Mga Magmamantala sa Gingharian Nagtaho
Kamatuoran sa Bibliya Nagpagawas sa Usa ka Madre sa Bolivia
DAGHANG buotag-kasingkasing nga mga tawo namahawa sa bakak nga relihiyon, nakakat-on sa kamatuoran sa Bibliya, ug nagasimba kang Jehova, ang matuod nga Diyos. Kapin ug 7,600 nagbuhat niana sa Bolivia, apil ang usa ka madre.
Sa dihang nuybe anyos pa lang, si M—— unang nakahibalag sa usa sa mga Saksi ni Jehova. Siya ang miabli sa pultahan sa miduaw ang Saksi sa iyang balay, ug sa unang panahon, nakadungog siya sa ngalan sa Diyos, Jehova, nga gilitok. Wala siya malimot niadto sa daghan nga katuigan.
Sanglit siya ang bugtong babaye sa pamilya, nahukman nga siya magmadre. “Pagkadako sa gibati nakong kalipay nga ako mag-alagad sa Diyos—labing menos, kana ang akong hunahuna,” matud ni M——. Apan ang iyang kalipay nahimong kalugda sa dihang iyang nakita ang inhustisya ug pagkamadapigon nga gibuhat sulod sa kombento. Matud niya: “Tingali dili gayod ako malimot niadtong mga pakigbisog sa kaguol ug niadtong lawasnon ug espirituwal nga mga pagdagmal nga masakit kaayo, nga tungod niadto giisip ko ang Diyos, dili ingong Diyos sa gugma, kondili Diyos nga magasilot nga walay kaluoy.”
Siya nagpadayon: “Sa panahon nga ako nahimong madre, wala ako molampos sa pagkaplag sa ngalang Jehova diha sa Bibliya. Nakaplagan ko lang ang ‘Yahweh,’ ug kadto nakapalibog nako. Usa ka adlaw ako migawas gani sa pagpangita sa mga tawo nga naghisgot kang Jehova, apan wala gayod ako makakaplag kanila.
“Milabay ang panahon, ug usa ka adlaw sa dihang ako nagpadulong sa balay sa akong pamilya, nakita nako ang usa ka karatula, ‘Kingdom Hall of Jehovah’s Witnesses.’ Gusto kong ingnan sila nga sila bakak nga mga propeta, apan walay tawo sa tigomanan. Mibalik ako sa pagka Dominggo. Usa ka tigom nagpadayon, ug ang ubay-ubay morag natingala sa pagkakitag usa ka madreng nagsul-ob sa biste sa madre nga mitambong. Human sa tigom, misulay ako sa paggawas dayon. Ugaling, usa sa mga Saksi mitimbaya kanako, mao nga gisukna ko siya, ‘Nganong inyong gipasipalahan ang Usang Balaan pinaagi sa pagdala nianang ngalana?’ Ang akong pangutana mitultol sa usa ka panaghisgot sa Bibliya, ug gihimo ko ang kahikayan nga siya moduaw nako sa balay sa akong pamilya. Siya gihinginlan sa akong mga ginikanan. Apan, kami nagkatagbo na usab, duha ka bulan sa ulahi, ug gidapit niya ako ngadto sa iyang balay alang sa pagtuon sa Bibliya. Ako nakadayeg kaayo sa impormasyon nga gipakita niya kanako, nga nagpamatuod nga ang mga Kristohanon angay magagamit sa ngalan sa Diyos. Kadtong ebidensiyaha mihatag kanakog kusog sa pagsalikway sa tanang waypulos nga mga butang gitudlo kanako ingong madre.
“Makahinumdom ako sa daghang butang mahitungod sa akong kinabuhi sa kombento. Pananglitan, kas-a nagkinahanglan akog dugang pagkaon. Mao nga gisulatan ko ug gihangyo ang akong mga ginikanan nga padad-an akog pipila, nga wala makaamgo nga ang mga sulat gisensura sa kombento. Sa sunod nga pagpangaon, gibutang sa akong atubangan ang daghang tinapay ug jelly, ug ako gipugos sa pagkaon niadtong tanan. Sa maong panahon ako daghan na kaayog pagkaon. Gisulti ko kadto sa akong mga higala, ug usa misugyot nga kumoton nako ang tinapay nga dili nako mahurot sa pagkaon ug isabulak kana sa salog. Sa gibuhat ko kadto, usa ka madre dihadiha migunit kanako ug gilamba ako sa salog, uban sa estriktong mando nga tilaan nako ang tibuok salog aron mahinlo. Dako ang kuwarto. Samtang nagsunod sa mando, akong nadungog ang kusog nga agik-ikay ug kataw-anay—wala gayoy kaluoy nga gipakita.
“Akong makita karon unsa ka talagsaon nga mahigawas nianang tanan. Sumala sa madahom, ang maong kagawasan naglangkit ug mga pagsakripisyo. Sa usa ka butang, gihinginlan ako sa akong amahan gikan sa balay. Bisan pa niana, una mogawas sa kombento, ako nakapribilehiyo sa pagtabang sa ubang batan-ong madre sa pagkat-on sa kamatuoran. Ako nalipay sa pag-ingon nga pipila kanamo nagpahinungod sa among mga kinabuhi kang Jehova nga Diyos!
“Sa akong pagbiya sa kombento, lisod masabtan sa akong amahan nganong gibalibaran ko ang maayog-suweldo apan makahurot-panahon nga mga trabaho. Ugaling, buot ko ang mas daghang panahon alang sa pag-alagad sa Diyos. Karon ako nagaalagad nga regular payunir, nga may yano apan magantihon kaayong kinabuhi. Ug sa dako kong kalipay, ang akong inahan ug akong mga igsoong lalaki miduyog kanako sa pag-alagad kang Jehova.”
Sa pagkatinuod, ang kamatuoran sa Bibliya nagapagawas sa usa gikan sa bakak relihiyosong sistema niining kalibotana, ug kini nagahatag malungtarong kangaya ug kalipay.—Juan 8:32.