Pagwala sa Polusyon Gikan sa Kasingkasing ug Hunahuna

WALA hatagi ni Jehova nga Diyos ang tawo ug pangandoy sa kahugaw o kagubot. Ang ilang planetang puloy-anan gilaraw nga mahimong usa ka paraiso sa kahinlo, kahusay, ug katahom. Dili katuyoan sa Diyos nga kini mahimong usa ka mangil-ad tan-awon nga basurahan.​—Genesis 2:8, 9.

Ugaling, human gisalikway sa tawo ang pagtultol sa Diyos, sila misugod sa pagtukod ug ilang kaugalingong kahikayan sa kalibotan. Sanglit wala matultoli sa kaalam sa Diyos ug kulang sa kasinatian, sila napugos sa pagkat-on pinaagi sa pagpanaghap kon mosaler ba ang ilang paagi. Ang sekular nga kasaysayan nagpamatuod sa kamatuoran sa Bibliya nga ang tawo dili molampos sa pagmando sa ilang kaugalingon; sa libolibo ka tuig ang “tawo nagamando sa tawo alang sa iyang kadaotan.” (Ecclesiastes 8:9; Jeremias 10:23) Ang modernong problema sa polusyon, sa tanang matang niini, mao ang resulta sa sayop nga pagmando sa tawo.

Pagsagop sa Hunahuna sa Diyos

Ang mga tawo nga matinguhaon sa pagpahimuot sa Diyos maningkamot pag-ayo sa pagkinabuhi sa mga sukdanan sa Maglalalang sa kahinlo. Busa, nakaatubang ang mga Saksi ni Jehova ug suliran sa dihang giiskedyol ang usa ka internasyonal nga kombensiyon nga himoon sa Prague, Czechoslovakia, sa tungatunga sa tuig 1991.a Duolan sa 75,000 ka tawo ang gilaomang motambong, usa ka panon sa katawhan nga haruhayng mapahiluna sa Strahov Stadium. Apan ang istadyom wala na gamita sulod sa lima ka tuig. Kini guba na, naguba tungod sa klima. Duolan sa 1,500 ka mga Saksi ni Jehova migugol ug kapin sa 65,000 ka oras sa pag-ayo ug pagpintal niana pag-usab. Sa pag-abot sa panahon sa kombensiyon kining kampanya sa paghinlo naghimo sa istadyom nga usa ka maayong dapit sa pagsimba sa matuod nga Diyos, si Jehova.

Unsay nagpalihok sa mga Saksi ni Jehova sa pagkahimong lahi, samtang ang kalibotan sa katibuk-an nagpakitag gamay rang apresasyon sa kahinlo ug kahusay? Ang apresasyon sa tambag sa Bibliya nga kinahanglang wagtangon sa mga Kristohanon ang negatibong mga batasan, sama sa kahakog, kawalay-konsiderasyon, kadalo, ug kawalay gugma. “Hukasa ang daang pagkatawo uban ang mga batasan niini,” nag-ingon ang Bibliya. Pulihi kini ug “bag-ong pagkatawo, nga pinaagi sa tukmang kahibalo gibag-o sumala sa dagway sa Usa nga naglalang niana.” Ang pagkatawo nga gitiman-an sa gugma sa kahinlo, kahusay, ug katahom walay luna alang sa makahugaw nga mga kiling.​—Colosas 3:9, 10; 2 Corinto 7:1; Filipos 4:8; Tito 2:14.

Ang bag-ong pagkatawo nagkinahanglan nga ang mga Kristohanon magmahunahunaon sa polusyon, dili magpatakag hugawhugaw o supakon ang mga balaod batok sa polusyon nga ipakanaog sa mga kagamhanan. Kini motabang kanila sa dili pagsagop sa usikan, hakog, ug tapolang kaisipan nga motultol sa pagpatakag labay. Pinaagi sa pagpasiugda sa pagtahod sa kabtangan sa uban, kini dili mogamit ug graffiti ingong paagi sa pagpahayag sa mga hunahuna ug pagbati, ingong walay daotang tuyo nga kalingawan, o ingong usa ka kapiliang matang sa arte. Kini nagkinahanglan nga ang mga balay, sakyanan, sapot, ug mga lawas huptang mahinlo.​—Itandi ang Santiago 1:21.

Kon bahin sa mga tawo nga dili-andam sa pagsul-ob sa bag-ong pagkatawo, sad-an ba ang Diyos tungod sa dili paghatag kanila ug kinabuhi diha sa iyang umaabot nga Paraiso? Dili gayod. Ang si bisan kinsa nga aduna gihapoy tagong mga kiling sa iyang kasingkasing ug hunahuna magapameligro sa napasig-uling paraisonhong katahom sa planetang Yuta, nga mopahinabog dakong kasubo sa mga tawong nagatinguha sa pag-amping niana. Ang desisyon sa Diyos “sa paglaglag sa mga naglaglag sa yuta” matarong ug mahigugmaon.​—Pinadayag 11:18; 21:8.

Kinahanglan Bang Aktibo Kitang Malangkit?

