“Ang Kataposang Kaaway” Malaglag!

NIADTONG bata ka pa, tingali nahadlok ka sa ngitngit. Ang mga estorya nga makapahadlok ug gani pila ka estorya mahitungod sa engkanto tingali nakapakulba kanimo. Pagkamakahupay sa dihang dili pagngon sa imong inahan o amahan ang lampara samtang naningkamot kang makatulog!

Ang kamatayon usab nakapahadlok sa daghan. Apan, dili unta kana makapahadlok. Ngano? Tungod sa kon unsa gayod ang kamatayon.

Ilha ang Imong Kaaway

Ang maalamong Haring Solomon sa karaang Israel mipahayag: “Ang mga buhi nasayod nga sila mangamatay; apan ang mga patay dili mahibalo sa bisan unsa.” (Ecclesiastes 9:5) Sumala niining langitnong dinasig nga hunahuna nga makaplagan sa imong kaugalingong Bibliya, ang kamatayon maoy yanong kaatbang sa kinabuhi. Ang patay wala maglungtad nga may panimuot.

Sa paghisgot sa kamatayon sa masambingayon nga paagi, ang Kristohanong apostol nga si Pablo misulat: “Kamatayon, hain na ang imong pagkamadaogon? Kamatayon, hain na ang imong ikot?” Unsa ang ikot nga nagapahinabog kamatayon? Matud ni Pablo: “Ang ikot nga nagapahinabog kamatayon mao ang sala.” (1 Corinto 15:55, 56; Oseas 13:14) Nan, unsa ang tinubdan niining makamatay nga ikot? Sa laing bahin sa Kasulatan, si Pablo mipahayag: “Pinaagi sa usa ka tawo ang sala misulod sa kalibotan ug ang kamatayon pinaagi sa sala, ug nga tungod niini ang kamatayon mikuyanap ngadto sa tanang mga tawo sanglit ang tanang mga tawo nakasala man.” (Roma 5:12) Ang apostol wala gayod magduhaduha kon kinsa kadtong “tawhana” sa dihang siya miingon: “Kang Adan ang tanan nangamatay.” (1 Corinto 15:22) Oo, pinaagi sa pagsupak sa atong unang ginikanan, si Adan, kitang tanan nailalom sa ikot sa kamatayon.​—Genesis 3:1-19.

Uban sa himsog nga panglawas ug mahigugmaong pamilya diha sa maanindot nga palibot, walay mausa kanato ang mopiling mamatay. Hinuon, ingon sa gipakita sa Bibliya, “ang panahon ug wala matag-an nga panghitabo” mahimong mohikaw kanato sa kinabuhi. (Ecclesiastes 9:11) Sa pagkamatuod, wala kita masayod kon unsay mahitabo sa atong kinabuhi ugma. (Santiago 4:14) Usa ka butang ang tino​—kitang tanan nakapanunod sa sala ug kamatayon. Busa, sa tago ang kamatayon nagasunod kanato ug mohampak ingong usa ka kaaway.

Pagsagubang sa Kamatayon sa Usa ka Hinigugma

Ang kamatayon maoy kaaway ilabina sa dihang mohampak kini sa usa ka hinigugma. “Mas masakit kini alang kanimo,” sulti sa usa ka himalatyong asawa ngadto sa iyang bana samtang siya nagpanan-aw na sa kamatayon. Nganong nakasulti man siya niana? Tungod kay ang Bibliya nag-ingon: “Bisan unsa nga hikaplagan nga buhat sa imong kamot, buhata kana uban ang imong kusog, kay walay buluhaton, ni lalang, ni kahibalo, ni kalaam didto sa Sheol [ang komong lubnganan sa katawhan], diin ikaw moadto.” (Ecclesiastes 9:10) Ang patay dili na moantos. Apan ang kabug-at sa kasub-anan nahibilin sa buhi nga mga paryente ug mga higala. May mahimo ba mahitungod sa maong pag-antos?

