Mga Pangutana Gikan sa mga Magbabasa

Si Jesus miawhag: “Kusganong panlimbasogi ninyo ang pagsulod agi sa sigpit nga pultahan, tungod kay daghan, sultihan ko kamo, ang maninguha sa pagsulod apan dili makahimo.” (Lucas 13:​24) Unsay iyang gipasabot, ug sa unsang paagi kini mapadapat karong adlawa?

Atong masabtan pag-ayo kining makaiikag nga teksto pinaagi sa paghatag ug pagtagad sa kahimtang niini. Mga unom ka bulan antes sa iyang kamatayon, si Jesus didto sa Jerusalem panahon sa anibersaryo sa pagdedikar pag-usab sa templo. Siya namulong nga siya mao ang magbalantay sa mga karnero sa Diyos apan nagpunting nga ang mga Hudiyo sa katibuk-an dili apil sa maong mga karnero tungod kay sila wala maminaw. Sa dihang siya miingon nga siya “nahiusa” sa iyang Amahan, ang mga Hudiyo mikuhag mga bato aron ibato kaniya. Siya miikyas ngadto sa Perea tabok sa Jordan.​—Juan 10:​1-40.

Didto ang usa ka tawo misukna: “Ginoo, diyutay ra ba kadtong mga ginaluwas?” (Lucas 13:23) Kadto maoy usa ka haom nga pangutana nga isukna niya, sanglit ang mga Hudiyo niadtong panahona nagtuo nga usa ka limitadong gidaghanon lamang ang takos sa kaluwasan. Sa tinamdang ilang gipakita, dili lisod handurawon kon kinsa ang ilang gihunahuna nga maglangkob sa diyutay. Pagkasayop nila, ingon sa gipakita sa ulahing mga kaugmaran!

Sa mga duha ka tuig, si Jesus kauban nila, nagtudlo, naghimog mga milagro, ug nagtaganag kahigayonan nga sila mahimong manununod sa langitnong Gingharian. Uban sa unsang resulta? Sila, ug ang ilang mga pangulo sa partikular, mapasigarbohon sa pagkahimong mga kaliwat ni Abraham ug pagkatinugyanan sa Balaod sa Diyos. (Mateo 23:​2; Juan 8:​31-44) Apan wala sila moila ug motuman sa tingog sa Maayong Magbalantay. Diha nay daw usa ka abling pultahan atubangan kanila, uban ang pagkamembro sa Gingharian ingong ang pangunang ganti sa pagsulod niana, apan ilang gisalikway. Diyutay lamang, nga kadaghanan gikan sa ubos nga matang, ang nagpatalinghog sa mensahe ni Jesus sa kamatuoran, misanong, ug nagpabilin uban kaniya.​—Lucas 22:​28-30; Juan 7:​47-49.

Sa adlaw sa Pentekostes 33 K.P., kadtong naulahi mao ang nahalinya nga pagadihogan sa espiritu. (Buhat 2:​1-38) Dili sila apil niadtong mga mamumuhat sa pagkadili-matarong nga gihisgotan ni Jesus kinsa magdanguyngoy ug magpakagot sa ilang mga ngipon tungod sa pagkapakyas sa pagkuha sa kahigayonan nga gitagana kanila.​—Lucas 13:​27, 28.

Ingong resulta, sa unang siglo ang “daghan” mao ang mga Hudiyo sa katibuk-an, ug ilabina ang relihiyosong mga pangulo. Sila miangkon nga buot ug pabor sa Diyos​—apan sumala lamang sa ilang kaugalingong mga sukdanan ug mga paagi, dili sa Diyos. Sa kasukwahi, ang “diyutay” kinsa misanong gumikan sa tim-os nga interes nga mahimong bahin sa Gingharian nahimong dinihogang mga membro sa Kristohanong kongregasyon.

Karon tagda ang labawng gipasangkad nga pagpadapat nga nahitabo sa atong adlaw. Daghang tawo nga nagtambongan sa mga simbahan sa Kakristiyanohan natudloan nga sila moadto sa langit. Hinunoa, kini nga mga pangandoy wala ipasukad sa tukmang mga pagtulon-an sa Kasulatan. Sama sa mga Hudiyo sa sinugdan, sila buot ug pabor sa Diyos ugaling sa ilang kaugalingong mga sukdanan.

