Usa ka Kahibulongang Karera
57 Anyos sa Misyonaryong Kinabuhi
Sumala sa giasoy ni Eric Cooke
SA NAMASIBAS na ang kahayag, miakbo ako sa barandilya sa barko nga tigtabok sa kanal ug misud-ong sa lama sa kapunawpunawan. Ang akong manghod nga lalaki ug ako migikan sa Southampton, Inglaterrra, sa miaging gabii ug nagpadulong sa Saint-Malo, Pransiya. Mga turista? Dili, ang among tuyo mao nga dad-on ang mensahe sa Gingharian sa Diyos ngadto sa Pransiya. Sa pag-abot sa Saint-Malo, gikuha namo ang among mga bisikleta ug mipaingon sa habagatan.
Kana ang pagsugod sa akong manghod nga lalaki nga si John ug ako sa langyaw nga misyonaryong pag-alagad sa kapig 57 ka tuig kanhi. Unsay mitultol sa among pagsulod sa bug-os-panahong pag-alagad? Unsay mitukmod namo sa pagbiya sa nahilunang pagkinabuhi sa hamugaway Ingles nga panimalay?
Kon Unsay Nag-impluwensiya sa Among Kinabuhi
Niadtong 1922 ang akong inahan mitambong sa pakigpulong publiko nga “Hain ang mga Patay?” Siya nalipay niadto ug sa wala madugay nahimong dedikadong alagad ni Jehova. Apan si Papa wala malipay. Membro siya sa Anglikanong Iglesya, ug sa daghang katuigan nagdala kanamo sa simbahan sa mabuntag sa Dominggo samtang si Mama nagtudlo namo gikan sa Bibliya sa mahapon.
Niadtong 1927 si John nag-14 anyos na ug misugod sa pagtambong sa mga tigom kauban ni Mama ug nakig-ambit sa ganghaan-sa-ganghaan nga pagsangyaw. Apan ako matagbawon sa kaugalingon, kay may maayong trabaho sa Barclay’s Bank. Bisan pa niana, tungod sa pagtahod kang Mama, sa kadugayan misugod ako sa pagtuon sa Bibliya, uban sa mga basahon sa Watch Tower Society. Human niadto, kusog na ang espirituwal nga pag-uswag, ug sa 1930 ako nabawtismohan.
Sa pagbiya sa tunghaan sa 1931, gisugdan ni John ang bug-os-panahong ministeryo isip payunir. Sa dihang gisugyot niya nga ako mokuyog niya sa payunir nga buluhaton, gibiyaan ko ang akong karera sa bangko ug mikuyog niya. Ang among determinasyon nalig-on sa among bag-ong ngalan, mga Saksi ni Jehova, nga bag-o pa namong nadawat. Ang una namong asaynment mao ang lungsod sa La Rochelle ug sa palibot nga teritoryo sa kasadpang baybayon sa Pransiya.
Pagpayunir Pinaagi sa Bisikleta sa Pransiya
Samtang nagbisikleta kami pahabagatan gikan sa Saint-Malo, nahimuot kami sa pagkakita sa mga plantasyon sa mansanas sa Normandy ug pagsimhot sa hinog nga kahumot gikan sa mga galingan sa mansanas. Wala kami makaamgo niadto nga ang nait nga kabaybayonan sa Normandy 13 anyos sa ulahi, panahon sa Gubat sa Kalibotan II, daoton sa pipila sa labing dugoong mga bugno sa kasaysayan; ni nakaamgo kami nga molungtad ug dugay kaayo ang among bug-os-panahong ministeryo. Ako mapasiawon nga miingon kang John: “Sa akong hunahuna kita makalahutay sa lima ka tuig ingong mga payunir. Ang Armageddon dili na madugay!”
Tapos sa tulo ka adlaw nga pagbisikleta, nakaabot kami sa La Rochelle. Kaming duha may gamayng kahibalo sa Pranses, mao nga wala kami maglisod sa pagkaplag ug kuwartong kasarangan nga pagkasangkap. Sakay sa among mga bisikleta, gikobrehan namo ang tanang balangay sulod sa radyos nga 20 kilometros, nga nanagtag sa mga basahon sa Bibliya. Dayon kami mipadayon ngadto sa laing siyudad ug misubli sa paagi. Walay laing mga Saksi niadtong bahina sa Pransiya.
