Nganong Dugay Kaayong Gihusay ang Isyu?
MGA 6,000 ka tuig kanhi, wala lalisa ang pagkasoberano sa Diyos. Sa pagkahuman sa iyang kahibulongang mga buhat sa paglalang, “Nakita sa Diyos ang tanan nga iyang gibuhat ug, tan-awa! kana maayo kaayo.” (Genesis 1:31) Unya misulod siya sa usa ka taas nga yugto sa “pahulay”; dili, hinuon, nga siya sa pisikal gikapoy. Hinunoa, siya mipahulay sa pagkaagi nga gihunong niya ang iyang mga buhat sa paglalang diha sa yuta, nga masaligon nga ang iyang maayong katuyoan bahin niini magmalamposon sa bug-os.—Genesis 2:1-3; Isaias 55:11.
Unsa ang maong katuyoan? Gibutang ni Jehova ang unang tawhanong magtiayon sa usa ka dapit nga gitawag ang tanaman sa Eden. Ang ilang unang responsabilidad mao ang pag-atiman sa ilang paraisong pinuy-anan, apil ang nagkadaiya kaayong kahayopan. Gawas pa, sila kinahanglang manganak ug magmatutog mga anak. Sa nahaigong panahon, samtang modako ang ilang pamilya, ilang ipaabot ang Paraiso ngadto sa kinatumyan sa yuta sa pagsugot sa sugo sa Diyos nga ‘dag-a ang yuta.’ Busa, ang yuta sa kadugayan mahimong usa ka matahom nga pinuy-anan, nga puno sa malipayon, nahiusang pamilya nga nag-alagad sa ilang langitnong Amahan. Kadto ang orihinal nga katuyoan sa Diyos.—Genesis 1:27, 28; 2:8, 15, 20-22.
Si Adan ug si Eva makig-ambit ba sa pagtuman niining dakong katuyoan hangtod sa kataposan? Kana magdepende sa ilang pagpadayon sa pagkooperar niini pinaagi sa pagsugot sa ilang Maglalalang. Ang ilang pagkamasinugtanon dili mahimong binuta, nga dili hunahunaon. Sila gihatagan ug kagawasan sa pagpili, kay buot sa Diyos nga sila mag-alagad kaniya gikan sa mapabilhon nga kasingkasing. Ingong usa ka dayag nga pahinumdom sa iyang makataronganong pagkasoberano, gihatag niya kanila ang usa ka yanong pagsulay. Sila makakaon sa bisan unsang bunga diha sa tanaman gawas sa usa. Dihay usa ka kahoy nga nagpamunga nga mahitungod niana ang Diyos miingon: “Sa adlaw nga ikaw mokaon gikan niana ikaw mamatay gayod.”—Genesis 2:16, 17.
Kining mga pulonga nagtug-an kanato nga si Adan ug si Eva wala lalanga aron matigulang ug mamatay. Ang kamatayon moabot lamang kon sila mosupak niining yanong sugo. Kon si Adan ug si Eva nagpabilin pang masinugtanon sa Diyos, sila unta buhi pa sa yuta karong adlawa ingong mga ginikanan sa tibuok-kalibotang pamilya sa hingpit nga mga kaliwat.—Tan-awa ang prinsipyo nga gipahayag sa Salmo 37:29.
Ugaling, usa sa manulondang mga linalang sa Diyos, nga karon gitawag Satanas, nahimong hinawayon sa paagi sa Diyos sa pagmando. Giagda niya si Eva sa pagkaon sa gidiling bunga, nga malalangong nagsugyot nga pinaagi sa pagkaindependente sa pagmando sa Diyos, mahimong mas maayo ang iyang kahimtang. Hinuon, ang tinuod nga motibo ni Satanas mao ang tinguha nga mahimong diyos sa umaabot nga pamilya sa katawhan.—Genesis 3:1-5; Mateo 4:8, 9; Juan 8:44.
Sanglit si Jehova naghatag sa unang tawhanong magtiayon sa tanan nga ilang gikinahanglan, angay untang ituboy ni Eva ang iyang pagmando ug isalikway ang bakakong sugyot ni Satanas. Makapasubo, hinuon, siya mipadayon ug milapas sa balaod sa Diyos. Human niadto, gipalabi ni Adan ang pagduyog sa iyang asawa diha sa iyang dili-maalamong dalan. Busa ang mabuotbuoton nga magtiayon, ingon man si Satanas, mirebelde batok sa Diyos, ug mitungha ang isyu sa balaang pagkasoberano.—Genesis 3:6.
Panahon Gikinahanglan sa Paghusay sa Hinungdanong mga Isyu
Si Jehova makalaglag unta sa tulo ka rebelde dihadiha. Apan kana dili maghusay nga mabug-oson sa mga pangutana nga gipatungha sa ilang pagrebelde. Ang tawo malamposon bang makamando sa iyang kaugalingon nga bulag sa Diyos? Hustisya ba sa bahin sa Diyos ang pagpangayog pagpasakop sa iyang pagkasoberano? Dugang pa, tungod sa kagawian sa unang magtiayon, may mga tawo ba nga dimahakogong mopalabi sa pag-alagad sa Diyos nga kinabubut-on—bisan pag sulayon ni Satanas? (Job 1:7-11; 2:4) Kinahanglan ug panahon sa pagtubag niining mga pangutanaha. Kinahanglan ug panahon, usab, sa pagbuntog sa mga epekto nianang orihinal nga rebelyon ug pagtuman sa katuyoan sa Diyos sa paghimo sa yuta nga usa ka paraiso nga pagapuy-an sa walay-salang tawhanong banay. Gipaabot pa gihapon nato ang pangataposang kasulbaran sa maong mga isyu.
