“Angay ba Akong Mobalhin?”

¹ Agig sanong sa sugo ni Jesus nga “panglakaw . . . paghimog mga tinun-an sa katawhan sa tanang kanasoran,” daghang dedikadong mga alagad ni Jehova mibalhin aron sa pag-alagad diin mas dako ang panginahanglan. (Mat. 28:19) Sila misundog kang Pablo, kinsa misanong sa awhag: “Tabok ngadto sa Macedonia ug tabangi kami.” (Buh. 16:9) Sa unsang paagi mahimo kini diha sa praktikal nga paagi?

² Himoa ang Usa ka Tikang sa Matag Higayon: Aduna bay talagsa-matrabaho nga teritoryo sa inyong kongregasyon? Kon mao, ikaw lagmit magsentro sa imong mga paningkamot diha nianang mga dapita. Sa dili pa mohukom sa pag-adto bisan asa, konsultaha ang imong mga ansiyano aron mahibaloan kon sila ba mibati nga ikaw andam na sa pagbalhin. Mahimo usab nimong pangutan-on ang imong magtatan-aw sa sirkito kon duna ba siyay nahibaloang duol nga kongregasyon diin ikaw makapalapad sa imong ministeryo. Sa laing bahin, human sa mainampingong pag-ihap sa bili, tingali buot nimong konsiderahon ang pagtabang sa laing bahin sa nasod o sa laing nasod. Kon kini ang imong tinguha, ikaw kauban sa imong lawas sa mga ansiyano kinahanglang mosulat sa sangang buhatan diin ikaw interesado sa pag-alagad, nga naglaraw sa imong teokratikanhong kasinatian. Maalamon tingali nga duawon ang dapit sa dili pa mohukom kon himoon ba o dili ang permanenteng pagbalhin.

³ Mag-amping Bahin sa Paglalin: Nagkadaghang gidaghanon sa atong mga igsoon ang namalhin sa laing mga nasod tungod kay sila nangitag mas maayong sukdanan sa panginabuhi o kahupayan gikan sa pagdaogdaog. Kasamtangan, ang pipila nabiktima sa walay tanlag nga mga tawo kinsa nanaad nga motabang kanila sa pagpahiluna sa bag-ong nasod apan gikuha lamang ang ilang salapi ug dayon gilayasan sila. Sa ubang mga kaso kining mga tawhana mosulay pa gani sa pagpugos sa mga lalin ngadto sa imoral nga pagkaulipon. Sa dihang sila modumili, sila pasagdan nga mailalom sa gahom sa nasod nga ilang gisudlan. Busa ang kahimtang sa mga lalin nahimong grabe kay nianang sa ilang kaugalingong nasod. Basin sila kinahanglan pa ganing mohangyo sa mga igsoon sa pagpapuyo ug sa laing paagi magpatabang kanila, nga nagpabug-at sa ubang Kristohanong mga pamilya kinsa nakigbisog sa ilang kaugalingong mga problema ug mga kalisdanan. Ang mga membro sa pipila ka panimalay nahimulag sa pisikal nga paagi gikan sa usag usa, ug ang mga pamilya naluya sa espirituwal nga paagi tungod nianang wala hunahunaa pag-ayo nga mga pagbalhin.​—1 Tim. 6:​8-​11.

⁴ Kon buot nimong mobalhin alang sa personal nga bentaha, ibutang sa hunahuna nga bisan asa ka pa magpuyo, adunay mga problema nga atubangon. Mas sayon nga buntogon kanang mga problemaha sa dapit nga nahibalo ka na sa pinulongan ug kultura, inay kay magsugod na usab diha sa di-sinating mga palibot.