Pagbantay Uban sa Atong Halangdong Maglalalang

“Si Jehova mao ang akong Magbalantay. Walay makulang kanako. Gipalig-on niya ang akong kalag. Ginamandoan niya ako sa mga dalan sa pagkamatarong tungod sa iyang ngalan.”​—SALMO 23:1, 3.

1. Unsang mahigugmaong kahupayan ang gihatag ni Jehova?

ANG ika-23 nga Salmo, “usa ka awit ni David,” nakahupay sa daghang gikapoy nga mga kalag. Kana midasig kanila aron makasalig sa gipahayag diha sa bersikulo 6: “Sa pagkamatuod ang kaayo ug ang mahigugmaong-kalulot magasunod kanako sa adlaw nga tanan sa akong kinabuhi; ug ako magapuyo sa balay ni Jehova sa tanang adlaw.” Mao ba kana ang imong pangandoy, ang makapuyo sa tanang panahon sa balay sa pagsimba ni Jehova, nga nahiusa sa iyang katawhan nga sa karon ginatigom gikan sa tanang nasod sa yuta? “Ang magbalantay ug magtatan-aw sa inyong mga kalag,” ang atong Halangdong Maglalalang, si Jehova nga Diyos, motabang kanimo sa pagkab-ot nianang tumonga.​—1 Pedro 2:25.

2, 3. (a) Sa unsang paagi si Jehova nagabantay nga mahigugmaon sa iyang katawhan? (b) Sa unsang paagi miusbaw nga tagsaon ang “panon” ni Jehova?

² Ang Maglalalang sa “bag-ong mga langit ug bag-ong yuta” mao usab ang Organisador ug Supremong Magtatan-aw sa Kristohanong kongregasyon, “ang panimalay sa Diyos.” (2 Pedro 3:13; 1 Timoteo 3:15) Siya interesado gayod sa pagbantay sa iyang katawhan, ingon sa tin-aw nga gipahayag sa Isaias 40:10, 11: “Tan-awa! Ang Soberano Ginoong Jehova mismo moabot ingong kusganon, ug ang iyang bukton mohari alang kaniya. Tan-awa! Ang iyang ganti nagauban kaniya ug ang iyang balos anaa sa iyang atubangan. Ingon sa magbalantay iyang pagabantayan ang iyang kaugalingong panon. Pinaagi sa iyang bukton iyang pagatigomon ang mga kordero; ug diha sa iyang sabakan iya silang dad-on. Kadtong may mga magagmay pa iyang pagaagakon nga maampingon.”

³ Sa usa ka pinalapad nga kahulogan, kining “panon” naglakip niadtong sa dugayng panahon naglakaw diha sa Kristohanong kamatuoran ug sa “mga kordero” nga gitigom ning bag-o pa gayod nga panahon​—sama sa daghang gibawtismohan karon sa Aprika ug Sidlakang Uropa. Ang kusgan, nagapanalipod nga bukton ni Jehova nagtigom kanila ngadto sa iyang sabakan. Bisan tuod sila kaniadto sama ug nahisalaag nga mga karnero, sila karon may suod nga relasyon uban sa ilang hinigugmang Diyos ug Magbalantay.

Ang Kaubang Magbalantay ni Jehova

4, 5. (a) Kinsa “ang maayong magbalantay,” ug sa unsang paagi ang tagna nagpunting kaniya? (b) Unsang pagbahinbahin nga buluhaton ang ginadumala ni Jesus, ug may unsang tagsaong resulta?

⁴ Kay nag-alagad diha sa tuong kamot sa iyang Amahan sa langit, “ang maayong magbalantay,” si Jesu-Kristo, maluloton usab nga nagtagad sa “mga karnero.” Iyang gihatag ang iyang kinabuhi alang sa kaayohan una sa “gamayng panon” sa mga dinihogan ug unya, karong adlawa, sa dakong panon sa iyang “ubang mga karnero.” (Lucas 12:32; Juan 10:14, 16) Ang Halangdong Magbalantay, si Jehova nga Diyos, nagtumong niining tanang karnero, nga nag-ingon: “Ania ako, ako mismo, ug ako sa pagkatinuod magahukom . . . tali sa karnero ug karnero. Ug magabutang ako ug usa ka magbalantay ibabaw kanila, ug siya magapasibsib kanila, bisan ang akong alagad nga si David. Siya mismo magapasibsib kanila, ug siya mismo mahimong ilang magbalantay. Ug ako mismo, si Jehova, mahimo nga ilang Diyos, ug ang akong alagad nga si David mao ang prinsipe sa ilang taliwala. Ako mismo, si Jehova, namulong niini.”​—Ezekiel 34:20-24.

