Pag-ihap sa Bili sa Paglalin Ngadto sa Usa ka Datong Yuta
KINI sinati nga talan-awon diha sa mga konsulada sa tibuok nagkaugmad nga kalibotan: usa ka lawak hulatanan nga punog mga tawo nga gikulbaang nagpaabot sa ilang interbiyo. Pinasukad nianang mubo apan hinungdanong panaghisgot, pagatinoon kon kaha makabaton silag bisa ngadto sa usa ka industriyalisadong yuta sa Kasadpan. Gituohan sa daghan nga kini unya mao ang ilang tiket paingon sa kauswagan. “Ako naghago sa upat ka tuig, ug wala gani ako makapalit ug radyo,” mimulo ang usa ka batan-ong taga-West Africa. “Kon atua pa ako sa Inglaterra o sa Tinipong Bansa, sa pagkakaron may kotse na ako ug kaugalingong lugar nga kapuy-an.”
Dili lisod sabton nganong daghan diha sa kabos, nagkaugmad nga kanasoran nagbaton nianang mga pagbatia. Alang kanila, lisod makit-an ang mga trabaho, ug gamay ra ang suweldo. Tungod sa implasyon ang tinigom inanay mahurot. Ang mga balay maoy nihit ug huot. Ang mga tawo nagsul-ob ug sinina nga biya na niadtong anaa sa mas datong kanasoran. Gibati sa daghan nga nahiunlod sa ekonomikanhong huyonghuyong.
Ug nagapangamay gayod ang datong Kasadpan! Matud sa usa ka batan-ong lalaki sa Sierra Leone: “Ang pipila nga nakaadto sa laing nasod namalik ug nangestorya nga naghatag kanamog kaisog sa pag-adto ug pagtan-aw sa industriyalisadong kanasoran sa among kaugalingon. Matud nila nga ikaw kinahanglang magkugi, apan dako ang imong makitang salapi mao nga makasuportar ka sa imong kaugalingon ug makabaton pag pipila ka kaluhoan, sama sa usa ka kotse. Ug kon ikaw mobalik dinhi nga may mga duha ka libong dolyares, ikaw makatukod ug usa ka negosyo ug makaminyo.”
Dili katingad-an, ang pila ka alagad sa Diyos mangatarongan sa susamang paagi. Usa ka Aprikanhong sister miingon: “Kaming mga batan-on sa organisasyon sa Diyos namati sa mga estoryahay bahin sa unsa ka maayo ang kahimtang sa uban nga nangadto sa laing nasod. Busa usahay ako mangutana sa akong kaugalingon, ‘Unsa kaha ako? Nganong nag-antos ako dinhi? Angay bang moadto ako o magpabilin?’”
Kon nagpuyo ka sa usa ka kabos nga nasod, lagmit ikaw maghunahuna kon ang pagbalhin makapauswag ba sa matang sa imong kinabuhi. Ugaling, ang paglalin ngadto sa usa ka langyawng nasod maoy usa ka dako kaayong proyekto, usa ka gastoso ug seryosong lakang. Kini mahimong maglangkit sa pagkat-on ug usa ka bag-ong pinulongan, pagbatog bag-ong mga kahanas sa trabaho, pagpasibo ngadto sa usa ka bag-ong kultura, pag-agwanta sa pagpihigpihig nga gipahayag sa daghan ngadto sa mga langyaw, ug pagkat-on sa bug-os bag-ong paagi sa kinabuhi. Bisan pa niana, daghang Kristohanon nakahimo niana nga malamposon ug nagpamatuod nga maayong mga tabang sa mga kongregasyon diha sa ilang bag-ong mga nasod, nga nag-alagad nga sulundang mga magmamantala, mga payunir, mga ansiano, ug mga ministeryal nga alagad.
