Pagpalampos sa Pagpakigbisog sa Alkoholismo

“Sa panahon sa trabaho, mga alas diyes sa buntag, maghunahuna ako sa pag-inom ug alkoholikong ilimnon. Sa pagka alas 12 sa udto mogawas ako aron moinom ug usa o duha ka lad-ok. Sa pagka alas tres mangurog ang akong lawas. Mangandoy ako nga ting-undang na sa trabaho aron makainom na usab ako. Sagad moinom akog daghan dayon nag pauli. Sa mga alas siyete ganahan na usab akong moinom. Ako moinom, mahulog sa lingkoranan ug mawad-an sa panimuot, mangihi sa akong karsones, ug maghigda sa akong ihi hangtod sa buntag. Hunahunaa kini ug pilopiloa sa 7 ka adlaw matag semana; pilopiloa kana sa 52 ka semana sa usa ka tuig; pilopiloa kana sa 29 ka tuig.”

KINING tawhana usa ka alkoholiko. Wala siya mag-inusara. Minilyon sa tibuok kalibotan nakigbisog niining makamatayng kahimtang nga, sumala kang Dr. Vernon E. Johnson, “naglangkit sa tibuok pagkatawo: sa pisikal, mental, sikolohikal, ug espirituwal.”a

Daghang eksperto nag-ingon nga ang alkoholismo dili matambalan apan nga kini masumpo pinaagi sa usa ka programa sa tibuok-kinabuhing pagpalayo-sa-pag-inom. Kini dili kay dili-makataronganong kinahanglanon, tungod kay ang alkoholikong ilimnon dili kinahanglanon sa kinabuhi. Sa pagkatinuod, ang pag-abuso sa alkoholikong ilimnon dili makapahimuot sa Diyos. (1 Corinto 6:9, 10) Mas maayong mosulod sa bag-ong kalibotan sa Diyos nga dili-moinom ug alkoholikong ilimnon kay sa magpadaog sa pangandoy alang niini ug mawad-an sa walay kataposang kinabuhi.​—Mateo 5:29, 30.

Ang paghunong​—ug pagpabiling libre—​sa pag-abuso sa alkohol sa kasagaran usa ka makapahigawad nga pakig-away. (Itandi ang Roma 7:21-24.) Unsay makatabang? Maghatag kitag pila ka direktang tambag. Bisan kon dili ka gayod moinom ug alkoholikong ilimnon, kining tambaga matulon-anon ug makapaarang kanimo sa pagtabang sa pila ka higala o paryente nga nakigbisog sa alkoholismo.

Usa ka Matinud-anong Pagsusi sa Imong Kaugalingon

Usa sa dakong mga babag nga buntogon mao ang dili-pagdawat sa kamatuoran nga ikaw usa ka alkoholiko. Ang dili-pagdawat maoy usa ka porma sa pagkadili-matinud-anon. Kana maoy pangatarongan nga may katuyoan: aron sa pagpanalipod sa imong kagawasan sa pag-inom. ‘Dili ingon niana ka dako ang akong suliran sa alkohol,’ tingali ikaw mangatarongan. ‘May pamilya pa gihapon ako. May trabaho pa gihapon ako.’ Labing hinungdanon, wala gihapon nimo biyai ang alkohol.

Ang dili-pagdawat mopugong kanimo sa pagpamati sa mga higala nga buot motabang kanimo. Si Robert nakapaniid nga ang ama-ama sa iyang asawa nakabatog dili-mahimsog nga mga paagi sa pag-inom ug dili-maayong pamatasan. “Human sa pila ka adlaw, ako siyang gisukmatan,” miingon si Robert, “gipangutana siya kon gibati ba niya nga ang iyang pag-inom nakaimpluwensiya sa iyang kinaiya.” Ang resulta? “Wala gayod siya modawat, pinaagi sa mga komento sama sa, ‘Wala kay pamatuod’ ug, ‘Wala ka masayod kon unsay akong gibati.’”

Kon ikaw giduol sa usa ka membro sa pamilya o usa ka higala nga nabalaka sa imong pag-inom, himoa ang matukion, matinud-anong pagsusi sa imong kaugalingon. (Proverbio 8:33) Mabuhi ka ba nga walay alkohol sulod sa tibuok semana, sulod sa tibuok bulan, o sulod sa daghang bulan? Kon dili, ngano? Ayaw panig-ingon sa usa ka tawo nga naglimbong sa iyang kaugalingon pinaagi sa bakak nga mga pangatarongan. Si Santiago nag-ingon: “Kining tawhana sama sa usa ka tawo nga nagtan-aw sa iyang nawong sa salamin. Kay siya nagtan-aw sa iyang kaugalingon, ug siya molakaw ug mahikalimot kon unsa siyang matanga sa pagkatawo.”​—Santiago 1:22-25.

