Ang Among mga Ginikanan Nagtudlo Kanamo sa Paghigugma sa Diyos

SUMALA SA GIASOY NI ELIZABETH TRACY

Ang armadong mga lalaki, kinsa sayo pa nianang adlawa nanguna sa usa ka magubtanong panon batok kanamo, nagpugos pagpagula kang Mama ug Papa sa kotse. Ang akong magulang nga babaye ug ako, nga nahibilin sa lingkoranan sa likod, naghunahuna kon makita pa ba namo pag-usab ang among mga ginikanan. Unsay mitultol niining makahahadlok nga kasinatian duol sa Selma, Alabama, T.B.A., sa 1941? Ug unsay kalabotan niini sa mga pagtulon-an nga among nadawat gikan sa among mga ginikanan?

ANG akong Papa, si Dewey Fountain, gimatuto sa usa ka paryente diha sa usa ka uma sa Texas human mamatay ang iyang mga ginikanan sa masuso pa lamang siya. Sa ulahi mitrabaho siya sa mga minahan ug aseite. Sa 1922, sa dihang siya 23 anyos, naminyo siya kang Winnie, usa ka maanyag nga batan-ong taga-Texas, ug nagsugod sa paghimog mga plano sa pagpuyo didto ug pagpatunghag pamilya.

Nagtukod siyag balay sa mga kakahoyan sa sidlakang Texas duol sa gamayng lungsod sa Garrison. Didto nagtanom siya ug nagkadaiyang mga pananom, lakip sa gapas ug mais. Nagbuhi usab siyag tanang matang sa mga hayop sa uma. Ngadtongadto, kaming mga anak nangatawo​—si Dewey junior sa Mayo 1924, si Edwena sa Disyembre 1925, ug sa Hunyo 1929, natawo ako.

Pagkakat-on sa Kamatuoran sa Bibliya

Si Mama ug Papa naghunahuna nga ilang nasabtan ang Bibliya, sanglit sakop sila sa Church of Christ. Apan sa 1932, si G. W. Cook nagbilin sa mga librong Deliverance ug Government, nga gipatik sa Watch Tower Society, uban sa igsoong lalaki ni Papa nga si Monroe Fountain. Mahinamong makig-ambit sa akong mga ginikanan sa iyang nakat-onan, si Monroe subsob nga moduaw sa tingpamahaw, mobasag artikulo gikan sa Ang Bantayanang Torre, ug unya “dili tinuyong” magbilin sa magasin. Human niana, si Mama ug Papa mobasa niana.

Usa ka Dominggo sa buntag si Tiyo Monroe nagdapit kang Papa ngadto sa balay sa silingan aron sa pagtuon sa Bibliya. Gipasaligan niya siya nga si G. Cook makatubag sa tanan niyang mga pangutana gikan sa Bibliya. Sa pagpauli ni Papa gikan sa pagtuon, mahinamon niyang giingnan ang pamilya: “Natubag ang tanan nakong mga pangutana ug may dugang pang impormasyon! Abi nakog nahibalo na ko sa tanan, apan sa dihang si G. Cook nagsugod sa pagsaysay bahin sa impiyerno, kalag, katuyoan sa Diyos bahin sa yuta, ug kon sa unsang paagi ipahinabo kana sa Gingharian sa Diyos, misugod ako sa pagbati nga sa pagkatinuod wala gayod akoy nahibaloan sa Bibliya!”

Ang among balay morag usa ka sentro sa panaghugoyhugoy. Ang mga paryente ug mga higala manuaw, maghimog fudge ug popcorn, ug manganta samtang magtugtog si Mama sa piano. Sa hinayhinay kining maong mga kalihokan gipulihan sa mga panaghisgot sa mga ulohan sa Bibliya. Bisan tuod kaming mga bata dili makasabot sa tanang butang nga gihisgotan, ang lig-on nga gugma sa among mga ginikanan alang sa Diyos ug alang sa Bibliya dayag kaayo nga ang matag usa kanamong mga bata nakaugmad sa susamang gugma alang sa Diyos ug sa iyang Pulong.

