Ikaw ba ‘Makaadto sa Macedonia’?
1. Nganong si Pablo ug ang iyang mga kauban miadto sa Macedonia?
1 Sa mga 49 K.P., si Pablo migikan sa Antioquia sa Sirya alang sa iyang ikaduhang misyonaryong panaw. Buot siyang moduaw sa Efeso ug sa ubang mga siyudad sa Asia Minor. Apan siya gisugo sa balaang espiritu sa ‘pag-adto sa Macedonia.’ Gikalipay niya kini ug sa iyang mga kauban, ug ilang natukod ang unang kongregasyon didto. (Buh. 16:9, 10; 17:1, 2, 4) Karon, dunay dakong panginahanglan sa dugang mangangani sa ubang bahin sa kalibotan. (Mat. 9:37, 38) Makatabang ka ba?
2. Nganong ang uban wala maghunahunang mobalhin sa laing nasod?
2 Tingali gusto kang magmisyonaryo sama kang Pablo apan wala ka maghunahunang mobalhin sa laing nasod. Pananglitan, basin dili ka kuwalipikadong moeskuyla sa Gilead tungod sa imong edad o tungod kay ikaw dalaga o may gagmay pang mga anak. Tingali wala ka maghunahunang mobalhin sa laing nasod kay malisdan ka sa pagkat-on ug laing pinulongan. O kaha mi-abroad ka aron manarbaho ug nagduhaduha sa pagbalhin. Apan human makaampo ug makapamalandong niini, imong nakita nga makahimo ka diay sa pagbalhin sa laing nasod diin mas dako ang panginahanglan.
3. Nganong dili na kinahanglan ang pagbansay ingong misyonaryo aron magmalamposon sa pagsangyaw sa laing nasod?
3 Kinahanglan ba ang Pagbansay Ingong Misyonaryo? Nganong nagmalamposon si Pablo ug ang iyang mga kauban? Sila misalig kang Jehova ug sa iyang balaang espiritu. (2 Cor. 3:1-5) Busa, bisag dili ka kuwalipikado alang sa linaing pagbansay, magmalamposon ka gihapon sa pagsangyaw sa laing nasod. Hinumdomi usab nga ikaw ginabansay diha sa Teokratikanhong Tunghaan sa Ministeryo ug sa Tigom sa Pag-alagad. Ug kon duna kay tumong nga moeskuyla sa Gilead o sa susamang tunghaan, ang imong pagbalhin sa laing nasod aron masulayan ang misyonaryong pag-alagad mapuslanon kanimo kon makadawat kag dugang pagbansay sa ulahi.
4. Nganong ang mga edaran makahimo gihapon sa pagbalhin sa laing nasod aron sa pagsangyaw?
4 Mga Edaran: Ang hamtong sa espirituwal nga mga edaran nga baskog pa dakog ikatabang sa mga nasod nga dunay panginahanglan. Miretiro ka na ba? Ang uban bisag igo-igo lang ang pensiyon maayo ra gihapog kahimtang sa mibalhin sa laing nasod diin ang mga galastohan, lakip ang pagpatambal, mas menos kon itandi sa nasod nga ilang gigikanan.
5. Iasoy ang kasinatian sa usa ka retiradong brader nga mibalhin sa laing nasod.
5 Ang usa ka retiradong brader nga ansiyano ug payunir gikan sa nasod nga nagsultig Iningles, mibalhin sa usa ka popular nga tourist spot sa Southeast Asia aron motabang sa usa ka grupong nagsultig Iningles nga may siyam ka magmamantala. Ilang gisangyawan ang 30,000 ka langyaw nga nagpuyo sa maong dapit. Sulod sa duha ka tuig, 50 ang nagtambongan sa mga tigom. Ang brader misulat: “Sukad nga mibalhin ko dinhi, dili nako ikahubit ang daghan kaayong panalangin nga akong natagamtam!”
6. Iasoy ang kasinatian sa usa ka dalaga nga mibalhin sa usa ka nasod nga may dakong panginahanglan.
6 Mga Dalaga: Gigamit ni Jehova ang mga babaye sa pagpakaylap sa maayong balita sa mga nasod nga may dakong panginahanglan. (Sal. 68:11) May usa ka batan-ong dalaga nga gustong moalagad sa laing nasod, apan nabalaka ang iyang mga ginikanan. Busa iyang gipili ang usa ka nasod nga maayog kahimtang sa politika ug ekonomiya. Misulat siya sa sangang buhatan ug nakadawat ug espesipikong mga impormasyon. Sulod sa unom ka tuig nga pagpuyo didto, siya nakatagamtam ug daghang panalangin. Siya misulat: “Sa amoa, diyutay ra kog gitun-an sa Bibliya. Apan sa nag-alagad ko sa dapit nga may dakong panginahanglan, daghan na kog gitun-an sa Bibliya ug naugmad ko ang katakos sa pagpanudlo.”