⁵ Ang titulo nga “akong alagad nga si David” matagnaong nagpunting kang Kristo Jesus, ang “binhi” nga magapanunod sa trono ni David. (Salmo 89:35, 36) Niining adlaw sa paghukom sa mga nasod, ang kauban ni Jehova nga Magbalantay ug Hari, si Kristo Jesus, ang Anak ni David, padayon nga nagabahinbahin sa “mga karnero” sa katawhan gikan sa mga nangangkong “mga karnero” apan sa pagkatinuod “mga kanding” diay. (Mateo 25:31-33) Kining “usa ka magbalantay” gibangon usab aron pasibsibon ang mga karnero. Pagkamahimayaon nga katumanan niining tagna ang atong nakita karong adlawa! Samtang ang mga politiko naghisgot sa paghiusa sa katawhan pinaagi sa usa ka bag-ong kahikayan sa kalibotan, ang usa ka Magbalantay sa pagkamatuod nagahiusa sa mga karnero sa tanang kanasoran pinaagi sa daghag-pinulongan nga kampanya sa pagpamatuod nga ang organisasyon lamang sa Diyos sa yuta ang makahimo.

6, 7. Sa unsang paagi gitino sa “matinumanon ug maalamong ulipon” nga ang “pagkaon sa hustong panahon” mabatonan sa mga karnero?

⁶ Samtang ang mensahe sa Gingharian nagakaylap sa bag-ong mga teritoryo, gitino sa “matinumanon ug maalamong ulipon” sa dinihogan nga mga Kristohanon, nga gitugyanan sa usa ka Magbalantay, nga maandam ang tanang mga tagana aron mapadala ang “pagkaon sa hustong panahon.” (Mateo 24:45) Daghan sa 33 ka nagaimprinta nga sanga sa Watch Tower Society sa tibuok yuta nagapakusog sa ilang pag-imprinta aron matagan-an ang nagadugang nga mga panginahanglan ug mas maayong mga tun-anang-basahon sa Bibliya ug mga magasin.

⁷ Ang Nagamandong Lawas sa mga Saksi ni Jehova nagahimo kutob sa ilang maarangan aron mapauswag ang kalidad sa paghubad diha sa mga 200 ka pinulongan ug sa pagsugod ug hubad sa dugang mga pinulongan sumala sa kinahanglan aron makobrehan ang tibuok natad sa kalibotan. Kini maoy pagsuporta sa sugo nga gihatag ni Jesus sa iyang mga tinun-an sa Buhat 1:8: “Kamo magadawat ug gahom sa diha nga kakunsaran na kamo sa balaang espiritu, ug kamo mahimong akong mga saksi . . . hangtod sa kinatumyang bahin sa yuta.” Dugang pa, ang New World Translation of the Holy Scriptures, nga napatik na sa bug-os o sa bahin diha sa 14 ka pinulongan, karon ginahubad sa 16 pa ka pinulongan sa Uropa, Aprika, ug Oriente.

Nagtagamtam “sa Kalinaw sa Diyos”

8. Sa unsang paagi ang mga karnero napanalanginan nga madagayaon pinaagi sa pakigtugon sa kalinaw nga gihimo ni Jehova kanila?

⁸ Pinaagi sa iyang usa ka Magbalantay, si Kristo Jesus, gihimo ni Jehova ang “pakigtugon sa kalinaw” uban sa Iyang napakaon-ug-husto nga mga karnero. (Isaias 54:10) Sa pagpakitag pagtuo sa giulang dugo ni Jesus, ang mga karnero nakaarang sa paglakaw diha sa kahayag. (1 Juan 1:7) Sila nagtagamtam sa ‘kalinaw sa Diyos nga lapaw sa tanang pagpanabot ug nga magabantay sa ilang mga kasingkasing ug mga hunahuna pinaagi kang Kristo Jesus.’ (Filipos 4:7) Ingon sa gihubit sa Ezekiel 34:25-28, si Jehova nagatultol sa iyang mga karnero ngadto sa espirituwal nga paraiso, usa ka makalilipayng kahimtang sa seguridad, makahupayng kadagaya, ug pagkamabungahon. Kining mahigugmaong Magbalantay nag-ingon mahitungod sa iyang mga karnero: “Sila makaila nga ako mao si Jehova sa diha nga balion ko ang mga balabag sa ilang yugo ug sa maluwas ko sila gikan sa kamot niadtong nagaulipon kanila. Ug sila dili na mahimong bihagon sa mga nasod; . . . ug sila sa pagkamatuod mopuyo nga may kasegurohan, ug walay magahadlok kanila.”

