Ikaw ba Makaalagad Diha sa Usa ka Langyawng Yuta?
“DUGAY na akong nangandoy nga mahimong misyonaryo. Sa ulitawo pa, nag-alagad ako sa Texas, T.B.A., diin dihay dakong panginahanglag mga magsasangyaw. Miduyog kanako didto ang akong asawa human sa among kaminyoon. Sa dihang nahimugso ang among anak nga babaye, naghunahuna ko, ‘Aw, dili na matuman ang akong mga plano alang sa misyonaryong buluhaton.’ Apan si Jehova mohimo sa mga tinguha nga matinuod, ilabina kon kini may kalabotan sa iyang kabubut-on.”—Jesse, nagaalagad karon sa Ecuador uban sa iyang asawa ug tulo ka anak.
“Wala gayod ako maghunahuna nga makahimo ako niana nga walay pagbansay sa misyonaryong tunghaan sa Gilead. Sa dihang akong nakita ang usa sa akong mga estudyante sa Bibliya nga magpakigpulong o magsangyaw, nalipay ako, ug nagpasalamat ako kang Jehova tungod sa paghatag kanako niining maong kahigayonan.”—Karen, usa ka dalaga nga nagpayunir sulod sa walo ka tuig sa Amerika del Sur.
“Human sa bug-os-panahong pagsangyaw sulod sa 13 ka tuig sa Tinipong Bansa, ang akong asawa ug ako mibati nga gikinahanglan namo ang usa ka bag-ong hagit. Mas malipayon kami karon; usa gayod kini ka maayo kaayong paagi sa kinabuhi.”—Tom, nagpayunir uban sa iyang asawa, si Linda, sa rehiyon sa Amazon.
Kining mapabilhong mga pagpahayag maoy gikan sa mga tawo kansang mga kahimtang wala magtugot kanila sa pagdawat ug misyonaryong pagbansay sa Watchtower Bible School of Gilead. Bisan pa niana, ilang naeksperyensiyahan ang mga kalipay ug mga hagit sa pag-alagad sa langyawng yuta. Sa unsang paagi kini nahitabo? Ang maong pag-alagad alang ba kanimo?
Hustong mga Motibo Gikinahanglan
Labaw pa sa espiritu sa adbentura ang gikinahanglan aron molampos diha sa usa ka langyawng yuta. Kadtong nakalahutay nakahimo niini tungod sa hustong mga motibo. Sama kang apostol Pablo, sila nag-isip sa ilang kaugalingon ingong mga utangan, dili lamang sa Diyos kondili sa mga tawo usab. (Roma 1:14) Puwede unta nilang tumanon ang balaang sugo sa pagsangyaw pinaagi sa pagpakigbahin sa ministeryo diha sa ilang kaugalingong dapit. (Mateo 24:14) Apan sila mibati nga utangan ug napalihok sa pag-abot ug pagtabang niadtong talagsa rang makabaton sa higayon nga makadungog sa maayong balita.
Ang tinguha sa pagsangyaw diha sa mas mabungahong teritoryo sagad nga maoy laing motibo—ug angayan gayod. Kinsa ba kanato nga sa dihang nakakitag laing mangingisda nga daghan kaayog nasikop dili moduol nianang maong luna sa linaw? Sa susama, ang makapalipayng mga taho sa talagsaong mga pag-uswag sa ubang kayutaan nakadasig sa daghan sa pag-adto sa dapit diin dunay “dakong duot sa isda.”—Lucas 5:4-10.
