Imo Bang Gihimo ang Imong Labing Maarangan?

“HIMOON ko ang akong labing maarangan.” Pagkasubsob nga kining mga pulonga sundan ug “apan” ug usa ka taas nga listahan sa mga pasangil kay wala maningkamot! Unsay ikasulti bahin sa atong pagpahinungod kang Jehova? Ginatuman ba nato ang atong saad sa paghatag sa atong labing maayo alang kaniya?

Ang pagpahinungod nagkahulogan ‘sa paghalad sa kaugalingon nga bug-os sa pag-alagad o pagsimba sa usa ka balaan nga persona o sa balaang mga kagamitan.’ Daghan ang gihimo ni Jesus sa pagpakita kon unsay nalangkit sa pagpahinungod kang Jehova pinaagi sa pag-ingon: “Kon adunay buot mosunod kanako, kinahanglang isalikway niya ang iyang kaugalingon ug magpas-an sa iyang kahoy sa pagsakit ug padayong mosunod kanako.” (Mateo 16:24) Ang usa nga nakasalikway sa kaugalingon ug nagpahinungod sa iyang kaugalingon sa Diyos nagahimo sa pagbuhat sa kabubut-on sa Diyos nga mao ang labing hinungdanong tinguha diha sa iyang kinabuhi.

Ingong nagapahinungod nga katawhan, kinahanglang usisaon nato ang atong kaugalingon aron masuta kon kita ba nagakinabuhi sa atong pagpahinungod. Gipakita ni Pedro kon nganong angay natong susihon ang atong kaugalingon sa dihang iyang gidasig ang dinihogang mga Kristohanon: “Himoa ang inyong labing maarangan aron maseguro ang inyong pagkatinawag ug pagkapinili; kay kon padayon ninyong himoon kini dili gayod kamo mangapakyas.” (2 Pedro 1:10) Oo, kon atong himoon ang atong labing maarangan, dili kita mahimo sa ulahi ingong mga pakyas sa espirituwal.

Mapauswag pa ang Atong Labing Maarangan

Sa mas halapad nga diwa, ang tanang nagapahinungod nga mga alagad sa Diyos gilaomang mohimo sa ilang labing maarangan, o sa ilang labing maayo, sa pagpahimuot kang Jehova. Ugaling, ang atong labing maarangan sa pagbuhat sa kabubut-on sa Diyos mahimo pang molambo. Alang sa usa ka tres-anyos nga batang lalaki, ang pagsugot sa ginagmay nga sugo tingali mao ang labing maayo nga iyang mahimo sa pagtabang sa iyang inahan, apan sa dihang modakodako na siya, makahimo siya ug labaw pa. Ingon usab niini ang atong espirituwal nga pagtubo​—ang atong labing maarangan kaniadto tingali dili na sama niana. Kita napalihok sa pagbuhat ug labaw pa alang kang Jehova.

Ang atong nagadugang nga apresasyon kang Jehova modasig sa atong pagkamainandamon sa pagbuhat ug labaw pa. Ang pagpabili sa iyang nahimo alang kanato mapalig-on pinaagi sa personal nga pagtuon sa iyang Pulong, ang Bibliya. Pananglitan, kon susihon ug palandongon nato pag-ayo kon giunsa pagpadala ni Jehova ang iyang Anak sa paghalad sa iyang kalag aron matubos ang katawhan gikan sa sala, kita mapukaw sa pag-alagad sa Tagmugna sa kahikayan sa lukat. (Juan 3:16, 17; 1 Juan 4:9-11) Kon labi pa natong “matilawan ug matan-aw nga maayo si Jehova,” mas dugang nga mapukaw ang atong mga kasingkasing sa pag-alagad kaniya.​—Salmo 34:8.