9. Unsang mga kahigayonan ang nabuksan sa katawhan sa Diyos tungod sa ‘pagkabali sa mga balabag’?

⁹ Niining ulahing katuigan, naeksperyensiyahan sa mga Saksi ni Jehova diha sa daghang nasod ang pagkabali sa “mga balabag sa ilang yugo.” Sila libre nang makasangyaw nga dili sama kaniadto. Ug hinaot kitang tanan, sa matag nasod, magagamit ug maayo sa seguridad nga gihatag ni Jehova samtang kita nagapadayon sa pagpalampos sa buluhaton. Pagkadako nga pasalig ang gihatag ni Jehova samtang nagkahiduol na kita sa panahon sa kinadak-ang kasakitan nga masaksihan sa katawhan!​—Daniel 12:1; Mateo 24:21, 22.

10. Kinsa ang gihatag ni Jehova nga motabang sa Maayong Magbalantay, si Kristo Jesus, ug unsa ang giingon ni apostol Pablo sa uban kanila?

¹⁰ Sa pagpangandam alang sa adlaw sa iyang panimalos batok sa daotan, si Jehova naghatag ug mga luyoluyong-magbalantay sa pagtabang sa Maayong Magbalantay, si Kristo Jesus, sa pag-atiman sa panon. Kini sila gihulad sa Pinadayag 1:16 ingong usa ka kompleto nga numero sa “pito ka bituon” sa tuong kamot ni Jesus. Sa unang siglo, si apostol Pablo nagtumong sa hawas nga lawas niining luyoluyong-magbalantay, nga nag-ingon: “Tagda ninyo ang inyong kaugalingon ug ang tibuok panon, nga niini ang balaang espiritu mao ang nagtudlo kaninyo nga mga magtatan-aw, sa pagbantay sa kongregasyon sa Diyos, nga iyang gipalit pinaagi sa dugo sa iyang kaugalingong Anak.” (Buhat 20:28) Karong adlawa, adunay tinagpulo ka libo ka luyoluyong-magbalantay nga nag-alagad diha sa mga 69,558 ka kongregasyon sa tibuok yuta.

Mga Luyoluyong-Magbalantay Nagapanguna!

11. Sa unsang paagi ang pila ka magbalantay malamposong nanguna diha sa mga teritoryo nga kanunay nang gikobrehan?

¹¹ Sa daghang dapit kining mga luyoluyong-magbalantay kinahanglang manguna diha sa mga teritoryo nga sublisubli nang gikobrehan niining kataposang mga adlaw. Sa unsang paagi nila mahuptan sa hataas nga sukod ang kadasig sa panon? Dalayegon kaayo ang nahimo niining mga magbalantaya, ug ang usa ka paagi nga sila nagmalamposon mao ang pagdasig sa buluhatong oksilyare ug regular nga payunir. Daghang mga magbalantay mismo ang nakig-ambit niining pag-alagara, ug ngani kadtong mga magmamantala nga wala pa makahimo niana nakapasundayag sa espiritu sa pagpayunir, nga nagaalagad nga may kalipay nga nakatabang sa pagsagubang sa kawalay pagtagad diha sa teritoryo. (Salmo 100:2; 104:33, 34; Filipos 4:4, 5) Mao nga, samtang ang pagkadaotan ug kagubot milukop sa kalibotan, daghang karnerohong tawo ang napukaw sa paglaom sa Gingharian.​—Mateo 12:18, 21; Roma 15:12.