Palandonga ang Sakripisyo nga Nalangkit
Daghang nasod ang dili motugot sa langyaw nga relihiyosong mga boluntaryo sa pagkuhag sekular nga trabaho. Busa kadtong nagtinguha sa pag-alagad sa langyawng nasod sagad nga kinahanglang may kaugalingong salapi. Sa unsang paagi naatubang kining maong problema sa panalapi? Daghan ang nagbaligya o nagpaabang sa ilang mga balay aron makakuha sa gikinahanglang kuwarta. Gibaligya sa uban ang ilang mga negosyo. Ang pipila nagtigom ug kuwarta alang sa ilang tumong. Ang uban pa nag-alagad sa usa ka langyawng yuta sulod sa usa o duha ka tuig, mibalik sa ilang yutang natawhan sa pagtrabaho ug pagtigom ug kuwarta, ug dayon mibalik sa pag-alagad pag-usab.
Ang dakong bentaha sa pagpuyo diha sa nagakaugmad nga nasod mao nga ang kasarangang gastos sa panginahanglan sa kinabuhi kasagarang mas ubos kay sa mas naugmad nga nasod. Nagtugot kini sa pipila nga makakinabuhi sa igoigong pensiyon. Siyempre, ang mga galastohan sa usa ka tawo nag-agad ug dako sa sukdanan sa pagkinabuhi nga pilion niya. Bisan diha sa nagakaugmad nga kanasoran, ang komportable kaayong mga puy-anan makaplagan apan sa mas dakong kantidad.
Dayag, angayng kuwentahon ang mga galastohan sa dili pa mobalhin. Bisan pa niana, labaw pa ang nalangkit kay sa pagtimbangtimbang lamang sa gastos. Tingali ang mga komento sa pipila nga nag-alagad sa Amerika del Sur makapatin-aw.
Ang Kinadak-ang Hagit
“Ang pagtuon ug Kinatsila sagubangonon kaayo alang kanako,” nahinumdom si Markku, nga taga-Pinlandia. “Nagtuo ko nga sanglit dili ko mahibalo sa pinulongan, dugaydugay pa una ako makaalagad ingong ministeryal nga alagad. Pagkadakong sorpresa sa dihang gihangyo ako sa pagdumala sa pagtuon sa libro human lamang sa duha ka bulan! Siyempre, dihay daghang makauulawng mga higayon. Nalisdan ko ilabina sa mga ngalan. Usa ka adlaw niana akong gitawag si Brader Sancho nga ‘Brader Chancho (baboy),’ ug dili gyod ko malimot nga akong gitawag si Sister Salamea nga ‘Malasea (daotan).’ Maayo na lang, ang mga igsoon mapailobon kaayo.” Sa ngadtongadto si Markku nag-alagad sulod sa walo ka tuig diha sa maong nasod ingong magtatan-aw sa sirkito uban sa iyang asawa, si Celine.
Si Chris, ang asawa ni Jesse nga gikutlo ganina, nag-asoy: “Akong mahinumdoman ang unang duaw sa among magtatan-aw sa sirkito, sa dihang tulo ka bulan pa lang kami dinhi. Akong naaninaw nga ang igsoon migamit ug mga ilustrasyon ug may nindot nga butang nga gisulti aron sa pag-abot sa among mga kasingkasing, apan wala ko makasabot niya. Didto mismo sa tigomanan, mihilak ko. Dili kadto hilom nga paghilak; nagbakho ako. Human sa tigom, naningkamot kong ipatin-aw ang akong lihok ngadto sa magtatan-aw sa sirkito. Maluloton kaayo siya ug gisultihan ako sa kanunayng gisulti sa tanan kanako, ‘Ten paciencia, hermana’ (‘Pagpailob lang, sister’). Duha o tulo ka tuig sa ulahi, nagkita na usab kami ug nag-estoryahanay sulod sa 45 minutos, nalipay sa kamatuoran nga kami makakomunikar.”
“Hinungdanon ang pagtuon,” nag-ingon ang laing brader. Kon mas dakong paningkamot ang atong himoon sa pagtuon sa pinulongan, labaw pa natong mapauswag ang atong mga katakos sa komunikasyon.”
