“Buhata Kutob sa Inyong Maarangan”
1 Sa dihang atong gipahinungod ang atong kaugalingon kang Jehova, kita misaad sa paghatag sa atong labing maayo kaniya. Sa katukma, ang apostol nga si Pedro nagdasig sa unang-siglong mga Kristohanon nga buhaton ang kutob sa ilang maarangan sa pagtino sa ilang pagbarog atubangan kang Jehova. (2 Ped. 1:10) Buot gayod natong buhaton ang kutob sa atong maarangan aron pahimut-an si Jehova sa pag-alagad kaniya karong adlawa. Unsay ipasabot niini? Samtang magkalalom ang atong relasyon kang Jehova ug atong pamalandongon ang tanan niyang nahimo kanato, ang atong kasingkasing magpalihok kanato kanunay nga buhaton ang atong labing maayo diha sa iyang pag-alagad. Buot natong palamboon ang kalidad ug, diin posible, pauswagon ang gidak-on sa atong ministeryo.—Sal. 34:8; 2 Tim. 2:15.
2 Usa ka batan-ong igsoong lalaki nga buot mobuhat ug dugang pa diha sa ministeryo nakakaplag nga ang regular nga pagtuon sa Pulong sa Diyos nagpalalom sa iyang apresasyon kang Jehova ug nagpatisok diha kaniya sa mas dakong kasibot. Nagdasig kini kaniya sa pag-aplay sa payunir nga pag-alagad. Usa ka sister nga gilisdan sa pagpakigsulti sa mga estranghero nagpraktis sa mga presentasyon sa Nangatarongan nga libro ug sa wala madugay nagsugod sa pagtagamtam ug mas dakong kalamposan sa iyang ministeryo. Nakahimo siya sa pagdumalag pagtuon sa Bibliya sa usa ka magtiayon nga midawat sa kamatuoran.
3 Pagmaya Kon Unsay Imong Mahimo: Pipila kanato makasinatig lisod nga mga kahimtang sama sa di-maayong panglawas, pagsupak sa pamilya, kakabos, o pagkawalay-pagtagad sa teritoryo. Daghang ubang suliran nga komon niining kataposang mga adlaw hayan magpugong sa atong pag-alagad. (Luc. 21:34, ptn.; 2 Tim. 3:1) Nagapasabot ba kini nga kita napakyas sa atong dedikasyon kang Jehova? Dili kon kita nagaalagad kaniya kutob sa atong maarangan.
4 Dili maalamon ang paghukom sa atong kaugalingon pinasikad sa kon unsay malampos sa uban. Hinunoa, ang Kasulatan nagadasig kanato nga “ipapamatuod sa matag usa kon unsa ang iyang kaugalingong buhat.” Ang paghatag sa atong kaugalingon sa bug-os ngadto sa gilapdon nga kita sa personal makaarang makapahimuot kang Jehova ug maghatag kanatog “hinungdan sa pagsadya.”—Gal. 6:4; Col. 3:23, 24.
5 Hinaot nga atong patalinghogan ang mga pulong ni Pedro sa ‘pagbuhat kutob sa atong maarangan nga makaplagan sa Diyos sa kataposan nga walay buling ug walay lama ug anaa sa pakigdait.’ (2 Ped. 3:14) Kanang espirituha magpahimo kanatong mobating luwas ug maghatag kanato ug kalinaw sa hunahuna nga si Jehova lamang ang makahatag.—Sal. 4:8.