12. Unsa ang seryosong suliran diha sa tulin motubo nga mga kanataran, ug sa unsang paagi kini usahay gidumala?

¹² Ang usa pa ka suliran sa subsob mao ang kakulang sa kuwalipikado nga mga magbalantay sa pag-atiman sa panon. Sa dapit nga tulin ang pagtubo, sama sa Sidlakang Uropa, adunay daghang bag-ong mga kongregasyon ang walay natudlong ansiano. Ang andam nga mga karnero maoy nangabaga sa kabug-at, apan sila kulang ug kasinatian, ug kinahanglan ang tabang aron mabansay ang mga karnero nga nagasulod sa mga kongregasyon. Sa kayutaan sama sa Brazil, Mexico, ug Zaire, diin tulin kaayo ang pagtubo, ang batan-on pang mga Saksi kinahanglang gamiton sa pag-organisar sa pag-alagad ug pagbansay sa mga bag-ohan. Ang mga payunir nagahatag ug dako nga tabang, ug dinhi nga natad nga ang mga sister makabansay sa bag-ohang mga sister. Gipanalanginan ni Jehova ang mga resulta pinaagi sa iyang espiritu. Ang pag-uswag padayon nga nagaabot.​—Isaias 54:2, 3.

13. (a) Sanglit ang anihon dako kaayo, alang sa unsa ang tanang mga Saksi angayng moampo? (b) Sa unsang paagi ang mga pag-ampo sa katawhan sa Diyos gitubag una pa ug sa ikaduhang gubat sa kalibotan?

¹³ Sa kayutaan diin ang buluhatong pagwali malig-on na, sa kayutaang ang mga pagdili gikuha na niining bag-o pa, ug sa bag-ong nabuksan nga mga teritoryo, ang mga pulong ni Jesus sa Mateo 9:37, 38 mapadapat gihapon: “Oo, daghan ang anihon, apan diyutay ra ang mga mamumuo. Busa, pangamuyo kamo sa Agalon sa anihon nga makapadala unta siyag mga mamumuo ngadto sa iyang anihon.” Kita kinahanglang moampo, usab, nga si Jehova mopatungha ug dugang mga magbalantay. Iyang napasundayag nga iya kining mahimo. Una pa ug sa panahon sa Gubat sa Kalibotan II, ang pintas samag-Asiryanhong mga diktador misulay sa pagpuo sa mga Saksi ni Jehova. Apan sa pagtubag sa ilang mga pag-ampo, si Jehova nagputli sa ilang organisasyon, naghimo niana nga tinuod teokratikanhon, ug mihatag sa gikinahanglang “mga magbalantay.”a Kini nahiuyon sa tagna: “Alang sa Asiryanhon, sa diha nga siya moabot sa atong yuta ug sa diha nga siya magatamak sa atong puluy-anang mga torre, kita usab magabangon batok kaniya ug pito ka magbalantay, oo, walo ka mga pangulo sa katawhan”​—ngani nanobra ang gidaghanon sa dedikadong mga ansiano nga magapanguna.​—Miqueas 5:5.

14. Unsang dako nga panginahanglan sa organisasyon, ug unsang pagdasig ang gihatag sa mga igsoong lalaki?

¹⁴ May tagsaong panginahanglan alang sa tanang lalaking mga Saksi sa pagtinguha sa dugang mga pribilehiyo. (1 Timoteo 3:1) Ang kahimtang dinalian. Ang kataposan niining sistema tulin nga nagsingabot. Ang Habacuc 2:3 nag-ingon: “Kay ang panan-awon alang pa sa natudlong panahon, ug kini nagadali sa kataposan, ug dili magbakak. . . . Kini sa walay pakyas moabot. Dili kini magalangan.” Mga brader, mahimo ba kamong magtinguha aron makuwalipikado alang sa dugang mga pribilehiyo niining pagbantay nga buluhaton​—sa dili pa moabot ang kataposan?​—Tito 1:6-9.

Ang Teokratikanhong Pagbantay

15. Sa unsang paagi ang katawhan ni Jehova usa ka teokrasya?

¹⁵ Aron makaambit sa bug-os diha sa nagadako nga organisasyon ni Jehova, ang iyang katawhan kinahanglang teokratikanhon sa ilang panglantaw. Sa unsang paagi mahimo nila kini? Nan, unsa ba ang buot ipasabot sa terminong “teokratikanhon”? Ang Webster’s New Twentieth Century Dictionary naghubit sa “teokrasya” ingong “ang pagmando sa Diyos sa usa ka estado.” Niining kahulogana nga ang “balaang nasod” sa katawhan ni Jehova nahimong usa ka teokrasya. (1 Pedro 2:9; Isaias 33:22) Ingong mga sakop o kauban nianang teokratikanhong nasod, ang matuod nga mga Kristohanon kinahanglang magkinabuhi ug moalagad sumala sa Pulong sa Diyos ug sa mga prinsipyo niini.