Ang tanan mouyon nga ang maong mga paningkamot mohatag ug daghang kaayohan. Ang pagkamapaubsanon, pagkamapailobon, ug pagkamalahutayon maugmad sa dihang ang usa ka tawo maningkamot sa pagtuon ug bag-ong pinulongan. Ang usa ka dakong pultahan sa oportunidad mabuksan aron makasangyaw sa maayong balita ngadto sa uban. Pananglitan, ang pagtuon ug Kinatsila makapaarang sa usa nga makakomunikar diha sa pinulongan nga ginasulti sa kapin sa 400 ka milyong tawo sa kalibotan. Daghan nga sa ulahi kinahanglang mopauli sa ilang yutang natawhan nakagamit gihapon sa ilang kahanas sa pinulongan sa pagtabang sa mga tawong Kinatsila ang pinulongan.
Komosta ang Kamingaw?
“Sa among unang pag-abot sa Ecuador sa 1989,” nahinumdom si Deborah, nga nag-alagad uban sa iyang bana, si Gary, sa rehiyon sa Amazon, “mingawon ko kaayo. Nakakat-on ako sa pagdepende sa mga igsoon sa kongregasyon. Sila nahimong morag pamilya nako.”
Si Karen, nga gihisgotan sa sinugdanan, nag-ingon: “Akong gisuklan ang kamingaw pinaagi sa pagpakigbahin sa ministeryo adlaw-adlaw. Niining paagiha dili ko magsigeg pangandoy sa amo. Gibutang ko usab kanunay sa hunahuna nga gipasigarbo sa akong mga ginikanan didto sa amo ang akong buluhaton sa langyawng yuta. Si Mama kanunayng nagdasig nako niining mga pulonga: ‘Mas makaatiman ug maayo kaninyo si Jehova kay sa akong pag-atiman.’”
Si Makiko, nga taga-Hapon, masiawon nga midugang: “Human sa paggugol ug tibuok adlaw sa pag-alagad sa kanataran, kapoy na kaayo ko. Busa sa dihang moabot ko sa balay ug mosugod sa pagbatig kamingaw, sagad nga makatulog ako. Tungod niini, ang kamingaw dili kaayo magdugay.”
Komosta ang Bahin sa mga Bata?
Kon bahin na sa mga bata, kinahanglang hatagan ug konsiderasyon ang ilang mga panginahanglan, sama sa edukasyon. May kalabotan niini ang uban mipili sa paghatag ug edukasyon diha sa balay samtang ang uban nagpaenrol sa ilang mga anak sa lokal nga mga eskuylahan.
Si Al mibalhin sa Amerika del Sur uban sa iyang asawa, duha ka anak, ug inahan. Siya miingon: “Among nakaplagan nga ang pagpaeskuyla sa mga bata nagtabang kanila nga dali kaayong makakat-on sa pinulongan. Sulod sa tulo ka bulan sila larino na kaayo.” Sa laing bahin, ang duha ka tin-edyer nga mga anak nga lalaki ni Mike ug Carrie nag-eskuyla sa giila nga tunghaan pinaagig sulat. Ang mga ginikanan nag-ingon: “Among nakaplagan nga ang ingon niining matanga sa mga pagtuon dili mahimong itugyan lamang ngadto sa mga bata. Kinahanglan kaming makigbahin sa maong kurso ug naneguro nga masunod gayod sa mga bata ang giasayn nga kurikulum.”
Si David ug Janita, nga taga-Australia, nagpadayag sa ilang mga pagbati bahin sa ilang duha ka anak nga lalaki. “Buot namo nga makita mismo sa mga bata ang paagi sa pagkinabuhi sa uban. Sayon ang pagtuo nga ang estilo sa kinabuhi nga among gidak-an mao ang naandan, apan sa pagkatinuod minoriya lamang kami. Nakita usab nila kon sa unsang paagi ang teokratikanhong mga prinsipyo nahimong epektibo sa tibuok kalibotan, bisag unsa pang nasora o kultura.”
