Mga Magmamantala sa Gingharian Nagtaho
Si Jehova Naglig-on sa Iyang Matinumanong mga Alagad
SI Jesus miingon: “Ang ulipon dili labaw sa iyang agalon. Kon ako ilang gilutos, kamo usab ilang pagalutoson.” (Juan 15:20) Apan ang matinumanong mga alagad ni Jehova gipasaligan nga sila iyang lig-onon. (Salmo 18:2; Nahum 1:7) Sa usa ka Aprikanhong nasod diin ang malinawong buluhaton sa mga Saksi ni Jehova grabeng gipiotan, si Jehova naglig-on sa iyang mga alagad atubangan sa mga pagbunal ug mga pagdakop, sumala sa gipakita sa mosunod nga taho:
“Ang usa ka magtatan-aw sa sirkito ug upat ka lokal nga igsoong lalaki sa dili makataronganon gidakop ug gibalhog ngadto sa usa ka gamayng kuwarto nga kasagarang butanganan sa nahisalaag nga mga iro,” matud sa taho. “Sila gihuptan didto sulod sa 123 ka adlaw nga nagpurol lamang ug wala gani tugting mogawas aron moadto sa kasilyas.” Ang usa ka membro sa Parliamento nakadungog sa ditawhanong mga kahimtang ug misugod sa pagprotesta, ug sa kataposan, tapos sa 123 ka adlaw, ang mga igsoong lalaki gibuhian. Gilig-on ni Jehova ang maong matinumanong mga igsoong lalaki pinaagi sa iyang espiritu.
Ang laing kasinatian gikan sa mao mismong nasod nagapakita sa maayong mga epekto sa atong buluhaton sa pagsangyaw. Ang taho nagsugid: “Sa usa ka balangay, ang mga tawo may dungog sa pagkamabangis ug pagkarebelde. Bisan pa niana, tapos sa pagsangyaw didto sa mga Saksi ni Jehova, daghan ang mitahod na sa lokal nga mga awtoridad ug misugod sa pag-apil sa senemanang trabaho sa komunidad sa mga karsada.” Usa ka lokal nga hepe buot mahibalo sa hinungdan sa maong kausaban sa tinamdan sa mga tawo ug gisultihan: “Tungod sa pagtudlo sa ‘pastor’ sa mga Saksi ni Jehova.” “Usa ka adlaw ang maong hepe nagdapit nako ngadto sa iyang balay,” matud sa Saksi, “ug nagdasig nako nga ipadayon ang maong maayong buluhaton. Gihatagan niya akog usa ka dakong manok ingong gasa aron makaon uban sa akong pamilya.” Sa laing okasyon, ang lokal nga alkalde miduaw sa igsoon, ug gipadayon siya sa igsoon ug gisangyawan. Ang alkalde “mihangyog pila ka magasin ug miingon, ‘Sa akong hunahuna kamo dili makahimog kadaot. Ipadayon ang paghimog mga pag-apelar. Kami wala pay mando sa pagdakop kaninyo. Sa akong hunahuna sa dili madugay sulbaron sa Estado ang inyong problema.’”
Ang usa ka espesyal payunir misulat: “Human sa mga sumbong gikan sa sekretaryo sa politikanhong partido, ang lokal nga hepe mimando nga ako dakpon ug prisohon sa usa ka hugawng atob nga nahugawan sa ihi ug tai sa hayop. Ako gibutang sa maong kangitngit sulod sa lima ka adlaw. Sa pagpadulong didto, ako miampo kang Jehova ug nahinumdom sa Salmo 50:15. Ang mga guwardiya didto naluoy kanako ug wala magtak-op sa bug-os sa pultahan aron ako makaginhawag diyutayng lab-as nga hangin. Tapos sa lima ka adlaw sa maong prisohan, ako gisulayan sa dihang gihatagan akog kanding nga dad-on ngadto sa lokal nga hepe, nga walay eskorte. Sanglit ako wala mokalagiw, ako gihatagag kagawasan kada adlaw gikan sa 3:00 s.h. hangtod sa 7:00 s.g. Ako makatagbo sa mga igsoon, ug kami makasangyaw sa tingob. Bisan pag ako nagsakit sa maong lisod nga panahon ug naglaom ang akong mga kaaway nga ako mamatay, si Jehova wala gayod mobiya kanako. Ang maong kasinatian nakapasuod nako kang Jehova, ug ako nakatino nga ang paglutos dili gayod magbulag kanako gikan sa katawhan ni Jehova.”—Itandi ang Roma 8:35-39.
Ang mga Saksi ni Jehova nagapabili kon giunsa sa Diyos sa paglig-on kanila sa mga panahon sa kalisod. Sila nagapabili usab niadtong nagapakitag kalulot kanila samtang ginapadayon nila kining labing hinungdanong moluwas-kinabuhing buluhaton sa pagwali sa maayong balita. Dili gayod hikalimtan ni Jehova ang maong kalulot.—Mateo 25:40.