16. Sa unsang paagi, sa panguna, mapasundayag nato nga teokratikanhon kita?

¹⁶ Si apostol Pablo tin-aw nga misaysay niini kon sa unsang paagi ang mga Kristohanon mahimong teokratikanhon. Una, matud niya nga sila “kinahanglang mosul-ob sa bag-ong pagkatawo nga gilalang sumala sa kabubut-on sa Diyos diha sa matuod nga pagkamatarong ug kamaunongon.” Ang Kristohanong pagkatawo kinahanglang naumol sumala sa matarong nga mga prinsipyo sa Diyos sa pagkamatarong nga mabasa sa iyang Pulong. Kinahanglang siya maunongon kang Jehova ug sa Iyang mga balaod. Tapos iilustrar kon sa unsang paagi kini himoon, si Pablo midasig: “Magmaawaton kamo sa Diyos, ingon nga mga anak nga pinalangga.” (Efeso 4:24–5:1) Sama sa masinugtanon nga mga anak, kinahanglang sundogon nato ang Diyos. Kana mao ang matuod nga teokrasya nga gipadapat, nga nagapakita nga kita sa pagkatinuod gimandoan sa Diyos!​—Tan-awa usab ang Colosas 3:10, 12-14.

17, 18. (a) Unsang tagsaong hiyas sa Diyos ang angayng sundogon sa teokratikanhong mga Kristohanon? (b) Sa iyang mga pulong ngadto kang Moises, sa unsang paagi gipasiugda ni Jehova ang Iyang pangunang hiyas, apan unsang pasidaan ang Iyang gidugang?

¹⁷ Unsa ang pangunang hiyas sa Diyos nga kinahanglan natong awaton? Si apostol Juan mitubag sa 1 Juan 4:8 sa dihang siya miingon: “Ang Diyos gugma.” Walo ka bersikulo sa ulahi, sa bersikulo 16, iyang gisubli kining hinungdanong prinsipyo: “Ang Diyos gugma, ug ang nagapabilin sa gugma nagapabilin sa Diyos ug ang Diyos nagapabilin diha kaniya.” Ang Dakong Magbalantay, si Jehova, mao ang personipikasyon sa gugma. Ang teokratikanhong mga magbalantay nagasundog kaniya pinaagi sa pagpasundayag sa dulot nga gugma alang sa mga karnero ni Jehova.​—Itandi ang 1 Juan 3:16, 18; 4:7-11.

¹⁸ Ang Dakong Teokrata nagpadayag sa iyang kaugalingon kang Moises ingong “Si Jehova, si Jehova, usa ka Diyos nga maluloy-on ug mabination, mahinay sa pagkasuko ug dagaya sa mahigugmaong-kalulot ug kamatuoran, nga nagatipig sa mahigugmaong-kalulot alang sa linibo, nga nagapasaylo sa kadaotan ug kalapasan ug sala, apan dili gayod niya palabyon ang daotan nga dili masilotan, nga magasilot sa kadaotan sa mga amahan sa ibabaw sa mga anak ug sa ibabaw sa mga apo, sa ibabaw sa ikatulo ug sa ibabaw sa ikaupat nga kaliwatan.” (Exodo 34:6, 7) Sa ingon gipasiugda ni Jehova ang nagkadaiyang mga bahin sa iyang nangibabawng teokratikanhong hiyas, ang gugma, samtang lig-ong nagpasidaan nga siya magasilot sa sala kon angayan.

19. Kasukwahi sa mga Pariseo, sa unsang paagi ang Kristohanong mga magbalantay molihok sa teokratikanhong paagi?

¹⁹ Alang niadtong may mga responsabilidad sa organisasyon, unsay kahulogan nga mahimong teokratikanhon? Si Jesus nag-ingon mahitungod sa mga eskriba ug mga Pariseo sa iyang adlaw: “Nagabugkos sila ug bug-at nga mga luwan ug gibutang kana sa mga abaga sa mga tawo, apan sila mismo dili buot motandog niana pinaagi sa ilang tudlo.” (Mateo 23:4) Pagkamadaogdaogon ug dili mahigugmaon! Ang matuod nga teokrasya, o pagmando-sa-Diyos, nagakinahanglan ug pagbantay sa panon pinaagi sa pagpadapat sa mahigugmaong mga prinsipyo sa Bibliya, nga dili pabug-atan ang mga karnero sa walay kataposang mga lagda nga hinimog-tawo. (Itandi ang Mateo 15:1-9.) Sa samang panahon, ang teokratikanhong mga magbalantay kinahanglang mosundog sa Diyos pinaagi sa malig-on nga paghupot sa kaputli sa kongregasyon dugang sa ilang gugma.​—Itandi ang Roma 2:11; 1 Pedro 1:17.