Ang mga panid sa Pulong sa Diyos, ang Bibliya, naundan sa daghang pulong sa paghupay. Pananglitan, ang pagbasa ug pagpamalandong sa mga salmo sa walay-duhaduha maoy usa ka tinubdan sa paglipay. Sa pagkatinuod, makapalipay ang mga pulong sama niini: “Dalayegon si Jehova, nga sa matag-adlaw nagapas-an sa atong palas-anon, ang matuod nga Diyos sa atong kaluwasan.”​—Salmo 68:19.

Ang laing tinubdan sa kahupayan mao ang Kristohanong kongregasyon. Sa unang siglo K.P., misulat si apostol Pablo: “Pasidunggi ang mga babayeng balo nga sa pagkatinuod mga balo. Apan kon ang babayeng balo adunay mga anak o mga apo [kinsa makatagana kaniya sa materyal nga paagi], patun-a kini sila ug diyosnong debosyon sa ilang kaugalingong panimalay ug sa padayong paghatag ug balos ngadto sa ilang mga ginikanan ug mga apohan, kay kini dalawaton sa panan-aw sa Diyos. Ang babaye nga isulat sa talaan sa mga balo kinahanglan nga dili ubos sa kan-uman ka tuig ang kagulangon, asawa sa usa ka bana, kinahanglan nga siya pagapanghimatud-an nga maayog binuhatan, ingon nga nakamatuto ug mga anak, nakapakita sa pagkamaabiabihon sa mga dumuloong, nakapanghugas sa mga tiil sa mga balaan, nakatabang sa mga nanag-antos sa kagul-anan, ug nagmakugihon sa pagbuhat ug maayo sa tanang paagi.” (1 Timoteo 5:3, 4, 9, 10) Ang mga Saksi ni Jehova karong adlawa sa susama nagatabang ug nagahupay sa maong isigkamagtutuo.

Kasagaran ang kinadak-ang pagpasibo nga kinahanglang himoon sa namatyan maoy bahin sa pagbati. “Gihigugma gayod nako ang akong asawa,” sulat sa usa ka lalaki kansang asawa namatay sa miaging duha ka tuig. “Mao kini ang labing makapasubo nga panghitabo sa akong kinabuhi, ug nalisdan ako sa pagsagubang.” Ang usa ka tawo nga taodtaod nang minyo nakigbahin sa iyang kinabuhi diha sa labing suod sa tawhanong mga relasyon. Sa dihang mamatay ang kapikas sa kaminyoon, ang buhi nga kapikas kinaiyanhong mobati ug dakong kapildihan. Kang kinsa kaha ang maong tawo modangop alang sa tabang?

Sa maong mga kahimtang, ang maayong Kristohanong mga kauban mahimong makapalig-on. “Ang tinuod nga kauban maoy mahigugmaon sa tanang panahon, ug maoy usa ka igsoon nga natawo alang sa panahon sa kasub-anan,” matud sa usa ka maalamong proverbio. (Proverbio 17:17) Ang usa ka biyuda o biyudo nagkinahanglag tabang​—mga kauban nga maghatag ug tinuod nga pagpaluyo. Dasigon sa maalamong mga higala ang nagbangotan sa pagsulti, bisan pag ang paghimo niana makapahilak. Tingali ang usa ka Kristohanon nga nakasinati na sa kasakit ug kaguol sa kasingkasing tungod sa pagkamatay sa kapikas mahimong makahatag ug malulutong tabang. “Pagsultig makapalipay ngadto sa mga nasubo,” tambag sa Bibliya. (1 Tesalonica 5:14) Apan hinumdomi nga gimingaw ang mga biyuda ug mga biyudo sa ilang mga kapikas sa kaminyoon. Busa, ang nagbangotan kinahanglang mosulti lamang sa iyang pagbati ngadto sa uban ubos sa mga kahimtang nga makapaarang sa tanan sa pagpabilin sa hinlo nga panggawi.​—1 Pedro 2:12.

