gibati namo ang gibati ni apostol Pablo sa miingon siya, ‘Ang panahong nahibilin hamubo’; busa mihukom kami sa ‘pag-adto sa Irlandiya’ ug pagtabang sa buluhaton didto.” (1 Corinto 7:29; itandi ang Buhat 16:9.) Sumala sa usa ka dili-literal nga paghubad, ang diwa sa mga pulong ni apostol Pablo sa 1 Corinto 7:29 mao: “Ang hinungdanong butang nga hinumdoman mao nga hamubo kaayo ang atong panahong nahibilin,” ug mao usab ang atong kahigayonan sa pagbuhat sa buluhaton sa Ginoo. (The Living Bible) Daghang matinuohong mga Kristohanon namalhin sa dapit diin sila gikinahanglan aron sa pagpahimulos niining mga kahigayonan una kana mawala ug sa pagpahimulos sa labing maayo sa bililhong panahong nahibilin.
“Nakita namo kini ingong maayong higayon nga kanunay ‘magbaton ug daghang buluhaton sa Ginoo.’” (1 Corinto 15:58) “Buot namong moalagad kang Jehova sa dapit nga kami makabuhat sa labing maayo.” “Gibati namong kami anaa sa posisyon sa panalapi sa pagbalhin ug kon kami makatagana sa usa ka panginahanglan sa laing dapit, sayop nga dili namo buhaton kana.” Ang maong mga ekspresyon nagabatbat sa mga pagbati sa daghan nga mihimog mga lakang sa pag-alagad diin sila labaw nga gikinahanglan. Ang maong mga Kristohanon nagbutang sa kasingkasing sa tambag nga makaplagan sa Proverbio 3:9, 27: “Pasidunggi si Jehova pinaagi sa imong mahalong mga butang ug sa inunahang mga bunga sa tanan ninyong abot. Ayaw pag-ihikaw ang maayo gikan niadtong kini nahiangay, sa dihang anaa sa gahom sa imong kamot ang pagbuhat niini.” Kay nakasusig maayo sa ilang mga kahimtang, nakahukom sila nga kini ‘anaa sa gahom sa ilang mga kamot sa pagbuhat’ sa malungtarong kaayohan sa ilang mga silingan sa ubang bahin sa kalibotan.—Tan-awa usab ang Roma 1:14, 15; Lucas 10:27-37.
Tingali ikaw makaarang sa paghimo nianang lakanga. Kon mao, ikaw maikag sa paagi nga ang pipila niadtong nakabalhin na nagatubag sa mosunod nga mga pangutana.
Unsay Angay Tagdon sa Dili pa Mobalhin?
Una mobalhin, konsultaha ang mga ansiano sa imong kaugalingong kongregasyon. Susiha kon unsay ilang hunahuna sa imong mga plano. (Proverbio 24:6) Tingali may mga hinungdan nganong dili maayo ang maong pagbalhin sa imong kahimtang, ug sila motabang kanimo sa pagtulotimbang sa tukma sa imong kahimtang. Pananglitan, ang usa ka tawo nga mobalhin kinahanglang lig-on sa espirituwal aron siya mahimong kaayohan ug dili kakulian sa bag-ong dapit.
Makigkontak sa sangang-buhatan sa mga Saksi ni Jehova sa nasod nga imong gilaomang balhinan—o pinaagi sa inyong lokal nga sangang-buhatan kon gilaoman nimo ang pagbalhin sulod sa imong nasod mismo. Kon posible, duawa ang giplanohang dapit aron may masayran ka bahin sa yuta ug sa katawhan sa dili pa mohimog panapos nga desisyon.
Analisaha ang imong mga motibo una mobalhin. Si Abraham mibalhin kay siya may lalom nga tinguha sa pagtuman sa kabubut-on sa Diyos, dili tungod sa espiritu sa pag-adbenturar o personal nga kapritso o kagustohan. Timbangag maayo ang tanang butang nalangkit. Mahimo kahang may suliran unya sa pinulongan? Makapahiuyon ka ba ngadto sa laing kultura ug klima? May espesyal ka bang panginahanglan sa panglawas? Ang tanang sakop sa pamilya bug-os kasingkasing bang nagapaluyo sa pagbalhin? Nahikay ba nimo ang imong kahimtang sa panalapi aron makabalhin kang malamposon? (Itandi ang Lucas 14:28.) Kini ug ang daghan pang butang nagkinahanglag mainampingon ug mainampoon nga pagpalandong.—Efeso 6:18.