Sa Hulyo 1932, si John, kinsa nakakat-on ug Kinatsila sa tunghaan, gipadala sa Sosyedad sa pag-alagad sa Espanya. Ako mipadayon sa habagatang Pransiya ug sa duha ka tuig may sunodsunod nga kauban nga gikan sa Inglaterra. Kay walay laing kaubang mga Saksi, ang regular nga pag-ampo ug pagtuon sa Bibliya bililhon aron mahuptan ang among espirituwal nga kusog. Kami namalik usab sa Inglaterra kas-a sa usa ka tuig alang sa tinuig nga mga kombensiyon.
Sa 1934 kami gipapahawa sa Pransiya. Ang Iglesya Romana Katolika, nga niadto may gamhanang impluwensiya, maoy responsable. Inay mobalik sa Inglaterra, ako mikuyog sa laing duha ka Ingles nga payunir ug kami mipadulong sa Espanya—nga nagsakay gihapon sa among mga bisikleta. Usa ka gabii kami nangatulog ilalom sa kakahoyan, sa lain diha sa tapok sa uhot, ug sa lain pa gayod sa baybayon. Sa kataposan kami nakaabot sa Barcelona sa amihanan-silangang Espanya ug miduyog kang John, nga nag-abiabi kanamo.
Ang Hagit sa Espanya
Walay mga kongregasyon niadto sa mga Saksi ni Jehova. Tapos matrabaho ang Barcelona sa pila ka bulan, mipadayon kami ngadto sa Tarragona. Maoy didto nga gisugdan namo ang paggamit sa mabitbit nga pornograpo ug mga rekording sa mugbong mga pakigpulong sa Bibliya sa Kinatsila. Kadto epektibo kaayo, ilabina sa guot nga mga karenderiya ug mga taberna.
Sa Lérida, sa amihanan-kasadpan, gikuyogan kami sa usa ka nahilain nga Saksi, si Salvador Sirera. Kay nadasig sa among pag-estar sa dapit, siya nag-alagad sa kadiyut ingong payunir. Sa Huesca, si Nemesio Orus nagdawat kanamo nga madasigon sa iyang gamayng balay sa ibabaw sa iyang reloheriya. Maoy uban kaniya nga among gidumala ang among unang pagtuon sa Bibliya sa balay, nga migamit sa usa sa unang mga pulyeto sa Sosyedad. Gidumala namo kadto sa duha ka oras sa kada adlaw, ug sa wala madugay siya mikuyog kanamo ingong payunir.
Sa sunod nga siyudad nga among gitrabaho, ang Zaragoza, nakabaton kami sa kalipay sa pagtabang kang Antonio Gargallo ug José Romanos, duha ka batan-ong tin-edyer. Kada gabii sila moanha sa gamay namong kuwarto alang sa pagtuon sa Bibliya nga among gidumala diha sa librong Government. Sa wala madugay, silang duha mikuyog kanamo sa buluhatong payunir.
Gisumbong nga mga Pasista
Kasamtangan, nagsugod ang kagubot. Hapit nang moulbo ang Katsilang Guerra Sibil, usa ka away nga ginatos ka libo ang nangamatay sa kataposan. Sa usa ka balangay duol sa Zaragoza, si Antonio ug ako nahisugamak sa mga suliran. Nasaypan sa usa ka babaye nga midawat sa among mga pulyeto nga kana Katolikong propaganda ug gisumbong kami nga mga Pasista. Gisikop kami ug gidala sa estasyon sa kapolisan. “Unsay inyong ginabuhat niining balangaya?” buot masayod ang sarhento. “Ang katawhan dinhi mga komunista ug dili gustog propaganda sa Pasista!”
Tapos namo isaysay ang among trabaho, siya natagbaw. Maluluton niya kaming gipapaniudto ug gitambagan nga mobiya sa balangay sa hilom panahon sa yugto sa pahulay. Apan sa pagbiya namo, ang usa ka panon sa manggugubot nagpaabot na. Gisakmit nila ang tanan namong basahon. Mangil-ad kadto nga kahimtang. Hinuon, mapasalamaton kami nga miabot ang sarhento ug nakigsulting mataktikanhon ngadto sa panon sa manggugubot. Nakontento sila sa mitanyag siya sa pagdala kanamo sa Zaragoza aron makigkita sa mga awtoridad. Didto siya nakigsulti ngadto sa usa ka opisyal sa siyudad alang kanamo, ug gibuhian kami.