Ang kinamaayohang pangontra sa kasakit nga ipahinabo sa kamatayon mao ang pagkapuliki kanunay sa pagtabang sa uban​—dili kini sayon alang niadtong nagtuo nga sila mao ang nanginahanglan ug tabang! Ania ang kahimtang diin nagdula ang pagkadili-mahakogon. Ang dili-mahakogong paghimo ug mga butang alang sa uban magtabang sa pagpala sa kasubo ug kaguol, kay si Jesus miingon: “May labawng kalipay ang paghatag kay sa pagdawat.”​—Buhat 20:35.

Kadaogan Ibabaw sa Kamatayon

Ang ikot sa pukyutan mahimong ngutngot kaayo, gani makamatay. Hinuon, kasagaran ang pagkuha sa suyod sa insekto nga natusok sa imong panit makatabang sa pagdalag kahupayan. Apan unsang mga kalaoman ang anaa alang sa kahupayan gumikan sa ikot nga nagapahinabog kamatayon?

Human isaysay nga ang sala mao ang ikot nga nagapahinabog kamatayon, si Pablo mipahayag: “Salamat sa Diyos, tungod kay mihatag siya kanato ug kadaogan pinaagi sa atong Ginoong Jesu-Kristo!” (1 Corinto 15:57) Sa unsang paagi ang kadaogan ibabaw sa kamatayon nalangkit kang Kristo? Gipakita ni Jesus nga mao kini ang kahimtang sa dihang siya naghisgot sa iyang kaugalingon: “Ang Anak sa tawo mianhi, dili aron pagaalagaran, kondili aron sa pag-alagad ug sa paghatag sa iyang kalag ingong lukat ilis sa daghan.” (Mateo 20:28) Oo, alang niadtong nagatuo sa Anak sa Diyos, si Jesu-Kristo, ug sa halad lukat nga gitagana ni Jehova pinaagi kaniya, ang kamatayon nga napanunod gikan kang Adan dili mosangpot sa permanenteng pagkawala-maglungtad.​—Juan 3:16.

Makapalipay sa pagkatinuod ang mga pulong ni Jesus: “Ang takna nagasingabot diin kadtong tanan nga anaa sa handumanang mga lubnganan makadungog sa iyang tingog ug mogula, kadtong naghimo sa maayong mga butang ngadto sa pagkabanhaw sa kinabuhi, kadtong nagbuhat sa daotang mga butang ngadto sa pagkabanhaw sa pagkahinukman.”​—Juan 5:28, 29.

Mga siglo una niana, ang manalagna sa Diyos nga si Isaias mitagna: “Siya [Jehova nga Diyos] sa pagkatinuod molamoy sa kamatayon sa walay kataposan, ug ang Soberanong Ginoo nga si Jehova sa pagkatinuod magapahid sa mga luha gikan sa tanang nawong.” (Isaias 25:8) Sa makausa pa, sa Pinadayag 21:4, ang Bibliya nagpresentar niining kahibulongang paglaom: “[Ang Diyos] magapahid sa tanang luha gikan sa ilang mga mata, ug ang kamatayon wala na, wala nay pagminatay ni paghilak ni kasakit. Ang unang mga butang nangagi na.” Kay napalig-on niining paglaoma sa Bibliya alang niadtong nangatulog sa kamatayon, ang mga namatyan dili kinahanglang “managsubo ingon sa uban nga walay paglaom.”​—1 Tesalonica 4:13.

Sulayig handuraw kon unsay gitagana sa Diyos alang sa katawhan, ingon sa gipadayag sa Bibliya. Ang umaabot nga “dakong kasakitan” nagkahulogan sa kalaglagan alang sa presenteng daotang sistema sa mga butang. (Pinadayag 7:14) Kadtong nagasunod sa bakak nga relihiyon malaglag. Wala na ang hakog politikal ug komersiyal nga mga elemento nga nakaamot sa paglungtad sa gutom ug gubat. Dayon itambog ni Jesu-Kristo sa bung-aw si Satanas nga Yawa, kinsa nakapahinabo sa daghan kaayong kamatayon sa tawo. Unya sugdan ni Kristo ang iyang Milenyal nga Pagmando, nga sa maong panahon iyang ipadapat ang bili sa iyang halad lukat alang sa katawhan. Ang mga patay mamalik pinaagi sa gilaomang pagkabanhaw, ug ang lamdag gikan sa Pulong sa Diyos modan-ag pag-ayo nga ang matuotuohong mga panglantaw mahitungod sa kamatayon, nga kaaway sa katawhan, dili na maglungtad. Ang tanang buhi unya makabaton ug kahigayonan sa pagkat-on sa mga dalan sa Diyos ug sa pagpahiuyon ngadto sa iyang matarong nga mga sukdanan.​—Proverbio 4:18; Buhat 24:15; Hebreohanon 2:14, 15; Pinadayag 18:4-8; 19:19-21; 20:1-3.