Bisan nagsugod na ang pagkaayo, kinahanglan gihapong magbantay ka sa dili-pagdawat. Ang librong Willpower’s Not Enough nag-ingon: “Ang tawong bag-o pang nakapalayo sa alkoholikong ilimnon sayop nga maghunahuna nga tungod kay siya nakahunong sa pag-inom sa makadiyot​—lagmit sa unang higayon—​siya naayo na.” Kini maoy hunahunang makagiyan nga anaa sa labing kusganong punto, ug kini mao ang unang lakang nga moinom ka ug balik. Aron makasukol ka sa maong dili-pagdawat, kinahanglang dili ka mag-inusara sa paghimo niana.

Pangitag Tabang

Kay nakaamgo nga dili siya makahimo sa pagsumpo sa alkoholismo nga mag-inusara, usa ka tawo nga tawgon natog Leo nangitag propesyonal nga tabang. Human sa usa ka yugto sa bug-os nga pagtambal, siya padulong na sa pagkaayo. Gibati ni Leo nga ang bili sa ekspertong tabang kinahanglang hatagan ug linaing pagtagad.b Kon ang maong tabang mabatonan sa inyong dapit, basin mohukom ka sa pagpahimulos niana.

Hinuon, kinahanglang makaamgo ka nga duna pay labaw sa pagkaayo kay sa yanong pagpalayo-sa-pag-inom. Ilalom sa alkoholismo lagmit adunay labi pang lalom nga mga suliran nga kinahanglan nimong atubangon. Ang dili pagtagad niini mahimong peligroso. Si Dr. Charlotte Davis Kasl misulat: “Nakainterbiyo akog mga tawo nga gitambalan tungod sa pag-abuso sa makapagiyan nga mga substansiya hangtod sa napulog-upat ka higayon tungod kay ang pangunang mga suliran sa pag-abuso, pagsalig sa alkohol, ug pagpasagad wala atimana.”

Nakaplagan kini ni Dennis nga matuod. “Ako alkoholiko nga dili mahubog nga aduna gihapoy daghang suliran,” siya misulat. “Dili igo ang paghunong sa pag-inom. Kinahanglang tan-awon ko ang akong nangagi, susihon ang mga nakat-onan gikan sa akong pagkabata, sabton kon sa unsang paagi naapektohan ako niini, ug maghimog mga kausaban sa akong paggawi.”

Sa samang paagi, gisusig maayo ni Leo ang iyang kaugalingon aron mouswag ngadto sa pagkaayo. “Sinahan kaayo ako, mabangis nga tawo,” siya miingon. “May mga yugtong bation ko nga ubos ang akong pagtamod sa kaugalingon ug may panahong maghanduraw nga dungganon.” Gipadapat ni Leo ang tambag sa Bibliya sa Efeso 4:22: “Hukasa ninyo ang daang pagkatawo nga dala pa sa inyong karaang paggawi.” Oo, “ang inyong karaang paggawi” adunay dakong impluwensiya sa imong pagkatawo. Maingon nga ang plaster mahulma sa hulmahan, mao usab ang imong personalidad sa usa ka bahin mahulma sa imong kanhing dalan. Sa dihang wagtangon ang dili maayong paggawi, unsay mabilin? Usa ka personalidad nga tingali nahulma sa daghang katuigan. Busa, ang pagkaayo kinahanglang maglakip sa pag-usab sa daang pagkatawo nga dala sa imong karaang paggawi.

Tukora ang Relasyon Uban sa Diyos

Ang pagkaayo ni Leo naglakip usab sa pag-ugmad ug personal nga relasyon uban sa Diyos. “Ang pagkat-on sa pagsalig kang Jehova bug-os nga nag-usab sa akong tinamdan, pamatasan, ug panglantaw,” siya miingon.

Apan, angayng magbantay. Ang bisan unsang relasyon​—sa tawo man o sa Diyos—​nagkinahanglag pagkamadayganon, pagkamatinud-anon, ug pagsalig. Kini mao gayod ang mga hiyas nga daoton sa alkoholismo. Kini mahimong ugmaron, apan nagkinahanglan ug panahon.

Ingong usa ka alkoholiko, tingali wala ka mahibalo kon sama sa unsa ang suod nga relasyon. Tingali wala ka pa gayod makasinati niana. Busa magmapailobon. Ayaw pagdalidalia kining lakanga, nga maglaom ug usa ka relasyon sa Diyos ingong awtomatikong resulta sa pagpalayo-sa-pag-inom. Paningkamot sa pagsabot sa Diyos ug sa iyang mga hiyas. Pamalandong kanunay, tingali mainampingong magabasa sa mga salmo sa Bibliya nga nagapahayag ug lalom, mapabilhong pagbati kang Jehova ug sa iyang mga paagi.c

“Gahom nga Labaw sa Kasagaran”

Ang usa ka masaligon, malaomong relasyon sa Diyos mahimong adunay kusganong impluwensiya kanimo. Si Jehova magpaluyo sa imong mga paningkamot sa pagkaayo. (Itandi ang Salmo 51:10-12; 145:14.) Makaduol ka kaniya diha sa kinasingkasing nga pag-ampo sa bisan unsang panahon, masaligon nga siya motagana kanimog “gahom nga labaw sa kasagaran.”​—2 Corinto 4:7; Filipos 4:6, 7.

