Pagkab-ot sa Tumong nga Gibutang Dihang Unom pa ka Tuig sa Edad
SUMALA SA ASOY NI SANDRA COWAN
Daghan nga ginikanan ang mopilig usa ka karera alang sa ilang mga anak, sama sa musika o ballet, ug mosugod sa pagbansay kanila sa bata pa kaayong edad. Kini ang gibuhat sa akong inahan alang kanako. Sukad sa panahon nga duha pa lang ka semana ang akong edad, ako gikuyog na ngadto sa Kristohanong mga tigom ug pagsangyaw sa kanataran.
DIHANG ako upat na ka tuig, si Mama nagtuo nga andam na akong mosangyaw sa kinaugalingon. Tin-aw pa akong mahinumdom sa una kong pagsulay. Kami nakaabot niadto sa usa ka dakong balay-umahan diha sa sakyanan, ug samtang si Mama ug ang uban naghulat sulod sa sakyanan, ako migawas ug mipaingon sa pultahan. Usa ka malulutong babaye namati samtang gitanyagan ko siyag napulo ka pulyeto. Ingong bayad niana, ako gihatagan niyag usa ka dakong barita sa sabon. Duha ka kamot ang akong gihakop niadto. Ako nalipay!
Niadto mismong tuiga, 1943, ang Watchtower Bible School of Gilead gibuksan aron sa pagbansayg bug-os-panahong mga payunir nga ministro alang sa buluhatong misyonaryo. Gidasig ako ni Mama nga himoon ko nga tumong sa akong kinabuhi ang misyonaryong pag-alagad. Ang Gubat sa Kalibotan II nagsilaob niadto sa Uropa, ug suginlan ako ni Mama mahitungod sa mga bata sa Saksi sa Uropa nga gikuha gikan sa ilang mga ginikanan. Gusto niya nga ako magmalig-on nga igo sa pagsagubang sa bisan unsang matang sa pagsulay.
Sa ting-init niadtong 1946, ako nabawtismohan sa internasyonal nga kombensiyon sa Cleveland, Ohio. Bisan tuod ako unom lang ka tuig sa edad, determinado ako sa pagtuman sa akong pahinungod kang Jehova. Niadtong ting-inita ako nag-alagad nga payunir sa unang panahon. Ako mahinumdom nga sa usa ka buntag nakapahimutang akog 40 ka magasin sa mga tawong nanglingkod sa The Plaza sa San Diego, California. Segurado ako, nga ang akong pagkagamay ug pagkaestoryador dakog kalabotan niadto.
Kasagaran kami magsangyaw duol sa Beth-Sarim, diin didto ang masakitong presidente sa Watch Tower Society, si Brader Rutherford, nagpuyo panahon sa mga tingtugnaw sa wala pa siya mamatay niadtong 1942. Regular namo siyang giduaw ug kami maniudto kauban sa bug-os-panahong mga alagad didto. Tungod sa maong malipayong mga pagduaw gihukom ko nga kadto gayod ang matang sa kinabuhi nga akong gusto. Unya gihimo kong akong tumong sa kinabuhi ang Tunghaang Gilead ug misyonaryong pag-alagad.
Sa sunod tuig nagdiborsiyo ang akong mga ginikanan, apan ang nabag-ong kahimtang sa pamilya wala makapaluya sa among espirituwalidad. Si Mama usa ka payunir ug mabalak-on kaayo mahitungod sa pagbansay nga gidawat sa akong igsoong lalaki ug kanako. Ang gamay namong treyler bibo tungod sa mga pagduaw sa Kristohanong mga igsoong lalaki ug mga babaye. Si Mama naningkamot sa linain nga akong mahimamat ang mga graduwado sa Gilead. Duha sa maong mga graduwado mao si Lloyd ug Melba Barry, kinsa nagduaw diha sa buluhatong sirkito samtang nagpaabot nga moadto sa ilang langyawng asaynment sa Hapon. Sila migahin ug panahon sa pagdasig nako—usa ka batang babaye nga nangandoy nga mahimong misyonaryo—ug kana nakapahingangha kanako.
Sa dihang ako napulo ka tuig sa edad, si Mama naminyo sa usa ka buotang Saksi nga usa usab ka payunir nga ministro. Iyang gisagop ang akong igsoong lalaki ug ako dili lamang sa papeles kondili sa iyang kasingkasing usab. Ang gugma niya kang Jehova ug kadasig alang sa pag-alagad mananakod kaayo.
