Mga Magmamantala sa Gingharian Nagtaho
Pagpangita sa Kamatuoran sa Bibliya sa Israel Gigantihan
DUGANG ug dugang mga tawo sa Israel sama sa bisan diin ang nakasabot nga kawang ang paningkamot sa tawo sa pagpatunghag malungtarong kalinaw ug pagtaganag paglaom alang sa umaabot. Ang 370 ka Saksi ni Jehova nianang matahom, makasaysayanhong yuta nagadala sa mohatag-kinabuhi nga paglaom niadtong nagapangita sa Diyos. (Isaias 55:2, 3) Ang mosunod nga mga taho gikan sa sangang buhatan sa Watch Tower Society sa Tel Aviv nagapakita nga ang Diyos nagaganti niadtong nagapangita sa kamatuoran sa Bibliya.
“Ang mga pagsamok sa samokang relihiyosong mga panatiko naawop na, ug ang ilang panlimbasog sa nangagi sa pagbalda sa atong mga tigom padayong misumbalik. Pananglitan, usa ka tigulang Rusong magtiayon nakig-uban sa usa ka grupong Adbentista apan wala matagbaw sa ilang nakat-onan. Wala sila makakitag ebidensiya sa mga paglutos nga gitagna nga maoy magtimaan sa matuod nga Kristiyanidad. Unya usa ka adlaw nakaplagan nila ang usa ka daan, gilabay Romanyano-pinulongang mantalaan nga may taho bahin sa mabangisong mga pag-atake sa magubotong mga panon niadtong 1985 sa sangang buhatan sa Sosyedad ug sa Kingdom Hall sa Tel-Aviv. Kay napukaw ang ilang kaikag, sila miadto sa Tel-Aviv ug naglakawlakaw sa upat ka oras hangtod ilang nakaplagan ang tinukod nga gibatbat sa artikulo sa mantalaan. Nahimuot sila sa pagdawat sa mga tubag sa pipila sa ilang mga pangutana ug nagpabilin alang sa tigom sa gabii, diin sila nalipay nga makahimamat ug pila ka tigsultig-Rusong mga Saksi. Sukad niadto, gihimo ang usa ka regular nga pagtuon uban kanila. Sa dugang sila nakakat-on, sa dugang sila kombinsido nga ilang nakaplagan kon unsa gayoy ilang gipangita—ang kamatuoran!
“Sa laing hitabo, ang usa ka igsoong lalaki nagsangyaw ngadto sa usa ka batan-ong padre de pamilya nga wala mouyon sa pipila sa mga punto nga gisulayan niya sa pagpatin-aw ug mao nga wala mopadayon sa pagsusi sa mensahe sa Gingharian. Pila ka tuig sa ulahi, ang anak babaye sa mao mismong tawo nagsakit, ug siya giingnan sa matuotuohong mga higala nga ang sakit lagmit nalangkit sa mezuzah nga gitaod sa haligi sa iyang pultahan. Gisugyot nila nga ipasusi kana sa rabbi. Gihukom niya nga buhaton kadto. Sa samang panahon, tim-os siyang miampo sa Diyos alang sa giya sa pagkaplag sa kamatuoran.
“Sa iyang pagpaingon sa balay sa rabbi, ang tawo kalit mihukom nga moadto ug mohapit sa usa ka reseta sa medisina didto sa klinika. Sa iyang pag-abot, kinsa ba ang iyang nakaplagan nga naglingkod didto kondili ang Saksi nga nakasangyaw kaniya pila ka tuig nga miagi! Ang igsoong lalaki miingon nga siya walay mga plano nga moadto sa klinika niadtong gabhiona hangtod nga sa kalit siya nakahinumdom sa usa ka butang nga iyang gikinahanglan. Ang igsoon ug ang tawo naglingkod ug nag-estoryahay sa duha ka oras niadtong gabhiona, ug ang pagtuon sa Bibliya gihikay uban sa batan-ong lalaki. Misugod siya sa pagtambong sa mga tigom, inanay ang iyang pag-uswag, ug siya miapil sa Tunghaan sa Teokratikanhong Ministeryo. Sa wala madugay siya nagsangyaw na sa kanataran, ug karon siya bawtismado nang igsoon. Siya wala na makaabot sa balay sa rabbi!”
Ang pagpangita sa kamatuoran sa Bibliya niining mga tawhana tugob nga gigantihan, kay nakaplagan nila ang bahandi nga mas bililhon kay sa pino nga bulawan.—Proverbio 3:13-18.