Mga Batan-on nga Nagaalagad sa Diyos

GIISIP ba nimong talagsaon nga ang buotang mga batan-on nagagugol sa ilang panahon, nga walay suhol, sa pag-anha sa inyong pultahan sa paghisgot bahin sa Diyos? Mopatim-aw bang katingad-anan, sa panahon sa nagausbawng kadili-matinuohon, nga ang mga bata nagakuyog sa ilang mga ginikanan sa pagpakigsulti sa uban bahin sa kahibulongang mga saad sa Bibliya sa usa ka malipayong umaabot?a

Diha sa kadaghanan sa 60,000 ug daghan pang kongregasyon sa mga Saksi ni Jehova sa tibuok yuta, makaplagan nimo ang daghang batan-on. Sila wala magatambong sa senemanang Sunday school o klase sa katekismo. Hinunoa, kining mga batan-ona nagapahimulos ug nagasalmot pa sa mga tigom sa kongregasyon. Ang mga gagmayng bata makapahayag ug yanong mga komento. Ang mga hapit nang tin-edyer nagaentra sa Tunghaan sa Teokratikanhong Ministeryo. Gigugol sa daghang tin-edyer ang mga bakasyon sa tunghaan sa pagtabang sa mga silingan nga mahibalo bahin sa Diyos ug sa kahibulongan niyang mga saad alang sa umaabot.

Dili bag-o ang maong kalihokan sa batan-on. Ang Bibliya nagasugid bahin sa matinuohong mga batan-ong lalaki ug mga babaye, ingon man mga tin-edyer ug gagmayng mga bata, nga nagapakitag talagsaong mga panig-ingnan sa pag-alagad sa Diyos.

Ang basahong Mga Salmo sa Bibliya mitagna bahin sa “pundok sa mga batan-ong lalaki,” nga makapapresko ug daghan ingon sa “mga yamog,” diha sa diyosnong pag-alagad. Kini misugilon usab bahin sa “mga batan-ong lalaki” ug “mga ulay” nga nagadayeg sa ngalan sa Diyos. (Salmo 110:3; 148:12, 13) Kalagmitan, ang pila ka batan-on nahiapil niadtong presente sa gibubo ang balaang espiritu sa Diyos diha sa mga magtutuo sa Pentekostes 33 K.P. Niadtong adlawa mga 3,000 ang midawat sa Pulong ug nangabawtismohan. Si apostol Pedro miingon nga kining katingalahang hitabo maoy katumanan sa tagna ni Joel: “Ang imong mga anak lalaki ug imong mga anak babaye magapanagna ug ang imong mga batan-ong lalaki makakitag mga panan-awon ug ang imong mga tigulang nga lalaki magadamgo sa mga damgo.”—Buhat 2:4-8, 16, 17, 41.

Ang ubang sulundang mga tawo diha sa Bibliya nga nag-alagad kang Jehova nga Diyos sa ilang pagkabatan-on nagaapil kang Samuel, sa matarong nga si Haring David, sa iladong mga propeta sa Bibliya nga si Jeremias ug si Daniel, ingon man ang matinumanong si Timoteo. Kining gulaa naundan sa tulo ka artikulo nga nagahisgot sa pipila niining mga sulundan sa Bibliya. Imong makita gikan sa mga artikulo nganong ang mga batan-on, ingon man ang mga tawo nga mas edaran, nagaisip nga seryoso sa pag-alagad sa Diyos ug nganong sila nagagugol ug daghan kaayong panahon aron tabangan ang ilang mga silingan sa pagbuhat sa sama.

[Footnote]