“Kuwatro anyos lamang ako sa dihang ang among pamilya mibiya sa Inglaterra sa 1969,” nahinumdom si Ken. Bisan tuod nahigawad ako tungod kay wala kami magpuyo sa payag nga ginama sa lapok nga giatpan ug kogon, nga maoy akong gipanan-aw, akong gibati nga naagian ko ang labing makaiikag kaayo nga pagmatuto sa usa ka batan-on. Maluoy gayod ako sa ubang kabataan nga wala makatagamtam sa samang kahigayonan! Tungod sa maayong pagpakig-uban sa mga misyonaryo ug mga espesyal payunir, nagsugod ako sa pag-oksilyare payunir sa edad nga siyam.” Si Ken usa na karon ka nagapanawng magtatan-aw.
“Ang Ecuador mao na gayod ang among pinuy-anan karon,” miuyon si Gabriella, anak nga babaye ni Jesse. “Nalipay kaayo ako nga ang akong mga ginikanan nakadesisyon sa pag-anhi dinhi.”
Sa laing bahin, may mga bata nga wala makapasibo tungod sa nagkadaiyang mga rason, ug ang ilang mga pamilya kinahanglang mobalik ngadto sa ilang mga yutang natawhan. Mao kana kon nganong ginasugyot ang pagduaw sa langyawng nasod sa dili pa mobalhin didto. Niining paagiha mahimo ang mga desisyon pinasikad sa direktang impormasyon.
Mga Panalangin Tungod sa Pagbalhin
Sa pagkatinuod, ang pagbalhin ngadto sa langyawng yuta naglangkit ug daghang hagit ug mga sakripisyo. Kini ba napamatud-ang mapuslanon alang niadtong namalhin? Tugoti sila sa pagsugilon kanato.
Jesse: “Sa napulo ka tuig nga pagpuyo namo sa siyudad sa Ambato, among nakita ang pagdaghan sa kongregasyon gikan sa 2 ngadto sa 11. Nakapribilehiyo kami sa pagtabang sa pagsugod ug lima niadtong maong mga kongregasyon, ug nakatrabaho kami sa pagtukod sa duha ka Kingdom Hall. Nakabaton usab kami sa kalipay sa pagtabang ug aberids nga duha ka estudyante sa Bibliya kada tuig aron makuwalipikar alang sa bawtismo. Usa lamang ka butang ang akong gimahayan—mianhi unta kami dinhi napulo ka tuig nga mas sayo.”
Linda: “Ang apresasyon sa mga tawo sa maayong balita ug sa among mga paningkamot nakadasig ug dako kanamo. Pananglitan, sa usa ka gamayng lungsod sa lasang, ang usa ka estudyante sa Bibliya nga ginganlag Alfonso nakasabot kon unsa ka mapuslanon ang paghimog publikong mga pakigpulong diha sa iyang dapit. Mao pay iyang pagbalhin ngadto sa iyang bag-ong gitukod nga balay nga kahoy, usa sa pipila lang diha sa balangay. Kay nakahukom nga ang iyang balay mao lamang ang tinukod diha sa lungsod nga takos kang Jehova, mibalik siyag puyo didto sa iyang payag nga kogon ug gihatag ang iyang balay ngadto sa mga igsoon aron gamiton ingong Kingdom Hall.”
Jim: “Ang panahon nga among ginagugol sa aktuwal nga pagpakig-estorya sa mga tawo sa ministeryo maoy labaw ug napulo ka pilo kay sa gigugol diha sa Tinipong Bansa. Dugang pa, ang lakat sa kinabuhi dinhi mas hinay. Wala gayoy duhaduha nga adunay mas daghang panahon alang sa pagtuon ug pag-alagad sa kanataran.”
