Nganong Mapailobon Kaayo ang Diyos?
TAN-AWA ang masulob-on nga nawong sa usa ka bata nga gigutom. Tan-awa ang yagpis niya nga lawas ug ang midako nga tiyan. Palandonga ang dako kaayo nga panginahanglan niya sa pagkaon, ug tan-awa ang way-sulod nga panaksan nga iyang gibitbit. Tingali ang iyang inahan nagsud-ong pinaagi sa nanglawom nga mga mata, nga ang iya mismong nawong maoy makapasubong hulagway sa kawalay-paglaom. Unya sulayi ang pagluom sa imong kaguol—oo, ug pagpugong sa imong mga luha.
Kining hulagwaya gisubli sa minilyong beses diha sa 6 milyong kilometro kuwadrado sa gihampak-sa-gutom nga rehiyon sa Sahel. Kini moabot ug kapin sa 4,800 kilometros latas sa Aprika habagatan sa Desyertong Sahara, gikan sa Senegal sa Atlantikong Baybayon paingon sa Etiopia sa Pulang Dagat. Hinuon, nameligro usab sa gutom ang kapid-an diha sa ubang kayutaan. Ang World Health Organization nagtaho nga mga 1.1 libong milyong tawo sa tibuok yuta masakiton nga grabe o kulang sa sustansiya.
Ang kagutmanan, hinuon, maoy usa lang ka bahin sa pag-antos sa tawo. Ang tawo naghugaw sa yuta, ug apektado kitang tanan. Ang politikanhong mga sistema nagauyon sa inhustisya ug panaggubat nga nagpatunghag kasakitan ug kamatayon sa daghan. Nganong gitugotan sa Diyos kanang mga butanga? Matinagdanon ba siya kanato?
Matinagdanon Gayod ang Diyos!
Ang atong Maglalalang tinuod nga matinagdanon kanato. Adunay dakong pamatuod niini ug sa iyang katakos nga palamposon ang mga butang alang sa atong kaayohan ug alang sa panaghiusa sa tanan niyang kalalangan. Pananglitan, tan-awa ang nag-ubang hulagway sa usa ka putyukan nga mitugdong sa bulak sa usa ka kahoy nga nagabunga. Ang putyukan nagdepende sa bulak alang sa nectar nga gikinahanglan niini alang sa pagkaon. Sa baylo, ang kahoy nagdepende sa pollen nga gidala sa lawas sa putyukan gikan sa susamang kahoy. Niining paagiha, ang bulak mabinhian mao nga motungha ang bunga. Dili tanang kahoy nga nagabunga mabinhian niining paagiha. Ug ang iyang pagkamaayo mosangpot diha sa bunga nga tingali atong kan-on uban sa kahimuot ug kaayohan.
Ang putyukan mismo maoy bahin sa organisado-kaayong panon sa kapin sa 30,000 ka putyukan. Ang pipila magbantay sa balayan, samtang ang uban maghinlo o magpahangin niana. Ang uban pa gayod magpondo sa nectar ug pollen, magpakaon sa gagmay nga putyukan, o mangitag bag-ong mga tinubdan sa nectar. Ang Diyos naghikay pag-ayo sa mga butang mao nga kita makabatog kaayohan sa dihang ang maong puliki nga mga putyukan mopatunghag tam-is ug masustansiyang dugos nga makapahimuot sa atong panilaw.
Ang milagro sa pagtinabangay sa mga putyukan ug sa mga tanom ug taliwala sa mga insekto mismo maoy usa lang sa daghang pamatuod nga ang Maglalalang sa hingpit may katakos sa paghimo sa buhing mga butang nga magtinabangay sa usag usa. Maylabot niana, “ang Diyos maoy Diyos, dili sa kagubot, kondili sa pakigdait.” (1 Corinto 14:33) Nan, nganong gitugotan niya nga ang katawhan maglungtad diha sa labihang kawalay-panaghiusa, uban sa misangpot nga kasakitan alang sa daghan kaayo? Kon ang Diyos matinagdanon kanato, nganong nagpaabot siyag dugay kaayo sa pagtul-id niining kahimtanga? Sa pagkamatuod, nganong mapailobon kaayo ang Diyos?
Ang Pulong sa Diyos, ang Bibliya, nagatubag nianang mga pangutanaha. Kining talagsaong basahon nagtug-an kanato nga si Jehova nga Diyos nagpailob tungod sa usa ka maayong katarongan. Unsa ba ang maong katarongan? Ug hangtod kanus-a ang pailob sa Diyos?
[Picture Credit Line sa panid 2]
Cover photo: Frilet/Sipa