Nakakaplag Akog Bahandi nga Adunay Labawng Bili
SUMALA SA GIASOY NI FLORENCE WIDDOWSON
Sa dihang nagkilomkilom na, kami mihukom sa pagkampo duol sa usa ka lanaw. Dili angayng lugar nga kampohan sa duha ka babaye, apan kami naghunahuna nga luwas kadto sulod sa usa ka gabii. Samtang puliki ako sa pagtaod sa tolda, si Marjorie nag-andam sa among panihapon.
MAO pay pagkatapos nakog dukdok sa kataposang usok sa tolda sa dihang nakita nako nga may naglihok duol sa itom nga tuod sa kahoy. “Nakita ba nimo kanang tuod nga milihok?” sangpit ko kang Marjorie.
“Wala,” siya mitubag, nga medyo nahibulong.
“Aw, kana milihok gayod,” ako mipatugbaw. “Ihatag kanako kanang kaldero!”
Nagdala niana, dala ang atsa diha sa akong abaga, mipadulong ako ngadto sa lanaw. Sa dihang tungod na ako sa tuod, usa ka lalaki migula gikan sa likod niana!
“Mainom ba ang tubig sa lanaw?” nagkayuring ako.
“Dili,” misingka siya, “apan kon buot ka ug mainom nga tubig, kuhaan ti ka.”
Gibalibaran dayon nako ang iyang tanyag, ug sa akong dakong kalipay, dihadiha mitalikod siya ug milakaw. Nga nagkurog, mibalik dayon ko ug gitug-anan si Marjorie sa nahitabo. Gidalidali namog tangtang ang tolda, nanghipos, ug mibiya. Sa ulahi kami gisultihan nga ang tawo bag-o pa lang nakagawas sa bilanggoan.
Bisan kon ang mga tigsuhid sagad magkampo didto sa mga dapit nga may bulawan sa Australia niadtong 1937, kami laing matang nga tigsuhid. Kami nangita sa mga tawo nga bililhon sa Diyos.
Ang Kasaysayan sa Akong Pamilya
Usa ka gatos ka tuig kanhi, ang akong amahan mao ang mananalsal ug puthaw sa gamayng balangay sa Porepunkah sa estado sa Victoria. Natawo ako didto sa 1895, ug ako nagdako kauban sa upat ka igsoong lalaki duol sa Subang Ovens, sa tiilan sa Bukid Buffalo. Ang akong mga ginikanan regular nga mga tumatambong sa Union Church, ug ako mitambong sa Sunday school, diin ang akong amahan maoy tigdumala.
Sa 1909, si Mama giatake sa sakit sa kasingkasing panahon sa usa ka makusog nga bagyo ug namatay diha sa mga bukton sa akong amahan. Unya, sayo sa 1914, usa sa akong mga igsoong lalaki mibiya sa balay, ug pipila ka oras sa ulahi gidala siyag balik kanamo—patay. Siya naghikog. Ang among kaguol misamot tungod sa pagtulon-an sa simbahan nga ang impiyerno nagpaabot kaniya, sanglit ang paghikog maoy sala nga dili mapasaylo.
Ulahi nianang tuiga mibuto ang Gubat sa Kalibotan I, ug duha sa akong mga igsoong lalaki nagpalista alang sa pag-alagad sa laing nasod. Ang makalilisang nga balita sa pag-ulag dugo ug pag-antos nagtukmod kanamong unom ka batan-ong babaye, kauban sa among amahan, sa pagsugod pagtuon sa basahon sa Bibliya ni Juan.
Pagkaplag ug Tinuod nga Bahandi
Si Ellen Hudson may kopya sa librong The Time Is at Hand, nga sinulat ni Charles Taze Russell. Ang iyang kadasig alang niana nakaimpluwensiya sa uban kanamo sa grupo. Sa dihang siya nakamatikod nga ang libro usa lamang sa serye sa unom ka tomo nga nag-ulohang Studies in the Scriptures, nagpadala siyag sulat sa International Bible Students Association sa Melbourne ug mihangyo alang sa nahibiling serye. Ang among grupo nagkauyon sa paggamit sa unang tomo, The Divine Plan of the Ages, sa among senemanang pagtuon.
