Mga Pangutana Gikan sa mga Magbabasa

Unsay kaakohan sa mga Kristohanon sa pagpakunhod sa paghugaw sa atong palibot​—yuta, dagat, ug hangin?

Ingong mga Saksi ni Jehova, kita dulot nga nabalaka sa daghang suliran sa ekolohiya nga nagaapektar sa atong yutan-ong puloy-anan. Labaw kay sa kadaghanang tawo, atong giapresyar nga ang yuta gilalang aron mahimong mahinlo, makahimsog nga puloy-anan alang sa hingpit tawhanong pamilya. (Genesis 1:31; 2:15-17; Isaias 45:18) Gipasaligan usab kita sa Diyos nga iyang “laglagon ang nagalaglag sa yuta.” (Pinadayag 11:18) Mao nga husto lamang nga maghimo ug balanse, makataronganong paningkamot aron dili na madugangan pa ang paghugaw sa tawo sa atong globo. Ugaling, timan-i ang pulong “makataronganon.” Kasulatanhon usab nga magbantay kita batok sa sobra nga kabalaka sa mga isyu sa ekolohiya ug mga buhat.

Bisan ang normal nga pagkinabuhi sa tawo nagapatunghag hugaw. Pananglitan, ang pagtanom, pagproseso, ug pagkaon sa mga produktong kalan-on sa subsob mopahinabog hugaw, bisag ang kadaghanan niana madunot. (Salmo 1:4; Lucas 3:17) Ang sinugbang-isda nga pagkaon nga giandam sa nabanhawng si Jesus alang sa iyang mga tinun-an nagpahinabo gayod ug aso, abo, ug basura sa mga bukog sa isda. (Juan 21:9-13) Apan ang may kinabuhi o walay kinabuhi nga mga sistema o siklo sa yuta gidesinyo sa pag-atiman niana.

Dili angay kalimtan sa katawhan sa Diyos ang mga butang bahin sa ekolohiya. Si Jehova nagsugo sa iyang karaang katawhan sa paghimog mga lakang sa paglabay sa mga hugaw, mga lakang nga maayo sa ekolohiya ug sa sanitasyon. (Deuteronomio 23:9-14) Ug kay nasayod man kita sa iyang panglantaw mahitungod sa nagalaglag sa yuta, sa walay duhaduha kita kinahanglang dili magpasagad sa mga butang nga atong mahimo aron mahuptan nga hinlo ang palibot. Ato kining ipakita pinaagi sa hustong paglabay sa basura o hugaw, ilabina ang makahilo nga mga butang. Kita makugihong mokooperar sa mga paningkamot sa pagsiklo-pag-usab, ug may dugang pa kita nga katarongan sa pagbuhat sa ingon kon kana gisugo ni Cesar. (Roma 13:1, 5) Ug ang pila ka mga indibiduwal nakabatig katagbawan gumikan sa paghimog dugang mga lakang, sama sa paggamit sa produkto nga madunot inay kay sa mga produkto nga makadungag sa mga bukid sa basura sa yuta ug ilalom sa kadagatan.

Hinuon, kon asa kutob ang usa ka Kristohanon mosunod niining bahina maoy usa ka personal nga desisyon gawas kon gikinahanglan sa balaod. Dayag nga sumala sa mga balita ang dili hingpit nga mga tawo dali rang mahulog sa bitik sa paghingapin. Ang tambag ni Jesus sa pagkatinuod hinungdanon: “Ayaw kamo pagpanghukom . . . Nganong tan-awon mo man ang puling nga anaa sa mata sa imong igsoon, ug wala hinuon nimo tagda ang troso nga anaa sa kaugalingon mong mata?” (Mateo 7:1, 3) Ang paghinumdom niini mahimong motabang kanato nga dili masayloan ang ubang importanteng mga hinungdan.

Ang propetang si Jeremias misulat: “Oh Jehova, ako nasayod nga ang dalan sa tawo wala diha sa iyang kaugalingon. Kini wala sa tawo nga nagalakaw aron sa pagtultol sa iyang mga lakang.” (Jeremias 10:23) Ang dili pagtagad niining prinsipyoha nagadala sa katawhan sa “panahong lisod sagubangon,” ingon sa gipahayag diha sa 2 Timoteo 3:1-5. Ug ang gipatala sa Diyos sa Pinadayag 11:18 nagpamatuod nga ang tawhanong paningkamot sa pagwala sa yuta sa iyang dakong ekolohikal nga mga suliran, lakip sa polusyon, dili molampos sa bug-os. Mahimong adunay pipila ka pag-uswag sa ubang mga dapit, apan ang dumalayon lamang nga sulbad nagkinahanglan sa pagpangilabot sa Diyos.

Tungod niining katarongan atong ibug-os ang atong mga paningkamot ug kahinguhaan sa sulbad sa Diyos, inay sulayan nga ayom-ayomon ang hapaw nga mga simtoma. Niining bahina atong sundon ang pananglitan ni Jesus, nga migugol sa dakong bahin sa iyang ministeryo sa ‘pagpamatuod sa kamatuoran.’ (Juan 18:37) Inay pakan-on ang kalibotan o kunhoran ang kaylap nga mga suliran sa katilingban​—lakip ang polusyon—​si Jesus nagtudlo ngadto sa bug-os nga sulbad sa mga suliran nga nagasakit sa katawhan.​—Juan 6:10-15; 18:36.

Samtang ang gugma alang sa isigkatawo nagtukmod kanato nga likayan ang dili kinahanglanon nga paghugaw sa yuta, atmospera, o abiyo sa tubig, kita padayon nga magpamatuod sa kamatuoran. Kini naglakip sa pagtudlo sa mga tawo sa pagpadapat sa kamatuoran sa Bibliya ug sa paglikay sa pagdaot sa ilang mga lawas pinaagig tabako, sobrang alkohol, o makadaot nga mga droga. Samtang minilyon ka bag-ohan ang nahimong mga tinun-an, sila nakakat-on ug mga batasan sa kahinlo ug pagkamatinagdanon sa uban. Busa ang buluhatong pagwali nakahimog literal nga tabang sa pagpakunhod sa linangkob nga suliran sa polusyon karong adlawa. Apan labing hinungdanon, ang Kristohanong mga tinun-an maningkamot sa pagbag-o sa ilang pagkatawo ug mga batasan karon aron sila mohaom sa hinlo, Paraisong yuta nga sa dili madugay ihatag sa Diyos sa iyang matuod nga mga magsisimba.