Ang ubang mga pamilya nagbukas usab sa ilang mga panimalay alang sa senemanang mga panaghisgot sa Bibliya, nga kasagarang nasentro sa ulohan diha sa kinaulahiang magasing Bantayanang Torre. Sa dihang adto himoon ang maong mga tigom sa mga pamilya sa silingang mga lungsod sa Appleby ug Nacogdoches, maghuot kami sa among Model A Ford ug mobiyahe paingon didto, mag-ulan man o mag-init.

Paglihok Sumala sa Ilang Nakat-onan

Wala magdugay nga nakita sa among mga ginikanan ang panginahanglan nga molihok. Ang gugma sa Diyos nagkinahanglan nga ang makat-onan ipakig-ambit sa uban. (Buhat 20:35) Apan kining maong lakang sa paghimog publikong pagpahayag sa pagtuo sa usa maoy usa ka hagit, ilabina nga ang among mga ginikanan kinaiyanhong maulawon, mapainubsanong mga tawo. Bisan pa niana, ang ilang gugma alang sa Diyos nagpalihok kanila, ug kini sa baylo nagtabang kanila sa pagtudlo kanamo sa pagsalig pag-ayo kang Jehova. Gipahayag kini ni Papa niining paagiha: “Si Jehova naghimo sa mga mag-uuma nga mga magwawali!” Sa 1933, si Mama ug Papa nagpasimbolo sa ilang pagpahinungod kang Jehova pinaagi sa pagpabawtismo sa tubig diha sa usa ka punong duol sa Henderson, Texas.

Sayo sa 1935, misulat si Papa sa Watch Tower Society ug misuknag pipila ka pangutana mahitungod sa Kristohanong paglaom sa walay-kataposang kinabuhi. (Juan 14:2; 2 Timoteo 2:11, 12; Pinadayag 14:1, 3; 20:6) Nakadawat siyag tubag gikan mismo kang Joseph F. Rutherford, presidente sa Sosyedad niadtong panahona. Inay tubagon ang iyang mga pangutana, gidapit ni Brader Rutherford si Papa nga motambong sa kombensiyon sa mga Saksi ni Jehova sa Washington, D.C., sa Mayo.

‘Imposible!’ naghunahuna si Papa. ‘Kita mga mag-uuma nga dunay 26 ektarya nga gitamnan ug mga utanon. Kinahanglang anihon kanang tanan ug dad-on sa merkado nianang panahona.’ Apan, wala madugay human niana usa ka baha ang mibanlas sa iyang mga pangulipas​—mga tanom, koral, ug mga taytayan. Busa mikuyog kami sa ubang mga Saksi sa inabangang bus sa tunghaan nga nagdala kanamo 1,600 kilometros paamihanan-sidlakan ngadto sa kombensiyon.

Sa kombensiyon si Papa ug Mama nahinam sa pagpamati sa tin-awng pagsaysay kon kinsa ang “dakong panon” nga makalabang-buhi sa “dakong kasakitan.” (Pinadayag 7:9, 14, King James Version) Sa nahibiling bahin sa ilang kinabuhi, ang paglaom sa walay-kataposang kinabuhi sa paraiso sa yuta nagpalihok kang Mama ug Papa, ug sila nagdasig kanamong mga bata nga ‘mogunit nga hugot sa tinuod nga kinabuhi,’ nga alang kanamo nagpasabot ug walay-kataposang kinabuhi sa yuta nga gitanyag ni Jehova. (1 Timoteo 6:19; Salmo 37:29; Pinadayag 21:3, 4) Bisan tuod singko anyos pa lamang ako, nalingaw gayod ako nga makauban sa akong pamilya niining malipayong okasyon.