Handurawa ang kalipay nako ug ni Papa sa pagkaplag nga walay kalayonhong impiyerno. Ang kahadlok nga ang akong igsoong lalaki nabilanggo sa kalayonhong impiyerno nawagtang. Nakat-onan namo ang kamatuoran nga ang mga patay walay hunahuna, sama sa natulog, ug wala magkinabuhi sa laing dapit nga nag-antos sa pagsakit. (Ecclesiastes 9:5, 10; Juan 11:11-14) Ang pipila sa among grupo sa pagtuon sa Bibliya mihukom sa pag-adto sa among mga silingan sa pagsangyaw sa mga kamatuoran nga among nakat-onan. Lakwon namo ang duol nga mga balay, apan migamit kamig mga bisikleta ug tartanilya aron sa pag-abot niadtong anaa sa kabanikanhan.
Una nakong nasulayan ang balay-balay nga pagsangyaw sa Armistice Day, Nobyembre 11, 1918. Tulo kami gikan sa among grupo sa pagtuon nga mibiyahe ug 80 kilometros padulong sa lungsod sa Wangaratta aron sa pag-apod-apod sa tract nga Peoples Pulpit. Mga tuig sa ulahi, samtang diha sa pagsangyawng asaynment sa usa sa mga dapit nga hilit, nasinati nako ang kasinatiang nahisgotan sa sinugdanan.
Sa 1919, mitambong ako sa kombensiyon sa mga Estudyante sa Bibliya sa Melbourne. Didto, sa Abril 22, 1919, gisimbolohan nako ang akong pahinungod kang Jehova pinaagi sa bawtismo sa tubig. Ang espirituwal nga kombira nagpalalom sa akong apresasyon alang sa espirituwal nga bahandi sa Gingharian sa mga langit ug sa yutan-ong organisasyon ni Jehova.—Mateo 13:44.
Wala ako mouli sa balay human sa kombensiyon apan midawat sa imbitasyon nga mokuyog kang Jane Nicholson, usa ka bug-os-panahong magsasangyaw, sulod sa usa ka bulang pagsangyaw. Ang among asaynment mao ang mga balangay sa umahan ug bakahan ubay sa King River. Pipila lang ka tuig ang milabay, kining bukiron nga dapit maoy gikuhaan sa pelikulang The Man From Snowy River.
Sa 1921 nadawat namo ang maayong tabang sa pagtuon sa Bibliya nga The Harp of God. Sa dihang si Papa misugod paggamit niana ingong librong tun-anan sa iyang klase sa Sunday-school, daghang ginikanan misupak ug mihangyo kaniya nga moluwat. Siya mihimo dayon niana. Sa ulahi nadawat namo ang pulyeto nga Hell, uban sa makapainteres nga mga pangutana sa hapin, “Unsa Kana? Kinsay Atua Didto? Makagula ba Sila?” Nadani kaayo si Papa sa tin-aw nga pamatuod sa Bibliya nga gipresentar bahin sa ulohan nga dihadiha misugod siya pag-apod-apod ug mga kopya gikan sa balay ngadto sa balay. Nakapahimutang siyag ginatos niana sa among balangay ug sa nait nga mga banika.
Mga Biyaheng Pagsangyaw Uban sa Akong Amahan
Ngadtongadto, si Papa mipalit ug kotse aron sa pag-abot sa katawhan sa laing dapit uban sa mensahe sa Gingharian. Ingong mananalsal, mas naanad siya sa mga kabayo, busa ako ang nahimong drayber sa kotse. Sa sinugdanan, magpalabay kami sa gabii sa mga hotel. Sa wala madugay kini gastoso ra kaayo, ug kami misugod sa pagkampo.
Giayom-ayom ni Papa ang atubangang lingkoranan sa kotse aron kini malapad ug busa ako mahimong matulog sa kotse. Naghimo kamig gamay nga tolda para sa higdaanan ni Papa. Human sa pagkampo sa daghang semana, mopauli kami sa Porepunkah, diin si Papa moabli na usab sa iyang salsalanan. Wala gayod kami mohunong sa pagkahibulong nga kanunayng may daghang magpasalsal nga mobayad sa ilang bayranan aron may magasto kami sa among sunod nga biyaheng pagsangyaw.
Daghang maayog kabubut-ong tawo ang miangay sa among mga pagduaw ug ngadtongadto midawat ug mga pagtuon sa Bibliya sa balay. Karon aduna nay pito ka kongregasyon nga adunay kaugalingong Kingdom Hall sa dapit nga sa sinugdan gialagaran sa among gamayng grupo gikan sa Porepunkah. Sa pagkatinuod, kinsay makatamay sa “ang adlaw sa gagmayng mga butang”?—Zacarias 4:10.
