Ang Ipasabot sa mga Balita
Lunop Wala Pasobrahi
Ang asoy sa Bibliya sa usa ka tibuok-yutang lunop dugay nang gisaway ingon nga gibase kono sa tinumotumong estorya inay sa tinuod nga hitabo. Ang New Catholic Encyclopedia nagpatuo: “Gikauyonan nga malangkobon karon nga ang hitabo ni Noe ug sa arka dili usa ka taho sa kasaysayan kondili hinanduraw nga mugna sa katitikan sa bug-os laing dagway.” Giergo sa mga maduhaduhaon nga ang tanang kabasaon sa atmospera makapahinabo lamag pila ka pulgadang ulan sa tibuok yuta.
Apan sumala sa asoy sa Genesis, ang tinubdan sa katubigan sa lunop dili lamang ang kabasaon sa atmospera. Sa Genesis 1:6 kita giingnan nga ang Maglalalang mihukom: “Mahimo ang usa ka [atmosperikong] hawan sa taliwala sa mga tubig ug pagabahinon niini ang katubigan [sa kadagatan] ug ang katubigan [ibabaw sa hawan].” Ang katubigang nagbitay ibabaw sa hawan lagmit nagpabilin didto hangtod sa Lunop. Sumala ni apostol Pedro, ang atmosperikong “mga langit” ug ang katubigan ibabaw ug ilalom niana mao ang gigamit nga niana “ang kalibotan sa panahon [ni Noe] nakaagom ug kalaglagan sa dihang kadto gilunopan sa tubig.”—2 Pedro 3:5, 6; Genesis 1:7.
Ang pagpanglaglag sa usa ka lunop sa tubig gibati sa bag-o pa sa Habagatang Aprika sa dihang nahitabo ang usa ka lunop sa probinsiya sa Natal ug nahunos ang kapin sa 300 ka kinabuhi. Sa pagkomento bahin sa katalagman, ang konserbasyonistang si K. H. Cooper miingon: “Ako kadaghanan maghunahuna kon unsay mahitabo niining adlawa ug panahona kon ugaling mag-ulan ug 40 ka adlaw ug 40 ka gabii nga walay hunong. . . . Ang ingon kahang ulan makapapas sa halos tanang kinabuhi sa yuta? Kay nakakita karong bag-o kon unsay nahitabo tapos lamang sa upat ka adlaw nga ulan sa Natal,” mipadayon si Cooper, “ako kombinsido na karon sa pagkatinuod sa estorya sa Daang Testamento.”
Kabalaka Alang sa mga Kabos?
Sa unsang paagi matak-opan ang ulang nga nagabulag sa kabos gikan sa dato? Kana ang suliran nga gihisgotan ni Papa Juan Paulo II sa bag-ong ensiklikal nga nag-ulohang Sollicitudo rei socialis (The Social Concern). Ang papa nagtuo nga angay bation sa iglesya nga obligado nga hupayon ang kalisdanan niadtong nagaantos. Sa unsang paagi? “Kay nagaatubang sa mga kaso sa kawalad-on, ang usa dili makapasagad kanila sa pagpalabi sa hinobrang mga adorno sa simbahan ug mahalong mga galamiton alang sa balaang pagsimba; sa kaatbang maobligar kini nga ibaligya ang maong mga butang aron itagana ang pagkaon, ilimnon, sinina ug puy-anan alang niadtong nakulangan niining mga butanga.”
Bisan pa niana, sa pagkomento mahitungod sa ensiklikal sa papa, ang eksperto sa Batikano si Domenico Del Rio miingon diha sa La Repubblica: “Tin-aw nga ang katawhan karon maghulat aron tan-awon . . . nga ang papa mismo, ug kadtong anaa alirong niya, maoy mohatag ug sulundan. Ang basilica sa Batikano ug ang mga basilica sa Roma napunog ‘mahalong mga adorno,’ tingali usab sa ‘hinobrang mga dayandayan sa simbahan.’” Apan, sumala sa magasing Fortune, “ang opisyales sa Batikano masuko sa ideya nga mawad-an bisag usa ka Gresyanhong urna aron ipatungha ang salapi.”
Sa giingnan ni Jesus ang usa ka datong magmamando nga ‘ibaligya ang tanan niyang katigayonan ug ihatag ang salapi ngadto sa mga kabos,’ kadtong tawhana dili buot mobuhat niana. Siya “milakaw nga magul-anon, kay daghan man siyag katigayonan.” Tukma, si Jesus nagpasidaan: “Kay hain gani ang imong bahandi, atua usab didto ang imong kasingkasing.”—Marcos 10:21, 22; Mateo 6:21.