Magkalipay sa Mahinlong Yuta sa Unahan!

PAGKAMALIPAYON nato nga si Jehova, nga usa ka Diyos sa kahusay ug kahinlo, motuman sa iyang orihinal nga katuyoan sa paghimo sa yuta nga usa ka tibuok yuta nga paraiso! (Isaias 11:6-9) Siya nagsaad: “Ang akong pulong nga mogula sa akong baba . . . dili mobalik kanako nga walay kapuslanan, kondili nga kini magatuman sa akong gikahimut-an.” “Ang Diyos dili mahimong mamakak,” busa kini dili mga pulong nga walay kahulogan.​—Isaias 55:11; Hebreohanon 6:18.

Kita mahupayan nga mahigugmaong mangilabot si Jehova sa dili pa mopahinabo ang katawhan ug grabe nga polusyon hangtod sa punto nga dili na masanta ang bug-os nga pagkalaglag sa ekolohiya!​—Pinadayag 11:18.

Wagtangon ni Jehova ang dili-mahinulsolon, mapasagaron nga mga maghuhugaw ug ang mga tawo nga masukihong nagasalikway sa mga prinsipyo sa kahusay ug kahinlo. Walay usa ang tugotang modaot sa napasig-uling Paraiso.​—Proverbio 2:20-22.

Sa panahon sa pagmando sa Gingharian sa Diyos, ubos sa paggiya ni Jesu-Kristo, ang katawhan pagatudloan kon unsaon sa pagkuha sa bisan unsang mga hinungdan sa pisikal nga polusyon. Unya​—dili karon—​ang panahon dihang ang tanang mga alagad sa Diyos kinahanglang aktibong malangkit sa personal ug pangatibuk-ang mga paagi nga makaamot ug usa ka wala pa mahimo sukad nga paghinlo sa tibuok yuta.​—Itandi ang Ezekiel 39:8-16.

Ang mga makalabang-buhi sa kataposan sa presenteng daotang sistema sa mga butang mopaluyo niining pisikal nga programa sa paghinlo nga may samang dedikasyon ug kadasig sa ilang pagpakigbahin sa kampanya sa espirituwal nga paghinlo karong adlawa.​—Salmo 110:3.

Ang usa ka nahinloang yuta tino nga moabot, nga aduna unay buhaton nga labing dakong kampanya sa paghinlo sa tibuok panahon, nga pagahimoon sa Gingharian sa Diyos. Ang tanang lama sa polusyon pagakuhaon. Wala nay makita pa nga graffiti. Wala nay linabayng mga botelya, mga lata, bag nga plastik, chewing-gum ug mga putos sa karmelitos, peryodiko, ug mga magasin nga maghugaw sa bisan unsang baybayon o sa paraisonhon nga lugar.

Magkalipay sa mahinlong yuta sa unahan!

[Hulagway sa panid 7]

Makigbahin ka ba unya sa umaabot nga paghinlo sa tibuok yuta?