Sa pagpauli gikan sa kombensiyon, ang pamilya nananom pag-usab, ug sa ulahi naani namo ang kinadaghanang abot sukad. Tinong nagtabang kini sa pagkombinsir kang Mama ug Papa nga ang pagsalig sa bug-os kang Jehova pagagantihan gayod. Misulod sila sa linaing matang sa buluhatong pagsangyaw diin matag usa kanila miuyon nga mogugol ug 52 ka oras kada bulan diha sa ministeryo. Ug unya, sa dihang miabot ang sunod nga tingtanom, ilang gibaligya ang tanan! Nagpahimo si Papa ug 6 x 2.4-metros nga treyler aron kapuy-an namong lima, ug mipalit siya ug bag-ong duhay-pultahan nga Ford sedan aron mobutad niana. Mao usab kanay gibuhat ni Tiyo Monroe, ug siya usab mibalhin sa usa ka treyler uban sa iyang pamilya.

Pagtudlo Kanamo sa Kamatuoran

Si Papa ug Mama nagsugod pagpayunir, nga maoy pagtawag sa bug-os-panahong ministeryo, sa Oktubre 1936. Ingong pamilya, nagsugod kami pagsangyaw sa kalungsoran sa sidlakang Texas nga panagsa rang makobrehan sa mensahe sa Gingharian. Sa duolan sa usa ka tuig, nagbalhinbalhin kami, apan sa katibuk-an, nalipay gayod kami niining kinabuhia. Si Mama ug Papa nagtudlo kanamo pinaagi sa ilang pulong ug panig-ingnan nga mahisama sa unang mga Kristohanon kinsa nagsakripisyo sa ilang kaugalingon aron sa pagpaabot sa kamatuoran sa Bibliya ngadto sa uban.

Kaming mga bata ilabinang nakadayeg sa among inahan tungod sa mga sakripisyo nga iyang gihimo pinaagi sa pagbiya sa iyang balay. Apan, dunay usa ka butang nga dili gayod niya ibilin ug mao kadto ang iyang makina sa pagtahi. Maayo usab kadto. Tungod sa iyang katakos ingong mananahi, maanindot kanunay ang among mga sinina. Sa matag kombensiyon, duna kamiy nindot bag-ong mga sinina nga isul-ob.

Nahinumdoman nako pag-ayo sa dihang si Herman G. Henschel miabot uban sa iyang pamilya sa among dapit sakay sa sound truck sa Watch Tower Society. Ilang iparking ang sakyanan sa dapit nga daghan ang namuyo, magpatokar ug mubong girekord nga pakigpulong, ug dayon mohimog personal nga mga pagduaw sa mga tawo aron sa pagtagana ug dugang impormasyon. Si Dewey junior nalipayng makig-uban sa anak lalaki ni Herman nga si Milton, nga niadtong panahona mga 15 anyos pa. Karon si Milton mao ang presidente sa Watch Tower Society.

Panahon sa kombensiyon sa 1937 sa Columbus, Ohio, nabawtismohan si Edwena, ug si Mama ug Papa gitanyagan ug pribilehiyo nga mag-alagad ingong mga espesyal payunir. Niadtong panahona, kanang buluhatona naglakip sa paggugol ug labing menos 200 ka oras kada bulan sa buluhatong pagsangyaw. Sa akong paghinumdom, akong naamgohan kon sa unsang paagi ang maayong panig-ingnan ni Mama nakatabang kanako sa pagpaluyo sa akong bana sa iyang Kristohanong mga asaynment.

Sa dihang si Papa nakasugod ug pagtuon sa Bibliya uban sa usa ka pamilya, gikuyog niya kaming mga bata aron sa paghatag ug positibong panig-ingnan alang sa ilang mga anak. Papangitaon niya kami ug pabasahon sa mga teksto sa Bibliya ug patubagon sa pipila ka sayon nga mga pangutana. Ingong resulta, daghan niadtong mga batan-ona nga among gitun-an nag-alagad kang Jehova nga matinumanon hangtod niining adlawa. Sa pagkatinuod, ang lig-ong patukoranan napahimutang usab alang kanamo sa pagpadayon sa paghigugma sa Diyos.

