Mga Magmamantala sa Gingharian Nagtaho
Pagkobre sa Hilit nga Teritoryo sa Paraguay Namunga
ANG Paraguay nga sanga sa Watch Tower Society sa bug-os nasayod sa panginahanglan sa pagwali sa maayong balita sa Gingharian sa tibuok niyang teritoryo. (Buhat 1:8) Kini mao ang panahon alang sa tanan sa pagkat-on mahitungod sa Gingharian ug sa pag-alagad kang Jehova sa dili pa niya ipadangat ang kataposan niining daotang sistema sa umaabot nga “dakong kasakitan.” (Mateo 24:21, 22) Ang mosunod nga mga kasinatian nagpakita kon unsay ginahimo sa pagtabang sa katawhan sa wala pa maasayni nga mga teritoryo. Ang sanga nagtaho:
Mga kahikayan gihimo sa pagkobre sa tanang wala pa maasayni nga teritoryo pinaagi sa temporaryo nga mga espesyal payunir. Sulod sa mga bulan sa Nobyembre hangtod Enero sa tuig sa pag-alagad 1990, 39 ka mga brader ug sister nagkobre sa usa ka gatos ka mga siyudad ug gagmayng mga lungsod nga wala pay mga magmamantala sa Gingharian. Sila nakapahimutang ug 6,119 nga mga libro, 4,262 mga pulyeto, ug 5,144 mga magasin. Ingong sangpotanan niining kahimoan, bag-ong mga grupo sa magmamantala ang naporma.
◻ Usa ka babaye midawat gikan sa usa ka payunir nga sister nga nagbuhat sa wala pa maasayni nga teritoryo sa librong Ikaw Mabuhing Walay Kataposan sa Paraiso sa Yuta. Ang payunir nagtanyag sa pagdumala ug pagtuon sa Bibliya uban kaniya, ug iyang gidawat nga malipayon. Sa dihang ang payunir mibalik, naghulat kaniya dili lamang ang babaye apan usab ang iyang bana ug ilang napulo ka mga bata. Sa sunod nga pagbisita, ang pamilya maingon usab sa ilang mga higala ug mga silingan andam alang sa pagtuon sa Bibliya! Ang babaye nag-imbita kanila, nga nag-ingon nga ang pagtuon maayo kaayo ug ang paglaom ug mga panalangin nga ginahatag ni Jehova kahibulongan. Kini maoy butang nga walay usa ang nakatug-an masukad kaniya, busa iyang gibati nga ang iyang mga silingan ug mga higala angay usab nga makadungog sa maayong balita.
Matag higayon ang sister modumala sa pagtuon, may daghan kaayong tumatambong nga mora nag usa ka gamay nga kongregasyon. Kining interesadong mga tawo nagsukot ug daghang mga pangutana ug nakig-ambit sa pagtuon. Sa dihang gipasabot sa payunir nga human matrabaho ang teritoryo, siya ug iyang mga kauban mobalhin sa laing dapit, ang babaye mabalak-ong nagsukna kon unsay mahitabo kanila. Mga kahikayan gihimo uban sa mga brader gikan sa kinaduolang kongregasyon sa pagpadayon sa pagtuon. Karon espesyal nga mga payunir giasayn sa pagtabang ning mga interesado, samag-karnerong katawhan.
◻ Samtang namalaybalay sa laing wala pa maasayni nga teritoryo, usa ka payunir nga sister nakahibalag ug usa ka lalaki kinsa mga napulo ka tuig sa miagi nakabaton sa librong Ang Kamatuoran nga Motultol sa Kinabuhing Dayon. Sukad niadtong panahona siya wala na makakontak sa mga Saksi ni Jehova. Ugaling, siya nahibalo nga si Jehova, kinsa iyang gitawag nga Jehova sa mga panon, mao lamang ang matuod nga Diyos ug Siya lamang ang pagasimbahon. Sa iyang kaugalingon nga paagi, siya nakigsulti mahitungod kang Jehova sa tanan niyang kaila. Sa pagkamatuod, matag semana siya mobaktas ug tulo ka kilometros sa pagbisita sa usa ka interesadong magtiayon sa pagpakighisgot kanila mahitungod sa Diyos tungod kay, sama sa iyang pagdason, ‘Kon ako mohunong sa pagbisita kanila, ilang malimtan si Jehova.’ Dugang sa maong magtiayon, may mga napulo pang uban nga gustong motuon sa Bibliya—ang tanan tungod kay kining interesadong lalaki nagsangyaw kanila.
Pagkatagsaon, mga pila lamang ka adlaw sa wala pa ang payunir magbisita kaniya, kining maong lalaki wala motugot sa lokal nga pari ug sa iyang prosesyon sa pagsulod sa iyang balay dala ang imahen sa birhen, nga nagsaysay nga siya wala magatuo sa mga imahen. Ang pari nasuko. Nianang gabhiona ang lalaki nag-ampo kang Jehova alang sa tabang. Busa hunahunaa kon unsa kahinam ug kamalipayon niya sa dihang ang payunir mibisita! Mga kahikayan dihadiha gihimo alang sa usa ka sestimatikong pagtuon sa Bibliya, ug ang lalaki nagpadayon sa pag-uswag sa pagpakig-uban sa teokratikanhong organisasyon.
Sa pagkatinuod, si Jehova nagapanalangin sa pagpanigom nga buluhaton sa Paraguay samtang ang mga brader nagapaninguha sa paghatag ug bug-os nga pagpamatuod dinha sa wala pa maasayni nga mga teritoryo.—Mateo 24:14.