Mga Magmamantala sa Gingharian Nagtaho
“Sila Nagpadayong Walay Hunong”
SUKAD sa mga adlaw ni Jesu-Kristo ug sa iyang mga apostol, ang relihiyosong mga lider migamit sa bisan unsang paagi nga posible sa ilang mga paningkamot nga babagan ang pagsangyaw sa maayong balita sa Gingharian sa Diyos. Ang mga apostol balikbalik ug mahugtanong ‘gimandoan’ sa lokal nga mga awtoridad sa Jerusalem nga “mohunong na sa pagsulti pinasukad sa ngalan ni Jesus.” (Buhat 5:27, 28, 40) Bisan pa niana, ang asoy sa Bibliya nagpahayag nga “ang pulong sa Diyos padayong nagtubo, ug ang gidaghanon sa mga tinun-an padayong nagkadaghan pag-ayo sa Jerusalem.”—Buhat 6:7.
Duha ka milenyo sa ulahi makaplagan gihapon nato ang relihiyosong mga lider sa Israel nga nag-impluwensiya sa lokal nga mga awtoridad sa pagbabag sa buluhaton sa matuod nga mga Kristohanon nianang nasora.
Ilalom sa pagpit-os nga gipahamtang sa radikal nga mga relihiyonista, sa Nobyembre 1987, ang lokal nga mga awtoridad sa Tel Aviv, Israel, nagmando sa mga Saksi nga dili na maghimog Kristohanong mga tigom sa Kingdom Hall nga nahimutang sa sangang buhatan sa Watch Tower Society. Ang mando miepekto niadtong Oktubre 1989. Sa pagsunod, ang mga Saksi nagtigom diha sa inabangang mga pasilidad sa maong lugar sulod sa tulo ka tuig samtang ang ilang Kingdom Hall wala gayod gamita.
Kasamtangan, ang hitabo gipasaka sa Korte Suprema sa Israel. Ang opisina sa abogado sa estado nagrepaso sa argumento nga gipresentar sa mga Saksi ug nagpahayag nga walay posibleng depensa batok sa ilang apelasyon tungod sa dayag nga relihiyosong pagpihig nga nalangkit. Busa, ang lokal nga mga awtoridad napugos sa pagbali sa ilang desisyon, ug ang mga Saksi ni Jehova malipayong mibalik sa ilang Kingdom Hall.
Ang buluhaton ba sa pagsangyaw sa mga kamatuoran sa Bibliya mius-os sulod niadtong mga tuiga? Wala gayod! Sa panahon sa pagpasira sa Kingdom Hall, dihay duha ka kongregasyon sa Tel Aviv ug usa ka nahimulag nga grupo sa pagtuon sa Bibliya sa haduol nga lungsod sa Lod. Tulo ka tuig sa ulahi, sa dihang ang Kingdom Hall giablihan pag-usab, ang mga Saksi ni Jehova miuswag ngadto sa upat ka kongregasyon, ug usa ka bag-ong grupo sa pagtuon sa Bibliya ang nagtigom sa Beersheba.
Ang pagtubo sa Israel dili limitado sa pangunang mga grupo sa pinulongan, nga Arabiko ug Hebreohanon. May dinaghang pagsulod sa mga lalin gikan sa kanhing Unyon Sobyet, busa ang tigsultig-Ruso nga mga Saksi ni Jehova puliki karon sa pagpakig-ambit sa maayong balita kanila. Ang pipila ka Rusog-pinulongan nga mga miting ginahimo sa tulo ka kongregasyon; kapin sa usa ka gatos ka tawo ang nagtigom di pa dugay alang sa usa ka Rusyanhong asembliya.
Sa walay duhaduha, ang mapihigong mga relihiyonista mopadayon sa ilang krusada batok sa matuod nga pagsimba. Apan ang mga magmamantala sa Gingharian nagpadayon sa pagsundog sa unang-siglong mga Kristohanon kinsa, bisan pa sa pagsupak, “nagpadayong walay hunong sa pagpanudlo ug sa pagpahayag sa maayong balita bahin sa Kristo, si Jesus.”—Buhat 5:42.