7. Iasoy ang kasinatian sa usa ka pamilya nga mibalhin sa laing nasod.
7 Mga Pamilya: Kon ikaw may mga anak, makapugong ba gyod kini kanimo nga mobalhin sa laing nasod aron sa pagsangyaw? Gisulayan kini sa usa ka pamilya nga may otso ug diyes anyos nga mga anak. Ang inahan misulat bahin sa ilang kasinatian: “Kami mapasalamaton nga napadako namo ang among anak dinhi kay nakauban nila ang mga espesyal payunir ug mga misyonaryo. Malipayon kaayo mi sa pag-alagad sa dapit nga dako ang panginahanglan.”
8. Posible bang makaalagad sa laing nasod nga dili na kinahanglang magtuon ug laing pinulongan? Ipatin-aw.
8 Problema sa Pinulongan: Nagduhaduha ka ba sa pagbalhin sa laing nasod tungod kay malisdan ka sa pagkat-on sa pinulongan? Lagmit ang imong pinulongan gigamit sa ubang mga nasod nga may dakong panginahanglan sa mga magmamantala sa Gingharian. Ang usa ka magtiayong nagsultig Iningles mibalhin sa nasod nga nagsultig Kinatsila nga may ubay-ubayng imigrante nga Ingles ug pinulongan. Human ang sangang buhatan magpadala kanilag impormasyon bahin sa mga kongregasyon nga nagsultig Iningles nga may dakong panginahanglan, sila nagpilig usa niini ug kaduha nila kini duawa. Mipauli sila ug gipakubsan ang ilang binulan nga galastohan, ug nagtigom ug kuwarta sulod sa usa ka tuig. Sa andam na silang mobalhin, gitabangan sila sa mga igsoon nga makakitag balay nga barato ra ang abang.
9, 10. Unsay mahimong konsiderahon niadtong nanglangyaw, ug ngano?
9 Nanglangyaw: Ikaw ba milangyaw sa laing nasod sa wala pa makakat-on sa kamatuoran? Tingali dunay dakong panginahanglan sa mga magmamantala sa imong yutang natawhan. Makapauli ka kaha aron makatabang? Tingali mas dali kang makakaplag ug trabaho ug kapuy-an kay sa uban nga gikan sa laing nasod. Gawas pa, imo na kining pinulongan ug lagmit ang mga tawo mas maminaw sa mensahe sa Gingharian nga imong gisangyaw kay sa uban nga dili taga-diha.
10 Usa ka Albaniano ang mikagiw sa Italya, nakakitag maayong trabaho, ug nagapadalag kuwarta sa iyang pamilya sa Albania. Human ma-Saksi, siya nagtudlog Albaniano ngadto sa usa ka grupo sa mga Italyanong espesyal payunir nga mobalhinay didto aron sa pag-alagad diin dako ang panginahanglan. Ang brader misulat: “Mangadto sila sa teritoryo nga akong gibiyaan. Dili sila makamaong mosultig Albaniano apan malipay silang moadto didto. Ang akong pinulongan ug kultura maoy Albaniano. Unya nganong ania man ko sa Italya?” Ang brader nakahukom nga mopauli sa Albania aron motabang sa pagsangyaw. Siya miingon: “Nagbasol ba ko nga gitalikdan ko ang trabaho ug kuwarta sa Italya? Wala gayod! Nakaplagan ko ang labing hinungdanong trabaho sa Albania. Alang kanako, ang trabaho nga tinuod nga hinungdanon ug mohatag ug malungtarong kalipay mao ang pag-alagad kang Jehova pinaagi sa paggamit sa tanan nimong nabatonan!”
11, 12. Unsay angayng buhaton niadtong buot moalagad sa laing nasod?
11 Kon Unsaon Kini Paghimo: Sa wala pa moadto sa Macedonia, si Pablo ug ang iyang mga kauban buot mopanaw pakasadpan, apan “sila gidid-an sa balaang espiritu,” busa sila mipanaw paamihanan. (Buh. 16:6) Sa hapit na silang moabot sa Bitinia, gipugngan sila ni Jesus. (Buh. 16:7) Si Jehova, pinaagi kang Jesus, nagpadayon sa pagdumala sa pagsangyaw. (Mat. 28:20) Busa, kon nagplano kang mobalhin sa laing nasod, pag-ampo kang Jehova alang sa giya.—Luc. 14:28-30; Sant. 1:5; tan-awa ang kahon nga “Kon Unsaon Pagkasayod nga May Panginahanglan ang Nasod nga Giplano Nimong Adtoan.”