Si Mama ug Papa nagbuhat ingong usa ka tem aron giyahan kaming duha ka anak latas sa lisod nga katuigan sa pagkatin-edyer. Ang among balay usa ka espirituwal nga dangpanan nga akong mahinumdoman uban sa kahidlaw. Alang kanila ang pagpayunir nga may gamayng kinitaan samtang magpadako ug duha ka anak dili sayon; nanginahanglan kadtog pagsakripisyo-sa-kaugalingon. Apan si Mama ug Papa nagsalig kang Jehova ug nagbutang nga una sa intereses sa Gingharian.
Makahinumdom gayod ako sa internasyonal nga kombensiyon sa New York City sa 1950! Si Papa mihulam ug kuwarta sa bangko, ug nagdala kamig tulo ka pasahero sa sakyanan aron makaabag sa gastos. Si Mama, Papa, akong igsoong lalaki, ug ako naglingkod sa atubangan gikan sa San Diego hangtod gayod sa New York, samtang ang uban naglingkod sa luyo. Kay ang agalon ni Papa wala mohatag kaniyag duha ka semanang bakasyon sa trabaho, nawad-an siyag trabaho tungod sa pagtambong niadtong kombensiyona. Apan sumala sa gipasalig kanamo ni Papa, si Jehova magtagana sa among mga panginahanglan, ug Siya nagtagana gayod. Gibaligya ni Papa ang sakyanan aron mabayran ang hulam sa bangko, ug unya nakabaton siyag mas maayong trabaho. Kini ug ang susamang mga kasinatian nahimong bililhon kaayo alang kanako sa katuigan sa ulahi sa dihang ang akong bana ug ako moatubang ug lisod nga mga kahimtang.
Sa among biyahe sa pagpauli gikan sa New York, miduaw kami sa Kingdom Farm, diin akong nakita ang Tunghaang Gilead sa unang panahon. Mahinumdoman ko nga ako nagtindog sulod sa usa sa mga lawak-klasehanan ug nag-ingon sa akong kaugalingon, ‘Ako wala pay 11 ka tuig sa edad. Dili na gayod ako makaanhi dinhi. Moabot na ang Armageddon.’ Apan kadtong pagduawa naghimo nakong labawng determinado kay sukad masukad sa paghimo sa Gilead nga akong tumong.
Pagsingkamot Padulong sa Akong Tumong
Matag bakasyon sa ting-init sa pagtungha, gikan sa unang grado paunahan, ako magpayunir. Dayon, duha ka semana human sa pagtapos sa hayskul niadtong Hunyo 1957, ako nahimong regular payunir.
Ang miting sa distritong kombensiyon alang niadtong interesado sa Gilead nga gihimo sa Los Angeles nga kombensiyon niadtong 1957 maoy espesyal nga miting alang kanako. Samtang ako naglakaw paingon sa sulod sa tolda alang niadtong mitinga, akong nahibalag si Bill, usa ka batan-ong brader nga akong kaila sukad sa unom pa ka tuig ako. Sa miaging tuig, siya didto sa Louisiana nga nag-alagad diin mas dako ang panginahanglan. Nahingangha kami kaayo sa pagkasayod nga kaming duha interesado kaayo sa misyonaryong pag-alagad. Unom ka bulan sa ulahi gihukom namo nga himoon kanang usa ka proyekto namong duha. Misulat kami sa Sosyedad nga nangayog asaynment ug usa ka bulan una sa among kasal, among nadawat ang usa ka asaynment sa Romney, West Virginia.
Mibalhin kami didto sa among pagpaingon sa kombensiyon sa New York niadtong 1958. Samtang didto niadtong kombensiyona, mitambong kami sa miting alang niadtong interesado sa Gilead. Ginatos ang presente. Sa pagtan-aw niadtong panon, gibati namong ang among kalaoman nga matawag sa Gilead gamay gayod kaayo. Bisan pa niana, gihatag namo ang usa ka pasiunang aplikasyon, bisan pag kami naminyog 11 lang ka semana. Sa sunod tuig sa distritong kombensiyon sa Philadelphia, gihatag namo ang ikaduhang aplikasyon.
Si Bill ug ako nakakat-on sa Romney sa pagsalig kang Jehova sa pagtabang kanamo latas sa lisod nga mga kahimtang. Ang Romney maoy usa ka lungsod nga may mga 2,000 ka molupyo. Imposible ang pagkakitag trabaho. Nagpuyo kami sa usa ka 5-metros kaugalingong-gama nga treyler nga gidesinyo alang sa klima sa California. Wala kamiy tubig sa gripo, walay pagpainit sa treyler, ug walay repriherador. Mahimong tugnaw kaayo sa sulod nga kinahanglang magbuak kamig yelo diha sa balde aron makabatog tubig. Ang mga igsoon nagtabang kanamo sumala sa ilang maarangan, nga nagpaambit sa pagkaon nga ilang naayam. Kami nagkaon ug osa, raccoon, ug squirrel. Dili lang kas-a nga abi namog kami walay makaon niadtong adlawa, ug unya sa pag-abot namo sa balay gikan sa pag-alagad, among hikaplagan ang pila ka mansanas o keso nga gibilin atubangan sa among pultahan.
