Asa Ka Moadto Alang sa Tambag?

MAY nakapasa na ba nimog mini nga kuwarta? Tingalig wala pa, apan unsa ang imong reaksiyon kon may mosulti kanimo nga nagsirkular ang mini nga kuwarta? Masilo ka ba? Siyempre dili! Lagmit magpasalamat ka nga ikaw gipasidan-an ug gipabantay nga dili mailisag kuwartang mini ang pipila sa imong hinagoan, tinuod nga kuwarta.

Kadaghanan nato nagadawat ug tambag o mga pasidaan matag karon ug unya. Tinuod, ang pila ka pasidaan mas puslanon kay sa uban. Apan bisan pag dili nato makita ang personal nga bili sa pila ka tambag o pahimatngon, kana ba hinungdan sa pagkasilo kay gitambagan?

Ang tinuod mao, ang tanan nagakinahanglag tabang ug tambag matag karon ug unya. Walay mausang nagbaton sa tanan nga tubag. Tungod sa ekonomikanhon ug politikanhong kadili-piho nga nagalibot kanato, ang tanan nagakinahanglag lig-ong paglaom alang sa umaabot. Sa kalibotan diin halos katunga sa mga kaminyoon mosangko sa diborsiyo, diin daghan ang pagmabdos sa tin-edyer, ug diin epidemya ang mga sakit nga gipasa sa seksuwal nga paagi, may dinaliang panginahanglan sa ugdang, praktikal nga giya. Ang mga ginikanan nagakinahanglag tabang sa pagtino sa kinamaayohang paagi sa pagmatuto sa ilang mga anak niining makalibog nga sistema sa mga butang. Ang mga tin-edyer nagakinahanglag tabang sa paghusay sa ilang nagkasunging mga emosyon ug mga pagpiit nga daw dili madaog. Ang tanan nagakinahanglag tabang sa pagsulbad sa praktikal nga mga sukdanan sa moral diha sa kalibotan diin ang pagkamalimbongon, imoralidad, ug kapintasan dugang ug dugang gidawat.

Asa man hikaplagi ang maong tabang? Sa pagkakaron ang kinamaayohang tinubdan sa tambag bahin sa kinabuhi mao ang Bibliya, ang dinasig nga Pulong sa Diyos. Ang karaang salmista misulat: “Ang imong pulong maoy lamparahan sa akong tiil, ug kahayag sa akong dalan.” (Salmo 119:105) Kadtong nagabasa ug nagapadapat sa Pulong sa Diyos makalikay sa kadaghanang mga kapeligrohan nga nagalungtad karong adlawa. Kana usa ka hinungdan nganong ang mga Saksi ni Jehova nagagugol ug ginatos ka milyong oras kada tuig sa pagduaw sa ilang mga silingan ug paghisgot sa Bibliya uban nila. Bisan pa niana, daghang tawo dili mamati, ug ang pipila masilo pa. Ngano man kini?

Siradong mga Hunahuna—Ngano?

Aw, daghang tawo ang sensitibo kaayo bahin sa pagdawat ug tambag, ilabina bahin sa relihiyon. Bisan ang mga membro sa simbahan dili kanunay buot mamati sa tambag nga ginahatag sa ilang mga magwawali. Usa ka Britanikong klerigo mimulo: “Ang tanan may kaugalingong mga ideya ug kana giisip nga maayo sama ra sa iya sa magwawali.” Busa, dili katingad-an nga ang mga tawo dili buot mamati sa usa ka estranghero diha sa ilang pultahan.

Dugang pa, bisan pag kita nagapuyo sa panahon sa pagkamaduhaduhaon, daghan gihapon ang dunay lig-on, emosyonal nga kalangkitan sa ilang simbahan. Sumala sa giingon sa usa ka ensiklopedia, “ang relihiyon nagatandog sa kinailadmang mga pagbati sa dimaihap nga katawhan.” Ang maong mga tawo tingali wala makasabot sa panginahanglan nga makigsulti sa lain nga sakop sa laing relihiyon mahitungod sa Bibliya, bisan pag ang panaghisgot maoy bahin sa pagkaplag ug solusyon sa ilang mga suliran.

Ang uban dili buot maghisgot sa Bibliya tungod kay nakita nila ang dakong kasalingkapaw ug kahiwian sa relihiyon. Maglagot sila nga ang pila ka relihiyosong pangulo nagakonsentir sa imoralidad, o sila mayugot sa way-ulaw nga pagkamakisapi sa daghang ebanghelista sa telebisyon. Tingali sila dili moangay sa dihang gamiton sa usa ka klerigo ang iyang awtoridad sa pagsuportar sa usa ka kiliran batok sa lain sa usa ka politikanhong bugno. Alang kanila, ang relihiyon daw nakapahinabog mas daghang suliran kay sa ginasulbad niini.

Ang mga suliran nga gireklamo sa maong mga tawo maoy tinuod. Sa relihiyosong pagkasulti, daghang “mini nga kuwarta” ang nagasirkular. Apan sa pagkamatuod, ang pagdumili sa pagdawat sa bililhong tabang gikan sa Bibliya tungod niini dili makataronganon sama ra sa dili pagdawat ug tinuod nga kuwarta tungod kay nagasirkular ang mini nga mga papel de bangko!

Ug sumala sa gihisgotan na, kitang tanan nagakinahanglag tambag niining kalibotan sa lisod nga mga pagpili ug peligrosong mga kahimtang. May paagi ba nga sa maalamon matultolan kon bahin sa pagdawat ug tambag? Dili ba kinahanglanon o daotan pa nga makigsulti sa lain nga sakop sa laing relihiyon bahin sa Bibliya? Posible ba ang pagbatog makataronganong hunahuna nga igo aron madawat ang maayong tambag ug dili hilimbongan sa mini nga tambag? Unsay ginaingon sa Bibliya bahin niini?