20. Unsang organisasyonal nga mga kahikayan ang ginaila sa teokratikanhong mga magbalantay?

²⁰ Ginaila sa matuod nga mga magbalantay nga niining panahon sa kataposang mga adlaw, si Jesus nagtudlo sa iyang matinumanon ug maalamong ulipon ibabaw sa iyang tanang kabtangan ug kining ulipona gitultolan sa balaang espiritu sa pagtudlo ug mga ansiano alang sa pagbantay sa mga karnero. (Mateo 24:3, 47; Buhat 20:28) Busa, ang pagkahimong teokratikanhon naglangkit sa pagbaton ug halalom nga pagtahod alang niining ulipona, alang sa organisasyonal nga mga kahikayan nga gipatuman sa ulipon, ug alang sa kahikayan sa ansiano sulod sa kongregasyon.​—Hebreohanon 13:7, 17.

21. Unsang maayong panig-ingnan ang gibilin ni Jesus alang sa mga luyoluyong-magbalantay?

²¹ Si Jesus mismo nagbilin ug usa ka maayong panig-ingnan, nga kanunay nagsalig kang Jehova ug sa Iyang Pulong alang sa giya. Siya nag-ingon: “Ako dili makahimo ug usa ka butang sa akong kaugalingong pagbuot; sumala sa akong nadungog, ako magahukom; ug ang akong hukom matarong, kay gitinguha ko, dili ang akong kabubut-on, kondili ang kabubut-on sa nagpadala kanako.” (Juan 5:30) Ang mga luyoluyong-magbalantay ni Ginoong Jesu-Kristo angayng mougmad sa samang mapaubsanong tinamdan. Kon ang ansiano kanunayng modangop sa Pulong sa Diyos alang sa pagtultol, sama sa gihimo ni Jesus, nan siya teokratikanhon gayod.​—Mateo 4:1-11; Juan 6:38.

22. (a) Sa unsang paagi ang tanan angayng maningkamot nga mahimong teokratikanhon? (b) Unsang malulotong imbitasyon ang gihatag ni Jesus sa mga karnero?

²² Bawtismadong mga lalaki, tinguhaa ninyo nga makuwalipikado kamo alang sa mga pribilehiyo sa kongregasyon! Kamong tanan minahal nga mga karnero, himoang tumong nga mahimong teokratikanhon, nga magaawat sa Diyos ug kang Kristo sa pagpakitag gugma! Hinaot nga ang mga magbalantay ug ang panon samang magmalipayon kay sila mitubag sa imbitasyon ni Jesus: “Umari kanako, kamong tanan nga nabudlayan ug nabug-atan, ug papahulayon ko kamo. Isangon ninyo ang akong yugo ug pagkat-on gikan kanako, kay ako maaghop ug mapaubsanon sa kasingkasing, ug makakaplag kamo ug pahulay alang sa inyong mga kalag. Kay masayon ang akong yugo ug magaan ang akong luwan.”​—Mateo 11:28-30.

[Footnote]

Makasaysay Ka Ba?

◻ Unsa ang “panon” ni Jehova, ug kinsa ang nalakip niana?

◻ Sa unsang paagi si Jesus milihok ingong “ang maayong magbalantay” sa unang siglo, ug karong adlawa?

◻ Unsang hinungdanong papel ang gidula sa mga luyoluyong-magbalantay sa pag-atiman sa panon?

◻ Unsa ang sukaranang kahulogan sa pulong “teokrasya”?

◻ Sa unsang paagi ang usa ka Kristohanon​—ilabina na ang luyoluyong-magbalantay​—molihok aron mahimong teokratikanhon?

[Hulagway sa panid 20]

Sama sa usa ka debotadong magbalantay, ginaatiman ni Jehova ang iyang panon

[Hulagway sa panid 23]

Ang pag-awat sa hiyas ni Jehova nga Diyos nga gugma maoy teokrasya nga gipadapat