Unsa ba ang mga Kalisod nga Tingali Pagaatubangon?
Sa dili pa gani mobalhin, basin maatubang nimo ang mga kalisod. Dili tanan ang may pagsabot sa mga butang sama kanimo. Tingali makadungog kag dili-mahunahunaon o negatibong mga komento. Hinumdomi, hinunoa, nga bisan si apostol Pedro misanong nga negatibo sa diha nga nadungog niya kon unsay mahitabo kang Jesus. Inay dasigon si Jesus nga magmalig-on sa pagbuhat sa kabubut-on ni Jehova, si Pedro miingon: “Magmaluluton ka sa imong kaugalingon, Ginoo; dili gayod mahitabo kini kanimo.” Sama kang Jesus, ihukom nga suklan ang bisan unsang negatibong sinultihan.—Mateo 16:22, 23.
Tapos ka mahiluna sa bag-ong dapit, ang kamingaw tingali usa ka dakong suliran. Ang gugma kang Jehova ug sa katawhan nga kinahanglang makadungog sa maayong balita sa iyang Gingharian mobulig kanimo sa pagsagubang niini. Daghang suliran ang magamaygamay kon himoon mo gayod nga inyong pinuy-anan ang inyong bag-ong dapit. Likayi ang paghimog negatibong mga pagtandi sa imong nangaging pinuy-anan, kay ang pagbuhat niana makapahinabog kadiskontento ug kayugot. Sa diha nga moatubang ug mga kalisod, hinumdomi ang pagdapit ni Jehova sa Malakias 3:10: “Palihog, sulayi ako, . . . kon dili ba akong pagabuksan alang kaninyo ang mga tamboanan sa mga langit ug igabubo kanimo ang panalangin hangtod nga wala nay panginahanglan.”
Unsang mga Panalangin ang Matagamtam?
Samtang modako ang imong pagkalangkit sa buluhaton sa pagmantala sa maayong balita, mouswag usab ang kalidad sa imong ministeryo. Maugmad nimo ang dugang mga kahanas ingong magtutudlo sa Pulong sa Diyos. Kini magdalag mga benepisyo dili lamang diha kanimo kondili sa tanan usab nga mamati kanimo. (1 Timoteo 4:15, 16) Dako gayod nga pribilehiyo ang pagdumalag mga pagtuon sa Bibliya sa balay ug pagtabang sa pagpagawas sa mga tawong mabuot ug kasingkasing gikan sa Babilonyanhong bakak nga mga pagtulon-an! Matagamtam mo ang kalipay nga gibatbat ni apostol Pablo sa misulat siya sa pipila nga iyang natabangan nga mahimong mga Kristohanon: “Unsa ba ang atong paglaom o kalipay o purongpurong sa kalipay—aw, dili ba sa pagkamatuod kamo man?” (1 Tesalonica 2:19) Oo, usa ka kalipay ug panalangin nga makaambit sa pagtabang sa mga indibiduwal ug mga kongregasyon nga mouswag sa espirituwal.
Si Abraham gitawag “higala ni Jehova” tungod kay siya misugot dayon sa pagtultol sa Diyos. (Santiago 2:21-23; Isaias 41:8) Makapalalom ka usab sa imong personal nga relasyon sa Diyos. Samtang manlimbasog ka sa iyang pag-alagad, masinati nimo ang iyang mahigugmaong pag-atiman ug pagpaluyo. Masabtan mo sa bug-os pa kon unsay gipasabot sa salmista sa miingon siya: “Tilawi ug tan-awa nga si Jehova maayo, Oh kamong katawhan.”—Salmo 34:8.
Si Tony, Margaret, ug ilang mga anak miatubang ug mga suliran sa diha nga sila mibalhin aron sa pag-alagad sa bug-os pa kang Jehova. Apan sa tabang ni Jehova, malamposon nilang nasagubang kadto. “Wala namo itugot nga ang mga kalisod maghikaw kanamo sa among kalipay,” matud nila. “Sa mga kahimtang sama sa among naatubang, kami nakatuon sa pagsalig sa dugang kang Jehova, ug among nakita ang iyang gahom diha sa tanang butang samtang ang sunodsunod nga suliran nahanaw.” Ang libolibong mga alagad ni Jehova karong adlawa nagpakita ug susamang pagtuo pinaagi sa pagbalhin ngadto sa dapit diin may dakong panginahanglan. Makahimo ka ba sa sama?
[Hulagway sa panid 23]
Ang panaghisgot sa pamilya makatabang sa labawng malamposong pagbalhin