Pagkaplag sa Mithianong Solusyon

ANG Pulong sa Diyos, ang Bibliya, naghisgot bahin sa usa ka panahon sa dihang ang langitnong kagamhanan sa Diyos magsulbad sa tanang suliran sa katawhan, nga karon naglakip sa suliran sa polusyon pinaagi sa mga awto. Kini bang Mesiyanikong Gingharian, nga ang daghan gitudloan nga iampo, mohatag sa mithianong solusyon pinaagi sa pagbuhat sa bug-os nga walay-polusyong awto? O ang mithianong solusyon makab-ot ba pinaagi sa pagwagtang sa tanang sakyanang demotor gikan sa yuta? Sanglit ang Bibliya wala maghatag kanato ug tinong tubag, ang ato lamang mahimo mao ang pagpaabot ug pagtan-aw.​—Mateo 6:9, 10.

Apan makatino kita niini: Ang kagamhanan sa Diyos dili motugot nga daoton sa polusyon ang matahom nga kalalangan diha sa napasig-uling Paraiso nga ipatungha sa Gingharian.​—Isaias 35:1, 2, 7; 65:17-25.

Sanglit kadtong nagsunod sa Pulong sa Diyos ginabansay na alang sa kinabuhi sa walay-polusyon nga bag-ong kalibotan, unsay angay nga pagbati nila bahin sa paggamit ug mga awto karong adlawa? Ang Pagmata! sa Hunyo 22, 1987, naghisgot sa ulohang “Unsay Nagakahitabo sa Atong Kalasangan?” Kana mitaho nga ang pipila ka siyentipiko naghunahuna nga adunay koneksiyon tali sa mga polusyon sa hangin nga anaa sa binuga sa sakyanan ug sa nagkamatay nga kalasangan. Kini nagpahinabo sa usa ka nabalakang magbabasa sa pagsulat sa Watchtower Society nga nangutana kon maayo bang magdrayb ug mga kotse ang mga Kristohanon tungod sa maong kamatuoran. Nahibulong siya kon ang paghimo sa ingon magpakita bag kawalay-pagtahod sa kalalangan ni Jehova.

Ang iyang sulat gitubag, sa bahin, sumala sa mosunod: “Ang mga Saksi ni Jehova matinumanong nagsunod sa mga balaod sa kalikopan nga gipatuman sa mga awtoridad sa gobyerno sa pagkunhod sa polusyon. (Roma 13:1, 7; Tito 3:1) Ang paghimog mga lakang nga gawas sa gibaod sa gobyerno anaa lamang sa paghukom sa indibiduwal. Kon adunay mohukom nga dili na modrayb ug kotse, kana iyang kaugalingong panghukom. Ang artikulo sa Pagmata! nagpakita kon unsay pagbati sa pipila ka tawo, hinunoa, pinaagi sa pag-ingon sa panid 8: ‘Daghan ang nagahimog praktikal nga mga lakang sa pagkunhod sa polusyon sa hangin sa gidak-on nga maposible. Sila nagadrayb nga mas hinay, nagabiyahe nga menos, nagaapil sa mga pag-angkasay, nagagamit ug walay-tinggang gasolina, ug nagasunod sa kontra-polusyon nga mga balaod nga gibaod sa gobyerno.’”

Kristohanong Katimbang

Kining tubaga nagpadayag sa Kristohanong katimbang. Pagahinumdomang ang mga awto dili mao lamang ang nagahugaw. Ang mga ayroplano ug mga tren​—sa pagkamatuod, kadaghanang modernong mga gamit sa transportasyon​—nagahugaw. Apan ang maong mga gamit sa transportasyon wala gam-a uban sa dayag nga katuyoan sa paghugaw. Ang miresultang maghuhugaw maoy usa ka segundang epekto, nga ikasubo apan tungod sa limitadong kahibalo ug dili-hingpit nga mga tinamdan.