Sa 1931, si Papa ug ako mibiyahe sakayg kotse ug duolan sa 300 kilometros latas sa daot nga kadalanan aron sa pagtambong sa espesyal nga tigom, diin among gisagop ang among bag-ong ngalan, “Mga Saksi ni Jehova.” Kaming duha nalipay niining talagsaon, Kasulatanhong ngalan. (Isaias 43:10-12) Kana mas tin-awng nagpaila kanamo kay sa dili kaayo tin-aw nga ngalang “Internasyonal nga mga Estudyante sa Bibliya,” nga niana kami nailhan hangtod niadtong panahona.
Usa ka adlaw samtang nagsangyaw sa lungsod sa Bethanga, nahibalag nako ang lokal nga ministro gikan sa Church of England. Nasuko siya ug gisubay ang among daghang napahimutang nga libro, nga nagmandong ang mga tawo maghatag sa ilang mga libro kaniya. Human niana mihimo siyag publikong pagsunog sa mga libro diha sa sentro sa lungsod. Apan ang iyang salawayong buhat misumbalik.
Human nako mapahibalo ang sangang buhatan sa Sosyedad kon unsay nahitabo, usa ka bukas nga sulat ang gipatik nga nagsaway sa gihimo sa klerigo. Dugang pa, ang mga kahikayan gihimo alang sa daghang Saksi sa pag-apod-apod sa sulat sa tibuok distrito. Sa dihang si Papa ug ako miduaw pag-usab sa lungsod, nakapahimutang kamig mas daghang libro kay sa miagi. Ang mga tawo sa lungsod maukit-ukiton mahitungod sa kon unsay unod sa “gidiling” literatura!
Ang unang tawo nga misagop sa kamatuoran sa Bibliya sa amihan-sidlakang Victoria ingong resulta sa among pagsangyaw mao si Milton Gibb. Taliwala sa among mga pagduaw, gitun-an niya pag-ayo ang mga publikasyon sa Sosyedad nga among gibilin kaniya. Sa usa sa among mga pagsubli-duaw, iya kaming gisorpresa pinaagi sa pag-ingon: “Ako karon usa na sa inyong mga tinun-an.”
Bisan pag nalipay sa iyang desisyon, ako misaysay: “Dili, Milton. Dili ka mahimong usa sa akong mga tinun-an.”
“Nan, kon mao, ako usa sa mga tinun-an ni Rutherford [ang presidente sa Watch Tower Society niadtong panahona].”
Sa makausa pa akong gipasabot: “Dili, dili usab usa sa mga tinun-an ni Rutherford, apan gipanghinaot ko nga usa sa mga tinun-an ni Kristo.”
Si Milton Gibb napamatud-ang usa sa daghang bililhong bahandi alang kang kinsa ako migugol ug daghang tuig sa pagsuhid. Siya ug ang iyang duha ka anak maoy Kristohanong mga ansiano, ug ang ubang membro sa iyang pamilya aktibo sa kongregasyon.
Pag-atubang sa Lainlaing mga Pagsulay
Bisan pa sa pagdili sa buluhaton sa mga Saksi ni Jehova sa Australia sa Enero 1941, kami mipadayon sa pagsangyaw, nga naggamit lamang sa Bibliya. Unya ang akong pagpayunir, o bug-os-panahong ministeryo, nabalda sa dihang gipapauli ako aron sa pag-atiman sa nagmasakiton nakong amahan. Sa ulahi, nagkasakit usab ako ug nagkinahanglan ug seryosong operasyon. Gidangtag panahon ang akong paghibalik sa maayong panglawas, apan akong nasinati ang kamatuoran sa saad sa Diyos: “Dili ko gayod ikaw pagabiyaan ni pagatalikdan.” (Hebreohanon 13:5) Usa ka Kristohanong igsoong babaye nagpalig-on kanako, nga nag-ingon: “Hinumdomi, Flo, ikaw wala gayod mag-inusara. Ug ikaw ug si Jehova kanunayng modaog.”
Unya nahitabo ang kataposang pagkasakit sa akong minahal nga amahan sulod sa 13 ka semana. Sa Hulyo 26, 1946, siya namatay. Napahimuslan niya ang tugob nga kinabuhi, ug ang iyaha maoy langitnong paglaom. (Filipos 3:14) Busa sa edad nga 51, ako nag-inusara, nga nakauban si Papa sa kadaghanan bahin sa akong sayong katuigan. Unya nahibalag nako ang akong umaabot nga bana. Kami naminyo sa 1947 ug duyog nga nagpayunir. Apan kining malipayong yugto wala magdugay, kay naestrok siya sa 1953 ug nahimong baldado.
