Mas Maayong Kalibotan—Usa Lamang ka Damgo?
KON sumusunod ka sa Mazdaismo ingon nga giwali sa Iranian nga propetang si Zoroaster, magpaabot ka unta sa adlaw nga ang yuta mapasig-uli sa orihinal nga katahom niini. Kon nakapuyo ka sa karaang Gresya, tingali gipangandoy nimong makaabot sa mithianon nga Bulahang Kapuloan o makakita nga mahibalik ang Bulawanong Panahon nga gibatbat sa magbabalak nga si Hesiod sa ikawalong siglo W.K.P. Ang usa ka Guaraní Indian sa Amerika del Sur tingali nangita pa sa Yuta nga Walay Tumang-kadaotan. Kay nagkinabuhi sa atong panahon, tingali naglaom ka nga ang kalibotan moarang-arang tungod sa usa ka politikanhong ideolohiya o ingong resulta sa modernong-adlaw nga pagkaamgo sa ekolohiya.
Ang Bulawanong Panahon, Bulahang Kapuloan, Yuta nga Walay Tumang-kadaotan—kini sila naapil sa daghang ngalan nga gigamit sa pagbatbat sa samang pangandoy, sa paglaom alang sa mas maayong kalibotan.
Kining kalibotana, ang atong kalibotan, sa tinuoray dili usa ka mithianong dapit. Nagkasamot ka pintas nga krimen, walay-ingong mapintasong mga gubat nga pagpinatyanay sa managsoon, pagpuo sa tibuok rasa, kadili-matinagdanon sa mga pag-antos sa uban, kakabos ug gutom, kawalay-trabaho ug kawalay-panaghiusa, mga suliran sa ekolohiya, dili-katambalan nga mga sakit nga mitakboy sa minilyon—ang listahan sa mga kaalaotan karon maorag walay kataposan. Sa pagpalandong bahin sa mga gubat nga karon ginabugno, usa ka Italyanong magsusulat miingon: “Ang pangutana nga kinaiyanhong motungha maoy kon ang kamabatokon dili ba kaha ang labing kusganong pagbati sa atong panahon.” Kon tagdon ang situwasyon, sa imong hunahuna pagkamatinud-anon ba ang pagpangandoy ug butang nga lahi, butang nga mas maayo? O ang maong pangandoy ba maoy paghandom sa Utopia, usa ka damgo nga dili gayod matuman? Nagkinabuhi na ba kita sa kinamaayohan sa tanang posible nga mga kalibotan?
Dili kini bag-ong mga kabalaka. Sulod sa kasiglohan ang mga tawo nangandoy sa kalibotan diin magahari ang panag-uyon, hustisya, kauswagan, ug gugma. Sa lakat sa panahon, ang ubay-ubayng pilosopo nagpahayag sa tin-aw sa ilang mga ideya mahitungod sa mithianong mga Estado, sa mas maayong mga kalibotan. Apan, ikasubo, wala gayod nila ikasaysay kon sa unsang paagi kini sila malamposong palihokon.
Kining kasiglohan-ug-edad nga listahan sa mga damgo, mga Utopia, ug tawhanong mga tingusbawan alang sa mas maayong katilingban may ginatudlo ba kanato?
[Hulagway sa panid 3]
Kini ba ang kinamaayohan sa tanang posible nga mga kalibotan?