Hinuon, dili tanan ang maayo ug kahimtang. Ang mga kalisod ug mga suliran sa paglalin misangpot sa espirituwal nga kadaotan sa pipila. Busa, dayag nga ang maong paglalin dili angay himoon nga walay seryoso, mainampoon nga pamalandong. Ang Bibliya nagtambag sa Proverbio 3:5, 6: “Sumalig ka kang Jehova uban sa bug-os mong kasingkasing ug ayaw pagsalig sa imong kaugalingong pagsabot. Sa tanan nimong mga dalan matikdi siya, ug siya mismo magtul-id sa imong mga dalan.” Oo, buot nimong makatino nga ikaw nagalihok nga nahiuyon sa kabubut-on ni Jehova. (Santiago 4:13-15) Ug si Jesus mihatag ug pila ka praktikal nga tambag aron sa pagtabang kanimo sa pagbuhat niini sa dihang iyang giawhag ang iyang mga mamiminaw nga ‘ipha ang bili.’ (Lucas 14:28) Naglangkit kini dili lamang sa mga butang maylabot sa salapi. Kini nagkahulogan sa pagtagad sa posibleng espirituwal nga mga bili sa paglalin.
Ang mga Kamatuoran sa Kinabuhi sa Laing Nasod
Una pa molalin sa bisan diin, angay nimong mabatonan ang usa ka maayo, matinud-anong ideya kon unsay pagadahomon sa imong pag-abot didto. Kon mahimo, himoa ang pasiunang pagduaw ug tan-awa sa imong kaugalingon kon sama sa unsa ang mga kahimtang. Kon dili kana himoon, kinahanglang mosalig ka sa segunda-manong impormasyon. Ang Bibliya nagpasidaan: “Si bisan kinsang walay kasinatian motuo sa matag pulong, apan ang usang maalamon magapalandong sa iyang mga lakang.”—Proverbio 14:15.
Nabatonan sa pipila ang tanan nilang impormasyon mahitungod sa kinabuhi sa mga nasod sa Kasadpan gikan sa mga sine ug mga salida sa telebisyon. Busa nagtuo sila nga ang tanan didto maoy dato, nagadrayb ug bag-ong kotse, ug nagpuyo sa usa ka maluhong balay. Apan, ang kamatuoran lahi. Daghang datong kanasoran dunay makahadlok nga mga sukod sa kakabos, kawalay-balay, ug kawalay-trabaho. Ug daghan sa labing kabos nga mga molupyo mao ang bag-ong mga imigrante o lalin. Misaysay ang usa ka opisyal sa konsulada sa embahada sa U.S. sa usa ka kabos nga nasod: “Wala lang masayod ang mga tawo kon unsa ka lisod ang pagkamapahiluna sa Amerika. Ang pipila nagasulat ug mga sulat sa balay nga nag-ingon nga maayo ang ilang kahimtang—nga sila nakapalit ug duha ka kotse ug usa ka balay—apan sa kamatuoran sila nagakalisod.”
Ang kahimtang susama sa laing dapit. Si Gn. Sahr Sorie maoy usa ka edukador nga taga-West Africa nga nagpuyo ug nagtungha sa London. Mikomento siya: “Dili sayon ang paglalin gikan sa Aprika ug pagpuyo sa Inglaterra. Daghan kaayong imigrante ang nagkinabuhing kabos kaayo. Imong makita ang mga lakra sa kalisod diha sa ilang mga nawong. Ang pipila malisdan sa pagtigom ug 20 pence aron makatawag sa telepono. Kasagaran sila nagapuyo sa usa ka kuwarto kauban sa daghan pa, nga may gamay rang heater aron sila dili tugnawon. Sila makatrabaho lamang sa mga trabahong ubos, ug bisan pa niana kini dili paigo sa pagbayad sa ilang mga bayranan. Kadtong namiya sa Aprika aron makaikyas sa kakabos sagad makadiskobre nga sila labi pang kabos diha sa timawang mga dapit sa Uropa.”
Ang mga kalisod sa salapi nga magaduyog sa pagpahiluna diha sa usa ka bag-ong yuta daling makatuok sa espirituwalidad sa usa. (Mateo 13:22) Tinuod, ang pagkugi gidayeg diha sa Bibliya. (Proverbio 10:4; 13:4) Apan daghan nga nangadto sa laing nasod napugos sa pagdawat ug duha o tulo ka trabaho aron makab-ot ang ilang pinansiyal nga mga tumong—o yanong aron mabuhi lamang. Diyutay o wala nay panahong mabilin sa pagpadayon sa pagsimba sa Diyos. Mapasagdan ang Kristohanong mga tigom, pagtuon sa Bibliya, ug pagpakig-ambit sa kamatuoran sa Bibliya sa uban. Ang mga pulong ni Jesu-Kristo makapasubo nga napamatud-an: “Ikaw dili makapaulipon sa Diyos ug sa Bahandi.”—Mateo 6:24.