Samtang nagkadako na si Dewey junior, nalisdan siya sa pagpuyo sa huot nga puy-anan uban sa duha ka manghod nga babaye. Busa sa 1940 mipili siya sa pagbiya ug nagpayunir uban sa laing Saksi. Ngadtongadto, naminyo siya kang Audrey Barron. Busa si Audrey natudloan usab ug daghang butang sa among mga ginikanan, ug nakakat-on siya sa pagmahal pag-ayo kang Mama ug Papa. Human mapriso si Dewey junior sa 1944 tungod sa iyang Kristohanong neyutralidad, si Audrey taudtaod nga miipon pagpuyo kanamo sa among huot nga treyler.

Sa dakong kombensiyon sa St. Louis, Missouri, sa 1941, si Brader Rutherford direktang misulti ngadto sa mga bata nga nag-edad ug 5 hangtod sa 18, nga gipalingkod sa linaing seksiyon sa atubangan. Si Edwena ug ako namati sa iyang kalmado, klaro nga tingog; sama siya sa usa ka mahigugmaong amahan nga nagtudlo sa iyang kaugalingong mga anak sa balay. Gidasig niya ang mga ginikanan: “Karon si Kristo Jesus nagtigom sa iyang atubangan sa mga tawo nga iyang gipakigsaaran, ug sa labing puwersadong paagi giingnan niya sila sa pagtudlo sa ilang mga anak sa dalan sa pagkamatarong.” Midugang siya: “Ayaw silag ipalayo sa panimalay ug tudloi sila sa kamatuoran!” Ikalipay, gibuhat kana sa among mga ginikanan!

Nianang maong kombensiyon, nadawat namo ang bag-ong pulyeto nga Jehovah’s Servants Defended, nga nagrepaso sa mga kaso sa korte nga nadaog sa mga Saksi ni Jehova, lakip kadtong diha sa Korte Suprema sa Tinipong Bansa. Gitun-an kini ni Papa uban kanamo ingong pamilya. Wala lang kami mahibalo nga ginaandam na diay kami alang sa nahitabo pipila ka semana sa ulahi sa Selma, Alabama.

Pagpanghasi sa Magubtanong Panon sa Selma

Sa buntag sa maong makahahadlok nga kasinatian, si Papa naghatod ug mga kopya sa usa ka sulat ngadto sa serip, sa mayor, ug sa hepe sa kapolisan sa Selma nga naghubit sa among konstitusyonal nga katungod sa pagpadayon sa among ministeryo ilalom sa panalipod sa balaod. Bisan pa niana, gipugos nila kami sa pagbiya sa lungsod.

Sa ulahing bahin sa kahaponon, lima ka armadong mga lalaki ang nangabot sa among treyler ug gikuha si Mama, akong igsoong babaye, ug ako ingong mga bihag. Giutingkay nila ang tanan sa sulod, nga nangitag butang nga subersibo. Si Papa didto sa gawas, ug gimandoan nila siya sa pagtaod sa treyler ngadto sa kotse, nga padayong nagtion sa ilang mga pistola kaniya. Niining tungora, wala ako mahadlok. Morag kataw-anan kaayo nga kining mga tawhana naghunahuna nga peligroso kami nga ang akong igsoong babaye ug ako miagik-ik. Apan, nahimo kaming seryoso sa dihang gipasiplatan ni Papa.

