Posible ba ang Tinuod nga Panalipod?

ANG magsusulat nga si Ralph Waldo Emerson mipahayag kas-a: “Ang mga tawong mabaw ug panghunahuna motuo sa suwerte . . . Ang mga tawong lig-on (sa moral ug sa panghunahuna) motuo sa epekto kay adunay nagpahinabo.” Oo, ang tawong motuo sa gahom sa mga anting-anting ug panagang nagtugyan sa iyang kinabuhi sa pagmando sa dili-makitang mga gahom. Gisalikway niya ang lohiko ug katarongan ug nagpadaog sa dili-makataronganon, matuotuohong mga kahadlok.

Hinuon, ang Bibliya makahimo sa pagpagawas sa usa ka tawo gikan nianang mga kahadloka. Nagpadayag kini nga ang mga anting-anting ug panagang walay mahimo, walay gahom. Sa unsang paagi gipadayag kini sa Bibliya? Aw, sumala sa The New Encyclopædia Britannica, “ang mga anting-anting gihunahunang nagkuhag gahom gikan sa ilang mga pakiglangkit sa [apil sa ubang butang] mga gahom sa kinaiyahan.” Kining mga gahoma tingali mao ‘ang mga espiritu sa mga patay’ o ‘ang gahom sa kapalaran.’ Apan ang Bibliya sa tin-aw nagpakita nga ang mga patay “walay nahibaloan nga unsa pa man.” (Ecclesiastes 9:5) Busa, walay mga espiritu sa mga patay nga makatabang o makadaot sa mga buhi; ni adunay dili-makitang gahom sama sa kapalaran nga makalihok alang sa imong kaayohan.

Panahon sa Bibliya, gisaway sa Diyos kadtong mibulag kaniya, kadtong nalimot sa iyang balaang bukid, “kadtong nag-andam ug talad alang sa diyos sa Suwerte ug nagbubo ug bino alang sa diyos sa Kapalaran.” Inay maagoman ang panalipod, kadtong mga tigpasiugda sa kapalaran nahukman sa kalaglagan. “Igatugyan ko kamo sa pinuti,” matud ni Jehova nga Diyos.​—Isaias 65:11, 12.

Tungod sa paghimog mga salamangka, ang karaan usab nga nasod sa Babilonya nagtuo sa panalipod sa misteryosong mga gahom. Bisan pa niana ang Babilonya nakaagom ug katalagman. “Ipadayon ninyo ang pagbuhat sa inyong mga panglamat ug inyong mangil-ad nga mga salamangka,” mihagit ang manalagnang si Isaias. “Basin pa nga sila motabang kaninyo . . . Apan wala! bisan pa sa daghan ninyong panglingla wala kamo ing gahom.” (Isaias 47:12, 13, The New English Bible) Sa kataposan kanang nasora nahanaw sa bug-os. Napamatud-an nga kawang ang pagtuo sa okulto. Sa susama, walay anting-anting, panagang, o habak nga makatabang o makapanalipod kanimo.

Usa ka Matang sa Pagsimbag Diyosdiyos

Sa gihapon, alang sa uban dili daotan ang pagtangkil ug kuwarso, tiil sa koneho, o relihiyosong medalya. Dili ba kana sila mga pahiyas lamang nga dili makadaot? Suno sa Bibliya dili. Kini wala mag-ingon nga ang mga galamiton sa okulto dili daotan.

Usa ka matang sa pagsimbag diyosdiyos ang paggamit ug mga anting-anting​—butang nga tin-awng gisaway sa Pulong sa Diyos. (Exodo 20:4, 5) Tinuod, tingali dili mobati ang usa ka tawo nga siya nagasimba sa laktud sa anting-anting o habak. Apan kon ang usa nanag-iya niini, dili ba kini nagpadayag sa tinamdang matinahoron, masimbahon nganha sa dili-makitang mga gahom nga okulto? Ug dili ba tinuod nga ang masimbahong pagtagad (sama sa paghalok) sagad gihatag ngadto sa mga panagang mismo? Apan ang Bibliya, sa 1 Juan 5:21, nagtambag sa mga Kristohanon: “Pagbantay kamo sa mga diyosdiyos.” Dili ba nalakip niana ang mga butang nga giisip nga mga panagang o mga anting-anting?