Bisan pa niana, aduna nay diyutay sa atong panahon kinsa mapainubsanong misanong sa mensahe sa Gingharian, nagdedikar sa ilang kaugalingon kang Jehova, ug nahimong takos sa iyang pabor. Kini mitultol ngadto sa ilang pagkahimong “mga anak sa gingharian.” (Mateo 13:38) Ang maong dinihogang “mga anak” gisugdan sa pagdapit sa Pentekostes 33 K.P. Ang mga Saksi ni Jehova dugay nang nagtuo nga ang ebidensiya sa pakiglabot sa Diyos sa iyang katawhan nagpaila nga sa paninugdan ang mga membro sa langitnong matang gitawag na. Busa, kadtong nakakat-on sa kamatuoran sa Bibliya sa dili pa dugayng katuigan nakasabot nga ang paglaom sa kinabuhing walay kataposan sa usa ka paraisong yuta gitagana na karon. Sila midaghan pa sa nagakunhod nga nanghibilin sa dinihogang mga Kristohanon, nga adunay paglaom nga moadto sa langit. Ang Lucas 13:​24 dili pangunang mapadapat niadtong kinsa wala magdahom nga moadto sa langit, apan kini tinong nasudlan ug maalamong tambag alang kanila.

Pinaagi sa pag-awhag kanato nga kusganon kitang manlimbasog, si Jesus wala magsulti nga siya o ang iyang Amahan magbutang ug mga babag sa atong dalan aron babagan kita. Apan atong masabot gikan sa Lucas 13:​24 nga ingon niana ang mga kinahanglanon sa Diyos aron dili maapil kadtong mga dili-takos. Ang “kusganong panlimbasogi ninyo” nagpasabot ug pakigbisog, paghimo kutob sa atong maarangan. Busa hayan atong pangutan-on ang atong kaugalingon, ‘Ako ba nagahimo kutob sa akong maarangan?’ Ang Lucas 13:​24 mahimong usbon ang pagkasulti, ‘Kinahanglang kusganon akong manlimbasog aron makasulod sa sigpit nga pultahan tungod kay daghan ang naninguha sa pagsulod apan dili makahimo. Busa ako ba tinuorayng kusganong nanlimbasog? Ako ba sama sa usa ka atleta sa karaang estadyum kinsa nagbuhat sa tanan niyang maarangan aron maangkon ang ganti? Walay ingong atleta nga kulang sa kadasig, nga nagpasayonsayon lang. Ako ba?’

Ang mga pulong ni Jesus nagpaila nga ang pipila hayan magtinguha sa ‘pagsulod sa pultahan’ sa ilang kaugalingong kasayon lamang, sa sayon nga paaging gusto nila. Ang maong tinamdan makaapektar sa indibiduwal nga mga Saksi. Ang pipila lagmit mangatarongan, ‘Aduna akoy nailhan nga debotadong mga Kristohanon nga nanlimbasog kutob sa ilang mahimo sulod sa katuigan, naghimog daghang sakripisyo; bisan pa niana, pagkamatay nila, ang kataposan niining daotang sistema sa gihapon wala pa modangat. Busa mas maayo tingali nga maghinayhinay una ko, magkinabuhi ug mas normal nga kinabuhi.’

Dali ra kaayong maghunahuna nianang paagiha, apan maalamon ba gayod kini? Pananglitan, ang mga apostol naghunahuna ba nianang paagiha? Tinong wala. Ilang gihatag sa tinuod nga pagsimba ang tanan kutob sa ilang maarangan​—hangtod sa ilang kamatayon. Si Pablo, pananglitan, nakaingon: “[Si Kristo] mao ang atong ginabandilyo . . . Alang niining katuyoana ako sa pagkatinuod nagahago, nga nanlimbasog sa akong kaugalingon sumala sa pagpalihok niya ug kini nagalihok dinhi kanako nga may gahom.” Sa ulahi siya misulat: “Niining katuyoana kita nagahago ug nagapanlimbasog sa atong kaugalingon, tungod kay gipahimutang nato ang atong paglaom diha sa usa ka buhing Diyos, kinsa usa ka Manluluwas sa tanang matang sa mga tawo, ilabina sa mga matinuohon.”​—Colosas 1:​28, 29; 1 Timoteo 4:10.

Atong nahibaloan nga si Pablo nagbuhat sa bug-os matarong nga butang sa pagpanlimbasog. Pagkatagbaw sa matag usa kanato nga makasulti sama sa gisulti ni Pablo: “Gibugno ko na ang maayong bugno, ako nakadagan na hangtod sa pagkatapos, nasunod ko na ang pagtuo.” (2 Timoteo 4:7) Busa uyon sa mga pulong ni Jesus nga natala sa Lucas 13:​24, ang matag usa kanato makapangutana, ‘Ako bang gipahinungod ang akong kaugalingon uban ang kakugi ug paningkamot? Oo, ako ba naghatag ug dagaya, makanunayong pamatuod nga ako misunod sa tambag ni Jesus: “Kusganong panlimbasogi ninyo ang pagsulod agi sa sigpit nga pultahan”?’