Apan, kini ba nagkahulogan nga kinahanglang ipasiugda sa mga Kristohanon ang mga paagi batok sa polusyon ug sa paghinlo?

Ang polusyon dayag nga makadaot sa panglawas ug sa kahilwasan sa katilingban. Si Jehova tukmang nabalaka niining mga butanga, sumala sa atong makita gikan sa mga balaod nga iyang gihatag sa mga Israelinhon. (Exodo 21:28-34; Deuteronomio 22:8; 23:12-14) Apan wala gayod siya magsugo kanila sa pagkabig sa ubang mga tawo labot sa mga butang nga nalangkit ang kahilwasan sa katilingban; ni gisugo ang unang-siglong Kristohanon sa pagbuhat niini.

Karong adlawa, ang mga butang may kalabotan sa palibot mahimo dayong isyu sa politika. Gani, ang ubang mga partido sa politika naporma ilabina sa katuyoan sa pagsulbad sa mga suliran sa palibot. Ang Kristohanon nga magpaimpluwensiya sa mga isyu sa politika dili na neyutral sa politika. Si Jesus mihatag sa iyang mga tinun-an ug prinsipyo: “Sila dili bahin sa kalibotan, maingon nga ako dili bahin sa kalibotan.” Ang Kristohanon nga dili mosunod niining sugoa nagpameligro sa iyang kaugalingon sa pagdapig sa “mga magmamando niining sistemaha sa mga butang, nga nagapaingon sa pagkawagtang.”​—Juan 17:16; 1 Corinto 2:6.

Si Jesus wala mosulay sa pagsulbad sa tanang sosyal nga mga suliran sa iyang adlaw; ni gisugo niya ang iyang mga tinun-an sa paghimo niini. Ang iyang gisugo kanila mao: “Busa panglakaw kamo ug himoa ninyong mga tinun-an ang katawhan sa tanang kanasoran, sa pagbawtismo kanila . . . , nga magtudlo kanila sa pagtuman sa tanan nga akong gisugo kaninyo.” Siya wala magsugo kanila ug mga polisa may kalabotan sa palibot.​—Mateo 28:19, 20.

Nagbatbat kon unsa ang kinahanglang unahon diha sa Kristohanong kinabuhi, si Kristo miingon: “Nan, padayon sa pagpangita pag-una sa gingharian ug sa iyang pagkamatarong.” (Mateo 6:33) Sa dihang ipakanaog ni Jehova, pinaagi sa iyang Mesyanikong Gingharian, ang iyang matarong nga mga prinsipyo sa tibuok-yuta nga sukod, ang mga suliran sa palibot masulbad sa walay kataposan ug sa katagbawan sa tanan.

Busa, ang mga Saksi ni Jehova nagakuha ug timbang nga baroganan. Diha sa Roma 13:1-7, obligasyon gayod nga ilang sundon ang mga balaod sa kagamhanan nga nagaamping sa palibot. Dugang pa, ang diyosnong gugma sa silingan nagapalihok kanila sa pagpakitag pagtahod sa kabtangan sa uban​—publiko o pribado—​dili pinaagi sa pagdaot niana ug dili magpatakag labay sa mga hugaw. Apan sila tin-aw nga wala sugoa nga maoy manguna sa kalibotanong mga paagi sa paghinlo. Ilang giuna sa makataronganon ang pagsangyaw sa mensahe sa Gingharian sa Diyos, nahibalo nga mao kini ang paagi nga mohatag ug labing malungtarong kaayohan.

Usa ka Espirituwal nga Paghinlo

Ang karaang mga Israelinhon masubsob nga gipasidan-an sa mga sangpotanan kon ilang hugawan ang yuta pinaagi sa pag-ula ug dugo, sa pagsubay ug imoral nga estilo-sa-kinabuhi, o sa pagpakitag pagkawalay-pagtahod sa balaang mga butang. (Numeros 35:33; Jeremias 3:1, 2; Malakias 1:7, 8) Labing hinungdanon, sila gihukman tungod niining espirituwal nga polusyon, dili tungod sa bisan unsang pisikal nga polusyon diin sila tingali sad-an.b

Busa, ang espirituwal nga polusyon o kahugawan ang kinahanglang paningkamotang likayan sa Kristohanon karon. Kini iyang himoon pinaagi sa pagsul-ob sa “bag-ong pagkatawo,” nga mokuha sa makahugaw nga mga kiling gikan sa kasingkasing ug hunahuna. Kapin sa upat ka milyong mga Saksi ni Jehova ang nakabaton ug kaayohan niining espirituwal nga paghinlo, nga nakabaton taliwala kanila ug relihiyoso ug moral nga kahinlo, maingon man sa inilang pisikal nga kahinlo.​—Efeso 4:22-24.

Karon na ang panahon alang sa kampanya sa espirituwal nga paghinlo. Usa ka pisikal nga kampanya sa paghinlo sa tibuok yuta ang mosunod sa tinudlong panahon ug moluwas sa atong pinuy-anan gikan sa pagkahimong tibuok-kalibotan nga basurahan pinaagi sa paghatag ug walay-polusyon nga palibot nga angay niini.​—Ecclesiastes 3:1.

[Mga footnote]