Ang Maglalalang mas nasayod sa imong pagkagama kay kang bisan kinsang tawo. (Salmo 103:14) Ang tawhanong mga magtatambag, kinsa nagasalig sa tawhanong kaalam, makatabang; apan mas makatabang kanimo ang Maglalalang sa tawo niining pakigbisoga! (Isaias 41:10; 48:17, 18) Siya nagatagana ug mahigugmaong pagpaluyo sulod sa Kristohanong kongregasyon.

Usa ka Sistema sa Pagpaluyo

Ang hamtong sa espirituwal nga mga ansiano diha sa Kristohanong kongregasyon mahimong dakong tinubdan sa tabang. Pipila lang kanila ang nangangkon nga espesyalista sa mga natad sa medisina ug sa mental nga kahimsog, apan sila nahibalo ug nagsalig sa Pulong ug sa mga prinsipyo sa Diyos. Sila mapamatud-ang “ingon sa usa ka tagoanan gikan sa hangin ug usa ka salipdanan gikan sa bagyo, ingon sa mga sapa sa tubig diha sa dapit nga mamala, ingon sa landong sa usa ka dakong bato diha sa umaw nga yuta.” (Isaias 32:2) Pahimusli sa bug-os ang ilang tabang.d

Siyempre, ang maong Kristohanong mga ansiano, duyog sa ubang mga membro sa pamilya ug mga higala, dili mopanalipod kanimo gikan sa mga sangpotanan sa imong kaugalingong binuhatan. Ang publikasyong Coming Off Drink nagpatin-aw: “Ang malisod nga bahin sa pagtambal sa mga alkoholiko mao ang pagsulti sa mga alkoholiko sa makadaot nga mga sangpotanan sa pagkagiyan ug sa pagdasig kanila sa pagdawat sa responsabilidad sa ilang kaugalingong paggawi.” Busa sila mahimong maluloton apan prangka, nga magdasig kanimo sa pag-atubang sa kamatuoran ug sundon ang bisan unsang pagtambal ug paggawi nga gikinahanglan aron makadaog sa imong pagpakigbisog batok sa alkohol.

Ang Pagkaayo Maoy Imong Responsibilidad

Samtang ikaw makabatog kaayohan gikan sa pagpaluyo sa uban, kinahanglan nimong masayran nga walay tawo o espiritu nga makapugos sa imong pagkaayo. Ikaw may kagawasan sa pagpili sa imong gusto. Ang imong pagkaayo maoy imo gayong responsibilidad. (Itandi ang Genesis 4:7; Deuteronomio 30:19, 20; Filipos 2:12.) Dawata kanang maong responsibilidad, ug si Jehova magapanalangin kanimo. Kita gipasaligan sa 1 Corinto 10:13: “Walay bisan unsa nga pagsulay ang moabot kaninyo kondili kadto rang maantos sa mga tawo. Apan ang Diyos matinumanon, ug dili niya itugot nga kamo pagasulayon labaw sa inyong maarangan, apan uban sa pagsulay siya magatagana usab ug lutsanan aron kamo makaantos niini.” Busa, kalipayi​—ikaw mahimong molampos sa imong pagpakigbisog sa alkoholismo.

[Mga footnote]

[Kahon sa panid 24]

Tingali nag-antos ka sa kaulawan ug kagul-anan nga gipahinabo sa alkoholismo. Kon mao, ayaw wad-a ang imong paglaom. Mabatonan ang tabang.

[Kahon sa panid 26]

KON MOBALIK ANG IMONG PAGKAGUMON

“Ang pagkaandam nga mobalik ang pagkagumon sama ra sa pagbansaybansay sa sunog,” nag-ingon ang librong Willpower’s Not Enough. “Wala kana magkahulogang magpaabot kang may sunog apan nga ikaw andam sa paghimog responsableng aksiyon kon adunay mahitabo.” Kon mobalik ang imong pagkagumon:

□ Pag-ampo kang Jehova. Makasalig ka nga siya makasabot sa imong suliran ug buot motabang.​—Salmo 103:14; Isaias 41:10.

□ Pakigsulti sa usa ka Kristohanong ansiano, human makadesisyon kon kinsay imong duolon kon motungha ang panginahanglan. Magmatinud-anon kon unsay nahitabo, ug pamati pag-ayo sa iyang Kasulatanhong tambag.

□ Pagbantay batok sa pagkawala sa paglaom. Ang pagdumot sa kaugalingon motukmod lang kanimo sa bug-os nga pagkagumon pag-usab, busa ibutang ang imong sayop sa tukmang panglantaw. Ang pagkapildi sa usa ka gubat wala magkahulogan nga napildi ka na sa gubat. Sa dihang matumba ang usa ka maglulumba, siya dili mobalik sa sinugdanan sa lumba; siya motindog ug mopadayon sa pagdagan. Himoa ang sama sa imong pagpaayo. Ikaw anaa gihapon sa dalan. Ang mga semana, mga bulan, o mga tuig nga ikaw nakapalayo sa pag-inom anaa gihapon.

[Hulagway sa panid 25]

Pakigbisogi ang dili-pagdawat pinaagi sa matugkaron, matinud-anong pagtan-aw sa imong kaugalingon