Ang Lit-ag sa Okulto

Pinaagi sa paggamit ug mga anting-anting, daghan usab ang malit-agan sa okulto. Tinuod, ang pipila tingali magtangkil ug kuwarso o panagang nga lana tungod ilabina sa batasan inay sa pagtuo. Apan maingon nga ang pagpakigkarinyo sa usa ka pampam mahimong mosangpot sa pagkanatakdan ug AIDS, ang pagpakiglangkit sa okulto basin adunay daotan usab nga sangpotanan. May maayong mga katarongan nga gidid-an sa Diyos ang mga Israelinhon sa paghimo sa salamangka, panagna, ug pagtagna sa kapalaran. “Ang tanan nga nagabuhat niining mga butanga dulumtanan kang Jehova,” nagpasidaan ang Bibliya.​—Deuteronomio 18:10-14.

Nganong adunay higpit kaayong pagdili? Kay ang dili-makitang mga gahom luyo nianang mga buhata dili man ang mga espiritu sa mga patay ni ang gahom sa kapalaran apan si Satanas nga Yawa ug ang iyang mga demonyo.a Ug ang paggamit ug mga anting-anting laktud nalangkit sa pagsimbag demonyo. Nag-ingon ang Vine’s Expository Dictionary of Old and New Testament Words: “Sa pamarang, ang paggamit ug mga droga, kon kaha yano o isog, sa kasagaran ubanan sa mga yamyam ug mga pangaliya ngadto sa mga gahom nga okulto, uban sa tagana nga lainlaing mga panagang, anting-anting, ubp.”

Busa ang usang adunay panagang nagabuhat sa espiritismo. Siya nameligro nga mailalom sa makahahadlok nga impluwensiya ug pagmando sa “diyos niining sistema sa mga butang”​—si Satanas nga Yawa. (2 Corinto 4:4) Nan, may maayong katarongan nga ang Bibliya nagmando nga molikay kita sa tanang matang sa espiritismo.​—Galacia 5:19-21.

Pagbugto sa Tanikala sa Patuotuo

Ugaling ang The World Book Encyclopedia nag-ingon: “Ang mga patuotuo kalagmitang may bahin sa kinabuhi samtang ang mga tawo magmahadlokon sa usag usa ug adunay mga kawalay-kapihoan ang ugma-damlag.” Apan ginatabangan sa mga Saksi ni Jehova ang daghan aron makagawas sa makadaot nga mga patuotuo. Usa ka babayeng taga-Habagatang Aprika nahinumdom: “Ako gisamok sa mga espiritung daotan, ug ang akong balay napuno sa muti sa pagpanalipod kanako batok kanila.” Siya gitabangan sa mga Saksi ni Jehova nga masabtan ang mga kapeligrohan sa pagpakiglangkit sa okulto. Iyang sanong? “Gisugdan ko paglabay ang tanang butang nga nabatonan ko nga nalangkit sa demonismo,” matud niya. “Miarang-arang ang akong panglawas. Akong gipahinungod ang akong kinabuhi sa pag-alagad kang Jehova ug nabawtismohan.” Karon siya nahigawas na sa patuotuo ug sa espiritismo.

Palandonga, usab, ang taga-Nigeria nga arbularyo nga nagsagol sa espiritismo uban sa iyang mga paagi sa pagtambal. Siya, nga kasagarang mogamit sa mga pagbahad ug mga pagtunglo, sa naandan magpadlas sa mga Saksi ni Jehova gikan sa iyang balay inigduaw nila. Siya nag-andam pa kas-a ug usa ka espesyal nga sinambog, giyamyaman kadto, ug gisaliyab sa nawong sa usa ka Saksi! “Sa pito ka adlaw ikaw mamatay!” siya misinggit. Pito ka adlaw sa ulahi ang Saksi mibalik, nga tungod niadto ang arbularyo midalidali paggowa sa balay, kay nagtuong siya nakakitag multo! Kay nayagyag karon ang iyang salamangka ingong walay kapuslanan, misugot siya nga magtuon ug Bibliya ug sa ngadtongadto nahimong Saksi mismo.

Ikaw usab makalingkawas sa mga gapos sa kahadlok ug patuotuo. Tinuod, dili kini sayon. Tingali nagdako ka sa usa ka kultura diin kasagaran ang paggamit ug mga anting-anting ug mga panagang. Ang mga Kristohanon sa Efeso nag-atubang sa samang hagit. Nagkinabuhi sila sa usa ka kulturang impluwensiyado pag-ayo sa espiritismo. Unsay gibuhat nila sa nasayran nila ang kamatuoran sa Pulong sa Diyos? Ang Bibliya nag-ingon: “Daghan sa mga naghimog salamangka nagpundok sa ilang mga basahon ug nagsunog niini atubangan sa tanan. Ug ilang gikuwenta ang bili niadto ug nasayran nga kadto mibilig kalim-an ka libong salapi.”​—Buhat 19:19.