12 Konsultaha ang inyong mga ansiyano ug ang ubang hamtong nga mga igsoon bahin niini. (Prov. 11:14; 15:22) Basaha ang atong mga publikasyon nga naghisgot sa pag-alagad sa laing nasod, ug panukiduki bahin sa nasod nga giplano nimong adtoan. Makaduaw ka ba didto, tingali bisag pipila lang ka adlaw? Kon interesado gyod kang mobalhin, sulati ang sangang buhatan sa maong nasod alang sa dugang impormasyon ginamit ang adres diha sa kinabag-ohang Tinuig nga Basahon. Apan, inay direktang mosulat sa sangang buhatan, ihatag kini sa inyong mga ansiyano, ug unya sila magbutag komento niini sa dili pa nila kini ipadala.—Tan-awa ang Organisado Aron Buhaton ang Kabubut-on ni Jehova, panid 111-112.
13. Sa unsang paagi makatabang kanimo ang sangang buhatan, apan unsay imong responsibilidad?
13 Ang sangang buhatan magpadala kanimog mapuslanong impormasyon bahin sa maong nasod aron makahimo kag desisyon. Apan dili sila mohatag ug sponsorship letters, residency, visa, o ubang legal nga mga dokumento o mangitag imong kasak-an. Ikaw ang angayng moatiman niini sa dili pa mobalhin. Dugang pa, ikaw ang mokontak sa mga embahada o konsulado aron mangayog impormasyon bahin sa mga kinahanglanon sa visa ug permiso sa pagtrabaho. Ikaw ang moatiman sa imong panginahanglan ug sa legal nga mga dokumento.—Gal. 6:5.
14. Nganong angayng magmabinantayon kon mobisita o mobalhin sa nasod nga gidili ang buluhaton?
14 Mga Nasod nga Gidili ang Buluhaton: Sa pipila ka nasod, ang mga igsoon kinahanglang magmabinantayon sa ilang kalihokan sa pagsimba. (Mat. 10:16) Ang mga magmamantala nga mobisita o mobalhin didto mahimong makabalda sa atong kalihokan ug makapameligro sa atong mga igsoon. Kon nagplano kang mobalhin sa maong nasod, palihog sulati ang inyong sangang buhatan pinaagi sa inyong lawas sa mga ansiyano sa dili ka pa moadto.
15. Kon dili ka makabalhin, sa unsang paagi nimo mapauswag ang imong ministeryo?
15 Kon Dili Ka Makabalhin: Kon dili ka makabalhin sa laing nasod, ayaw kaluya. Tingali may laing “dakong pultahan nga nagatultol ngadto sa kalihokan” nga bukas alang kanimo. (1 Cor. 16:8, 9) Basig ang inyong magtatan-aw sa sirkito may nahibaloang dapit nga dakog panginahanglan ug duol ra sa inyoha. Tingali makatabang ka sa duol nga kongregasyon o grupo nga langyawg pinulongan, o kaha mapauswag nimo ang imong ministeryo diha sa imong presenteng kongregasyon. Bisag unsa ang kahimtang, ang importante nga ikaw bug-os kalag sa imong pagsimba.—Col. 3:23.
16. Unsay angay natong bation niadtong buot mobalhin sa laing nasod?
16 May nailhan ka bang igsoon nga hamtong sa espirituwal nga nagplanong moalagad sa laing nasod? Nan tabangi ug dasiga siya! Sa mibiya si Pablo sa Sirya sa Antioquia, ikatulo kini sa kinadak-ang siyudad sa Imperyo sa Roma (sunod sa Roma ug Alejandria). Kay dako man kini nga teritoryo, ang kongregasyon sa Antioquia lagmit nagkinahanglan sa tabang ni Pablo ug naguol kaayo sa iyang pagbiya. Apan, wala hisgoti sa Bibliya nga gipugngan sa mga igsoon si Pablo. Inay maghunahuna sa ila lang teritoryo, sila nakasabot nga ang “uma mao ang kalibotan.”—Mat. 13:38.
17. Unsay mga benepisyo kon ikaw ‘moadto sa Macedonia’?
17 Gipanalanginan gayod si Pablo ug ang iyang mga kauban kay sila misanong sa pagdapit nga moadto sa Macedonia. Samtang didto sila sa siyudad sa Filipos, ilang nakaplagan si Lydia, ug “gibuksan pag-ayo ni Jehova ang iyang kasingkasing aron maminaw sa mga butang nga gisulti ni Pablo.” (Buh. 16:14) Handurawa ang kalipay ni Pablo ug sa iyang kaubang mga misyonaryo sa dihang nabawtismohan si Lydia ug ang tibuok niyang panimalay! Sa daghang kayutaan, adunay mga matinud-anog kasingkasing nga sama kang Lydia apan wala pa masangyawi. Kon ikaw ‘moadto sa Macedonia,’ malipay ka nga imo silang makaplagan ug matabangan.