Ang Bantayanang Torre sa Enero 1, 1993, panid 31, naghisgot niining butanga, nga nag-ingon: “Ingong mga Saksi ni Jehova, kita dulot nga nabalaka sa daghang suliran sa ekolohiya nga karon nagaapektar sa atong yutang puy-anan. Labaw pa kay sa kadaghanang tawo, kita nag-ila nga ang yuta gilalang aron mahimong hinlo, makapahimsog nga puy-anan alang sa hingpit tawhanong pamilya. (Genesis 1:31; 2:15-17; Isaias 45:18) . . . Sa ingon matarong ang paghimog timbang, makataronganong mga paningkamot sa paglikay nga way-hinungdan nga dugangan ang nagpadayong paghugaw sa tawo sa atong yuta. Hinuon, matikdi ang pulong ‘makataronganon.’ . . . Ang katawhan sa Diyos dili angay nga malimot sa mga butang may kalabotan sa ekolohiya. Si Jehova nagbaod sa iyang karaang katawhan sa paghimog mga lakang sa paghipos sa mga hugaw, mga lakang nga bililhon sa ekolohiya ingon man sa kahinlo. (Deuteronomio 23:9-14) Ug sanglit kita nasayod sa iyang panglantaw niadtong nagadaot sa yuta, tinong dili angay nga dili nato tagdon ang mga butang nga atong mahimo aron mahinlo ang kalikopan. . . . Bisan pa niana, ang gidak-on nga pagabuhaton sa usa ka Kristohanon sa maong tumong maoy personal nga butang gawas kon giobligar sa balaod. . . . Ang dili-hingpit nga mga tawo daling mahulog sa lit-ag sa paghingapin. . . . Ang tawhanong mga paningkamot sa pagwagtang gikan sa yuta sa dagkong mga suliran sa ekolohiya niini, lakip ang polusyon, dili bug-os nga molampos. Tingali adunay diyutayng pag-uswag dinhi ug didto, apan kinahanglang mosalga ang Diyos alang sa bugtong malungtarong solusyon. Tungod niini ibug-os nato ang atong mga paningkamot ug kahinguhaan sa balaang solusyon, inay kay sulayan nga hupayon ang pangibabawng mga simtoma.”

Ang mga Kristohanon maoy timbang samtang nagsunod sila sa mga prinsipyo sa Bibliya, nga naghinumdom sa balaang buluhaton nga ilang nadawat sa pagwali sa mensahe sa Gingharian sa Diyos sa tibuok kalibotan. (Mateo 24:14) Walay butang nga mas hinungdanon o mas dinalian! Kon ang modernong mga gamit sa transportasyon ug komunikasyon makaabag sa mga Kristohanon aron matuman ang maong katungdanan, makataronganon gayod nga gamiton nila ang modernong mga gamit sa transportasyon. Sa samang panahon, likayan nila ang dili-angay o tinuyong paghugaw. Sa ingon mahuptan nila ang maayong konsensiya atubangan sa tawo ug sa Diyos.

Busa bisan tuod kita karong adlawa wala gayod masayod kon sa unsang paagi masulbad sa kataposan ang suliran sa polusyon ug sa awto, kita nasayod nga masulbad kini. Sa pagkamatuod, ang mithianong solusyon anaa na sa kapunawpunawan.

[Kahon sa panid 9]

Pagpukgo sa Polusyon

• Pagbaktas o pagbisikleta kon mahimo

• Pag-apil sa mga pag-angkasay sa kotse

• Pagpahiling nga regular sa mga sakyanang demotor

• Pagkamahunahunaon sa hinlong gasolina

• Paglikay sa way-hinungdang biyahe

• Pagdrayb sa kasarangan apan makanunayong mga katulinon

• Paggamit ug publikong transportasyon kon posible ug praktikal

• Pagpatay sa makina inay pasagdan nga mag-andar sa dihang ang sakyanan magparking sa bisan unsang gidugayon