Usa ka bug-os panahong ministro nga ginganlag Jetter nahibalo niini. Aron dugang matugkad kon unsay iyang gitun-an, migahin siya ug gamayng lawak sa iyang balay alang niana nga katuyoan. Iyang gihikay kini aron makapamalandong siya samtang nagatuki. Aduna siyay Watch Tower Publications Indexes maingon man sa tinagik nga mga tomo sa Ang Bantayanang Torre ug Pagmata! nga maabot diha sa estante sa libro. “Dihang manukiduki ako ug makawiwili nga impormasyon,” siya miingon, “maikagon kaayo akong ipakig-ambit kini sa uban.”

Hinunoa, sama nga ang pagkaon ug lamiang kalan-on panagsa dili magpaundang sa usa ka tawo sa adlaw-adlawng panginahanglan sa pagkaon ug regular nga kalan-on, ang lalom apan sa usa ka panahon nga pagtuki sa Bibliya dili makapahunong sa adlaw-adlawng panginahanglan sa pagkuhag espirituwal nga kalan-on. Giapresyar ni Ruth kini nga panginahanglan, kay sumala sa iyang mahinumdoman, ang iyang pamilya hiusang nagabasa sa Bibliya kada buntag ug gabii human mangaon. Karon, sa edad 81 anyos, nakagugol ug kapin sa 60 ka tuig sa bug-os-panahong ministeryo, siya regular nga nagabasa gihapon sa Bibliya inigmata sa 6:00 s.b. Inigkadawat dayon niya sa Bantayanang Torre ug Pagmata! nga magasin, mogahin gayod ug panahon si Ruth sa pagbasa niini. Iyang sublion pagbasa ang artikulo labing menos tulo o upat ka beses sa dili pa niya tun-an kini sa kongregasyon. “Ang pagtuon sa Pulong sa Diyos mao ang imong gikinahanglan aron magpabiling malig-on diha sa pagtuo,” siya miingon. Kini nakatabang usab kaniya nga makapadayon sa misyonaryong pag-alagad sa daghang katuigan.

Nagahimo sa Atong Labing Maarangan sa Pagtabang sa Uban

Pinaagi sa matugkaron ug regular nga pagtuon sa Pulong sa Diyos, ang atong kasibot sa pag-alagad sa Diyos motubo, ug adunay usa ka butang diha sa sulod kanato nga nagaagda kanato sa paghimo ug labaw pa. (Itandi ang Jeremias 20:9.) Ang maong kasibot maoy nagpalihok kang Hirohisa sa pagtuman sa iyang ministeryo sa bug-os. (2 Timoteo 4:5) Siya nagpuyo diha sa iyang nag-inusarang ginikanan uban sa upat ka manghod nga lalaki ug babaye. Samtang tin-edyer pa siya, gitabangan ni Hirohisa ang iyang pamilya pinaagi sa pagbangon sa alas tres sa kadlawon sa paghatod ug mga peryodiko. Buot niyang mobuhat ug labaw pa sa pagsulti sa uban mahitungod kang Jehova, busa si Hirohisa misulod sa payunir nga pag-alagad, nga maoy pagtawag sa bug-os-panahong ministeryo sa mga Saksi ni Jehova. Bisag batan-on pa, siya malipayon sa pagtabang sa uban aron makaduyog kaniya sa paghimo sa ilang labing maarangan sa pagdayeg kang Jehova.

Ang paghimo sa atong labing maayo sa pagtabang sa uban nag-apil sa pagkahimong epektibo diha sa atong ministeryo. Gidasig kas-a ni Jesus ang iyang mga tinun-an: “Kon kamo mahibalo niining mga butanga, malipayon kamo kon kini inyong buhaton.” (Juan 13:17) Si Naomi maayong pananglitan sa pagpadapat sa mga sugyot nga gihatag sa organisasyon ni Jehova aron mouswag diha sa atong ministeryo. Nalisdan siyang makig-estorya sa mga dili-kaila gikan sa balay ug balay ug dili makahunahuna kon unsay isulti samtang magbarog siya diha sa pultahan. Giawhag siya sa mga ansiano sa kongregasyon sa pagpadapat sa mga sugyot nga makita diha sa librong Nangatarongan Pinasukad sa Kasulatan, diha sa bahin nga “Mga Pasiuna nga Magamit sa Ministeryo sa Kanataran.”a Iyang gisag-ulo ang mga introduksiyon ubos sa ulohang “Pamilya/Kabataan” ug gibansaybansay kini sa daghang higayon. Ingong resulta, siya nakaarang sa pagpakig-estorya sa usa ka ginang sa panimalay nga nag-edad ug mga 30 anyos. Wala pa gani makahimog pagbalik duaw si Naomi, kining babayehana mitambong sa Kingdom Hall. Gihikay ang pagtuon sa Bibliya. Ang ginang sa panimalay ug ang iyang bana karon bawtismado nang mga Kristohanon, nga nagakalipay sa panimalaynong kinabuhi uban sa ilang mga anak.

