Gikan sa Dalan sa Kamatayon Ngadto sa Dalan sa Kinabuhi

SA DAGHAN nga katuigan ang akong kinabuhi nadaot tungod sa pagkagiyan nako sa mga droga. Misugod ako sa soft drugs o dili isog ug misangko nga giyanon sa isog nga mga droga, sama sa LSD. Ang mga droga nahimong simbolo sa kagawasan gikan sa tanan nga matang sa personal ug sosyal nga mga suliran. Ikasubo, gidasig ko ang ubang batan-on nga mokuyog nako sa pagsubay sa dalan sa kamatayon.

Sanglit ako nailhan nga namaligyag droga, ako nailalom sa paniid sa kapolisan. Admitihon nako nga ako nahadlok, kay nasayod ako nga kon hidakpan kana magpasabot sa daghang katuigan sa bilanggoan. Bisan pag magul-anon ang akong kinabuhi, kana dili igo aron usbon nako ang akong mga dalan.

Misulay ang akong mga ginikanan sa pagtabang nako pinaagi sa pagdala nako ngadto sa usa ka balay sa masakiton sa utok aron matambalan. Gilaoman nga ang mga medisina ug ang pagtambal nga madawat didto magsulbad sa akong suliran, apan sa akong pagkagawas, nakaamgo ang akong mga ginikanan nga bisan ang medikal nga pagtambal dili makausob nako. Misulay sila sa pagtabang nako sa dugang pa pinaagi sa paghimo nga ako makigsulti sa usa ka pari. Wala usab kana mosaler. Nagtabako akog marijuana ug miinom sa iyang atubangan, nga daw siya wala ra diha. Wala gayod akoy tinguha nga magbag-o!

Ang akong pangasaw-onon, si Oriana, misupak pag-ayo sa akong pagkinabuhi, ug dili ko gustong iya akong biyaan. Atubangan niana, kadto mipatim-awng usa ka maayong panukmod aron magbag-o. Apan, sa kapulihay, gipadayon ko sa sekreto ang akong bisyo sa droga. Gipatuo ko si Oriana nga ako may sakit. Sa wala madugay ako nahimong daot kaayong tawo. Nagsige akog saad sa akong kaugalingon nga ako mohunong, nga ako makahimo niana, apan kadto wala magpulos. Ako nagpadayon lamang sa unahan ubay sa dalan sa kamatayon.

Kay buot nakong minyoan sa labing madali si Oriana, mikontak kamig interyor nga tig-adorno aron mohimog pila ka trabaho sa among apartment. Ang iyang asawa usa sa mga Saksi ni Jehova, ug siya nakigsulti kanamo bahin sa iyang pagtuo. Sa sinugdan ang among estorya nakahimog mas lalom nga impresyon kang Oriana kay kanako, apan samtang nagpadayon kadto, akong naamgohan nga ang mga Saksi ni Jehova lig-on nga nagtuo nga sa dili madugay himoon sa Diyos kining yutaa nga paraiso ug ang katawhan magpuyo dinhi sa walay kataposan diha sa kalinaw.

Buot nakong susihon kon tinuod nga “bisan karon ang mga Saksi ni Jehova nagapakitag gugma ug pagtahod sa usag usa,” sumala sa giingon sa babaye. Busa si Oriana ug ako miadto sa Kingdom Hall. Naulaw ako tungod sa taas kong buhok ug akong dili desenteng pamiste, apan ang pag-abiabi kanamo sa mga Saksi mipabati dayon kanamo nga relaks. Gibati ko nga ako makasalig kanila. Tin-aw nga ang sinserong gugma ug pagtahod sa usag usa natuman na alang kanila.

Sukad niadtong adlawa, ako misugod sa pagtambong nga regular sa Kristohanong mga tigom, ug ako misugod sa pagtuon sa Bibliya uban sa mga Saksi ni Jehova. Ako nagpatupi sa akong buhok ug nagbag-o sa akong pamiste, ug uban sa dakong paningkamot, ako nakahunong sa pagtabako ug paggamit sa mga droga. (2 Corinto 7:1) Bisan pa niana, may laing seryosong suliran sa akong kinabuhi. Nga wala makaamgo niini, ako nahimong alkoholiko. Sa dihang ako mahubog, ako makig-away. Ako makig-ergo sa mga tawo ug mangabugho kaayo kang Oriana. Ako nahidangat sa kahimtang sa dakong kasubo. (Proverbio 23:29-35) Naningkamot ako sa pagputol sa bisyo, ug sa tabang ni Jehova, sa gahom sa pag-ampo, ug sa tabang sa Kristohanong mga igsoon, ako nakalangkat niining daotang bisyo gikan sa akong kinabuhi.

Ang akong asawa ug ako nabawtismohan sa Agosto 23, 1974. Salamat sa kamatuoran, ang among mga kinabuhi karon may kahulogan. Sanglit nakabaton ako pag-usab sa akong pagsalig-sa-kaugalingon, naangkon ko ang pagtahod sa trabahoan. Ang akong asawa ug ako dakog kinitaan, apan unya naamgohan ko nga kami diyutay na lamag panahong nahibilin alang sa among sagradong pag-alagad. Kon buot namong pahimuslan ang mas suod nga relasyon uban kang Jehova, kinahanglang himoon namo ang kausaban sa among mga kinabuhi. Kay kon dili, diha ang riyesgo nga mabugnaw ang among unang gugma sa kamatuoran. Busa sa 1979 misugod kami sa pagpayunir, nga mideboto sa among kaugalingon sa bug-os pa sa buluhatong pagwali.

Nganong gihimo ko kini nga desisyon? Aw, hain ba ako karong adlawa kon wala pa ang kahayag sa kamatuoran? Kadtong nahauban kanako sa dalan sa kamatayon karon maoy mga alkoholiko o wala nay pamilya o nabilanggo​—o nangamatay na. Bisan pa niana, ang mensahe sa Bibliya maoy nagpagawas kanako. Ang tambal ug hugot nga tinguha yanong dili paigo. Gikinahanglan ang lig-on nga panukmod. Ang pagtinguha sa pag-ugmad sa tinuod nga pakighigala kang Jehova, ang Maglalalang, mitagana sa maong panukmod. Karon, maoy akong sinserong tinguha ang pagbuhat sa akong maarangan sa pagtabang niadtong naulipon sa bisyo sa droga, ingon man niadtong nagaantos o nangitag kaikyasan sa ilang mga suliran. Pinaagi sa aktibong pagpakig-ambit sa Kristohanong ministeryo, ang akong asawa ug ako nagabuhat gayod niana. Nakapribilehiyo kami sa pagtabang sa daghang tawo ubay sa dalan sa kinabuhi. Apil kanila mao ang tulo ka tawo nga ako mismong napailaila sa mga droga. Sa pagkakaron ako nagaalagad nga nagapanawng magtatan-aw sa amihanan sa Italya.

Kini tinuod: Ang pag-abusar sa droga maoy sama sa dalan nga sa madugay o madali motultol nimo sa kamatayon o labing menos sa kinabuhing waykapuslanan nga walay kaugmaon. Makulangan ako sa mga pulong aron ipahayag ang akong pasalamat kang Jehova nga Diyos! Gipakita niya kanako ang lutsanan gikan sa kangitngitan nga akong gipuy-an ug gipunting ang dalan sa kinabuhi, nga puno sa kahayag, nga motultol sa kaugmaon nga dayon.—Sumala sa giasoy ni Ruggero Polotti.