Mga Magmamantala sa Gingharian Nagtaho

Mga Saksi ni Jehova Nagasangyaw nga Di-pormal nga Maayog mga Resulta

DAGHAN nga tawo ang unang nakahibalo sa kamatuoran sa Bibliya sa dihang gisangyawan sila nga di-pormal sa usa sa mga Saksi ni Jehova. Niini ang mga Saksi nagasunod sa panig-ingnan ni Jesu-Kristo, nga misangyaw nga di-pormal ngadto sa usa ka babayeng Samarianhon sa usa ka atabay sa dihang siya miabot sa pagkalos ug tubig. (Juan, kapitulo 4) Sa Silangang Aprika, usa sa mga Saksi ni Jehova misangyaw nga di-pormal ngadto sa usa ka madreng Katoliko. Ang sangang-buhatan sa Watch Tower Society misugid kon unsay misangpot:

◻ Sayo sa buntag sa pagpaingon niya sa lungsod, nahibalag sa Saksi ang usa ka madreng Katoliko. Gipahimuslan niya ang higayon sa pagsukna sa madre: “Asa ka man paingon niining taknaa sa adlaw?” Ang tubag mao: “Ako moampo ngadto sa akong Diyos.” Unya gisukna niya ang madre: “Nahibalo ba ka sa ngalan sa imong Diyos?” “Dili ba ang iyang ngalan Diyos?” mitubag ang madre. Ang Saksi mitanyag nga moadto sa iyang balay nianang pagkahapon aron sa paghisgot sa ngalan sa Diyos. Tapos sa estoryahay ang madre miadto sa iyang simbahan ug nangutana sa usa sa mga pari kon nahibalo ba siya kon unsay kahulogan sa “Jehova”. Ang tubag mao, “Kana ang ngalan sa Diyos.” Ang madre natingala kaayo sa pagkadungog nga ang pari nahibalo niadto apan wala gayod magtudlo niana kaniya.

Ang Saksi miduaw sa babaye sulod sa siyam ka sunodsunod nga adlaw ug nagtudlo kaniya sa kamatuoran mahitungod sa Trinidad, kalag, impiyernong-kalayo, ug paglaom sa mga patay. Gisuhop sa babaye ang tanan ug unya mihangyo sa Saksi nga hatagan siyag panahon sa pagpalandong nianang tanang bag-ong pagtulon-an. Tapos sa duha ka semana nakigkita na usab siya sa Saksi ug mihangyo nga magbatog dugang mga panaghisgot. Sa maong panahon ang madre nakahukom na sa pagbiya sa simbahan ug naglaglag na sa iyang mga imahen, mga rosaryohan, ug krus. Ang pari misulay sa pagdani kaniya sa pagbalik, apan siya determinado sa pagpadayon sa kamatuoran. Sa ulahi siya nabawtismohan ug nag-alagad nga regular katabang payunir sa daghang bulan bisan pa sa iyang dili maayong panglawas ug pagkaedaran na.

Sanglit dako ang iyang balay, gitanyag niya sa kongregasyon nga gamiton kanang Kingdom Hall. Giilisan sa mga igsoong lalaki ang daang atop, gikanlat ang mga bungbong sa sulod, ug gihimo ang usa ka dakong bahin sa tinukod nga usa ka madanihong tigomanan. Kining kanhing Katolikong madre nagapuyo sa usa ka kuwarto sa luyo sa tigomanan. Nalipay kaayo siya nga nakahimo sa maong amot alang sa pagsimba ni Jehova.

◻ Ang laing kasinatian nga nagpakita sa kaalam sa di-pormal nga pagsangyaw nagagikan sa Kampala, Uganda. Sa pagpaingon sa usa ka opisina sa gobyerno, usa ka Saksing misyonaryo nakigsulting di-pormal ngadto niadtong kauban niya sa elebetor. Usa ka lalaki, si Gn. L—— , mipahayag ug tinguha nga modawat sa basahon nga gitanyag apan dili makakuha niana niadtong gutloa. Busa gihatag niya sa misyonaryo ang iyang ngalan ug direksiyon sa iyang opisina. Sa ulahi miadto didto ang misyonaryo ug nangutana alang kang Gn. L—— . Gitawag siya apan sa katingala sa misyonaryo, lain nga tawo ang mitungha. May duha ka lalaki nga may samang ngalan nga nagtrabaho niadtong opisinaha. Gihatag ang mubong pamatuod ngadto sa ikaduhang Gn. L—— , ug siya nagpakitag talagsaong interes. Samtang ang unang Gn. L—— nawad-ag interes, ang pagtuon sa Bibliya nasugdan uban sa ikaduhang Gn. L—— . Siya karon usa ka bawtismadong Saksi, ug ang iyang asawa ug anak lalaki maayog pag-uswag padulong sa bawtismo.

Si Jesu-Kristo mao ang Maayong Magbalantay ug nakaila sa mga karnerohon kansang mga kasingkasing hilig sa pagkamatarong. Kining mga kasinatiana nagailustrar nga siya nagatultol sa iyang mga sumusunod ngadto niana kanila. Ang di-pormal nga pagsangyaw mahimong mabungahon!​—Juan 10:14.