Salig Diha sa Hinatag-Diyos nga Kalig-on

Mga Pangunang Punto Gikan sa Ikaduhang Timoteo

SI Jehova nagahatag sa iyang mga alagad ug gahom sa paglahutay sa mga pagsulay ug paglutos. Ug pagkadako sa panginahanglan ni Timoteo ug sa ubang mga Kristohanon sa hinatag-Diyos nga kalig-on! Ang malaglagong sunog sa Roma niadtong 64 K.P., ug ang hungihong niini nga si Emperador Nero maoy hinungdan. Aron sa pagpanalipod sa iyang kaugalingon, iyang gibasol ang mga Kristohanon, ug kini sa dayag nakamugna ug balod sa paglutos. Malagmit sa maong panahon (mga 65 K.P.), si apostol Pablo nabilanggo pag-usab sa Roma. Bisag nagaatubang sa kamatayon, siya niadto misulat sa iyang ikaduhang sulat ngadto kang Timoteo.

Ang sulat ni Pablo nag-andam kang Timoteo nga suklan ang mga apostata ug mobarog nga malig-on atubangan sa paglutos. Kini nagdasig kaniya nga mopadayon sa paghimog espirituwal nga pag-uswag ug naghisgot bahin sa mga kahimtang ni Pablo sa bilanggoan. Ang sulat nagtabang usab sa mga magbabasa nga mosalig sa hinatag-Diyos nga kalig-on.

Pag-antos sa Kasakitan ug Pagtudlo Uban ang Kaaghop

Ang Diyos naghatag ug kalig-on alang kanato nga molahutay sa paglutos ingong magmamantala sa maayong balita. (2Ti 1:1-18) Wala hikalimti ni Pablo si Timoteo sa iyang mga pag-ampo, ug iyang nahinumdoman ang iyang pagtuo nga walay pagminaot. Ang Diyos naghatag kang Timoteo ‘dili sa usa ka espiritu sa pagkatalawan, kondili sa gahom, gugma, ug sa maayong panghunahuna.’ Busa pasagdi siyang dili magakaulaw sa pagpanaksi ug sa pag-antos sa kasakitan alang sa maayong balita. Siya usab miagda nga “padayong huptan ang sumbanan sa maayong mga pulong” nga nadunggan gikan kang Pablo, sama nga kita kinahanglang motapot gayod ngadto sa tinuod Kristohanong kamatuoran bisag ang uban motalikod gikan niini.

Ang mga butang nga gitudlo ni Pablo angay nga igatudlo usab ngadto sa matinumanong mga tawo kinsa magatudlo sa uban (2:1-26) Si Timoteo giagda nga mahimong usa ka maayong sundalo ni Kristo, matinumanon sa dihang nag-antos sa kasakitan. Si Pablo mismo nag-antos sa pagkabilanggo tungod sa pagsangyaw sa maayong balita. Siya nagdasig kang Timoteo nga maningkamot kutob sa iyang mahimo nga itanyag ang iyang kaugalingon nga usa ka magbubuhat nga kahimut-anan sa Diyos, nagalikay sa mga sulosulting waykapuslanan nga nahasupak sa kon unsay balaan. Ug siya giingnan nga ang ulipon sa Ginoo angayng magtudlo sa uban nga may kaaghop.

Isangyaw ang Pulong!

Ang hinatag-Diyos nga kalig-on gikinahanglan sa pag-atubang sa kataposang mga adlaw ug mahuptan ang kamatuoran sa Kasulatan. (3:1-17) Taliwala sa mga dili diyosnon motungha ang mga tawong ‘nagatuon kanunay apan wala managpakakab-ot sa tukmang kahibalo sa kamatuoran.’ Ang maong ‘daotang mga tawo ug mga impostor mosamot sa pagkadaotan, nagpahisalaag ug nahisalaag.’ Apan, si Timoteo angay nga ‘mopadayon sa mga butang nga iyang nakat-onan.’ Busa mao man usab kita, sa pagkasayod nga ang ‘tibuok kasulatan maoy dinasig sa Diyos ug mapuslanon alang sa pagpanudlo, pagpamadlong, pagtul-id sa mga butang, ug sa pagmatuto sa pagkamatarong, aron ang tawo sa Diyos mamahingpit, ug bug-os nga masangkapan alang sa maayong buluhaton.’

Si Timoteo angay nga mosukol sa mga apostata ug tumanon ang iyang ministeryo. (4:1-22) Iyang mabuhat kini pinaagi sa ‘pagsangyaw sa pulong’ ug magpabilin niini. Kini hinungdanon, sanglit ang kongregasyon nagaatubang sa usa ka “malisod nga panahon” tungod kay ang pipila nagtudlo ug bakak nga doktrina. Ang mga Saksi ni Jehova usab angay nga motapot sa Pulong sa Diyos karon, magasangyaw niini nga dinalian diha sa kongregasyon ug ngadto sa mga tawo sa gawas, bisan diha sa dili paborableng mga kahimtang. Si Pablo “nagbantay sa pagtuo,” bisag siya gisalikway sa uban. Apan ‘ang Ginoo nagpasulod ug gahom nganha kaniya, nga pinaagi kaniya unta ang pagsangyaw sa bug-os mamatuman.’ Hinaot nga kita usab mosalig sa hinatag-Diyos nga kalig-on ug magpadayon sa pagsangyaw sa maayong balita.

[Kahon/Hulagway sa panid 31]

Usa ka Maayong Sundalo: Si Pablo nag-awhag kang Timoteo: “Ingong usa ka maayong sundalo ni Kristo Jesus pakigbahin sa pag-antos sa kasakitan. Walay tawo nga nag-alagad ingong usa ka sundalo magpalangkit sa iyang kaugalingon diha sa mga pamatigayon sa kinabuhi, aron nga iyang maangkon ang pag-uyon sa usa nga nagpasulod kaniya sa pagkasundalo.” (2 Timoteo 2:3, 4) Ang usa ka Romanong sundalo ‘nag-antos sa kasakit’ sa dihang magdala sa bug-at nga mga hinagiban, usa ka atsa, usa ka basket, mga pagkaon alang sa tulo ka adlaw, ug uban pang mga butang. (Wars of the Jews ni Josephus, Book 3, kapitulo 5) Wala niya pangitaa ang mga interes sa negosyo, kay kana dili makapahimuot sa iyang agalon, ug siya ginatagan-an ug panggasto. Sa susama, ang usa ka Kristohanong nag-antos sa mga pagsulay gipakasama sa pagkahimong “usa ka maayong sundalo ni Kristo.” Bisag siya tingali nagtrabaho sa sekular nga paagi aron sa pagtuman sa Kasulatanhong mga obligasyon, dili niya tugotang malangkit nga wala kinahanglana uban sa materyal nga mga butang nga magpahunong kaniya sa pagpakigbisog sa espirituwal nga pagpakig-away. (1 Tesalonica 2:9) Sa pagsangyaw gikan sa balay ug balay, gibakyaw niya “ang espada sa espiritu, nga mao, ang pulong sa Diyos,” ug nagtabang sa pagpagawas sa katawhan gikan sa relihiyosong kasaypanan. (Efeso 6:11-17; Juan 8:31, 32) Sanglit kinabuhi ang nalangkit, hinaot ang tanang Kristohanong mga sundalo magpadayon sa pagpahimuot kang Jesu-Kristo ug kang Jehova nga Diyos niining paagiha.