Sa Hulyo 1936, sa dihang misugod ang guerra sibil, si Antonio midumili nga makig-away uban sa mga kasundalohan ni Franco ug gipatay. Pagkadako unya nga kalipay sa dihang si John ug ako mag-abiabi kaniya sa pagkabanhaw ug makakita na usab sa iyang malumong pahiyom!
Gitawag nga mga Komunista sa Irlandiya
Sa dayon nang mosilaob ang guerra sibil, si John ug ako namauli sa Inglaterra alang sa among naandang tinuig nga bakasyon. Tungod sa gubat niadto dili na mahimong mobalik sa Espanya, mao nga mipayunir kamig pila ka semana sa Kent, duol sa among balay sa Broadstairs. Dayon miabot ang sunod namong asaynment—ang Irlandiya. Ang presidente sa Sosyedad, si Joseph F. Rutherford, naghikay nga kami moadto didto ug moapod-apod sa espesyal nga tract nga nag-ulohang You Have Been Warned. Walay mga kongregasyon sa habagatang Irlandiya, pila ra ka nahilaing Saksi.
Sa maong panahon, sa paghulhog sa Katolikong klero, kami gisumbong nga mga komunista—ang kaatbang gayod sa sumbong batok kanamo sa Espanya! Kas-a ang nasukong pundok sa mga Katoliko mibutho sa pagsulod sa balay nga among giestahan, nagkuha sa kinarton namong basahon, ug nagsunog niana. Naagoman namo ang ubay-ubay poparehong mga hitabo una kami mahibalik sa Inglaterra sa ting-init sa 1937.
Gubat sa Kalibotan II ug Ngadto sa Gilead
Sa dihang gideklarar ang Gubat sa Kalibotan II sa Septiyembre 1939, si John nag-alagad sa Bordeaux, Pransiya, ug ako mao ang magtatan-aw sa kongregasyon sa Derby, Inglaterra. Ang pila ka payunir, apil si John, nga mikuyog na usab kanako, nahigawas sa pinugos nga serbisyo militar, apan ang uban, sama kanako, wala hatagig eksempsiyon. Mao nga ako misulod-guwa sa prisohan panahon sa gubat. Gikinahanglan ang pagkamainantoson aron makaantos sa mga kahimtang niadtong mga prisohan panahon sa gubat, apan nasayod kami nga labaw pa ang giantos sa among mga igsoon sa Uropa.
Human sa gubat ang bag-ong presidente sa Watch Tower Society, si Nathan H. Knorr, miduaw sa Inglaterra ug mihikay nga ang pila ka payunir moatender sa Watchtower Bible School of Gilead sa ilaya sa New York, aron mabansay nga misyonaryo. Mao nga sa Mayo 1946 si John ug ako mitabok sa Atlantiko sakay sa ginama-panahon-sa-gubat nga barkong Liberty.
Ang ikawalong klase sa Gilead internasyonal gayod nga klase. Makapalipay gayod sa kasingkasing ang pagtuon ug pagpakig-uban sa beteranong mga payunir panahon sa lima ka bulan nga kurso! Sa kataposan, miabot ang adlaw sa graduwasyon, ug sa kataposan nasayran namo ang among mga asaynment. Ako naasayn ngadto sa Southern Rhodesia, nga karon nailhang Zimbabwe, ug si John gipadala ngadto sa Portugal ug Espanya.
Misyonaryong Pag-alagad sa Aprika
Ako midunggo sa Cape Town, South Africa, sa Nobyembre 1947. Ang laing barko nagdala sa mga kauban sa klase nga si Ian Fergusson ug Harry Arnott. Sa wala madugay miduaw si Igsoon Knorr, ug mitambong kamig kombensiyon sa Johannesburg. Dayon kami mipaingon sa amihanan ngadto sa among mga asaynment—si Ian ngadto sa Nyasaland (karon Malawi), si Harry ngadto sa Northern Rhodesia (karon Zambia), ug ako ngadto sa Southern Rhodesia (Zimbabwe). Sa nahaigong panahon ang Sosyedad nagtukod sa usa ka sangang-buhatan, ug ako natudlong magtatan-aw sa sanga. Kami may 117 ka kongregasyon nga may mga 3,500 ka magmamantala sa nasod.
Sa wala madugay nangabot ang upat ka bag-ong misyonaryo. Nagdahom sila nga ang ilang asaynment maoy dapit sa lapok nga mga payag, mga leyon nga magangulob sa magabii, mga halas sa ilalom sa higdaan, ug primitibong mga kahimtang. Sa kapulihay, tungod sa mamulak nga kakahoyang nagalinya sa mga dalan sa Bulawayo, sa modernong mga pasilidad, ug sa mga tawong andam magpatalinghog sa mensahe sa Gingharian, gitawag nila kadtong paraiso sa payunir.
