Ang Dakong Dibuhista—Si Jehova!
“ANG mga dibuhista nagadibuhog dili-maisip nga pagsubang ug pagsalop sa adlaw ug ang ilang mga dibuho mahalin sa gatosgastos, libolibo pa ganing dolyar. Bisan pa, si Jehova nga Diyos, ang Dakong Dibuhista ug Tagmugna sa mga pagsubang ug pagsalop sa adlaw, nagahatag kanatog usa kada adlaw—walay bayad. Ang mga orihinal mas matahom kay sa mga kopya. Dili ba mohatag kana natog katarongan sa pagpabili kaniya ingong Maglalalang?” Pangatarongan pa sa usa ka nagapanawng magtatan-aw sa mga Saksi ni Jehova sa Hawaii sa panahon sa usa sa iyang mga pakigpulong sa usa ka kongregasyon.
Ang usa ka babayeng ateyista, nga miduaw sa Kingdom Hall sa unang higayon, mitambong. Nakaalinggat siya sa pangatarongan sa ministro, apan nagpabilin gihapon ang lig-ong mga pagduhaduha bahin sa paglungtad sa Diyos. Apan, samtang nagmaneho sa pagpauli sa balay gikan sa trabaho sa milabay ang duha ka semana sa ulahi, naabtan siya sa bagang trapiko. Dinhi nakakita siyag usa ka matahom nga pagsalop sa adlaw. Mibalik ang iyang mga hunahuna sa pakigpulong sa nagapanawng magtatan-aw.
Siya miasoy: “Inay masuko nga naabtan sa trapiko, akong namatikdan ang matahom nga pagsalop sa adlaw, ug nakapahinumdom kini kanako sa gipahayag sa mamumulong bahin sa pagpabili kang Jehova nga Diyos ingong Dibuhista ug Maglalalang. Kini nakapahunahuna kanako, ‘Tingali tinuod ang iyang giingon; tingali duna gayoy Maglalalang.’ Gihunahuna ko kini samtang mipauli ako, ug niadtong gabhiona akong gitawag ang akong higala kinsa midapit kanako sa sinugdan sa Kingdom Hall. Misugod ako sa pagtuon sa Bibliya, ug karon nagasimba na ako kang Jehova nga akong Diyos ug Maglalalang.”
Sama sa salmista, kining babayehana dili lamang nakadangat sa pagpabili kang Jehova ingong Dakong Dibuhista sa kalalangan kondili midangat usab sa pag-awit sa iyang mga pagdayeg. Misulat ang salmista: “Dayega si Jehova sa kalangitan . . . Dayegon ninyo siya, adlaw ug bulan. Dayegon ninyo siya, kamong tanang kabitoonan sa kahayag. . . . Ipapadayeg kanila ang ngalan ni Jehova; kay siya nagsugo, ug sila nangahimo.”—Salmo 148:1-5.