Kami naglisod kaayo sa pangabuhi matag karon ug unya sulod sa siyam ka bulan. Sa kataposan, mihukom kami nga maalamon ang pagbalhin ngadto sa Baltimore, Maryland, diin si Bill makakitag trabaho. Sa gisultihan namo ang mga igsoon mahitungod sa among desisyon, sila nanghilak ug kami nanghilak. Mao nga mihukom kami sa pag-antos ug diyutay pang panahon.
Tapos gayod niadto ang usa ka Saksi nga manedyer sa usa ka supermarket sa Westernport, Maryland, mga 60 kilometros ang kalayo, mitanyag kang Bill ug inoras nga trabaho. Sa samang bulan usa sa among mga estudyante sa Bibliya mitanyag kanamo ug nindot gamayng balay nga sinangkapan na uban ang dakong dapog. Maoy niadto nga ang Malakias 3:10 nahimong paborito kong kasulatan. Gibubo ni Jehova diha kanamo ang panalangin nga labaw sa among mga pagdahom.
Sa Kataposan Gilead!
Usa sa labing makalipayng mga adlaw sa among kinabuhi mao ang adlaw, niadtong Nobyembre 1959, sa dihang nadawat namo ang among imbitasyon alang sa Gilead. Gidapit kami alang sa ika-35ng klase, ang kataposang klase nga gihimo sa Kingdom Farm. Sa dihang ako mitindog sulod sa samang lawak-klasehan nga akong naduaw sa pagkabata pa, akong nabatonan ang madasigon, malipayong pagbati nga dili ikabatbat sa tukma sa mga pulong.
Ang Gilead maoy usa ka espirituwal nga tuboran. Kadto nahisama sa pagpuyo sa bag-ong kalibotan sa lima ka bulan. Talagsa ra sa kinabuhi nga kita magpaabot ug daghang katuigan alang sa usa ka butang ug dayon hisayran nga kana mas maayo kay sa atong gidahom. Apan ang Gilead sama gayod niana.
Giasayn kami sa India, apan sa kadugayan wala kami hatagig mga visa. Busa, tapos sa usa ka tuig nga pagpaabot sa New York City, giasayn kami pag-usab sa Watch Tower Society ngadto sa Morocco, Amihanang Aprika.
Mga Misyonaryo sa Morocco
Gigugol namo ang 24 ka malipayong katuigan sa Morocco, nga nahigugma sa katawhan sa pag-abot gayod namo. Nakakat-on kami sa Pranses ug Kinatsila, mga pinulongan nga nakatabang namo sa pagpakigsulti sa daghang nasyonalidad nga nagpuyo didto. Kadaghanan kadtong naggikan sa ubang nasod ang misanong sa mensahe sa Gingharian.
Usa ka babaye nga akong gitun-an sa Bibliya maoy usa ka Espanyolang mananayaw ug flamenco nga nagtrabaho sa usa ka kabaret sa Casablanca. Tapos makakat-on sa mga prinsipyo sa Bibliya, iyang gibiyaan ang tag-iya sa kabaret nga iyang gipuyopuyo ug mibalik sa Espanya. Didto gisangyawan niya ang tanan sa iyang pamilya, ug ang pipila kanila midawat sa mga kamatuoran sa Bibliya nga iyang gipaambit kanila. Human niadto mibalik siya sa Casablanca, diin siya nagpabiling matinumanon sa Diyos hangtod sa iyang pagkamatay niadtong 1990.
Ang una namong pila ka tuig sa Morocco nakakitag mga pag-uswag sa gidaghanon sa mga magmamantala sa Gingharian. Ugaling, sa dihang lisod na sa mga langyaw sa pagbatog trabaho ug mga permiso sa pagpuyo, may pakyaw nga pagpanggula sa mga Saksi aron moadto sa Uropa. Pipila niadtong akong gitun-an karon anaa sa New Zealand, Canada, Tinipong Bansa, Bulgaria, Rusya, ug Pransiya, ug pipila kanila anaa sa bug-os-panahong ministeryo.
Sa kalit, niadtong Abril 1973 ang among buluhaton sa pagsangyaw sa Morocco gidili. Pagkamakaguol kadto nga hitabo! Sa usa ka gabii sa Huwebes, kami usa ka malipayong panon sa Kingdom Hall, nga nag-estoryahay hangtod ang mga suga gipalong sa pagpahibalo kanamo nga panahon na sa pagpamauli. Wala gayod kami masayod nga dili na namo makita pag-usab kadtong mga sugaa nga hayag diha sa maong dayag Kristohanong panag-uban. Ubos sa gidili nga mga kahimtang, ang among mga tigom ug mga asembliyang sirkito gilimite sa gagmayng mga grupo diha sa pribadong mga balay. Sa pagtambong sa distritong mga kombensiyon, ang mga Saksi mobiyahe ngadto sa Pransiya o kaha Espanya.