Sa dihang andam na kaming mobiya, buot sa mga lalaki nga si Edwena ug ako mosakay uban nila sa ilang kotse. Lig-ong misulti si Papa. “Ibabaw sa akong patayng lawas!” matod niya. Human sa diyutayng panaglantugi ang among pamilya gitugotan nga mobiyaheng magkauban, nga ang armadong mga lalaki nagsunod kanamo sa ilang kotse. Mga 25 kilometros sa gawas sa lungsod, gisenyasan nila kami nga mohunong sa daplin sa haywey ug gikuha si Mama ug Papa. Ang mga lalaki nagpulipuli sa pagdani kanila: “Biyai kanang relihiyona. Balik ngadto sa uma, ug matutoa ang inyong mga anak nga babaye sa hustong paagi!” Misulay pagpangatarongan si Papa kanila apan walay kapuslanan.

Sa kataposan, usa ka lalaki ang miingon: “Lakaw, ug kon mobalik pa gani kamo sa Dallas County, patyon namo kamong tanan!”

Nahupayan ug magkauban pag-usab, mibiyahe kamig pipila ka oras ug dayon mihunong aron magpalabay sa kagabhion. Among natiman-an ang ilang numero sa lisensiya. Gitaho dayon ni Papa ang tanan ngadto sa Watch Tower Society, ug pipila ka bulan sa ulahi ang mga lalaki nailhan ug gipangdakop.

Ngadto sa Tunghaan sa Misyonaryo sa Gilead

Si Edwena nakadawat ug imbitasyon nga motambong sa ika-7ng klase sa Watchtower Bible School of Gilead sa South Lansing, New York, sa 1946. Si Albert Schroeder, usa sa mga instruktor, naghisgot sa iyang maayong mga hiyas ngadto sa iyang kanhing payunir nga kauban nga si Bill Elrod, nga niadtong panahona nag-alagad sa Bethel, ang tibuok-kalibotang hedkuwarter sa mga Saksi ni Jehova sa Brooklyn, New York.a Gipailaila si Edwena ug Bill, ug mga usa ka tuig human sa iyang paggraduwar sa Gilead, sila naminyo. Sulod sa daghang tuig nagpabilin sila sa bug-os-panahong ministeryo, lakip sa duyog nga pag-alagad sa Bethel sulod sa lima ka tuig. Dayon usa ka adlaw sa 1959, si Brader Schroeder nagpahibalo sa ika-34ng klase sa Gilead nga ang iyang minahal nga higala nahimong amahan sa kaluha, lalaki ug babaye.

Samtang ako nag-alagad uban sa akong mga ginikanan sa Meridian, Mississippi, sa ulahing bahin sa 1947, kaming tulo nakadawat ug imbitasyon nga motambong sa ika-11ng klase sa Gilead. Nakurat kami tungod kay sumala sa mga kinahanglanon ako bata pa kaayo, ug si Mama ug Papa tigulang na kaayo. Apan gihimo ang eksepsiyon, ug nakadawat kami niadtong dili-takos nga pribilehiyo sa abanteng instruksiyon sa Bibliya.

Misyonaryong Pag-alagad Uban sa Akong mga Ginikanan

Ang among misyonaryong asaynment mao ang Colombia, Amerika del Sur. Apan, sa Disyembre 1949 pa, kapin sa usa ka tuig human sa among graduwasyon, nga miabot kami sa usa ka puy-anan sa misyonaryo sa Bogotá diin tulo ka laing misyonaryo ang nagpuyo na didto. Sa sinugdan, halos mihinapos si Papa nga mas sayon nga tudloan ang mga tawo ug Iningles kay sa magtuon siya ug Kinatsila! Oo, dihay mga pagsulay, apan oh, pagkadako sa mga panalangin! Wala makaabot ug usa ka gatos ang mga Saksi sa Colombia sa 1949, apan karon dunay kapin sa 100,000!