Pagbaton sa Panalipod sa Diyos

Kon hinloan nimo ang imong kaugalingon sa tanang bahin sa okulto, mawad-an ka bag panalipod? Sa kaatbang, “ang Diyos alang kanato maoy usa ka salipdanan ug kusog, usa ka panabang nga daling hikaplagan panahon sa mga kasakitan.” (Salmo 46:1) Ang panalipod sa Diyos ipadayag ilabina iniglaglag niya niining daotang sistema sa mga butang. “Si Jehova nahibalo kon unsaon pagluwas ang mga tawong diyosnon gikan sa pagsulay, apan sa pagtagana sa mga tawong dili matarong alang sa adlaw sa paghukom aron pagaputlon.”​—2 Pedro 2:9; itandi ang Salmo 37:40.

Kasamtangan, ‘ang panahon ug dili-makita-daang hitabo mahitabo kanatong tanan.’ (Ecclesiastes 9:11) Ang Diyos wala magsaad nga ang iyang mga alagad magkinabuhi sa “may-panagang” nga kinabuhi o siya magsalipod kanato batok sa tanang personal nga kadaot. Bisan pa niana, siya nagsaad nga panalipdan ang atong espirituwalidad ug atong relasyon kaniya. (Salmo 91:1-9) Sa unsang paagi? Sa usa ka butang, gihatag niya kanato ang mga balaod ug mga prinsipyo nga makahatag kanatog kaayohan ug makapanalipod kanato batok sa daotang impluwensiya ni Satanas. (Isaias 48:17) Pinaagi sa atong pagkahibalo sa mga dalan ni Jehova, ‘ang katakos sa panghunahuna magabantay kanato, ang panabot manalipod kanato’​—pananglitan, gikan sa way-pulos o makadaot nga kalihokan.​—Proverbio 2:11.

Ang laing paagi nga panalipdan kita sa Diyos maoy pinaagi sa paghatag sa “gahom nga labaw sa kasagaran” sa mga panahon sa pagsulay. (2 Corinto 4:7) Ug sa dihang morag mabug-atan ang Kristohanon sa mga kahimtang, Siya mohatag sa “kalinaw sa Diyos nga molabaw sa tanang hunahuna” aron mabantayan ang kasingkasing ug mga katakos sa panghunahuna. (Filipos 4:7) Oo, ang Kristohanon nasangkapan aron “makabarog nga malig-on batok sa mga lipatlipat sa Yawa.”​—Efeso 6:11-13.

Sa unsang paagi maangkon nimo ang maong panalipod? Sugdi pinaagi sa pagkuhag kahibalo mahitungod kang Jehova ug sa iyang Anak, si Jesu-Kristo. (Juan 17:3) Ang mga Saksi ni Jehova dakog mahimo sa pagtabang kanimo niining bahina. Samtang ugmaron nimo ang mainitong relasyon uban kang Jehova, mosugod ka sa pagkasinati sa iyang malulutong panalipod. Ang Diyos nag-ingon, ingon sa atong mabasa sa Salmo 91:14: “Tungod kay iyang gipahaluna ang iyang gugma kanako, igahatag ko usab kaniya ang kaikyasan. Panalipdan ko siya tungod kay naila niya ang akong ngalan.”

Sa pagkatinuod, kon matinumanon ka kaniya, sa kataposan ang Diyos magpanalangin kanimo ug kinabuhing walay kataposan sa umaabot nga bag-ong kalibotan. Si Jehova nagpasalig bahin sa mga mabuhi nianang panahona: “Walay makapakurog kanila; kay ang baba mismo ni Jehova sa mga panon maoy nagsulti niini.” (Miqueas 4:4) Ang sakit ug kamatayon mawala na. (Pinadayag 21:4) Hinuon, bisan karon makapahimulos ka sa usa ka sukod sa kaluwasan​—kon imong ugmaron ang suod nga relasyon uban kang Jehova. Sama sa salmista, ikaw makaingon: “Ang akong panabang maoy gikan kang Jehova, ang Magbubuhat sa langit ug yuta.”​—Salmo 121:2.

[Footnote]

[Hulagway sa panid 6]

Ang mga Kristohanon sa Efeso nagsunog sa tanang butang may kalangkitan sa okultismo

[Hulagway sa panid 7]

Ubos sa Gingharian sa Diyos, ang kahadlok mawala na