Tambong sa “Diyosnong Kahadlok” Distritong Kombensiyon!
Nakahimo ka na bag mga plano sa pagtambong sa 1994 “Diyosnong Kahadlok” Distritong Kombensiyon sa mga Saksi ni Jehova? Segurado, makabenepisyo ka pinaagi sa pagtambong sa tanang tulo ka adlaw! Tungod kay adunay 42 ka kombensiyon nga naeskedyul sa Pilipinas lamang, lagmit nga adunay usa ka kombensiyon nga himoon duol sa dapit nga imong gipuy-an.
Ang usa ka matang sa kahadlok makadaot sa kaisog ug makagun-ob sa paglaom; hinuon, ang pasukaranang pakigpulong sa buntag sa Biyernes magbatbat sa diyosnong kahadlok ug maghubit sa daghang benepisyo niini. Sa pagkatinuod, ang tibuok nga programa sa kombensiyon magpasiugda sa maong mga benepisyo.
Sa hapon sa Biyernes imong mabatian kon sa unsang paagi ang diyosnong kahadlok makapalig-on sa kaminyoon ug sa pamilyahanong kinabuhi, ingon man kon sa unsang paagi makatabang kini sa mga batan-on sa pagpabiling malig-on sa ilang pagkamaunongon ngadto sa Diyos. Ang sesyon sa hapon taposon sa makapalipay nga pakigpulong nga “Kahupayan Alang sa Nagbangotan.” Pabilhan mo ang praktikal nga impormasyon nga itagana panahon sa maong pakigpulong sa pagtabang niadtong namatyan ug mga minahal.
Ang programa sa Sabado magpakita kon sa unsang paagi ang diyosnong kahadlok makapalig-on sa atong pagsunod sa pagtultol ni Jehova may kalabotan sa kongregasyon ug sa atong ministeryo. Sa pakigpulong nga “Basaha ang Pulong sa Diyos, ang Balaang Bibliya, sa Adlaw-adlaw,” ang mga delegado makadawat ug praktikal nga mga sugyot sa pagbasa ug pagtuon sa Bibliya. Ang programa sa Sabado taposon sa pakigpulong bahin sa makapapukaw-interes nga temang “Haduol na ang Makalilisang nga Adlaw ni Jehova.”
Usa ka bahin sa programa sa Dominggo mao ang pakigpulong nga “Aduna Unyay Pagkabanhaw sa mga Matarong.” Sa sunod nga diskurso, “Naluwas nga Buhi Latas sa Dakong Kasakitan,” itagana ang katin-awan sa kahibulongang saad ni Jesus bahin niadtong dili na gayod mamatay.—Juan 11:26.
Ang sesyon sa buntag sa Dominggo taposon sa makapatandog-sa-hunahunang 40-minutos nga drama nga nag-ulohang Mga Pagpili nga Inyong Atubangon. Ang tumatan-aw mapahinumdoman sa adlaw ni Josue ug makakita nga ihulagway ang iyang malig-ong hukom sa pag-alagad kang Jehova. Ang pagsulay sa kalayo sa mga adlaw ni Elias ipasundayag usab, ug mabatonan ang mga pagtulon-an gikan niining duha ka hitabo nga motabang sa mga delegado sa pagpasundayag ug diyosnong kahadlok karong adlawa. Sa hapon, ang pakigpulong publiko, “Kon Nganong Kahadlokan ang Matuod nga Diyos Karon,” mao unyay usa ka dakong punto sa kombensiyon.
Himoa na karon ang mga plano sa pagtambong. Aron makaplagan ang dapit nga kinaduolan sa inyong balay, pakigkontak sa lokal nga Kingdom Hall sa mga Saksi ni Jehova o pagsulat sa mga magpapatik niining magasina. Ang Disyembre 8 nga isyu sa Pagmata! maglista usab sa mga direksiyon sa tanang dapit sa kombensiyon sa Pilipinas.
[Credit Line]
T. Rosenthal/SUPERSTOCK