Human mag-alagad sa Bogotá sulod sa lima ka tuig, si Mama ug Papa gipadala ngadto sa siyudad sa Cali. Kasamtangan, sa 1952, naminyo ako kang Robert Tracy, kaubang misyonaryo sa Colombia.b Nagpabilin kami sa Colombia hangtod sa 1982, nga nianang panahona naasayn kami sa Mexico, diin kami nag-alagad sukad niadto. Ngadtongadto, sa 1968, ang akong mga ginikanan kinahanglang mopauli sa Tinipong Bansa aron magpatambal. Human maulii sa panglawas, nagpadayon sila ingong mga espesyal payunir duol sa Mobile, Alabama.

Pag-atiman sa Among mga Ginikanan

Sa pagpanglabay sa katuigan, si Mama ug Papa nagkaluya ug nagkinahanglag dugang pagpaluyo ug pagtagad. Sa ilang hangyo, giasayn sila nga mag-alagad duol kang Edwena ug Bill sa Athens, Alabama. Sa ulahi ang among igsoong lalaki, si Dewey junior, naghunahuna nga maalamong magkaduol pagpuyo ang pamilya sa South Carolina. Busa gibalhin ni Bill ang iyang pamilya sa Greenwood, uban kang Mama ug Papa. Kining mahigugmaong pagpasibo nagpaposible kanamo ni Robert nga makapadayon sa among misyonaryong pag-alagad sa Colombia, nga nahibalo nga ang akong mga ginikanan maayong pagkaatiman.

Dayon, sa 1985, naestrok si Papa nga naghimo kaniyang amang ug naglubog sa banig. Nagkomperensiya kami ingong pamilya aron konsiderahon kon sa unsang paagi labing maayong maatiman ang among mga ginikanan. Gidesisyonan nga si Audrey mahimong pangunang tig-atiman ni Papa ug nga si Robert ug ako labing makatabang pinaagi sa pagpadala ug sulat kada semana uban ang makapadasig nga mga kasinatian ug sa pagduaw nga subsob kutob sa maarangan.

Ang akong kataposang pagduaw kang Papa tin-aw pa sa akong hunahuna. Sa naandan dili siya makasulti ug tarong, apan human namo siya sultihi nga mobalik na kami sa Mexico, medyo nakalitok siya, uban ang dakong paningkamot ug pagbati, sa usa ka pulong, “Adios!” Niini kami nahibalo nga, sa iyang kasingkasing, iyang gipaluyohan ang among desisyon nga magpadayon sa among misyonaryong asaynment. Namatay siya sa Hulyo 1987, ug si Mama namatay siyam ka bulan sa ulahi.

Usa ka sulat nga akong nadawat gikan sa akong nabiyuda nga igsoon nagsumaryo pag-ayo sa apresasyon nga gibati sa matag usa kanamo alang sa among mga ginikanan. “Akong gipabilhan ang akong dagayang Kristohanong panulondon ug bisan sa usa ka gutlo wala gayod mobati nga mas malipayon ako kon ang atong mga ginikanan mipili sa pagmatuto kanato sa laing paagi. Ang ilang panig-ingnan sa lig-on nga pagtuo, pagsakripisyo sa kaugalingon, ug bug-os nga pagsalig kang Jehova nakapalahutay kanako sa makapaguol nga mga yugto sa akong kinabuhi.” Si Edwena mihinapos: “Nagpasalamat ako kang Jehova tungod sa mga ginikanan kinsa pinaagi sa pulong ug panig-ingnan nagpakita kanato sa kalipay nga atong mabatonan kon atong tukoron ang atong kinabuhi diha sa pag-alagad sa atong mahigugmaong Diyos, si Jehova.”

[Mga footnote]

[Mga hulagway sa panid 22, 23]

Pamilyang Fountain: (wala ngadto sa tuo) Dewey, Edwena, Winnie, Elizabeth, Dewey junior; tuo: Si Elizabeth ug Dewey junior sa tapaludo sa sound truck ni Henschel (1937); ubos sa tuo: Si Elizabeth nga nagsangyaw ginamit ang plakard sa edad nga 16