Sa nagkadiyutay kami, ang pila ka Saksing nabilin sa Morocco nahimong suod kaayo sa usag usa. Busa sa dihang ang Watch Tower Society sa kataposan mihukom sa pagsira sa sangang buhatan ug pag-asayn kanamo sa laing dapit, kaming tanan nanghilak.
Ngadto sa Sentral Aprika
Ang bag-o namong asaynment mao ang Sentral Aprikanhong Republika. Pagkadako sa kalainan gikan sa Amihanang Aprika! Samtang ang Morocco may klima nga sama kaayo sa habagatang California, kami karon didto sa init, umogon nga klima sa tropiko.
May bag-ong mga problema nga atubangon. Pananglitan, karon kinahanglang akong pugngan ang akong kahadlok sa tigkamang nga kahayopan. Sa tulo ka okasyon usa ka tuko nahulog sa akong ulo samtang miagi ako sa usa ka pultahan. Usahay, samtang magdumalag pagtuon sa Bibliya, usa ka ilaga mohukom sa pagduyog kanamo! Bisan pag buot nakong molukso ug modalagan, nakakat-on ako sa pagpugong sa akong kaugalingon, nga dili gayod magkuha sa akong mata gikan sa ilaga ug alsahon ko ang akong sudlanan sa libro ug mga tiil gikan sa salog hangtod nga siya mopahawa. Akong nasayran nga ikaw mahimong anad sa bisan unsa kon dili ka mosurender.
Sa dihang kami nakaestar nag unom ka bulan, usa ka abiso gihimo sa radyo nga gidili ang among buluhaton. Busa gisirhan ang among mga Kingdom Hall, ug ang mga misyonaryo gihangyo sa pagpahawa. Kami lang ug laing magtiayon ang nakahimo sa pagpabilin sa sangang-buhatan sulod sa laing tulo ka tuig. Dayon usa ka buntag sa Dominggo panahon sa among Pagtuon sa Bantayanang Torre, ang armadong polis miabot ug gidala kami sa opisina sa kapolisan. Gibuhian nila ang mga babaye ug mga bata, apan gipriso nila ang 23 ka igsoong lalaki, apil ang akong bana, si Bill. Human sa unom ka adlaw ilang gibuhian siya aron mopauli ug mamutos; tulo ka adlaw sa ulahi, sa mando sa gobyerno, kami mipahawa sa nasod, niadtong Mayo 1989. Lain na usab kadtong masulob-ong pagbiya didto sa erport, diin daghan sa among mahigugmaong mga igsoon nangabot aron sa pagpanamilit.
Sa Kataposan, Ngadto sa Sierra Leone
Ang asaynment namo karon mao ang Sierra Leone, Kasadpang Aprika, usa ka matahom nga nasod nga may nindot, puting-balas nga baybayon. Ang katawhan mahigalaon kaayo, ug ang pagsangyaw sa kanataran makalipay. Kami pasudlon aron palingkoron diha sa matag balay, kasagaran sa landong sa usa ka kahoy sa mangga o lubi. Ang katawhan gustong maghisgot sa Diyos ug magkuha sa ilang kopya mismo sa Bibliya aron sa pagsunod sa pagbasa.
Si Bill ug ako nagatrabaho sa Freetown Bethel Home. Ako nagasilbing tigdawat ug bisita ug nagatrabaho usab sa mga suskrisyon ug kuwenta sa kongregasyon. Tapos sa 16 ka tuig nga pag-alagad diha sa kanasoran diin gidili ang among buluhaton sa pagsangyaw, talagsaon ang pagkaanaa sa usa ka nasod diin ang buluhaton libre ug mauswagon.
Natapos ko ang 30 ka tuig nga misyonaryong pag-alagad niadtong Hunyo 1991. Sa pagkatinuod, si Mama nagbutang sa akong atubangan sa usa ka mapuslanon nga tumong! Kon siya buhi pa, gusto kong sultihan siya, “Salamat kanimo, Ma!” Makalilipay, ako makaingon pa, “Salamat, Pa!”
[Picture of Sandra Cowan on page 26]
[Picture of Sandra Cowan as child on page 27]
[Hulagway sa panid 28]
Kombensiyon sa New York, 1958
[Hulagway sa panid 29]
35th class—July, 1960
[Hulagway sa panid 30]
Si Bill ug Sandra Cowan, 1991