Ang sinultihan sa akong bana nadaot, ug nahimong halos imposible ang pagpakigsulti kaniya. Kadto maoy labing malisod nga bahin sa pag-atiman kaniya. Ang kahago sa hunahuna sa paningkamot nga masabtan kon unsay iyang gipanglimbasogang isulti dako gayod kaayo. Bisan kon kami nagpuyo sa hilit nga dapit diin walay duol nga kongregasyon, si Jehova wala magbiya kanamo panahon niadtong masulayong katuigan. Padayon akong nunot-sa-panahon sa tanang kinaulahiang impormasyon mahitungod sa organisasyon, maingon man sa padayong suplay sa espirituwal nga pagkaon sa mga magasing Bantayanang Torre ug Pagmata! Sa Disyembre 29, 1957, ang akong minahal nga bana namatay.
Ministeryo sa Adelaide
Sa makausa pa nag-inusara ako. Unsay akong buhaton? Dawaton ba ako pag-usab ingong bug-os-panahong ministro human sa paghunong ug duolan sa lima ka tuig? Ako nadawat, busa gibaligya nako ang akong balay ug nagsugod pag-usab sa payunir nga buluhaton sa Adelaide, ang kaulohang siyudad sa Habagatang Australia. Ang mga payunir gikinahanglan didto niadtong panahona, ug ako giasayn sa Kongregasyon sa Prospect.
Sanglit ako mahadlok nga magdrayb sa trapiko sa siyudad, gibaligya nako ang akong kotse ug misugod sa paggamit pag-usab ug bisikleta. Gigamit nako kana hangtod nag-edad akog 86 anyos, nga nailhan sa dapit ingong “ang gamayng babaye sa asul nga bisikleta.” Sa paglabay sa panahon nahimo akong mas nerbiyosa sa trapiko; ang atubangang ligid sa akong bisikleta daw kanunayng mokurog. Ang hitabo nga sa kataposan nakapahunong kanako sa pagbisikleta nahitabo usa ka hapon sa dihang nahulog ako sa alad. ‘Kini ang kataposang higayon,’ matud ko sa akong kaugalingon, ug busa mibalik na usab ako sa paglakaw.
Pipila ka tuig kanhi, samtang nagtambong sa distritong kombensiyon, ang akong mga bitiis misugod pagkaluya, ug human niana duha ka beses ako gioperahan sa mga lutahan sa akong bat-ang. Maayo ra ako human sa operasyon hangtod nga ang usa ka dakong iro mihasmag kanako. Kini nagkinahanglag dugang pagtambal, ug sukad niadto nagkinahanglan na akog abag aron makalakawlakaw. Ang akong hunahuna aktibo pa kaayo. Kini sama sa giingon sa akong higala: “Daw ang imong nagakatigulang nga lawas dili makaapas sa imong batan-ong hunahuna.”
Latas sa katuigan, nakita nako ang mga kongregasyon sa Adelaide nga mitubo, mipalapad, ug nagbahin. Unya, sa 1983, sa dihang ako nag-edad ug 88, mibiya ako sa Adelaide aron sa pagpuyo uban sa pamilya sa Kyabram sa estado sa Victoria, diin ako nakagugol ug napulo ka malipayong tuig. Makahimo gihapon ako sa paggula sa pagsangyaw sa kanataran; ang mga higala sa kongregasyon mopasakay kanako sa ilang kotse aron sa pagduaw niadtong kinsa sa regular nagkuhag mga magasin kanako. Kining mga tawhana malulutong moduol sa kotse aron ako makapakigsulti kanila.
Sa pagpalandong sa akong kapin sa 98 ka tuig nga pagkinabuhi, malipay ako sa paghandom sa daghang maunongon ug matinumanon kinsa nagdayeg kang Jehova duyog kanako, ilabina ang akong buotang papa. Morag ako na lang ang buhi sa tanang matinumanong kauban nako sa payunir nga ministeryo. Apan pagkadakong kalipay ang nagpaabot kanako sa dihang mahiusa niadtong nakig-ambit sa ganti sa kinabuhi sa langitnong Gingharian sa Diyos, tinuod nga usa ka bahandi nga labaw ug bili!
[Hulagway sa panid 28]
Nabawtismohan ako sa Abril 22, 1919
[Hulagway sa panid 31]
Malipayon gihapon sa pag-alagad ni Jehova samtang ako nagkaduol na sa panuigong 100