‘Sunod, ang kataposan,’ miingon si Pablo, ‘inigtugyan ni Kristo Jesus sa gingharian ngadto sa iyang Diyos ug Amahan. Kay siya magamando ingong hari hangtod nga ang tanang kaaway ikabutang na sa Diyos ilalom sa iyang mga tiil. Ingong ang kataposang kaaway, ang kamatayon pagalaglagon.’ (1 Corinto 15:24-26) Ang tanang balatian gumikan sa sala ni Adan mawala na. Mahitabo ang kataposang pagsulay, ug ang mga mahigugmaon sa Diyos makalabang niana sa pagkamatinumanon. (Pinadayag 20:4-10) Kay napasig-uli sa pagkahingpit, kining masinundanon nga mga tawo mabuhi, dili lamang sa tulo ka kawhaan ka tuig ug napulo o bisan lima ka kawhaan ug napulo, apan sa walay kataposan. Pagkadako nga gasa gikan sa Diyos pinaagi sa iyang pinalanggang Anak!​—Roma 6:23.

Busa, unsa kataas ikaw mabuhi unya? Ang gitas-on sa imong kinabuhi mahimong molungtad sa walay kataposan. Kay nagkinabuhi ka na sa “panahon sa kataposan” niining kalibotana, ikaw mahimong dili na gayod mamatay. (Daniel 12:4; Juan 11:25, 26; 17:3) Kon imong buhaton ang balaang kabubut-on, tingali makalabang kang buhi ngadto sa gisaad sa Diyos nga bag-ong kalibotan.​—2 Pedro 3:13.

Hinuon, kon ikaw edaran na kinahanglang sa realistiko imong isipon ang posibilidad nga mamatay. Sa walay duhaduha, ang paglaom sa pagkabanhaw nagdalag kalipay. Apan tingali gusto nimong mahibalo kon sa unsang paagi hikayon ni Jehova ang pamilyahanong kinabuhi sa maong bag-ong sistema sa mga butang. Ayaw tugoti ang maong mga butang nga magpabalaka kanimo, kay si Jehova magatino sa dumalayong kalipay niadtong matinumanon kaniya sa walay kataposan.

Samtang kining malisod nga “kataposang mga adlaw” sa daotang sistema ni Satanas nagauswag ngadto sa konklusyon niana, ayaw tugoti ang kahadlok sa kamatayon nga mohikaw kanimo sa pribilehiyo sa pag-alagad kang Jehova karon. (2 Timoteo 3:1) Kon mawad-an kag hinigugma sa kamatayon, lipaya ang imong kaugalingon nga ang gahom sa kamatayon temporaryo lamang. (Pinadayag 20:13, 14) Salig sa paglaom sa pagkabanhaw. Unya, kon ugaling makasulod ka ngadto sa bag-ong kalibotan pinaagi sa pagkalabang-buhi sa dakong kasakitan o pinaagi sa usa ka pagkabanhaw, magmasaligon sa dinasig nga pasalig nga ang kamatayon, ang kataposang kaaway, pagalaglagon.​—Pinadayag 7:9, 14.

[Hulagway sa panid 5]

Ang maayong Kristohanong mga kauban makahimo sa paglig-on sa espirituwal sa namatyan

[Hulagway sa panid 7]

Ang pagkapuliki sa pagtabang sa uban makapamenos sa kasub-anan nga gipahinabo sa kamatayon sa hinigugma