Duha ka Personal nga Pagpasibo
Sa dihang ako nabawtismohan sa 1930, diyutay ra ang pagsabot mahitungod niadtong makabatog kinabuhing walay kataposan sa yuta. Busa si John ug ako miambit sa mga emblema sa panahon sa Memorial, sama sa tanan niadto. Bisan sa 1935, sa dihang ang “dakong panon” sa Pinadayag kapitulo 7 nailhan ingong yutan-ong matang sa “mga karnero,” ang among panghunahuna wala mausab. (Pinadayag 7:9; John 10:16) Dayon sa 1952, ang The Watchtower sa panid 63 nagpatik sa katin-awan sa kalainan sa yutan-ong paglaom ug sa langitnong paglaom. Naamgohan namo nga wala kami makabaton sa paglaom sa langitnong kinabuhi, kondili ang among paglaom mao ang kinabuhi diha sa paraisong yuta.—Isaias 11:6-9; Mateo 5:5; Pinadayag 21:3, 4.
Ang laing pagpasibo? Ako nakaangay kang Myrtle Taylor, nga nagbuhat kauban namo sulod sa tulo ka tuig. Sa natin-aw nga sama usab ang iyang gibati kanako ug kaming duruha dulot nagpabili sa misyonaryong pag-alagad, kami nagkasabot nga magminyo ug nagpakasal sa Hulyo 1955. Si Myrtle maoy mapaluyohon kaayong asawa.
Ministeryo sa South Africa
Niadtong 1959 si Igsoon Knorr miduaw sa Southern Rhodesia, ug si Myrtle ug ako giasayn na usab sa South Africa. Sa wala madugay misugod kami sa pagbiyahe sa akong asaynment sa sirkitong buluhaton. Kadto bulawanong mga adlaw. Apan nagkatigulang na ako, ug ang panglawas ni Myrtle nakahatag kanamog diyutayng kabalaka. Sa wala madugay dili na kami makaapas sa paso sa sirkitong buluhaton, mao nga giestablisar namo ang usa ka misyonaryong balay sa Cape Town ug nag-alagad didto sa pila ka tuig. Sa ulahi, kami naasayn na usab sa Durban, sa Natal.
Ang among asaynment didto mao ang Chatsworth, usa ka dakong komunidad sa mga Indian. Kadto usa ka langyawng asaynment sulod sa langyawng asaynment—usa ka dakong hagit kanamong tigulang nang mga misyonaryo. Sa pag-abot namo sa Pebrero 1978, dihay usa ka kongregasyon sa 96 ka Saksi, nga kadaghanan Indian. Kinahanglan nga tun-an namo ang relihiyosong panghunahuna sa katawhang Hindu ug sabton ang ilang mga kostumbre. Ang paagi nga gigamit ni apostol Pablo sa pagsangyaw sa Atenas nagsilbing mapuslanong panig-ingnan alang kanamo.—Buhat 17:16-34.
Mga Panalangin sa Misyonaryong Pag-alagad
Karon ako 78 anyos na, uban sa 57 anyos sa misyonaryong pag-alagad sa akong luyo. Makapadasig gayod ang pagtan-aw sa kahibulongang mga pag-uswag diha sa kanasoran nga akong naalagaran! Ang Pransiya nakaabot ug 100,000 ka magmamantala sa Gingharian, ang Espanya may kapin sa 70,000, ug ang South Africa miuswag gikan sa 15,000 sa among pag-abot ngadto sa kapin sa 43,000.
Mga batan-on, ang inyong mga kahimtang nagatugot ba kaninyo sa pagsulod sa bug-os-panahong ministeryo? Kon mao, ikapasalig ko kaninyo nga kini mao ang labing maayong karera. Dili lamang nga kini panalipod batok sa mga suliran ug mga tentasyon nga nagahasi sa mga batan-on karong adlawa kondili kini makaumol sa inyong personalidad aron mahiuyon sa matarong nga mga prinsipyo ni Jehova. Dako gayod nga kaayohan ug pribilehiyo nga ang batag tigulang magaalagad kang Jehova karon!
[Hulagway sa panid 29]
Usa ka bisita miduaw sa kusina sa kampo ni Myrtle Cooke