Moral nga mga Kapit-osan
Angay usab nimong hatagag pagtagad ang moral nga kahimtang sa imong umaabot nga bag-ong nasod. Ang Bibliya nagtug-an kanato nga si Lot mipili sa pagpuyo sa Distrito sa Jordan. Gikan sa materyal nga panglantaw, ang iyang desisyon daw maalamon, kay “kadto usa ka rehiyon nga maayong pagkatubig . . . , sama sa tanaman ni Jehova.” (Genesis 13:10) Bisan pa niana, ang bag-ong mga silingan ni Lot maoy “dagkong mga makasasala batok kang Jehova”—mga tawong hiwi bahin sa sekso! (Genesis 13:13) Ingong sangptoanan, “ang maong matarong nga tawo tungod sa iyang nakita ug nadungog samtang nagpuyo sa ilang taliwala sa adlaw-adlaw nagsakit sa iyang matarong nga kalag tungod sa ilang malapasong mga binuhatan.”—2 Pedro 2:8.
Sa susama, karong adlawa ang paglalin ngadto sa Kasadpan basin magladlad kanimo ug sa imong pamilya ngadto sa moral nga mga kapit-osan ug mga tentasyon nga grabe pa kay diha sa inyong yutang-natawhan. Dugang pa, ang mga tawong tigulang basin dili pasidunggan kay sa diha sa kaugalingong nasod. Ang pagtahod alang sa mga ginikanan basin wala idasig. Ang mga silingan wala kaayoy interes sa usag usa. Sa unsang paagi ang maong mga kapit-osan mag-apektar kanimo ug sa imong pamilya? Kini butang nga palandongon nga mainampoon.
Mga Ginikanang Wala sa Balay
Ang pila ka ginikanan mipili sa pagbilin sa ilang mga pamilya ug pag-adto sa laing nasod nga inusara. Ang ilang plano mao nga pasundon ang ilang pamilya sa dihang sila mahiluna na o tingali mopauli sa kaugalingong nasod nga may daghang kuwarta. Maalamon ba ang maong kahikayan?
Ang Kasulatan nag-obligar sa mga ginikanan sa pagtagana sa materyal nga mga panginahanglan sa ilang mga pamilya, ug sa pila ka hingaping mga kaso, ang usa ka ginikanan walay kapaingnan gawas ang pagtrabaho sa laing nasod aron sa paghimo sa maong tagana. (1 Timoteo 5:8) Bisan pa niana, ang mga ginikanan obligado usab sa pag-atiman sa espirituwal nga mga panginahanglan sa ilang mga pamilya. Matud sa Pulong sa Diyos: “Kamong mga amahan, ayaw ninyo pasuk-a ang inyong mga anak, apan ipadayon ang pagmatuto kanila diha sa disiplina ug pagdumala sa kaisipan ni Jehova.”—Efeso 6:4.
Epektibo ba kining mahimo sa usa ka amahan kon siya wala sa iyang pamilya sa daghang bulan o katuigan sa usa ka panahon? Lagmit dili. Busa kinahanglang palandongon nimo kon ang materyal nga mga bentaha nga maangkon takos ba sa epekto tingali sa imong pagkawala nganha sa imong mga anak. Gawas pa, kasagarang madiskobrehan sa mga imigrante nga dili gayod sayon pangitaon ang ilang “bahandi” sumala sa ilang gihunahuna. Kon ang imigrante dili makaabot sa plete sa pamilya, ang panagbulag basin dangtag mga katuigan. Kini, sa baylo, basin momugnag seryosong moral nga mga kapeligrohan. (Itandi ang 1 Corinto 7:1-5.) Ikasubong isulti, ang pila diha sa maong masulayong mga kahimtang gidaog sa seksuwal nga imoralidad.
Masaligon sa mga Tagana sa Diyos
Samtang mous-os ang ekonomikanhong kahimtang sa kalibotan, maayo nga hinumdoman nga ang mga alagad sa Diyos angay dili mahadlok nga sila pagabiyaan. Matud ni Jesus: “Ayaw kamo pagkabalaka ug magaingon, ‘Unsay among kan-on?’ o, ‘Unsay among imnon?’ o, ‘Unsay among isul-ob?’ Kay kining tanang mga butanga mao ang ikag gipangita sa kanasoran. Kay ang inyong langitnong Amahan nahibalo nga inyong gikinahanglan kining tanang mga butanga. Nan, magpadayon kamo sa pagpangita pag-una sa gingharian ug sa iyang pagkamatarong, ug kining tanang ubang butang igadugang ra kaninyo.”—Mateo 6:31-33.
