Mga Pangutana Gikan sa mga Magbabasa
◼ Masabot ba nato gikan sa Mateo 7:13, 14 ug Lucas 13:24 nga bisan sa pagkabanhaw, isalikway sa kadaghanang mga tawo ang matuod nga pagsimba?
Dili, kining mga bersikuloha wala maglig-on nianang konklusyona. Hinunoa, kini maylabot ilabina sa pagkabaton ug kinabuhi diha sa langitnong Gingharian.
Ang mga pulong ni Jesus sa Mateo 7:13, 14 maoy bahin sa Wali sa Bukid. Siya miingon: “Sumulod kamo agi sa pultahan nga masigpit; kay dako ang pultahan ug sangkad ang dalan padulong sa kalaglagan, ug daghan ang nagasulod agi niini; kay masigpit ang pultahan ug hiktin ang dalan padulong sa kinabuhi, ug diyutay ra ang mga nakatultol niini.”
Ang kadaghanan sa gipamulong ni Jesus niining okasyona nalangkit ilabina sa langitnong Gingharian. Pananglitan, siya misugod uban niining mga pulonga: “Malipayon kadtong mahunahunaon sa ilang espirituwal nga panginahanglan, kay ila ang gingharian sa langit.” Siya miingon nga ang putli ug kasingkasing “makakita sa Diyos” ug nga “ang gingharian sa langit” iya niadtong “gilutos tungod sa pagkamatarong.” (Mateo 5:3, 8, 10) Sa ulahi nianang mao gihapon nga pakigpulong, naghisgot si Jesus bahin sa haluag nga dalan padulong sa kalaglagan ug hiktin ang dalan padulong sa kinabuhi. Sa lakbit, siya midugang: “Dili ang tanan nga magaingon kanako, ‘Ginoo, Ginoo,’ ang makasulod sa gingharian sa langit, kondili ang nagatuman sa kabubut-on sa akong Amahan nga anaa sa langit.”—Mateo 7:13, 14, 21.
Ang kahulogan sa Lucas 13:24 maoy susama, sumala sa gipadayag sa konteksto. Si Jesus mihatag ug duha ka sambingay mahitungod sa “gingharian sa Diyos.” Sa ulahi, siya gipangutana: “Ginoo, diyutay ra bay maluwas?” Si Jesus mitubag: “Panlimbasogi ninyo ang pagsulod agi sa pultahan nga masigpit, kay suginlan ko kamo, nga daghan ang maninguha sa pagsulod apan dili makahimo.” Ang “daghan” nagpasabot sa mga tawo nga nanghangyo nga pasudlon human nga natakpan ug nakandadohan na ang pultahan. Kini sila maoy “mga mamumuhat ug daotan” nga dili takos nga mahiuban ni “Abraham ug Isaac ug Jacob ug sa tanang mga propeta diha sa Gingharian sa Diyos.” Ang “daghan” nagtuo nga sila ang mauna “diha sa gingharian sa Diyos,” apan sila sa pagkatinuod maulahi, nga dayag nga nagkahulogan nga sila dili gayod makasulod.—Lucas 13:18-30.
Ang konteksto nagpakita nga naghisgot si Jesus bahin sa pagsulod ngadto sa langitnong Gingharian sa Diyos. Ang Hudiyohanong mga lider balik niadto dugay nang nagpahimulos sa pribiliheyado nga posisyon, sa pagbaton sa Pulong sa Diyos. Sila mibati nga dato sila sa espirituwal ug matarong sa panan-aw sa Diyos, kon itandi sa mga tawong ordinaryo, nga ilang gilantaw nga ubos. (Juan 9:24-34) Bisan pa, si Jesus miingon nga ang mga maniningil ug buhis ug ang daotang mga babaye nga midawat sa iyang balita ug naghinulsol makabaton sa pag-uyon sa Diyos.—Itandi ang Mateo 21:23-32; Lucas 16:14-31.
Ang mga tawong ordinaryo nga nahimong mga tinun-an ni Jesus nahilinya nga madawat ingong espirituwal nga mga anak sa dihang mibukas ang langitnong pagpanawag sa Pentekostes 33 K.P. (Hebreohanon 10:19, 20) Bisan tuod dakong panon ang nakadungog kang Jesus, kadtong midawat kaniya ug sa ulahi nakabaton sa langitnong paglaom diyutay ra. Apan ang diyutayng panon sa inanak-sa-espiritu nga mga tawo nga nanagpakadawat niana nga ganti ikatandi kang Jacob nga nagpauraray sa lamisa sa langit ubang kang Jehova (ang Dakong Abraham) ug sa iyang Anak (gihulagwayan ni Isaac). Kana sa pagkamatuod takos sa dakong panlimbasog, apan ang kadaghanan niadtong nakadungog kang Jesus wala manlimbasog.
Busa, atong makita gikan sa konteksto nga ang duha ka kahimtang nga gikomentohan ni Jesus (bahin sa diyutay nga nagaagi sa hiktin nga dalan padulong sa kinabuhi ug naluwas) nalangkit ilabina sa pagkabaton sa pag-uyon sa Diyos niadtong panahona sa dihang Iyang gitanyag pa ang paglaom sa langitnong kinabuhi. Diyutay ra niadtong nakadungog sa balita sa kamatuoran ug nakahibalo kon unsay gikinahanglan ang misanong ug nagpamatuod nga matinumanon.—Mateo 22:14; 24:13; Juan 6:60-66.
Makaiikag nga bisan karong adlawa, sa dihang ang enterong Bibliya mabatonan ug natuman ang daghang balaang mga tagna bahin sa kataposang mga adlaw, diyutay ra ang misanong sa Kristohanong balita ug nagalahutay sa pag-alagad kang Jehova. Nahiuyon kini sa sambingay ni Jesus bahin sa nagkalainlaing mga yuta. Siya miingon nga ang pipila nakadungog sa “pulong sa gingharian,” apan sakmiton ni Satanas ang gisabod. Ang uban modawat sa pulong uban ang kalipay apan sa ulahi mobulag tungod sa kasakitan o paglutos. Apan adunay uban nga mapamatud-ang dili-mabungahon tungod sa “kabalaka niining sistema sa mga butang ug sa malimbongong gahom sa bahandi.”—Mateo 13:18-23.
Kita makaseguro nga lahi unya kaayo kini sa dihang milyon-milyon ang pagabanhawon sa Adlaw sa Paghukom. Unya si Satanas wala nay gahom sa pagsakmit sa mga binhi sa kamatuoran nga gisabod diha sa ilang mga kasingkasing. Dili na nila sagubangon ang paglutos o ang mga kabalaka sa presente daotang sistema. Sila pagatudloan diha sa usa ka matarong nga palibot, nga pagalibotan sa milagrosong mga buhat sa Diyos, apil ang pagbanhaw sa mga patay ug ang pag-ayo sa kanasoran. Matuod, ang uban unya nianang panahona dili gihapon mosanong. (Itandi ang Juan 11:45-53.) Apan adunay maayong katarongan sa pagtuo nga ang kinabag-an makasabot sa pulong, mosanong niana, ug maluwas.