Nahinumdom Ka Ba?

Nalingaw ka ba sa pagbasa sa bag-ong mga isyu sa Ang Bantayanang Torre? Kon mao, maikag ka sa paghinumdom sa mosunod:

▫ Nganong ang Israelinhong mga espiya mipili sa pag-estar sa balay ni Rahab nga pampam?

Ang mga espiya nga Israelinhon nagkinabuhi sumala sa Kasugoan sa Diyos, busa sila miestar sa balay ni Rahab dili alang sa imoral nga katuyoan. Tingali sila nangatarongan nga ang ilang presensiya diha sa usa ka balay sa pampam dili kaayo katahapan diha sa siyudad. Nga ang iyang balay gitukod diha sa pader sa siyudad magpasayon sa pag-eskapo. Apan labaw sa tanan, si Jehova nagtultol kanila ngadto sa usa ka makasasala kansang kasingkasing naapektohan sa maayo pinaagi sa mga taho sa mga pakiglabot sa Diyos sa mga Israelinhon mao nga siya naghinulsol ug nagbag-o sa iyang mga dalan.​—12/15, mga panid 24-5.

▫ Sa unsang paagi ang kasuko makaapektar sa atong panglawas?

Ang mga pagtuon nagpakita nga ang kasuko mopagawas ug daghang hormone sa kalisod. Ang kanunayng pagsilaob sa kasuko mopahinabog pagkadili-timbang sa makaayo ug makadaot nga mga matang sa kolesterol, nga nagpameligro kanato sa sakit sa kasingkasing.​—12/15, panid 32.

▫ Unsang mga sugyot ang motabang kanato aron mapauswag ang atong pagpanagtag sa mga magasing Bantayanang Torre ug Pagmata!?

Magmahunahunaon sa Bantayanang Torre ug Pagmata!; himoang yano ang presentasyon; magmapailin-ilinon pinaagi sa pag-andam ug pila ka mugbong mga presentasyon; pagbutang ug personal nga tumong.​—1/1, mga panid 24-5.

▫ Nganong si Moises maoy usa ka maayong teokratikanhong panig-ingnan nga atong sundon?

Si Moises nangita sa pagtultol ni Jehova sa mga butang. Siya walay personal nga mga ambisyon apan mahunahunaon sa kahimayaan ni Jehova. Siya adunay lig-ong pagtuo, ug siya wala gayod malimot nga si Jehova mao ang tinuod nga Magmamando sa nasod sa Israel.​—1/15, panid 11.

▫ Unsa ang pipila ka paagi diin nagmadaogon ang diyosnong pagtulon-an?

Ang diyosnong pagtulon-an nagmadaogon pinaagi sa pagpasa ngadto sa katawhan ni Jehova ug mauswagong pagsabot sa kamatuoran. Kini nagdala sa katawhan ngadto sa espirituwal nga kahayag, ug kini nagpakita sa mga maaghop kon unsaon pagsimba ang Diyos “uban sa espiritu ug kamatuoran.” (Juan 4:24) Ang diyosnong pagtulon-an nagmadaogon usab ibabaw sa mga pagsulay ug sa daotang kalibotan.​—2/1, mga panid 10-12.

▫ Unsa ang yawi sa malamposong pagtambag?

Ang yawi mao ang tukmang pagtahod sa laing tawo ug sa iyang katungod nga tratahon sa dungganong paagi. Busa, ang Kristohanong magtatambag kinahanglang maluluton ug malig-on apan kinahanglang hatagag dignidad ang ginatambagan.​—2/1, panid 28.

▫ Sa unsang paagi nga ang Iglesya Romana Katolika nakadangat sa pagdawat sa Pagsaka ni Maria sa Langit ingong doktrina?

Sa unang mga siglo human nga namatay si Jesus, ang ideya sa Pagsaka ni Maria sa langit halayo kaayo sa panghunahuna sa mga Kristohanon. Apan, human nahimong opisyal nga doktrina sa iglesya ang pagtulon-an sa Trinidad, si Maria gihatagan ug labi pa ka hinungdanong papel. Ang teoriya sa Pagsaka ni Maria sa Langit wala dawata ingong doktrina hangtod sa Nobyembre 1, 1950, sa dihang si Papa Pio XII mipahayag: “Gibatbat namo kana ingong usa ka pagtulon-an nga gipadayag sa Diyos.”​—Munificentissimus Deus.​—2/15, mga panid 26-7.

▫ Sa Jeremias kapitulo 24, unsay gihawasan sa duha ka bukag sa mga igos, ang maayong mga igos ug kadtong daot nga mga igos?

Ang maayong mga igos naghawas sa mga Hudiyo nga sa sinugdan nabihag sa Babilonya, nga gikan niana ang usa ka nahibilin namalik sa Juda. Ang daot nga mga igos nagbarog kang Haring Zedekias ug niadtong uban kaniya nga mialsa batok kang Haring Nabucodonosor bisan tuod nanumpa sa ngalan sa Diyos. Sa susama, sa modernong panahon makaplagan nato ang nahibilin sa espirituwal nga Israel, nga namungag maayong mga bunga sa ilang mga kinabuhi, nga lahi sa klero sa Kakristiyanohan, nga namungag daot nga mga bunga.​—3/1, mga panid 14-16.

▫ Kinsa ang Kuwartodesimanos, ug nganong sila makapaikag sa mga Kristohanon karong adlawa?

Human sa panahon sa mga apostoles, dihay pipila nga nagsaulog sa Panihapon sa Ginoo sa Nisan 14 matag tuig, nga nagsunod sa sumbanan sa mga apostol. Sila nailhan nga “mga Ikakatorse,” o Kuwartodesimanos. Kini makapaikag karong adlawa, tungod kay kini nagpakita nga bisan human sa kamatayon sa mga apostoles, dihay pipila nga misunod sa hustong dalan sa paghandom sa kamatayon ni Jesus kas-a sa usa ka tuig sa Nisan 14.​—3/15, mga panid 4-5.

▫ Kinsa si William Whiston?

Siya maoy usa ka mahait ug salabotan nga ika-18ng siglong eskolar sa Inglaterra, usa ka suod nga kauban ni Sir Isaac Newton. Gihubad ni Whiston ang Kristohanon Gregong Kasulatan, nga dayag nga misupak sa doktrina sa Trinidad, ug usa ka magtutudlo sa astronomiya ug matematika. Apan si Whiston lagmit nga nahinumdoman pag-ayo tungod sa paghubad niya ngadto sa Ingles sa mga sinulat sa Hudiyong manalaysay nga si Flavius Josephus.​—3/15, mga panid 26-8.

▫ Sa unsang paagi ang tawo gibuhat sa dagway sa Diyos? (Genesis 1:27)

Ang tawo gibuhat nga adunay katakos sa pagpakita sa talagsaong mga hiyas sa Diyos sa gugma, hustisya, kaalam, ug gahom​—ingon man sa ubang mga hiyas.​—4/1, panid 25.