Sandra: “Ang pagkakita kon sa unsang paagi ang kamatuoran sa Bibliya makausab sa mga tawo nga mahimong maayo naghatag kanakog dakong katagbawan. Akong gitun-an sa Bibliya kanhi si Amada, ang 69-anyos nga tag-iya sa gamayng groseriya. Iya kanunayng dugangan ug duha ka bahing tubig ang matag napulo ka bahing gatas. Dugang pa niyang gitikasan ang iyang mga kustomer pinaagi sa pagbaligya kanila niining sinagolang gatas nga kulang sa bug-os nga sukod. Apan pagkahuman sa pagtuon sa leksiyon ubos sa sub-ulohang ‘Pagkamatinud-anon Mosangpot sa Kalipay’ sa kapitulo 13 sa librong Kahibalo nga Motultol sa Kinabuhing Walay Kataposan, gihunong ni Amada kining sayop nga mga buhat. Pagkadakong kalipay nga makita siyang nagpabawtismo pipila ka panahon human niana!”
Karen: “Wala pa gayod ako sukad makasalig ug dako kang Jehova o magamit niya sa dakong paagi parehas sa nahimo ug nahitabo nako sa dinhi na ako. Ang akong pakighigala kang Jehova nahimong mas lalom ug mas lig-on.”
Ikaw Komosta?
Latas sa katuigan linibo ka Saksi ang namalhin aron sa pag-alagad sa laing nasod. Ang pipila nagpabilin sulod sa usa o duha ka tuig, ang uban sa panahong walay kinutoban. Sila nagdala sa ilang mga kasinatian, espirituwal nga pagkahamtong, ug pinansiyal nga kahinguhaan, nga may tumong sa pagpauswag sa intereses sa Gingharian diha sa langyawng yuta. Sila nakaalagad sa mga dapit diin ang lokal nga mga magmamantala sa Gingharian dili makaalagad tungod sa kanihit sa sekular nga panarbaho. Daghan ang mipalit ug four-wheel-drive nga mga sakyanan aron makobrehan ang mga teritoryong lisod maabot sa laing paagi. Ang uban, tungod kay mas gusto ang kinabuhi sa siyudad, nahimong makapalig-ong impluwensiya diha sa dagkong mga kongregasyon diin diyutay ra ang mga ansiyano. Apan, sa walay eksepsiyon, ang tanan moinsistir nga sila nakadawat ug mas dako pa kay sa ilang nahatag kon bahin sa espirituwal nga mga panalangin.
Makapakigbahin ka ba sa pribilehiyo sa pag-alagad diha sa usa ka langyawng yuta? Kon itugot sa imong mga kahimtang, nganong dili susihon ang posibilidad sa paghimo sa maong pagbalhin? Ang una ug hinungdanong lakang mao ang pagsulat ngadto sa sangang opisina sa Sosyedad diha sa nasod diin ikaw naghunahunang mag-alagad. Ang espesipikong impormasyon nga imong madawat magtabang kanimo sa pagtino sa imong purohan nga magmalamposon. Dugang pa, daghang praktikal nga mga sugyot ang makaplagan diha sa artikulong “Biyai ang Imong Yuta ug ang Imong mga Kaparyentihan,” diha sa Agosto 15, 1988, nga gula sa Ang Bantayanang Torre. Uban sa hustong pagplano ug panalangin ni Jehova, malagmit ikaw usab makasinati sa kalipay sa pag-alagad diha sa usa ka langyawng yuta.
[Hulagway sa panid 24]
SI TOM UG LINDA DIHA SA USA KA HILIT NGA DALANDALAN, NGA PADULONG SA KOMUNIDAD SA MGA SHUAR INDIAN
[Hulagway sa panid 25]
DAGHAN ANG NAG-ALAGAD DIHA SA QUITO, ANG KAULOHANG SIYUDAD SA ECUADOR
[Hulagway sa panid 25]
SI MAKIKO NAGSANGYAW SA KABUKIRAN SA ANDES
[Hulagway sa panid 26]
ANG PAMILYANG HILBIG NAG-ALAGAD SA ECUADOR SULOD SA MILABAYNG LIMA KA TUIG