Nahiuyon sa iyang balaod, gikuha sa Diyos gikan kang Adan ug Eva ang pribilehiyo sa pagkinabuhing walay kataposan. Sila dili na takos makig-ambit sa katumanan sa iyang dakong katuyoan. Bisan pa niana, sa wala pa sila mamatay, sila gitugotan sa pagpanganak ug pagpatunghag mga anak. Matuod, si Adan ug Eva wala na makapasa ngadto sa ilang mga kaliwat sa mabaskogon, way-sala nga kinabuhi. (Roma 5:12) Apan bisan pag ang mga kaliwatan nga misunod natawong dili hingpit ug nahukman sa kamatayon, daghang indibiduwal ang nagbaton sa higayon sa pagpakita kon diin sila nagbarog maylabot sa dakong isyu sa pagkasoberano.
Pagsulbad sa Isyu
Unsaon sa Diyos sa pagsulbad niining mga butanga maylabot sa iyang pagkasoberano? Sa usa ka diwa ang mga pangutana nga gipatungha didto sa Eden karon gitubag na. Ang libolibong katuigan sa kasaysayan sa tawo sa masakit nagpadayag nga ang gipatuo ni Satanas nga si Eva mas maayog kahimtang kon bulag sa Diyos maoy usa ka bakak. Ang tawhanong pagmando nga wala magpakabana sa Diyos nahimong mapinadayonong kapakyasan. Sumala sa giingon sa Bibliya: “Ang tawo nagmando sa tawo sa iyang kadaotan.”—Ecclesiastes 8:9.
Sa laing bahin, daghang maayong butang ang gipamatud-an sulod sa daghang katuigan sukad nakasala si Adan ug si Eva. Daghang tawo ang nagpasundayag sa di-mabugtong pagmahal sa pagkasoberano ni Jehova, nga ang labing talagsaong panig-ingnan mao “ang Anak sa tawo,” si Jesu-Kristo mismo. (Mateo 20:18; Hebreohanon 11:1–12:3) Kadtong nagsunod sa mga balaod sa Diyos ug nag-ila sa iyang pagkasoberano nakakaplag nga kini gayod mao ang labing maayong paagi. Nasinati nila ang kamatuoran sa proverbio: “Ang panalangin ni Jehova—kana ang makapadato, ug dili siya modugang ug kasakit niana.” (Proverbio 10:22) Dugang pa, salamat sa tagana sa pagkabanhaw, sila sa kataposan makaambit sa katumanan sa dakong katuyoan sa Diyos.—Juan 5:28, 29.
Wala malimti ni Jehova ang iyang orihinal nga katuyoan. Kadtong nagasalikway sa iyang pagkasoberano dili tugotang magmando sa yuta sa tanang panahon, ug ang Bibliya nagpasidaan nga ang Diyos duol nang molihok batok kanila. Atong mabasa: “Ang kapungot sa Diyos ginapadayag gikan sa langit batok sa tanang pagkadili-diyosnon.” (Roma 1:18) Kining umaabot nga kapahayagan sa kasuko sa Diyos, nga gitawag sa Bibliya nga Armageddon, sa walay duhaduha mopasundayag nga siya nagalungtad gayod. Kadto lamang nagadawat sa iyang pagkasoberano ang maluwas sa maong talagsaong hitabo. “Ang mga matul-id mao ang magapuyo sa yuta, ug ang mga walay-ikasaway mao ang mahibilin ibabaw niini. Mahitungod sa mga daotan, sila pagaputlon gikan sa yuta mismo.”—Proverbio 2:21, 22.
Ang Dakong Isyu ug Ikaw
Tungod niining mga kamatuorana, ang matag usa kanato—sama kang Adan ug Eva—kinahanglang mopili. Sulayan ba nato ang pagkinabuhing bulag sa Diyos? O mopasakop ba kita sa iyang pagkasoberano? Hinumdomi, kini mao ang labing hinungdanong isyu nga giatubang nimo karong adlawa. Ang ubang mga isyu, bisan pag unsa tingali ka hinungdanon, may kalabotan sa imong kinabuhi karon. Kini may kalabotan sa kinabuhing walay kataposan. Ang desisyon nga imong himoon mag-apektar sa imong walay-kataposang kaugmaon.
Sa unsang paagi imong ikapakita nga imong gidawat ang pagkasoberano sa Diyos? Pinaagi sa makugihong pagtuon sa iyang Pulong, ang Bibliya, ug pagtinguha sa pagsugot sa iyang kabubut-on sa pakig-uban sa ubang matuod nga mga Kristohanon. (Sofonias 2:2, 3) Kon imong buhaton kana, mabatonan nimo ang makalipayng paglaom nga makita ang katumanan sa dakong katuyoan sa Diyos. Imong makita ang katumanan niining kahibulongang saad: “Makadiyut na lamang, ug ang daotan mawala na . . . Apan ang mga maaghop magapanunod sa yuta, ug sila makakaplag gayod sa ilang tumang kalipay sa kadagaya sa pakigdait.” (Salmo 37:10, 11) Kahibulongan gayod nga sangpotanan sa tanan nga nagapasakop sa pagkasoberano sa Diyos! Gamhanan gayod nga katarongan sa paghukom nga maalamon niining labing hinungdanong butang!
Kon si Adan ug si Eva nagsugot pa sa Diyos, sila unta buhi pa sa yuta karong adlawa
Pinaagi sa pagpasakop sa pagkasoberano ni Jehova, daghan ang gantihan sa kinabuhing walay kataposan sa usa ka yutang paraiso