Mga Magmamantala sa Gingharian Nagtaho
Usa ka Batan-ong Mahiligon ug Tren Nakakat-on sa Kamatuoran
KON ang kasingkasing sa usa ka tawo mahiligon sa pagkamatarong, nan tinoon ni Jehova nga Diyos, pinaagi sa paggamit kang Kristo Jesus ug sa langitnong mga manulonda, nga ang maong karnerohong tawo ngadtongadto masuginlan sa maayong balita sa Gingharian. Sa nahaigong panahon kanang tawhana basin makadangat sa tuong kiliran ni Jesus nga may pag-uyon. (Mateo 25:31-33) Kini ang nahitabo sa usa ka batan-ong mahiligon ug tren sa Austria nga nakahibalo sa kamatuoran sa talagsaong paagi.
Ang labing makapaukyab nga bahin sa pasatiempo sa maong ulitawo mao ang pag-uban sa pagsakay diha sa lawak sa mga makina sa tren, uban sa pagtugot sa tagdumala sa tren. Girekord niya ang matag biyahe diha sa iyang video camera aron iyang matan-aw kana pag-usab diha sa iyang balay. Sa usa ka biyaheng iyang gihimo gikan sa Vienna paingon sa Salzburg, ang makinista maoy usa sa mga Saksi ni Jehova. Gigamit niya ang higayon sa pagsulti mahitungod sa Gingharian ngadto sa mahiligon ug tren. Sa sinugdan ang ulitawo natingala sa pagkabati sa makinista nga naghisgot bahin sa Diyos ug sa Bibliya, apan panahon sa biyahe, gihatagan niyag labawng pagtagad ang talan-awon kay sa gisulti kaniya sa makinista.
Sa pagkauli na usab sa balay, kining batan-ong mahiligon ug tren nagtan-aw sa iyang video rekording dili lang kausa kondili kapulo, kay siya interesado kaayo sa maong biyahe. Sanglit iyang narekord usab ang tingog, balikbalik niyang nadunggan ang gisulti sa Saksi kaniya. Sa dugang nga siya mitan-aw sa video, sa dugang siya nasinati sa gisulti kaniya. Karon gisugdan niya ang pagpalandong niana, ug sa kataposan siya nasibot sa kahibulongang impormasyon nga gipahayag gikan sa Bibliya. Gusto niya nga makahibalo ug dugang pa.
Nahinumdoman niya ang ngalan sa makinista ug nasayran nga siya nagpuyo sa Vienna. Mao nga miadto siya sa buhatan sa koreyo ug misugod sa pagdayal sa sunodsunod nga numero sa telepono nga gilista ubos nianang ngalana sa direktoryo. Ang iyang pangutana niadtong motubag sa telepono mao: “Ikaw ba usa ka makinista sa tren?” Kon ang tubag maoy dili, siya motawag ug laing numero. Sa kataposan, iyang nakaplagan ang makinista. Siya misugilon kaniya sa iyang estorya ug nga siya nainteres sa mensahe sa Bibliya nga iyang nadunggan sa video.
Ang Saksi mihimog mga kahikayan pinaagi sa sangang buhatan nga may usa nga nagpuyo sa duol nga moduaw sa ulitawo. Nahitabo nga sa lokal nga kongregasyon, may laing Saksi nga usa usab ka makinista sa tren. Kining ikaduhang makinista miduaw sa mahiligon ug tren, ug nasugdan ang usa ka pagtuon sa Bibliya. Sa ting-init sa 1991, ang ulitawo nabawtismohan.
Si Jehova, nga nagasusi sa tanang kasingkasing, nakakita gayod nga kining tawhana may sinserong gugma sa pagkamatarong. Busa, gipahinabo niya nga siya nasuginlan sa kamatuoran sa Bibliya—bisan tuod sa talagsaong paagi.—1 Cronicas 28:9; Juan 10:27.
[Picture Credit Line sa panid 9]
Kortesiya sa Austrian Railways