Ang mga Saksi ni Jehova karong adlawa nagaalagad sa intereses sa Gingharian sa Diyos pinaagi sa madasigong pagmantala sa maayong balita. (Mateo 24:14; 28:19, 20) Sa daghang kabos nga kanasoran, adunay dakong panginahanglan sa mga magwawali sa Gingharian. Ilabinang may panginahanglan sa hamtong nga mga ansiano ug ministeryal nga mga alagad. Inay moadto sa mauswagon sa ekonomiya nga nasod diin ang panginahanglan dili kaayo dako, daghan ang nagpalabi sa pagpabilin diha sa ilang kaugalingong mga nasod. Unsay kahimtang sa pipila kanila?
Si Alethia, usa ka taga-Kasadpang Aprika nga nag-alagad nga bug-os panahon sulod sa 30 anyos diha sa iyang kaugalingong nasod, miingon niini: “Ako may higayon sa pagpuyo sa laing nasod. Ang hinungdan nga wala ako mopuyo mao nga gusto kong mahauban sa akong kaugalingong katawhan ug mga paryente. Ako malipay sa pagtabang kanila nga makakat-on sa kamatuoran aron kami makaalagad nga magkahiusa kang Jehova. Walay usa ka butang ang akong nasayloan sa pagpabilin dinhi, ug wala ako magbasol.”
Si Winifred susamang nagpuyo sa usa ka nasod sa Aprika. Ang pisikal nga matang sa pagkinabuhi didto giklasipikar nga usa sa labing ubos sa kalibotan. Apan human sa 42 ka tuig diha sa bug-os-panahong pag-alagad ingong payunir, siya miingon: “Dili kanunayng sayon ang pagpaigoigo sa pangabuhi. Si Satanas naningkamot sa paghimo sa kahimtang nga lisod, apan si Jehova kanunayng nagtagana alang kanako ug nag-atiman sa akong mga panginahanglan.”
Sa karaang panahon si Abraham “bug-os nagtuo nga ang gisaad sa [Diyos] arang niyang matuman usab.” (Roma 4:21) Ikaw ba susamang nagtuo nga si Jehova makaarang sa pagtuman sa iyang saad ug mag-atiman kanimo kon imong ibutang pag-una ang intereses sa Gingharian diha sa imong kinabuhi? Mouyon ka ba sa salmista nga misulat: “Ang kasugoan sa baba [sa Diyos] maayo alang kanako, labi pa kay sa kaliboan nga bulawan ug salapi”? (Salmo 119:72) O mahimo kaha nga adunay panginahanglan nga imong ipadapat nga labi pang bug-os ang tambag ni apostol Pablo? Sa 1 Timoteo 6:8, siya misulat: “Kay may pagkaon ug panapot, kita magmatagbawon niining mga butanga.” Mahimo kaha nga ang maalamong butang pagabuhaton mao, dili ang pagpangitag bag-ong silinganan, kondili sa pagpahimulos sa labing maayo sa inyong silinganan karon?
Ang kahimtang sa pangabuhi diha sa daghang nasod makapahinabog grabeng kalisod alang sa mga Kristohanon. Busa, kon tapos sa pagpalandong sa tanang butang nalangkit, ang usa ka pamilya mohukom sa paglalin, walay katarongan nga ang uban manaway. (Galacia 6:5) Kadtong magapabilin makapadayon sa pagpangayo sa tabang ni Jehova sa pag-antos sa mga kalisdanan nga ipatungha niining sistema, samtang sila magakalipay sa espirituwal nga mga panalangin nga igahatag sa Diyos kanila. Hinumdomi, sa dili madugay ang mga inhustisya ug mga pagkawalay-panag-angay niining kalibotana pagatul-iron ubos sa Gingharian sa Diyos. Unya kini mahisama na sumala sa gisulat sa salmista: “Imong [Jehova] ginabuklad ang imong kamot ug ginatagbaw ang tinguha sa tanang buhing butang.”—Salmo 145:16.