Nagahimo sa Atong Labing Maarangan sa Pagpakitag Personal nga Interes

Atong masundog usab si apostol Pablo, kinsa miingon: “Akong gibuhat kining tanang mga butang tungod sa maayong balita, aron ako mahimong mag-aambit niini ngadto sa uban.”​—1 Corinto 9:22, 23.

Gipalandong ni Hatsumi kining maong tinamdan. Samtang si Hatsumi nag-alagad sa publiko nga ministeryo, usa ka babaye ang matinahurong miingon diha sa intercom nga wala siyay panahong makigsulti. Ang tuno sa tingog sa tagbalay malumo, busa nagpadayon si Hatsumi sa pagduaw kaniya. Ang tagbalay mitubag lamang diha sa intercom, wala gayod mogawas sa pag-atubang kang Hatsumi. Kini nagpadayon sa duha ug tunga ka tuig.

Usa ka adlaw giusab ni Hatsumi ang panahon sa iyang pagduaw, miduaw siya sa hapon. Walay mitubag. Sa molakaw na unta siya, hinunoa, usa ka pamilyar nga tingog sa iyang likod nangutana, “Kinsa ka?” Ang babaye mao pay pagpauli gikan sa gawas. Sa dihang nadungog ang ngalan ni Hatsumi, siya mitubag dayon, “Oh, ikaw diay kadto ang tigduaw nako. Salamat sa imong kanunay nga pagtagad kanako.” Tungod kay giundang man sa babaye ang iyang pagtuon sa Bibliya uban sa mga Saksi ni Jehova sa laing dapit, siya naulaw kaayo sa pagbukas sa pultahan kang Hatsumi. Usa ka pagtuon sa Bibliya gisugdan ug balik, ug maayo kaayo ang pag-uswag sa tagbalay. Dako ba ang atong pagtagad sa mga tawo nga atong mahimamat diha sa balay-ug-balay nga ministeryo?

Himoa ang Imong Labing Maarangan

Ginaapresyar ni Jehova ang atong paningkamot sa pag-alagad kaniya sa labing maarangan. Siya sama sa usa ka amahan kansang anak moduol kaniya nga adunay dalang mga gasa. Sa daghang katuigan, ang gasa nagkalainlain depende sa edad ug kahinguhaan sa anak. Maingon nga malipay ang amahan sa pagdawat ug bisan unsang kinasingkasing nga mga gasa nga ihatag sa iyang anak kaniya, sa ingon andam modawat si Jehova sa atong bug-os-kasingkasing nga pag-alagad sumala sa atong espirituwal nga pagtubo.

Siyempre, walay kapuslanan ang pagtandi sa atong labing maarangan nianang sa uban. Sama sa giingon ni Pablo, kita may hinungdan sa pagkalipay labot sa atong kaugalingon, “dili sa pagtandi sa ubang tawo.” (Galacia 6:4) Hinaot nga magpadayon kita sa pagpamati sa tambag ni apostol Pedro: “Himoa ang inyong labing maarangan nga hikaplagan kamo nga walay-buling ug hugaw ug maanaa kamo sa kalinaw.”​—2 Pedro 3:14.

[Footnote]

[Hulagway sa panid 29]

Ginahimo ba nimo ang imong labing maayo sa pagpadapat sa mga sugyot alang sa pag-alagad sa kanataran?