Ang Ipasabot sa mga Balita
Satanasnong Impluwensiya
Human sa paghimog pagdukiduki bahin sa impluwensiya sa Satanismo diha sa musikang rock ug heavy metal, ang kolumnista sa mantalaan si Tom Harpur sa Toronto nga The Sunday Times misulat: “Kinahanglan akong ipahibalo ang labing kusganong pasidaan mahitungod sa nagakahitabo. . . . Wala pa ako sukad makakita ug grabe nga kalaw-ayan. Ang mga awit puno sa kabuangan, pagpanag-iya, mga demonyo, dugo, mga panghimaraot, kabangisan sa tanang matang, apil ang panglugos, pagpiang sa kaugalingon, pagbuno, ug paghikog. Ang kamatayon ug kalaglagan, mga panagna sa kalaglagan, ang pagsalikway sa tanan nga matarong ug ang pagdawat sa tanang butang mangilngig ug daotan—mao ang mga tema.”
Nagkaatol sa pagdaghan sa satanasnong musika mao ang pagdaghan sa satanasnong kulto nga aktibo sa Tinipong Bansa ug Canada. Mitaho mahitungod sa dili pa dugay nga seminar sa kapolisan sa Ontario, ang The Globe and Mail, usa ka mantalaan sa Canada, nag-ingon nga ang satanasnong kulto “nalangkit sa mga halad nga mananap, mga pagpanampalas sa lubnganan ug sa rituwal nga pag-abuso sa bata.” Ang sekreta nga si James Bradley sa Washington, D.C., naglangkit sa ginatos ka kaso sa pag-abuso sa bata diha sa rituwalistikanhong mga krimen sa Satanismo. Sumala sa gikutlo sa The Globe and Mail, ang sekretang si Bradley midugang nga kapin sa lima ka tuig, ang mga taho bahin sa mga rituwal nga pag-abuso ug bata maoy gikan sa “ginatos ka bata, sa ginatos ka social workers ug mga magtutudlo.”
Naghisgot bahin sa “kataposang mga adlaw” sa presente daotang sistema sa mga butang, si apostol Juan misulat: “Ang Yawa nahilusad diha kaninyo nga puno sa dakong kapungot, sanglit nasayod siya nga hamubo na lamang ang iyang panahon.” (2 Timoteo 3:1; Pinadayag 12:12) Ang impluwensiya ni Satanas, “ang magmamando sa kagamhanan sa kahanginan,” nakasulod bisan sa popular nga musika sa kalibotan. (Efeso 2:2) Maoy hinungdan nga gitambagan ni apostol Pablo ang kaubang mga Kristohanon sa “pagbarog batok sa malipatlipatong mga kaugdahan sa Yawa.”—Efeso 6:11.
“Dili na Mapugngan”
Sa dihang ang 28-anyos nga babaye nga tig-jogging gibun-og ug gilugos sa Central Park sa New York City, nakurat ang minilyong mga tawo ug naguol. Ang rason? Ang mabangis ug mananapon nga pag-atake gihimo sa gang sa mga tin-edyer diin ang “malaw-ay nga pagpasiatab sa resulta ug sa ilang pagkawalay pagtagad sa pag-antos nga nahatag tinuod nga makalilisang,” mitaho ang The New York Post. Ang pipila sa mga batan-on nga maoy responsabli sa mangilngig nga krimen gitaho nga gihimo sa mga bata nga nag-edad pa ug 14. Nakurat sa pag-atake, ang usa ka magsusulat sa Post miadmiter nga ang kalibotan nahimong usa ka “walay-disiplina, mapatuyangon sa kaugalingon, hupong sa droga, nabuang sa sekso, nabungkag nga pamilya, nabuang sa kapintasan nga katilingban,” nga “dili na mapugngan ug ang pangutana mao: ngano?”
Sa pagkamatuod, kining kaliwatana sa dili-hitupngan nga kapintasan kaamgid gayod nianang gitagna ni apostol Pablo diha sa 2 Timoteo 3:1-5. Diin didto iyang gibatbat nga “ang kataposang mga adlaw” pagatiman-an sa mga tawong “dalo, hakog, hamborigo, ug mapahitas-on.” Dugang pa, “sila mainsultohon, masukihon sa ilang mga ginikanan, dili-mapasalamaton, ug dili-diyosnon; sila dili-maluluton, walay-kaluoy, mga tigbutangbutang, mabangis, ug mapintas; pagadumtan nila ang maayo; sila mabudhion, danghag, ug mapahitas-on; sila mahigugmaon sa kalingawan inay sa Diyos.” (Todays English Version) Kini bang mapintas nga kalibotan magpabilin nga “dili na mapugngan” sa walay kataposan? Dili! Si Jesus miingon: “Inigsugod ug kahitabo niining mga butanga, tumindog kamo ug ihangad ninyo ang inyong mga ulo, kay ang inyong kaluwasan nagakahiduol na.”—Lucas 21:28.